ຂ່າວຫຼ້າສຸດ

ລາວ-ອັງກິດ ເພີ່ມທະວີການຮ່ວມມືສອງຝ່າຍ

215 27 ສ.ຫ. 2018 ຂ່າວໜ້າ​ໜຶ່ງ

    ທ່ານ Mark Field ຮອງ​ລັດຖະມົນຕີ​ກະຊວງ​ການ​ຕ່າງປະເທດ ແຫ່ງ​ສະຫະ​ຣາ​ຊະ​ອານາຈັກ​ອັງກິດ ແລະ ອຽກ​ລັງ​ເໜືອ ພ້ອມ​ດ້ວຍ​ຄະນະ ເດີນທາງ​ມາ​ຢ້ຽມຢາມ ແລະ ເຮັດ​ວຽກ​ຢູ່ ​ສປປ ລາວ​ເປັນ​ທາງ​ການ ແຕ່​ວັນ​ທີ 23-25 ສິງຫານີ້ ເພື່ອ​ເສີມ​ຂະຫຍາຍ​ສາຍ​ພົວພັນ ແລະ ການ​ຮ່ວມ​ມື​ລະຫວ່າງ​ສອງ​ຝ່າຍ.

    ກອງ​ປະຊຸມ​ປຶກສາ​ຫາລື​ທາງ​ດ້ານ​ການເມືອງ ລາວ-ອັງກິດ ຄັ້ງ​ທີ 2 ໄດ້​ຈັດ​ຂຶ້ນ​ວັນ​ທີ 24 ສິງຫາ 2018 ຢູ່​ກະຊວງ​ການ​ຕ່າງປະເທດ ເຊິ່ງ​ຝ່າຍ​ລາວ​ນຳ​ໂດຍ​ທ່ານ ແສງ​ເພັດ ຮຸ່ງ​ບຸນ​ຍວງ ຮອງ​ລັດຖະມົນຕີ​ກະຊວງ​ການ​ຕ່າງປະເທດ ຝ່າຍ​ອັງກິດ ນຳ​ໂດຍ​ທ່ານ Mark Field ຮອງ​ລັດຖະມົນຕີ​ກະຊວງ​ການ​ຕ່າງປະເທດ​ອັງກິດ.

    ໃນ​ກອງ​ປະຊຸມ​ຄັ້ງ​ນີ້ ທັງ​ສອງ​ຝ່າຍ​ໄດ້​ຜັດປ່ຽນ​ກັນ​ລາຍ​ງານ ​ສະພາບ​ການເຄື່ອນໄຫວ​ເສດຖະກິດ-ສັງຄົມ​ປະເທດ​ຂອງ​ຕົນ​ໃຫ້​ກັນ​ຊາບ ພ້ອມ​ທັງ​ໄດ້​ຮ່ວມ​ກັນ​ຕີ​ລາຄາ​ຄືນ ​ການ​ພົວພັນ​ຮ່ວມ​ມື​ລະຫວ່າງ​ສອງ​ຝ່າຍ​ໃນ​ໄລຍະ​ຜ່ານ​ມາ ນອກ​ນີ້ ປຶກສາ​ຫາລື​ກ່ຽວ​ກັບ​ການ​ເສີມ​ຂະຫຍາຍ​ການ​ພົວພັນ​ຮ່ວມ​ມື​ໃນຕໍ່ໜ້າ ແລກປ່ຽນ​ທັດສະນະ​ຕໍ່​ສະພາບ​ການ​ພົ້ນ​ເດັ່ນ​ຂອງ​ພາກ​ພື້ນ ແລະ ສາກົນ​ທີ່​ສອງ​ຝ່າຍ​ມີ​ຄວາມ​ສົນໃຈ​ຮ່ວມ​ກັນ.

    ການ​ຢ້ຽມຢາມ​ຂອງ ​ສປປ ລາວ ທ່ານ Mark Field ຄັ້ງ​ນີ້ ເປັນ​ຂີດ​ໝາຍ​ອັນ​ສຳຄັນ​ໃນ​ການ​ເສີມ​ຂະຫຍາຍ​ການ​ພົວພັນ​ຮ່ວມ​ມື​ຂອງ​ສອງ​ປະເທດ​ໃຫ້​ມີ​ບາດກ້າວ​ໃໝ່ ພາຍຫຼັງ​ທີ່ ລາວ-ອັງກິດ ໄດ້​ສ້າງຕັ້ງ​ສາຍ​ພົວພັນ​ການ​ທູດ​ນຳ​ກັນ​ປີ 1955 ເຊິ່ງ​ອັງກິດ​ໄດ້​ໃຫ້ການ​ຊ່ວຍເຫຼືອ​ແກ່​ລາວ ທັງ​ໃນ​ຂອບ​ສອງ​ຝ່າຍ ແລະ ຫຼາຍ​ຝ່າຍ ເປັນຕົ້ນ ຂະແໜງ​ສາທາລະນະ​ສຸກ ຜ່ານ​ອົງການ Welcome Trust Oxford University ມູນ​ຄ່າ 11,05 ຕື້​ກີບ ຫຼື ປະມານ 1,3 ລ້ານ​ໂດ​ລາ​ສະຫະລັດ ຊ່ວຍ​ຕິດ​ຕັ້ງ​ອຸປະກອນ ແລະ ຄົ້ນຄວ້າ​ພະຍາດ​ໃຫ້​ໂຮງໝໍ​ມະໂຫສົດ 34 ຕື້​ກີບ ຫຼື ປະມານ 4 ລ້ານ​ໂດ​ລາ​ສະຫະ​ລັດ ໃຫ້​ທຶນ​ການ​ສຶກ​ສາ​ຜ່ານ​ໂຄງການ Chevening ໃນ​ປີ 2017 ຈຳນວນ 5 ທຶນ ໂຄງການ​ເກັບ​ກູ້​ລະເບີດ​ຜ່ານ​ອົງການ MAG ແລະ ອົງການ HALO TRUST ມູນ​ຄ່າ 42,5 ຕື້​ກີບ ຫຼື ປະມານ 5 ລ້ານ​ໂດ​ລາ​ສະຫະລັດ ນອກ​ນີ້ ຍັງ​ໄດ້​ຊ່ວຍເຫຼືອ​ດ້ານ​ການ​ເຝິກອົບຮົມ​ໃນ​ຂະແໜງການ​ຕ່າງໆ ອັນ​ໄດ້​ປະກອບສ່ວນ​ສຳຄັນ​ໃນ​ການ​ສ້າງສາ​ພັດທະນາ ​ສປປ ລາວ ໃຫ້​ຫຼຸດ​ພົ້ນ​ຈາກ​ຄວາມທຸກ​ຍາກ ກ້າວ​ສູ່​ການ​ພັດທະນາ​ແບບ​ຍືນ​ຍົງ​ເທື່ອ​ລະ​ກ້າວ.

ຂ່າວທີ່ກ່ຽວຂ້ອງ