ຂ່າວຫຼ້າສຸດ

ສະໜາມ​ບິນ ນາ​ຣີ​ຕະ ຮັບ​ສະໝັກ​ແຮງ​ງານ​ຕ່າງປະເທດ​ເພີ່ມ​ອີກ

110 27 ສ.ຫ. 2018 ຂ່າວຕ່າງປະເທດ
ສະໜາມ​ບິນ ນາ​ຣີ​ຕະ ຮັບ​ສະໝັກ​ແຮງ​ງານ​ຕ່າງປະເທດ​ເພີ່ມ​ອີກ

     ຂ່າວສານ ກຽວ​ໂດ ຂອງ​ຍີ່ປຸ່ນ ລາຍ​ງານ​ວ່າ ສະໜາມ​ບິນ​ສາກົນ ນາ​ຣີ​ຕະ (Narita) ຂອງ​ຍີ່ປຸ່ນ ພວມ​ຮັບ​ສະໝັກ​ແຮງ​ງານ​ຕ່າງປະເທດ​ເພີ່ມ​ອີກ ເພື່ອ​ຕອບ​ສະໜອງ​ຕໍ່​ການ​ຮັບ​ໃຊ້​ຜູ້ໂດຍສານ ທ່າມກາງ​ທີ່​ລັດຖະບານ​ຍີ່ປຸ່ນ ຊຸກຍູ້​ນະໂຍບາຍ​ດຶງ​ດູດ​ນັກ​ທ່ອງ​ທ່ຽວ​ຕ່າງປະເທດ ໃຫ້​ເຂົ້າ​ໄປ​ທ່ອງ​ທ່ຽວ​ໃນ​ຍີ່ປຸ່ນ.

    ເຈົ້າ​ໜ້າທີ່​ໃນ​ສະໜາມ​ບິນ ນາ​ຣີ​ຕະ ເວົ້າ​ວ່າ ສະໜາມ​ບິນ​ແຫ່ງ​ນີ້​ມຸ່ງ​ໄປ​ສູ່​ການ​ມີ​ກຳລັງ​ຄົນ​ທີ່​ມາ​ຈາກ​ບັນດາ​ປະເທດ​ທີ່​ເວົ້າ​ພາສາ​ອັງກິດ ເຊັ່ນ ຟີ​ຈິ ຊຶ່ງ​ເປັນ​ບ່ອນ​ທີ່​ມີ​ແຫຼ່ງ​ແຮງ​ງານ​ທີ່​ມີ​ຄຸນ​ນະ​ພາບ​ສູງ ແຕ່​ມີ​ຜູ້​ຫວ່າງ​ງານ​ຈຳນວນ​ຫຼາຍ. ບໍລິສັດ​ແຫ່ງ​ໜຶ່ງ ທີ່​ຮັບຜິດຊອບ​ວຽກ​ງານ​ດ້ານ​ການ​ຮັກສາ​ຄວາມ​ສະຫງົບ ປະຈຳ​ຢູ່​ໃນ​ສະໜາມ​ບິນ ນາ​ຣີ​ຕະ ໃຫ້​ຮູ້​ວ່າ ໃນ​ຊຸມ​ປີ​ທີ່​ຜ່ານ​ມາ ບໍລິສັດ​ນີ້​ກໍ​ໄດ້​ເພີ່ມ​ເຕີມ​ກຳລັງ​ຄົນ​ຈາກ​ຕ່າງປະເທດ ແລະ​ມາ​ຮອດ​ເວລາ​ນີ້ ໄດ້​ມີແຮງ​ງານ​ຕ່າງປະເທດ 10 ຄົນ ທີ່​ມາ​ຈາກ​ຈີນ ສ ເກົາຫຼີ ແລະ ສີ​ລັງກາ ພວມ​ເຮັດ​ວຽກ​ໃຫ້​ແກ່​ບໍລິສັດ​ນີ້.

       ເພື່ອ​ຕອບ​ສະໜອງ​ຕໍ່​ຄວາມ​ຕ້ອງການ ໃນ​ການ​ຮັບ​ໃຊ້​ຜູ້ໂດຍສານ​ນັ້ນ ສະໜາມ​ບິນ​ສາກົນ ນາ​ຣີ​ຕະ ມີ​ແຜນການ​ເປີດ​ເສັ້ນທາງ​ແລ່ນ​ຂອງ​ເຮືອບິນ​ຕື່ມ​ອີກ​ເປັນ​ສາຍ​ທີ​ສາມ ຊຶ່ງ​ຕາມ​ນັ້ນແລ້ວ​ແມ່ນ​ຕ້ອງການ​ຮັບ​ສະໝັກ​ແຮງ​ງານ​ຕື່ມ​ອີກ 30.000 ຄົນ ເຮັດ​ໃຫ້​ຕົວ​ເລກ​ພະນັກງານ ທີ່​ເຮັດ​ວຽກ​ຢູ່​ໃນ​ສະໜາມ​ບິນ​ແຫ່ງ​ນີ້ ເພີ່ມ​ຂຶ້ນ​ເປັນ 70.000 ຄົນ.

    ລັດຖະບານ​ຍີ່ປຸ່ນ ມີ​ນະໂຍບາຍ​ດຶງ​ດູດ​ນັກ​ທ່ອງ​ທ່ຽວ​ເຂົ້າ​ໄປ​ທ່ອງ​ທ່ຽວ​ໃນ​ປະເທດ​ນີ້ ຕື່ມ​ອີກ​ຈຳນວນ​ຫຼາຍ ໂດຍ​ໃນ​ສະເພາະ​ໜ້າ​ກໍ​ແມ່ນ​ມຸ່ງ​ໄປ​ສູ່​ຄາດໝາຍ​ດຶງ​ດູດ​ນັກ​ທ່ອງ​ທ່ຽວ ໃຫ້​ບັນລຸ 40 ລ້ານ​ເທື່ອ​ຄົນ ພາຍ​ໃນ​ປີ 2020 ຊຶ່ງ​ເປັນ​ເວລາ​ທີ່​ຍີ່ປຸ່ນ ເປັນ​ເຈົ້າພາບ​ຈັດ​ງານ​ມະຫາ​ກຳ​ກິລາ ໂອ​ລິມ​ປິກ ແລະ ​ພາ​ຣາ​ລິມ​ປິກ (Olympics ແລະ Paralympics) ແລະ​ດຶງ​ດູດ​ນັກ​ທ່ອງ​ທ່ຽວ ໃຫ້​ບັນລຸ 60 ລ້ານ​ເທື່ອ​ຄົນ ພາຍ​ໃນ​ປີ 2030. ໃນ​ຂະນະ​ດຽວ​ກັນ ສະຖິຕິ​ຂອງ​ກະຊວງ​ທີ່​ດິນ ພື້ນຖານ​ໂຄງ​ລ່າງ ຄົມມະນາຄົມ ແລະ ທ່ອງ​ທ່ຽວ​ຍີ່ປຸ່ນ ໃຫ້​ຮູ້​ວ່າ ໃນ​ປີ 2016 ຍີ່ປຸ່ນ​ຕ້ອນຮັບ​ນັກ​ທ່ອງ​ທ່ຽວ​ຕ່າງປະເທດ 20 ລ້ານ​ເທື່ອ​ຄົນ ແລະ ໃນ​ປີ 2017 ຕ້ອນຮັບ 28,7 ລ້ານ​ເທື່ອ​ຄົນ ນັບ​ວ່າ​ສູງ​ເປັນ​ປະຫວັດ​ການ.

 

ຂ່າວທີ່ກ່ຽວຂ້ອງ