ຈະນຳໃຊ້ການເກັບຄ່າທຳນຽມ ຜູ້ໂດຍສານ-ພາຫະນະຜ່ານລະບົບເອເລັກໂຕນິກ ຢູ່ຂົວມິດຕະພາບ I

396 24 ສ.ຫ. 2018 ຂ່າວໜ້າ​ໜຶ່ງ

    ໃນ​ວັນ​ທີ 17 ສິງ­ຫາ 2018 ນີ້ ທີ່​ກົມ​ພາ­ສີ ກະ­ຊວງ​ການ​ເງິນ ໄດ້​ຈັດ​ພິ­ທີ​ເຊັນ​ສັນ­ຍາ​ໂຄງ­ການ​ພັດທະ​ນາ​ລະ­ບົບ​ການ​ຈັດ​ເກັບ​ຄ່າ​ທຳ­ນຽມ​ຜູ້­ໂດຍ­ສານ ແລະ ພາ­ຫະ­ນະ​ແບບ​ເອ​ເລັກ​ໂຕ​ນິກ (Smart VAT ໄລ­ຍະ​ທີ 2) ຂອງ​ດ່ານ​ພາ­ສີ​ສາ­ກົນ​ຂົວ​ມິດ­ຕະ­ພາບ I ລະ­ຫວ່າງ​ກົມ​ພາ­ສີ​ອາ­ກອນ​ກະ­ຊວງ​ການ​ເງິນ ແລະ ທະ­ນາ­ຄານ​ການ​ຄ້າ​ຕ່າງ­ປະ­ເທດ​ລາວ​ມະ­ຫາ­ຊົນ (ທຄຕລ) ໂດຍ​ຕາງ­ໜ້າ​ລົງ​ນາມ​ແມ່ນ​ທ່ານ ບຸນ​ປະ­ເສີດ ສີ​ກຸນ­ລະ­ບຸດ ຮັກ­ສາ​ການ​ຫົວ­ໜ້າ​ກົມ​ພາ­ສີ​ກະ­ຊວງ​ການ​ເງິນ ແລະ ທ່ານ ພູ​ຂົງ ຈັນ­ທະ​ຈັກ ຜູ້­ອຳ­ນວຍ­ການ​ໃຫຍ່​ທະ­ນາ­ຄານ​ການ​ຄ້າ​ຕ່າງ­ປະ­ເທດ​ລາວ​ມະ­ຫາ­ຊົນ ພ້ອມ​ບັນ­ດາ​ຄະ­ນະ​ນຳ​ກ່ຽວ­ຂ້ອງ​ເຂົ້າ​ຮ່ວມ.

    ການ​ຊຳ­ລະ​ຄ່າ​ບໍ­ລິ­ການ​ຕ່າງໆ​ຜ່ານ​ລະ­ບົບ​ທະ­ນາ­ຄານ (Bill Payment) ຂອງ ທຄຕລ ໄດ້​ເລີ່ມ​ໃຫ້​ບໍ­ລິ­ການ​ທຳ​ອິດ​ໃນ​ປີ 2009 ເຊິ່ງ​ເຮັດ​ໃຫ້​ບັນ­ດາ​ລູກ​ຄ້າ​ມາ​ໃຊ້​ບໍ­ລິ­ການ​ເພີ່ມ​ຂຶ້ນ​ຢ່າງ​ຕໍ່​ເນື່ອງ ປັດ­ຈຸ­ບັນ ທຄຕລ ໄດ້​ໃຫ້​ບໍ­ລິ­ການ​ຮ່ວມ​ກັບ 24 ພາກ­ສ່ວນ ຄື: ບັນ­ດາ​ບໍ­ລິ­ສັດ ສະ​ຖາ​ບັນ​ການ​ເງິນ​ຈຸ​ລະ​ພາກ ແລະ ທະ­ນາ­ຄານທຸ­ລະ​ກິດ ພິ­ເສດ​ກໍ່​ແມ່ນ​ການ​ຮ່ວມ​ມື​ກັບ​ກົມ​ພາ­ສີ​ກະ­ຊວງ​ການ​ເງິນ ໃນ​ນັ້ນ ໄດ້​ປະ­ກອບ​ຊຳ­ລະ​ຄ່າ​ໄຟ­ຟ້າ ນ້ຳປະ­ປາ ຄ່າ​ໂທລະ­ສັບ ຄ່າ​ພາ­ສີ​ອາ­ກອນ ຄ່າ​ເຄ​ໂບ ບັດ​ນ້ຳ­ມັນ ຄ່າ​ບັດ​ຂ້າມ​ຂົວ​ມິດ­ຕະ­ພາບ ລາວ-ໄທ ແຫ່ງ​ທີ I ຊຳ­ລະ​ຄ່າ​ງວດ​ເຊົ່າ​ສິນ​ເຊື່ອ ແລະ ອື່ນໆ.

