ຂ່າວຫຼ້າສຸດ

ກຳນົດເຂດຄຸ້ມຄອງສະໜາມຫຼວງ ພະທາດຫຼວງ ແລະ ບໍລິເວນອ້ອມຮອບ

224 27 ສ.ຫ. 2018 ຂ່າວໜ້າ​ໜຶ່ງ
ກຳນົດເຂດຄຸ້ມຄອງສະໜາມຫຼວງ ພະທາດຫຼວງ ແລະ ບໍລິເວນອ້ອມຮອບ

    ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ນະ­ຄອນ­ຫຼວງ​ວຽງ​ຈັນ ໄດ້​ຈັດ​ເຜີຍ­ແຜ່​ຂໍ້​ຕົກ­ລົງ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ວ່າ​ດ້ວຍ​ການ​ຄຸ້ມ​ຄອງ​ສະ­ໜາມ​ຫຼວງ ພະ​ທາດ­ຫຼວງ ແລະ ບໍ­ລິ­ເວນ​ອ້ອມ​ຮອບ ສະ­ບັບ​ເລກ​ທີ 690/ຈ​ນວ ລົງ​ວັນ​ທີ 13 ກໍ­ລະ­ກົດ 2018 ຂຶ້ນ​ວັນ​ທີ 24 ສິງ­ຫາ 2018 ທີ່​ຫໍ​ທຳ​ມະ​ສະ­ພາ ເປັນ​ປະ­ທານ ແລະ ເປັນ​ກຽດ​ເຜີຍ­ແຜ່​ໂດຍ​ທ່ານ ຄຳ​ປະ­ດິດ ເຂັມ​ມາ­ນິດ ຫົວ­ໜ້າ​ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ນະ­ຄອນ­ຫຼວງ​ວຽງ​ຈັນ ມີ​ພະ​ເຖ­ລາ­ນຸ­ເຖລະ ທ່ານ ຖະ­ໜອມ ທຳ​ທອງ ເຈົ້າ­ເມືອງ​ໄຊ​ເຊດ​ຖາ ພ້ອມ​ດ້ວຍ​ຫົວ­ໜ້າ ຮອງ​ຂະ­ແໜງ­ການ ກອງ​ວິ­ຊາ​ການ ຫ້ອງ­ການ ຖວ​ທ ເມືອງ ບໍ­ລິ­ສັດ​ທ່ອງ​ທ່ຽວ ໂຮງ­ແຮມ ບ້ານ​ອ້ອມ​ຂ້າງ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ຂໍ້​ຕົກ­ລົງ​ເຈົ້າ​ຄອງ​ນະ­ຄອນ­ຫຼວງ​ສະ­ບັບ​ດັ່ງ­ກ່າວ ປະ­ກອບ​ມີ 10 ໝວດ 33 ມາດ­ຕາ ໂດຍ​ໄດ້​ກຳ­ນົດ​ຫຼັກ­ການ ແລະ ມາດ​ຕະ­ການກ່ຽວ​ກັບ​ການ​ຄຸ້ມ​ຄອງ ແລະ ປົກ​ປັກ​ຮັກ­ສາ​ສະ­ໜາມ​ຫຼວງ ພະ​ທາດ­ຫຼວງ ແລະ ບໍ­ລິ­ເວນ​ອ້ອມ​ຮອບ ເພື່ອ​ເຮັດ​ໃຫ້​ເຂດ​ດັ່ງ­ກ່າວ​ສົມ​ກຽດ​ສັກ​ສີ ເປັນ​ເຂດ​ພິ­ທີ­ການ ເປັນ​ມໍ­ລະ­ດົກ ເປັນ​ສູນ​ລວມ​ຈິດ­ໃຈ ວັດ­ທະ­ນະ­ທຳ ສາ​ສະ​ນະ​ສະ­ຖານ​ຂອງ​ຊາດ ແລະ ເປັນ​ເຂດ​ອັດ​ສະ​ລິ​ຍະ ຄວາມ​ສີ­ວິ­ໄລ ທັງ​ເປັນ​ເຂດ​ແຫຼ່ງ​ທ່ອງ​ທ່ຽວ​ປະ­ຫວັດ­ສາດ-ວັດ­ທະ­ນະ­ທຳ ແລະ ປະ­ກອບ­ສ່ວນ​ສຳ­ຄັນ​ເຂົ້າ​ໃນ​ການ​ພັດ­ທະ­ນາ ນວ ໃຫ້​ເຕີບ​ໃຫຍ່​ຂະ­ຫຍາຍ­ຕົວ​ຢ່າງ​ບໍ່​ຢຸດ​ຢັ້ງ.

