ຂ່າວຫຼ້າສຸດ

ຮ່ວມກັນຮັກສາຄວາມສະຫງົບຮຽບຮ້ອຍຕາມຊາຍແດນ ນະຄອນຫຼວງວຽງຈັນ-ໜອງຄາຍ

199 27 ສ.ຫ. 2018 ຂ່າວໜ້າ​ໜຶ່ງ
ຮ່ວມກັນຮັກສາຄວາມສະຫງົບຮຽບຮ້ອຍຕາມຊາຍແດນ ນະຄອນຫຼວງວຽງຈັນ-ໜອງຄາຍ

    ກອງ​ປະຊຸມ​ຄະນະ​ກຳມະການ​ຮັກສາ​ຄວາມ​ສະຫງົບ​ຮຽບ​ຮ້ອຍ​ຕາມ​ຊາຍ​ແດນ​ລາວ-ໄທ ນະຄອນຫຼວງ​ວຽງ​ຈັນ-ແຂວງ​ໜອງ​ຄາຍ ຄັ້ງ​ທີ 11 ຈັດ​ຂຶ້ນ​ວັນ​ທີ 25 ສິງຫາ 2018 ທີ່​ແຂວງ​ໜອງ​ຄາຍ ປະເທດ​ໄທ ຝ່າຍ​ລາວ ນຳ​ໂດຍ​ທ່ານ ສິນ​ລະ​ວົງ ຄຸດ​ໄພທູນ ເຈົ້າ​ຂອງ​ນະຄອນຫຼວງ​ວຽງ​ຈັນ ປະທານ​ຄະນະ​ກຳມະການ​ຮັກສາ​ຄວາມ​ສະຫງົບ​ຮຽບ​ຮ້ອຍ​ຕາມ​ຊາຍ​ແດນ​ນະຄອນຫຼວງ​ວຽງ​ຈັນ (ນວ) ແລະ ຝ່າຍ​ໄທ​ນຳ​ໂດຍ​ທ່ານ ຣົນ​ນະ​ໄຊ ຈິດ​ວິເສດ ເຈົ້າແຂວງ​ໜອງ​ຄາຍ ປະທານ​ຄະນະ​ກຳມະການ​ຮ່ວມ​ມື​ຮັກສາ​ຄວາມ​ສະຫງົບ​ຮຽບ​ຮ້ອຍ​ຕາມ​ຊາຍ​ແດນ​ແຂວງ​ໜອງ​ຄາຍ.

    ກອງ​ປະຊຸມ​ໄດ້​ທົບ​ທວນ ແລະ ປະ​ເມີນ​ຜົນ​ການຈັດຕັ້ງ​ປະຕິບັດ​ບົດ​ບັນທຶກ​ກອງ​ປະຊຸມ​ຄັ້ງ​ທີ 10 ເຊິ່ງ​ທັງ​ສອງ​ຝ່າຍ​ໄດ້​ມີ​ຄວາມ​ຍິນ​ດີ​ທີ່​ການ​ພົວພັນ ແລະ ຮ່ວມ​ມື​ຂອງ​ສອງ​ປະເທດ​ມີ​ຄວາມ​ກ້າວໜ້າ​ຢ່າງ​ເປັນ​ຮູບ​ປະ​ທຳ​ຫຼາຍ​ຂຶ້ນ ແລະ ເສີມ​ສ້າງ​ຄວາມ​ສາມາດ​ແກ້​ໄຂ​ບັນຫາ​ທີ່​ເກີດ​ຂຶ້ນ ແລະ ເສີມ​ສ້າງ​ຄວາມ​ໝັ້ນຄົງ​ຕາມ​ບໍລິເວນ​ຊາຍ​ແດນ​ລະຫວ່າງ ນວ ກັບ​ແຂວງ​ໜອງ​ຄາຍ​ມີ​ຄວາມ​ສະຫງົບ​ຮຽບ​ຮ້ອຍ​ດີ ກອງ​ປະຊຸມ​ສະແດງ​ຄວາມ​ຍິນ​ດີ​ຕໍ່​ການ​ພົວພັນ​ການ​ທູດ​ນັບ​ມື້​ມີ​ຄວາມ​ໃກ້​ສິດ​ກັນ​ຫຼາຍ​ຂຶ້ນ ໂດຍ​ສະເພາະ​ການ​ພົວພັນ​ລະຫວ່າງ ນວ ແລະ ແຂວງ​ໜອງ​ຄາຍ.