    ພາຍ­ຫຼັງ​ເຊັນ​ສັນ­ຍາ​ວ່າ​ດ້ວຍ​ການ​ພັດ­ທະ­ນາ​ລະ­ບົບ​ຈັດ​ເກັບ​ອາ­ກອນ​ມູນ​ຄ່າ​ເພີ່ມ ​ເຄື່ອງ​ຕິດ​ຕົວ​ຜູ້­ໂດຍ­ສານຂາ​ເຂົ້າ ແລະ ຄ່າ​ທຳ­ນຽມ​ຜູ້­ໂດຍ­ສານ ພາ­ຫະ­ນະ​ເຂົ້າ-ອອກ​ທີ່​ດ່ານ​ພາ­ສີ​ສາ­ກົນ​ຂົວ​ມິດ­ຕະ­ພາບ I ໃນ​ວັນ​ທີ 19 ກັນ­ຍາ 2017 ເປັນ​ໄລ­ຍະ​ເກືອບ 1 ປີ­ຜ່ານ­ມາ​ນັ້ນ ການ​ຈັດ​ເກັບ​ອາ­ກອນ​ມູນ​ຄ່າ​ເພີ່ມ​ເຄື່ອງ​ຕິດ​ຕົວ​ຜູ້​ໂດຍສານ​ຂາ​ເຂົ້າ ເຫັນ​ວ່າ​ມີ​ຜົນ​ຕອບ​ຮັບ​ທີ່​ດີ ສ້າງ​ຄວາມ​ສະ­ດວກ​ໃຫ້​ແກ່​ບັນ­ດາ​ພະ­ນັກ­ງານ ແລະ ລູກ​ຄ້າ​ຜູ້​ຊົມໃຊ້ ສ້າງ​ລາຍ​ຮັບ​ໃຫ້​ງົບ­ປະ­ມານ ທັງ​ມີ​ຄວາມ​ໂປ່ງ​ໃສ ແລະ ວ່ອງ­ໄວ.

    ຈາກ​ໝາກ­ຜົນ​ຂອງ​ການ​ຮ່ວມ​ມືປະ­ສານ​ສົມ­ທົບ​ກັນ​ທີ່​ດີ​ໃນ​ໄລ­ຍະ​ຜ່ານ​ມາກົມ​ພາ­ສີ ແລະ ທຄຕລ ກໍ່​ໄດ້​ຕົກ­ລົງ​ເຫັນ​ດີ​ເປັນ​ເອ­ກະ​ພາບ​ກັນ​ກຳ­ນົດ​ການ​ເຊັນ​ສັນ­ຍາ​ຮ່ວມ​ມື​ໃນ “ໂຄງ­ການ​ພັດ­ທະ­ນາ​ລະ­ບົບ​ການ​ຈັດ​ເກັບຄ່າ​ທຳ­ນຽມ​ຜູ້­ໂດຍ­ສານ ແລະ ພາ­ຫະ­ນະ​ແບບ​ເອ​ເລັກ​ໂຕ​ນິກ (Smart VAT ໄລ­ຍະ​ທີ 2) ຂອງ​ດ່ານ​ພາ­ສີ​ສາ­ກົນ​ຂົວ​ມິດ­ຕະ­ພາບ I ລະ­ຫວ່າງ​ກົມ​ພາ­ສີ ກະ­ຊວງ​ການ​ເງິນ ແລະ ທະ­ນາ­ຄານ​ການ​ຄ້າ​ຕ່າງ­ປະ­ເທດ​ລາວ​ມະ­ຫາ­ຊົນ” ຂຶ້ນ​ໃນ​ຄັ້ງ​ນີ້.

    ລະ­ບົບ​ດັ່ງ­ກ່າວ ຈະ​ໄດ້​ນຳ​ໃຊ້​ຕູ້​ບໍ­ລິ­ການ​ອັດ­ຕະ­ໂນ­ມັດ (Kiosk) ຈຳ­ນວນ 10 ຕູ້ ເພື່ອ​ຄິດ­ໄລ່ ແລະ ຮັບ​ຊຳ­ລະ​ຄ່າ​ທຳ­ນຽມ​ສຳ­ລັບ​ຜູ້­ໂດຍ­ສານ ແລະ ພາ­ຫະ­ນະ​ທີ່​ເດີນ­ທາງ​ເຂົ້າ-ອອກ​ປະ­ເທດ ຜ່ານ​ທາງ​ດ່ານ​ພາ­ສີ​ສາ­ກົນ​ຂົວ​ມິດ­ຕະ­ພາບ I ນະ­ຄອນ­ຫຼວງ​ວຽງ​ຈັນ ໂດຍ​ຕູ້​ບໍ­ລິ­ການ​ອັດ­ຕະ­ໂນ­ມັດ​ດັ່ງ­ກ່າວ ແມ່ນ​ສາ­ມາດ​ສະ​ແກນປຶ້ມ​ຜ່ານ​ແດນ ພາ​ສ​ປອດ ແລະ ເອ­ກະ­ສານ​ລົດ ເພື່ອ​ຄິດ­ໄລ່​ຄ່າ​ບໍ­ລິ­ການ ແລະ ສາ­ມາດ​ຊຳ­ລະ​ດ້ວຍ​ເງິນ­ສົດ ບັດ ATM ທຄຕລ ຜ່ານ​ແອັບ​ພລີ​ເຄ​ຊັນ BCEL one ແລະ ຜ່ານ​ຕູ້​ອັດ­ຕະ­ໂນ­ມັດ​ໄດ້​ທັນ­ທີ ເຊິ່ງ​ຈະ​ໄດ້​ມີ​ການ​ທົດ​ລອງ​ນຳ​ໃຊ້​ໃນ​ກາງ​ເດືອນ​ຕຸ­ລາ ແລະ ເປີດ​ນຳ​ໃຊ້​ຢ່າງ​ເປັນ​ທາງ​ການ​ໃນ​ເດືອນ​ພະ­ຈິກ 2018 ນີ້.

ຂ່າວທີ່ກ່ຽວຂ້ອງ