    ໃນ​ຂໍ້​ຕົກ­ລົງ​ສະ­ບັບ​ນີ້ ໄດ້​ກຳ­ນົດ​ຂອບ​ເຂດ​ຄຸ້ມ​ຄອງ​ສະ­ໜາມ​ຫຼວງ ມີ​ເນື້ອ­ທີ່ 98.394 ຕາ​ແມັດ ທິດ​ຕາ­ເວັນອອກ​ຕິດ​ກັບບໍ­ລິ­ສັດ​ເພັດ​ຖາ­ວອນ ເດີ່ນ​ພະ​ທາດ­ຫຼວງ ວັດ​ທາດ­ຫຼວງ​ເໜືອ ທິດ­ໃຕ້​ຕິດ​ກັບຖະ­ໜົນ​ໜອງ​ບອນ ທິດ­ເໜືອ​ຕິດ​ກັບ​ຖະ­ໜົນ​ໄກ­ສອນ ສ່ວນ​ເຂດ​ພະ​ທາດ­ຫຼວງ​ມີ​ເນື້ອ­ທີ່ (ກົມ​ມະ​ລຽນ) 8.895 ຕາ​ແມັດ ຄວາມ​ຍາວ​ດ້ານ​ໃຕ້ 93,20 ແມັດ ຄວາມ​ຍາວ​ດ້ານ​ເໜືອ 93 ແມັດ ຄວາມ​ຍາວ​ດ້ານ​ຕາ­ເວັນ​ອອກ 94,50 ແມັດ ຄວາມ​ຍາວ​ດ້ານ​ຕາ­ເວັນ­ຕົກ 96,50 ແມັດ ສວນ​ໄຊ​ເຊດ​ຖາ ສວນ​ໜອງ​ສະ­ພັງ​ເລັນ ແລະ ສວນ​ອະ­ນຸ­ສາ­ວະ­ລີ​ນັກ­ຮົບ​ນິ­ລະ­ນາມ ມີ​ເນື້ອ­ທີ່ 79.613 ຕາ​ແມັດ ເຂດ​ດິນ ແລະ ສວນ​ອະ­ນຸ­ສາ­ວະ­ລີ​ເຈົ້າ​ໄຊ​ເຊດ​ຖາ ເນື້ອ­ທີ່ 7.185 ຕາ​ແມັດ ເຂດ​ເດີ່ນ​ອ້ອມ​ວັດ​ທາດ­ຫຼວງ​ໃຕ້ 12.557 ຕາ​ແມັດ ເນື້ອ­ທີ່​ຂອງ​ວັດ​ທາດ­ຫຼວງ​ໃຕ້ 11.388 ຕາ​ແມັດ ເດີ່ນ​ຕໍ່­ໜ້າ​ກົມ​ມະ​ລຽນ​ພະ​ທາດ­ຫຼວງ​ດ້ານ​ຕາ­ເວັນ​ອອກ 13.906 ຕາ​ແມັດ ແລະ ເຂດ​ເດີ່ນ​ອ້ອມ​ວັດ​ທາດ­ຫຼວງ​ເໜືອ ມີ 30.662 ຕາ​ແມັດ ໃນ​ການ­ຈັດ­ຕັ້ງ​ປະ­ຕິ­ບັດ​ໃນ​ການ​ຄຸ້ມ​ຄອງ ແລະ ປົກ​ປັກ​ຮັກ­ສາ​ອົງ­ການ​ປົກ­ຄອງ​ນະ­ຄອນ­ຫຼວງ​ວຽງ​ຈັນ ​ໄດ້​ມອບ​ໃຫ້​ພະແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ພະ​ແນກ​ໂຍ­ທາ​ທິ​ການ ແລະ ຂົນ­ສົ່ງ ພະ​ແນກ​ຊັບ­ພະ­ຍາ­ກອນ​ທຳ​ມະ​ຊາດ ແລະ ສິ່ງ­ແວ­ດລ້ອມ ກອງ​ບັນ­ຊາ​ການ​ປ້ອງ​ກັນ​ຄວາມ​ສະ­ຫງົບ ຫ້ອງ­ການ​ຄຸ້ມ​ຄອງ ແລະ ບໍ­ລິ­ຫານ​ຕົວ​ເມືອງ ອົງ­ການ​ປົກ­ຄອງ​ເມືອງ​ໄຊ​ເຊດ​ຖາ ຄະ­ນະ​ສົງ​ວັດ​ທາດ­ຫຼວງ​ເໜືອ ແລະ ທາດ­ຫຼວງ​ໃຕ້ ເປັນ​ຜູ້​ຈັດ​ຕັ້ງ​ປະ­ຕິ­ບັດ​ຕາມ​ພາ­ລະ​ບົດ­ບາດ ສິດ ແລະ ໜ້າ­ທີ່​ພື້ນ­ຖານ ແລະ ຕາມ​ໝວດ​ທີ 4 ຂອງ​ຂໍ້​ຕົກ­ລົງ​ສະ­ບັບ​ນີ້.

    ການ​ຈັດ​ເຜີຍ­ແຜ່​ໃນ​ຄັ້ງ​ນີ້ ແນ­ໃສ່​ໃຫ້​ທຸກ​ພາກ­ສ່ວນ​ຮັບ​ຮູ້ ແລະ ເຂົ້າ­ໃຈ​ຢ່າງ​ຈະ­ແຈ້ງ​ຕໍ່​ກັບ​ເນື້ອ​ໃນ​ຈຸດ­ປະ­ສົງ ແລະ ຂອບ​ເຂດ ຫຼັກ­ການ ມາດ​ຕະ­ການ ນຳ­ໄປ​ຜັນ​ຂະ­ຫຍາຍ​ຈັດ​ຕັ້ງ​ປະ­ຕິ­ບັດ​ໃຫ້​ຖືກ​ຕາມ​ພາ­ລະ​ບົດ­ບາດໃນ​ການ​ຄຸ້ມ​ຄອງ ປົກ​ປັກ​ຮັກ­ສາ​ສະ­ໜາມ​ຫຼວງ ພະ​ທາດ­ຫຼວງ ແລະ ບໍ­ລິ­ເວນ​ອ້ອມ​ຮອບ.

ຂ່າວທີ່ກ່ຽວຂ້ອງ