ເກືອບ 15 ພັນຄົນ ສອບເສັງຄັດເລືອກ ເຂົ້າຮຽນມະຫາວິທະຍາໄລແຫ່ງຊາດ

234 27 ສ.ຫ. 2018 ຂ່າວໜ້າ​ໜຶ່ງ
ເກືອບ 15 ພັນຄົນ ສອບເສັງຄັດເລືອກ ເຂົ້າຮຽນມະຫາວິທະຍາໄລແຫ່ງຊາດ

    ວັນ​ທີ 25 ສິງຫາ 2018 ທີ່​ມະຫາວິທະຍາໄລ​ແຫ່ງ​ຊາດ (​ມຊ) ໄດ້​ເປີດ​ສອບເສັງ​ຄັດ​ເລືອກ​ຮັບ​ນັກ​ສຶກ​ສາ​ເຂົ້າ​ຮຽນ​ໃນ​ສົກ 2018-2019 ມີ​ນັກ​ສອບເສັງ​ເຂົ້າ​ຮ່ວມ​ສອບເສັງ​ເກືອບ 15.000 ຄົນ ສົກຮຽນ​ນີ້​ແມ່ນ​ໄດ້​ຮັບ​ອະນຸມັດ​ຮັບ​ເອົາ​ນັກ​ສຶກ​ສາ​ເຂົ້າ​ຮຽນ​ທັງ​ໝົດ 7.500 ກວ່າ​ຄົນ.

    ທ່ານ ອຸດົມ ພອນ​ຄຳ​ເພັງ ຮອງ​ຄະນະ​ອະທິການ​ບໍດີ ​ມຊ ໄດ້​ກ່າວ​ວ່າ: ພາຍຫຼັງ​ໄດ້​ເປີດ​ລົງທະບຽນ​ຜ່ານ​ລະບົບ​ອອນ​ລາຍ​ມາ​ແຕ່​ກາງ​ເດືອນ​ກໍລະກົດ ມາ​ເຖີງ​ວັນ​ທີ 22 ສິງຫາ 2018 ໄດ້​ມີ​ນັກຮຽນ​ມາ​ລົງທະບຽນ​ທັງ​ໝົດ 19.262 ຄົນ ແຕ່​ມາ​ຮັບ​ເອົາ​ບັດ​ສອບເສັງ​ຕົວ​ຈິງ 14.490 ຄົນ ການ​ສອບເສັງ​ແບ່ງ​ເປັນ 3 ຄື: ສາຍ A (ສາຍ​ທຳ​ມະ​ຊາດ) ມີ​ນັກຮຽນ​ເຂົ້າ​ສອບເສັງ 5.290 ຄົນ ສາຍ B (ສາຍ​ສັງຄົມ​ສາດ) 8.180 ຄົນ ແລະ ສາຍ C (ສາຍ​ເຄີ່ງ​ທຳ​ມະ​ຊາດ ແລະ ສັງຄົມ) ມີ 1.020 ຄົນ ມີ 17 ສູນ​ສອບເສັງ ປະກອບ​ມີ: ຄະນະ​ວິສະວະກຳ​ສາດ ນິຕິສາດ-ລັດຖະສາດ ວິທະຍາໄລ​ເຕັກນິກ​ຊັບ​ພະ​ວິຊາ ໂຮງຮຽນ​ມິດຕະພາບ​ວຽງ​ຈັນ-ໂຮ່​ຈີ​ມິງ ​ມສ ໜອງ​ບອນ ​ມສ ຕານ​ມີ​ໄຊ ​ມສ ສາທິດ ຄະນະ​ເສດຖະສາດ-ບໍລິຫານ​ທຸລະ​ກິດ ສະ​ຖາ​ບັນ​ລາວ-ຍີ່ປຸ່ນ ຄະນະ​ສຶກ​ສາ​ສາດ+ຂົງ​ຈື ຄະນະ​ວິທະຍາສາດ​ທຳ​ມະ​ຊາດ ວິທະຍາສາດ​ສັງຄົມ ວິທະຍາສາດ​ປ່າໄມ້ ອັກສອນສາດ ສະ​ຖາ​ປັດ+ສະໂມສອນ ​ມຊ ຄະນະ​ວິທະຍາສາດ ແລະ ​ມສ ວຽງ​ຈັນ ມີ​ຫ້ອງ​ສອບເສັງ​ທັງ​ໝົດ 656 ຫ້ອງ ຄະນະ​ກຳມະການ​ຄວບ​ຄຸ້ມ​ຫ້ອງ​ເສັງ​ທັງ​ໝົດ 1.319 ຄົນ ສຳລັບ​ສາຍ A ສອບເສັງ​ວິຊາ​ຄະນິດສາດ ພາສາ​ລາວ ຟີ​ຊິກ​ສາດ ເຄ​ມີ​ສາດ ຊີວະ​ສາດ ສາຍ B ເສັງ​ວິຊາ​ຄະນິດສາດ ພາສາ​ລາວ​ວັນນະຄະດີ ພູມ​ສາດ ປະຫວັດສາດ ສ່ວນ​ສາຍ C ເສັງ​ຄະນິດສາດ ເຄ​ມີ​ສາດ ຊີວະ​ສາດ ພູມ​ສາດ ປະຫວັດສາດ ພາສາ​ລາວ​ວັນນະຄະດີ​ໃນ​ການ​ສອບເສັງ​ແມ່ນ​ໃຊ້​ເວລາ 1 ວັນ ເສັງ​ໃນ​ຮູບ​ແບບ​ປາ​ລະ​ໄນ.

    ເພື່ອ​ເປີດ​ໂອກາດ​ໃຫ້​ນັກ​ສອບເສັງ​ໄດ້​ເຂົ້າ​ມາ​ສຶກ​ສາ​ໃນ ​ມຊ ພິເສດ​ໃນ​ປີ​ນີ້​ ນັກ​ສອບເສັງ​ສາມາດ​ເລືອກ​ສາຍ​ຮຽນ​ໄດ້ 2 ສາຍ​ເປັນ​ສາຍ​ສຳຮອງ​ຄື: ສາຍ A ສາມາດ​ເລືອກ​ສອງ​ສາຍ​ສຳຮອງ​ໃນ​ສາຍ B ແລະ C ແລະ ສາຍ C ສາມາດ​ເລືອກ​ສາຍ​ສຳຮອງ​ໃນ​ສາຍ B ສ່ວນ​ສາຍ B ແມ່ນ​ບໍ່​ສາມາດ​ເລືອກ​ສາຍ​ສຳຮອງ​ໄດ້ ສຳລັບ​ປີ​ນີ້​ທາງ ​ມຊ ໄດ້​ເປີດ​ເອົາ​ນັກ​ສຶກ​ສາ​ທີ່​ຜ່ານ​ການ​ສອບເສັງ​ຄັດ​ເລືອກ ຈຳນວນ 7.500 ກວ່າ​ຄົນ​ເຂົ້າ​ມາ​ສຶກ​ສາ​ໃນ​ສົກ​ດັ່ງກ່າວ ໃນ​ນັ້ນ​ນັກ​ສຶກ​ສາ​ໄດ້​ຮັບ​ທຶນ​ກວມ 20% ເຊິ່ງ 10% ແບ່ງ​ໃຫ້​ບັນດາ​ແຂວງ ແລະ ອີກ 10% ແມ່ນ​ມອບ​ໃຫ້​ນັກ​ສຶກ​ສາ​ທີ່​ມາ​ສອບເສັງ​ໃນ​ຄັ້ງ​ນີ້ ​ທີ່​ໄດ້​ຮັບ​ຄະແນນ​ດີ​ໃຫ້​ໄດ້​ຮັບ​ທຶນ.

ຂ່າວທີ່ກ່ຽວຂ້ອງ