    ສຳລັບ​ການ​ຮ່ວມ​ມື​ໃນ​ການ​ຮັກສາ​ຄວາມ​ສະຫງົບ​ຮຽບ​ຮ້ອຍ​ຕາມ​ຊາຍ​ແດນ ນວ ກັບ​ແຂວງ​ໜອງ​ຄາຍ​ກອງ​ປະຊຸມ​ຄະນະ​ກຳມະການ​ຮ່ວມ​ມື ​ເຫັນ​ດີ​ປະຕິບັດ​ຕາມ​ບົດ​ບັນທຶກ​ກອງ​ປະຊຸມ​ຄະນະ​ກຳມະການ​ຮ່ວມ​ມື​ ຮັກສາ​ຄວາມ​ສະຫງົບ​ຮຽບ​ຮ້ອຍ​ຕາມ​ຊາຍ​ແດນ​ລາວ-ໄທ ຄັ້ງ​ທີ 24 ຈັດ​ຂຶ້ນ​ວັນ​ທີ 18-21 ທັນວາ 2017 ທີ່ ນວ ໂດຍ​ບໍ່​ໃຫ້​ກຳລັງ​ທະຫານ ແລະ ຕຳຫຼວດ​ຂອງ​ຝ່າຍ​ໃດ​ຝ່າຍ​ໜຶ່ງ​ລາດຕະເວນ​ລ່ວງ​ລ້ຳ​ດິນແດນ​ທາງບົກ ທາງນ້ຳ ແລະ ທາງ​ອາກາດ​ຂອງ​ອີກ​ຝ່າຍ​ໜຶ່ງ​ຢ່າງ​ເດັດຂາດ ຍົກເວັ້ນ​ກໍລະນີ​ການ​ຊ່ວຍເຫຼືອ​ຜູ້​ປະສົບ​ໄພ​ຕາມ​ລຳ​ແມ່ນ້ຳ​ຂອງ​ຕາມ​ຫຼັກການ​ມະນຸດສະທຳ ໂດຍ​ຕ້ອງ​ແຈ້ງ​ໃຫ້​ອີກ​ຝ່າຍ​ໜຶ່ງ​ຊາຍ​ແດນ​ທັນທີ ແລະ ຫາກ​ມີ​ບັນຫາ​ເກີດ​ຂຶ້ນ​ໃຫ້​ອະນຸ​ກຳມະການ​ທັງ​ສອງ​ຝ່າຍ​ກວດກາ​ປຶກສາ​ຫາລື ເພື່ອ​ຫາ​ວິທີ​ແກ້​ໄຂ​ຮ່ວມ​ກັນ​ໂດຍ​ໄວ ກອງ​ປະຊຸມ​ເຫັນ​ດີ​ໃຫ້​ສອງ​ຝ່າຍ​ຮ່ວມ​ມື​ສືບຕໍ່​ສະກັດ​ກັ້ນ​ປາບ​ປາມ​ການເຄື່ອນໄຫວ​ຂອງ​ບຸກຄົນ ຫຼື ກຸ່ມ​ຄົນ​ທີ່​ເປັນ​ໄພ​ຕໍ່​ຄວາມ​ໝັ້ນຄົງ​ຂອງ​ລາວ-ໄທ ຕາມ​ພື້ນ​ທີ່​ຂອງ​ຕົນ​ຢ່າງ​ເຂັ້ມ​ງວດ ກອງ​ປະຊຸມ​ເຫັນ​ດີ​ໃຫ້​ເຈົ້າ​ໜ້າທີ່​ຂັ້ນ​ເທິງ​ເຜີຍແຜ່​ໃຫ້​ປະຊາຊົນ​ທັງ​ສອງ​ຝ່າຍ​ໃນ​ພື້ນ​ທີ່​ຕິດ​ກັນ​ຊາບ  ໃນ​ກໍລະນີ​ມີ​ການ​ຈັດ​ງານ​ບຸນ​ປະເພນີ ແລະ ກິດຈະກຳ​ຕ່າງໆ​ຕາມ​ບໍລິເວນ​ຊາຍ​ແດນ ຫາກ​ມີ​ການ​ຈູດ​ພຸ​ບັ້ງໄຟ ຫຼື ສິ່ງ​ທີ່​ເຮັດ​ໃຫ້​ມີ​ສຽງ​ດັງ ແມ່ນ​ຝ່າຍ​ຈັດ​ກິດຈະກຳ​ດັ່ງກ່າວ ​ຈະ​ຕ້ອງ​ແຈ້ງ​ໃຫ້​ຝ່າຍ​ໜຶ່ງ​ຮັບ​ຊາບ​ລ່ວງ​ໜ້າ​ຢ່າງ​ໜ້ອຍ 3 ວັນ ຝ່າຍ​ໄທ​ຈະ​ໃຫ້​ໜ່ວຍ​ເຮືອ0 ຮັກສາ​ຄວາມ​ສະຫງົບ​ຮຽບ​ຮ້ອຍ​ຕາມ​ຊາຍ​ແດນ ສືບຕໍ່​ປະຕິບັດ​ໜ້າທີ່​ລາດຕະເວນ​ຮັກສາ​ຄວາມ​ສະຫງົບ​ຕາມ​ລຳ​ແມ່ນ້ຳ​ຂອງ ໂດຍ​ບໍ່​ໃຫ້​ເກີດ​ຜົນ​ກະທົບ​ຕໍ່​ການ​ທຳ​ມາ​ຫາ​ກິນ​ຂອງ​ປະຊາຊົນ​ຜູ້​ບໍລິສຸດ​ທັງ​ສອງ​ຝ່າຍ  ແລະ ທັງ​ສອງ​ຝ່າຍ​ເພີ່ມ​ທະວີ​ການ​ແລກປ່ຽນ​ຂໍ້​ມູນ​ຂ່າວສານ ​ດຳເນີນ​ມາດ​ຕະການ​ທີ່​ຈຳເປັນ​ຢ່າງ​ໜ້ອຍ 2 ເດືອນ​ຕໍ່​ຄັ້ງ ພາຍ​ໃຕ້​ກົດໝາຍ​ຂອງ​ສອງ​ປະເທດ ພ້ອມ​ທັງ​ເພີ່ມ​ທະວີ​ຮ່ວມ​ມື​ຢ່າງ​ຈິງ​ຈັງ ເປັນ​ການ​ຈັດ​ລະບຽບ​ຊາຍ​ແດນ ເພື່ອ​ປ້ອງ​ກັນ​ສະກັດ​ກັ້ນ ແລະ ປາບ​ປາມ​ຜູ້​ລັກລອບ​ນຳ​ຄົນ​ເຂົ້າ​ເມືອງ ແລະ ແຮງ​ງານ​ຜິດ​ກົດໝາຍ​ລວມ​ທັງ​ໃຫ້ການ​ຮ່ວມ​ມື​ດ້ານ​ແຮງ​ງານ ແລະ ການ​ຕ້ານ​ການ​ຄ້າ​ມະນຸດ ການ​ຄ້າ​ຢາ​ເສບ​ຕິດ ແລະ ສິນຄ້າ​ຜິດ​ກົດໝາຍ ສອງ​ຝ່າຍ​ເຫັນ​ດີ​ເພີ່ມ​ເວລາ​ການ​ເປີດ-ປິດ​ດ່ານ​ປະເພນີ​ບ້ານ​ໜອງ​ດາ​ເມືອງ​ສີ​ໂຄດ​ຕະບອງ ແລະ ດ່ານ​ຜ່ອນ​ບິນ​ບ້ານ​ໝໍ້​ເມືອງ​ສີ​ຊຽງ​ໃໝ່​ຈາກ​ເວລາ 8-16:30 ໂມງ ເປັນ 6-17 ໂມງ ແລະ ສຶກ​ສາ​ຄວາມ​ເປັນ​ໄປ​ໄດ້ ເພື່ອ​ຍົກ​ລະດັບ​ໃຫ້​ເປັນ​ຈຸດ​ຜ່ານ​ແດນ​ຖາວອນ​ຕໍ່​ໄປ.

