ຂ່າວຫຼ້າສຸດ

ສ ອາ​ເມ​ຣິ​ກາ ສຳເລັດ​ແຜນການ​ປະຕິບັດ​ພາສີ​ສິນຄ້າ​ຕໍ່​ຈີນ​ມູນ​ຄ່າ 50 ຕື້​ໂດ​ລາ

158 27 ສ.ຫ. 2018 ຂ່າວຕ່າງປະເທດ
ສ ອາ​ເມ​ຣິ​ກາ ສຳເລັດ​ແຜນການ​ປະຕິບັດ​ພາສີ​ສິນຄ້າ​ຕໍ່​ຈີນ​ມູນ​ຄ່າ 50 ຕື້​ໂດ​ລາ

    ວັນ​ທີ 23 ສິງຫາ​ທີ່​ຜ່ານ​ມາ ສ ອາ​ເມ​ຣິ​ກາ ໄດ້​ປະຕິບັດ​ລະດັບ​ພາສີ​ໃໝ່​ຢ່າງ​ເປັນ​ທາງ​ການ ຕໍ່​ການ​ນຳ​ເຂົ້າ​ສິນຄ້າ​ຈາກ​ຈີນ ໃນ​ມູນ​ຄ່າ​ລວມ 16 ຕື້ ໂດ​ລາ​ສະຫະລັດ ດ້ວຍ​ຂໍ້​ກ່າວ​ຫາ​ວ່າ​ຈີນ “ຂີ້ລັກ” ເຕັກ​ໂນ​ໂລ​ຊີ.

    ຈາກ​ການ​ຕົກລົງ​ດັ່ງກ່າວ ກໍ​ໄດ້​ເຮັດ​ໃຫ້ ສ ອາ​ເມ​ຣິ​ກາ​ເຮັດ​ສຳເລັດ​ແຜນການ​ປະຕິບັດ​ພາສີ​ຕໍ່​ສິນຄ້າ​ນຳ​ເຂົ້າ​ຈາກ​ຈີນ ທີ່​ມີ​ຍອດ​ມູນ​ຄ່າ 50 ຕື້ ໂດ​ລາ​ສະຫະລັດ ນັ້ນ​ຢ່າງ​ເປັນ​ທາງ​ການ​ແລ້ວ ກ່ອນ​ໜ້າ​ນັ້ນ ລະດັບ​ພາສີ​ໃໝ່​ຂອງ ສ ອາ​ເມ​ຣິ​ກາ ໄດ້​ຮັບ​ການ​ປະຕິບັດ​ຕໍ່​ສິນຄ້າ​ຈາກ​ຈີນ ເປັນ​ມູນ​ຄ່າ 34 ຕື້​ໂດ​ລາ​ສະຫະລັດ ເລີ່ມ​ແຕ່​ວັນ​ທີ 6 ກໍລະກົດ​ທີ່​ຜ່ານ​ມາ ໃນ​ນັ້ນ ສິນຄ້າ​ຕົ້ນຕໍ​ທີ່​ຖືກ​ປະຕິບັດ​ພາສີ ກໍ​ແມ່ນ​ປະເພດ​ເຄື່ອງ​ຈັກ ອຸປະກອນ​ໄຟຟ້າ ແລະ​ເຕັກ​ໂນ​ໂລ​ຊີ​ສູງ.

    ໃນ​ຂະນະ​ດຽວ​ກັນ ຈີນ​ກໍ​ແຈ້ງ​ເຕືອນ​ເລື້ອຍໆ​ວ່າ ຈະ​ມີ​ມາດ​ຕະການ​ຕອບ​ໂຕ້​ທີ່​ຄ້າຍຄື​ກັນ​ນັ້ນ​ທັນທີ ຕໍ່​ສິນຄ້າ​ທີ່​ນຳ​ເຂົ້າ​ມາ​ຈາກ ສ ອາ​ເມ​ຣິ​ກາ ດ້ວຍ​ຍອດ​ມູນ​ຄ່າ​ເທົ່າໆ​ກັນ ໂດຍ​ທີ່​ຈຸດ​ໃຈກາງ​ກໍ​ແມ່ນ​ພວກ​ຜະລິດ​ຕະ​ພັນ ທີ່​ເປັນ​ສັນຍາ​ລັກ​ຂອງ​ຂະແໜງການ​ຜະລິດ​ຢູ່​ໃນ ສ ອາ​ເມ​ຣິ​ກາ ເຊັ່ນ​ວ່າ​ລົດ Harley Davidson ເຫຼົ້າ bourbon ແລະ​ນ້ຳ​ໝາກກ້ຽງ ພ້ອມ​ດ້ວຍ​ຜະລິດ​ຕະ​ພັນ​ອື່ນໆ​ອີກ​ຫຼາຍ​ຮ້ອຍ​ລາຍການ.

    ຫຼ້າ​ສຸດ ແຫຼ່ງ​ຂ່າວ​ຂອງ​ຈີນ ລາຍ​ງານ​ວ່າ ໂດຍ​ອີງ​ຕາມ “ຖະແຫຼງການ​ຂອງ​ຄະນະ​ກຳມະການ​ກົດ​ລະບຽບ​ພາສີ​ຂອງ​ລັດຖະບານ​ຈີນ ກ່ຽວ​ກັບ​ການ​ຂຶ້ນ​ພາສີ​ຕໍ່​ສິນຄ້າ​ຂອງ ສ ອາ​ເມ​ຣິ​ກາ ທີ່​ມີ​ມູນ​ຄ່າ 16 ຕື້​ໂດ​ລາ​ສະຫະລັດ” ນັ້ນ ການ​ຂຶ້ນ​ພາສີ 25% ຂອງ​ຈີນ​ຕໍ່​ສິນຄ້າ​ຂອງ ສ ອາ​ເມ​ຣິ​ກາ ທີ່​ມີ​ມູນ​ຄ່າ 16 ຕື້​ໂດ​ລາ​ສະຫະລັດ ເລີ່ມ​ມີ​ຜົນ​ບັງຄັບ​ໃຊ້​ຢ່າງ​ເປັນ​ທາງ​ການ​ແລ້ວ ໃນ​ເວລາ 12 ໂມງ ຂອງ​ວັນ​ທີ 23 ສິງຫາ​ນີ້.

 

ຂ່າວທີ່ກ່ຽວຂ້ອງ