ຂ່າວຫຼ້າສຸດ

ອູ​ແກຣນ​ອາດ​ຈະ​ຕ້ອງ​ໄດ້​ຂຶ້ນ​ລາຄາ​ແກ​​ັສ

151 27 ສ.ຫ. 2018 ຂ່າວຕ່າງປະເທດ
ອູ​ແກຣນ​ອາດ​ຈະ​ຕ້ອງ​ໄດ້​ຂຶ້ນ​ລາຄາ​ແກ​​ັສ

     ທ່ານ ໂວ​ໂລ​ດີ​ເມຍ ກຣອຍ​​ສ​ມັນ ນາຍົກລັດຖະມົນຕີ​ອູ​ແກຣນ ກ່າວ​ເມື່ອ​ວັນ​ທີ 23 ສິງຫາ​ທີ່​ຜ່ານ​ມາ​ວ່າ ອູ​ແກຣນ ທີ່​ພວມ​ຢາກ​ຮື້​ຟື້ນ​ການ​ຮ່ວມ​ມື​ກັບ​ກອງ​ທຶນ​ເງິນຕາ​ສາກົນ (IMF) ຢູ່​ໃນ​ຂະນະ​ນີ້​ນັ້ນ ອາດ​ຈະ​ຕ້ອງ​ໄດ້​ຂຶ້ນ​ລາຄາ​ແກ​​ັສ ໃນ​ສ່ວນ​ທີ່​ສະໜອງ​ໃຫ້​ແກ່​ບັນດາ​ຄອບຄົວ​ຂອງ​ປະຊາຊົນ.

    ເມື່ອ​ຕົ້ນ​ເດືອນ​ສິງຫາ​ນີ້ ລັດຖະບານ​ອູ​ແກຣນ ໄດ້​ຕໍ່​ກຳນົດ​ເວລາ ການ​ຮັກສາ​ລາຄາ​ແກ​​ັສ​ໄວ້​ຄືເກົ່າ ໄປ​ຮອດ​ຢ່າງ​ໜ້ອຍ​ແມ່ນ​ໃນ​ວັນ​ທີ 1 ກັນຍາ ປີ 2018 ເປັນ​ການ​ຫຼຸດຜ່ອນ​ຄວາມ​ຫວັງ ທີ່​ອາດ​ຈະ​ໄດ້​ຮັບ​ເງິນ​ຊ່ວຍເຫຼືອ​ເພີ່ມ​ເຕີມ​ຈາກ IMF ເພື່ອ​ໃຫ້​ສາມາດ​ຮັກສາ​ພື້ນຖານ​ເສດຖະກິດ​ຂອງ​ປະເທດ​ນີ້​ໃຫ້​ໝັ້ນຄົງ.

    ຕາມ​ການ​ຕົກລົງ​ກັບ IMF ກໍ​ແມ່ນ​ອູ​ແກຣນ​ຈະ​ຕ້ອງ​ໄດ້​ຂຶ້ນ​ລາຄາ​ແກ​​ັສ ສູ່​ລະດັບ​ລາຄາ​ໃນ​ຕະຫຼາດ​ໃນ​ປັດຈຸບັນ ເພື່ອ​ໃຫ້​ໄດ້​ເງື່ອນໄຂ​ພຽງພໍ​ໃນ​ການ​ຮັບ​ເງິນ​ຕື່ມ​ອີກ ຕາມ​ໂຄງການ​ຊ່ວຍເຫຼືອ 17,5 ຕື້​ໂດ​ລາ​ສະຫະລັດ ຂອງ IMF. ໃນ​ເບື້ອງ​ຕົ້ນ ອູ​ແກຣນ​ເຫັນ​ດີ​ຂຶ້ນ​ລາຄາ​ແກ​​ັສ ຕາມ​ສູດ​ໜຶ່ງ​ທີ່​ສອງ​ຝ່າຍ​ເຫັນ​ດີ​ນຳ​ກັນ ແຕ່​ວ່າ​ຫຼັງ​ຈາກ​ນັ້ນ​ໄດ້​ໂຈະ​ການ​ຂຶ້ນ​ລາຄາ​ຂາຍ​ແກ​​ັສ ເປັນ​ໄລຍະໆ.

    ນັບ​ແຕ່​ເດືອນ​ເມສາ ປີ 2017 ເປັນຕົ້ນ​ມາ ອູ​ແກຣນ​ບໍ່​ໄດ້​ຮັບ​ບ້ວງ​ເງິນ​ໃດໆຈາກ IMF ຊຶ່ງ​ເປັນ​ຍ້ອນ​ວ່າ​ມີ​ຄວາມ​ຊັກ​ຊ້າ ໃນ​ຂະ​ບວນ​ການ​ປະຕິບັດ​ການ​ປະຕິ​ຮູບ​ຂອງ​ທາງ​ການ​ອູ​ແກຣນ ເລື່ອງ​ນີ້​ໄດ້​ເຮັດ​ໃຫ້​ອູ​ແກຣນ ຕົກ​ຢູ່​ໃນ​ສະພາບ​ການ​ເງິນ​ຂາດ​ຄວາມ​ໝັ້ນຄົງ ທ່າມກາງ​ທີ່​ປະເທດ​ນີ້​ຕ້ອງ​ໄດ້​ຊຳລະ​ໜີ້​ປະມານ 15 ຕື້​ໂດ​ລາ​ສະຫະລັດ ດ້ວຍ​ເງິນຕາ​ຕ່າງປະເທດ ພາຍ​ໃນ​ສອງ​ປີ​ຕໍ່ໜ້າ.

 

ຂ່າວທີ່ກ່ຽວຂ້ອງ