    ການ​ຮ່ວມ​ມື​ກໍລະນີ​ບຸກຄົນ​ຂອງ​ແຕ່​ລະ​ຝ່າຍ ​ຖືກ​ຈັບ​ກຸມ​ຂຸມ​ຂັງ​ສອງ​ຝ່າຍ​ຈະ​ພິ​ຈະ​ລະ​ນາ​ອະນຸຍາດ​ໃຫ້​ເຈົ້າ​ໜ້າທີ່ ຫຼື ຍາດ​ພີ່ນ້ອງ​ໃຫ້​ເຂົ້າ​ຢ້ຽມຢາມ​ຫຼື ຖືກ​ຈັບ​ກຸມ​ຕາມ​ລະບຽບ​ກົດໝາຍ​ຂອງ​ແຕ່​ລະ​ປະເທດ ໂດຍ​ແຈ້ງ​ຜ່ານ​ຄະນະ​ກຳມະການ​ເປັນ​ຜູ້​ປະສານ​ງານ​ກັບ​ຜ່ານ​ເຈົ້າ​ໜ້າທີ່​ກ່ຽວຂ້ອງ ການ​ສົ່ງ-ຮັບ​ຜູ້​ຕ້ອງ​ຫາ ຫຼື ຜູ້​ພົ້ນ​ໂທດ​ຈາກ​ການ​ດຳເນີນ​ຄະດີ​ກັບ​ຄືນ​ສູ່​ປະເທດ​ຂອງ​ຕົນ ອີງ​ຕາມ​ກົດໝາຍ​ຂອງ​ແຕ່​ລະ​ປະເທດ​ ໄດ້​ມີ​ໃຫ້​ແຈ້ງ​ຜ່ານ​ຄະນະ​ກຳມະການ​ສອງ​ຝ່າຍ​ເຫັນ​ດີ ​ໃຫ້​ອະນຸ​ກຳມະການ​ຮ່ວມ​ມື​ຮັກສາ​ຄວາມ​ສະຫງົບ​ຕາມ​ຊາຍ​ແດນ ນວ-ແຂວງ​ໜອງ​ຄາຍ ແລະ ພາກສ່ວນ​ທີ່​ກ່ຽວຂ້ອງ​ຮ່ວມ​ມື​ກັນ​ກວດ​ພື້ນ​ທີ່​ຢ່າງ​ໜ້ອຍ​ປີ​ລະ​ໜຶ່ງ​ຄັ້ງ ສອງ​ຝ່າຍ​ເຫັນ​ດີ​ພັດທະນາ​ເສັ້ນທາງ​ການ​ເດີນ​ເຮືອ​ທີ່​ຕື້ນ​ເຂີນ ໃນ​ລະດູແລ້ງ​ລະຫວ່າງ​ຕາ​ລິ່ງ​ແຄມ​ຂອງ​ບ້ານ​ດອນ​ຊີງ​ຊູ້ ເມືອງ​ສີ​ໂຄດ​ຕະບອງ ແລະ ຕາ​ລິ່ງ​ແຄມ​ຂອງ​ຕຳ​ບົນ​ບ້ານ​ໝໍ້ ເມືອງ​ສີ​ຊຽງໃໝ່ ເພື່ອ​ໃຫ້​ປະຊາຊົນ​ສາມາດ​ໃຊ້​ປະໂຫຍດ ແລະ ເດີນ​ເຮືອ​ສັນຈອນ​ໄປ​ມາ​ໄດ້​ຕະຫຼອດ​ປີ ເຫັນ​ດີ​ເພີ່ມ​ທະວີ​ໃຫ້​ປະສານ​ງານ ແລະ ຮ່ວມ​ມື​ກັນ​ປ້ອງ​ກັນ​ຕ້ານ ແລະ ສະກັດ​ກັ່ນ​ການ​ລັກລອບ​ຄ້າຂາຍ​ປະເພດ​ສັດປ່າ ພືດ​ປ່າ ແລະ ໄມ້​ຫ່ວງ​ຫ້າມ​ທີ່​ຜິດ​ກົດໝາຍ​ບໍລິເວນ​ຊາຍ​ແດນ​ຂອງ​ທັງ​ສອງ​ປະເທດ ເຫັນ​ດີ​ສະໜັບສະໜູນ​ໃຫ້ການ​ຮ່ວມ​ມື​ເຝົ້າ​ລະວັງ​ໃນ​ການ​ປ້ອງ​ກັນ ແລະ ຄວບ​ຄຸມພະ​ຍາດ​ຕິດຕໍ່​ຕາມ​ຊາຍ​ແດນ ເຫັນ​ດີ​ປະສານ​ງານ ແລະ ສະໜັບສະໜູນ​ໃຫ້​ພາກສ່ວນ​ທາງ​ການ​ທີ່​ກ່ຽວຂ້ອງ​ສອງ​ຝ່າຍ ​ຮ່ວມ​ກັນ​ແກ້​ໄຂ​ບັນຫາ​ຜູ້​ລັກລອບ​ເຂົ້າ​ເມືອງ​ຜິດ​ກົດໝາຍ.

    ນອກຈາກ​ນີ້ ຄະນະ​ກຳມະການ​ຮ່ວມ​ມື​ຮັກສາ​ຄວາມ​ສະຫງົບ​ຮຽບ​ຮ້ອຍ​ຊາຍ​ແດນ ນວ-ແຂວງ​ໜອງ​ຄາຍ ​ຈັດ​ກອງ​ປະຊຸມ​ຮ່ວມ​ກັນ​ຢ່າງ​ໜ້ອຍ​ປີ​ລະ 1 ຄັ້ງ ​ໂດຍ​ຜັດປ່ຽນ​ກັນ​ເປັນ​ເຈົ້າພາບ ສອງ​ຝ່າຍ​ເຫັນ​ດີ​ໃຫ້​ມີ​ຄະນະ​ກຳມະການ​ຮ່ວມ​ມື ຮັກສາ​ຄວາມ​ສະຫງົບ​ຮຽບ​ຮ້ອຍ​ຕາມ​ຊາຍ​ແດນ ນວ-ໜອງ​ຄາຍ ຝ່າຍ​ລະ​ບໍ່​ເກີນ 15 ທ່ານ ແລະ ເຫັນ​ດີ​ໃຫ້​ມີ​ຄະນະ​ອະນຸ​ກຳມະການ​ຮ່ວມ​ມື ຮັກສາ​ຄວາມ​ຮຽບ​ຮ້ອຍ​ຕາມ​ຊາຍ​ແດນ​ລະດັບ​ເມືອງ​ຝ່າຍ​ລະ​ບໍ່​ເກີນ 9 ທ່ານ ສ່ວນ​ກອງ​ປະຊຸມ​ຄັ້ງ​ທີ 12 ນວ ຈະ​ເປັນ​ເຈົ້າພາບ.

ຂ່າວທີ່ກ່ຽວຂ້ອງ