ຂ່າວຫຼ້າສຸດ

ຢາບ້າ-ຂີ້ລັກ

639 24 ສ.ຫ. 2018 ນານາສາລະ

    ການ​ແກ້​ໄຂ​ບັນ­ຫາ​ການ​ຂີ້­ລັກ​ງັດ​ແງະ​ໃນ​ບາງ​ບ້ານ​ຍັງ​ແກ້​ບໍ່​ຕົກ ເຊິ່ງ​ເວົ້າ​ແບບ​ກົງ​ໄປ​ກົງ​ມາ​ກໍ່​ແມ່ນ​ພວກ​ຕິດ​ຢາ​ບ້າ ແລ້ວ​ຊອກ​ຫາ​ຂີ້­ລັກ​ເອົາ​ຊັບ​ສິນ​ຂອງ​ປະ­ຊາ­ຊົນ ເຊິ່ງ​ມີ​ພໍ່​ແມ່​ຜູ້​ປົກ­ຄອງ​ໃຫ້​ທ້າຍ ຫຼື ຮູ້​ເຫັນ​ເປັນ­ໃຈ ບໍ່​ຍອມ​ເປີດ­ເຜີຍ​ຄວາມ​ຈິງ​ໃຫ້​ເຈົ້າ​ໜ້າ­ທີ່​ຮັບ​ຮູ້ (ປິດ​ບັງ-ເຊື່ອງ​ໄວ້) ຜູ້​ຂຽນ​ບໍ່​ຂໍ​ອ້າງ​ເຖິງ​ຂ່າວ​ໃນ​ໜ້າ​ໜັງ­ສື­ພິມ ແຕ່​ຢາກ​ນຳ​ສະ­ເໜີ​ແລກ­ປ່ຽນ ຍ້ອນ​ວ່າ​ເປັນ​ປະ­ຊາ­ຊົນ​ອາ­ໄສ​ໃນ​ນະ­ຄອນ­ຫຼວງ ເຊິ່ງ​ໄດ້​ຮູ້​ເຫັນ​ພຶດ­ຕິ​ກຳ​ຂອງ​ພວກ​ຢາ​ບ້າ ແລະ ຂີ້­ລັກ ບາງ​ກໍ­ລະ­ນີ.

    ສຳ­ລັບ​ການ­ຈັດ­ຕັ້ງ​ເມືອງ ແລະ ບ້ານ ຄົງ​ຈະ​ແມ່ນ​ການ­ຈັດ­ຕັ້ງ​ສາ­ມາດ​ແກ້​ໄຂ​ຄວບ​ຄຸມ​ໄດ້​ຢ່າງ​ເດັດ­ຂາດ ເພາະ​ຍົກ​ຕົວ­ຢ່າງ​ພາຍ​ໃນ​ບ້ານ​ຈະ​ມີ​ລະ­ບົບ​ການ­ຈັດ­ຕັ້ງ​ເປັນ​ຈຸ ເປັນ​ໜ່ວຍ ຖ້າ­ວ່າ​ເຮົາ​ລົງ​ເຮັດ​ວຽກ​ກັບ​ແຕ່​ລະ​ຄອບ­ຄົວ​ແບບ​ໜ້າ​ກະ­ດານ ຄື​ມີ​ການ​ສຳ​ຫຼວດ​ທຸກ​ຄອບ­ຄົວ​ແບບ​ຊັດ​ເຈນ ເກັບ​ກຳ​ສະ­ຖິ­ຕິ-ກວດ­ກາ ເບິ່ງ​ພຶດ­ຕິ​ກຳ​ຂອງ​ໄວ​ລຸ້ນ (ເຍົາ­ວະ​ຊົນ) ອອກ​ໂຮງ­ຮຽນ-ພໍ່​ແມ່​ບໍ່​ສົ່ງ­ເສີມ (ປະ­ເພດ​ຜູ້​ປົກ­ຄອງ​ເອົາ​ບໍ່​ຢູ່) ພຶດ­ຕິ​ກຳ​ຂອງ​ພວກ​ໄວ​ລຸ້ນ​ດັ່ງ­ກ່າວ ຍາມ​ກາງ­ເວັນ​ກໍ່​ມີ​ແຕ່​ນອນ ບາດ​ຕອນ​ຫົວ­ຄ່ຳ​ຊອດ​ແຈ້ງ​ຜັດ​ອອກ​ເລາະ​ທ່ຽວ ເຊິ່ງ​ພໍ່​ແມ່​ຜູ້​ປົກ­ຄອງ​ບາງ​ຄົນ ນອກ­ຈາກ​ບໍ່​ສົນ​ແລ້ວ​ຍັງ​ມີ​ສ່ວນ​ໃຫ້​ທ້າຍ​ຊ້ຳ ຖ້າ­ວ່າ​ຈຸ ຫຼື ໜ່ວຍ​ຮ່ວມ​ມື​ກັບ​ເຈົ້າ​ໜ້າ­ທີ່​ຕຳ­ຫຼວດ ພາ­ກັນ​ລົງ​ກວດ­ກາ​ລອງ​ເບິ່ງ​ແລ້ວ ກ່າວ​ວ່າ​ຕັກ­ເຕືອນ​ພວກ​ດັ່ງ­ກ່າວ ທັງ​ແຈ້ງ​ເຕືອນ​ພໍ່​ແມ່​ຜູ້​ປົກ­ຄອງ​ໃຫ້​ຮັບ­ຜິດ­ຊອບ​ລູກ​ຫຼານ​ຂອງ​ຕົນ​ຢ່າງ​ເຂັ້ມ​ງວດ ຢ່າ​ລືມ​ວ່າ ຢາ​ບ້າ ບໍ່​ມີ​ພຽງ​ໄວ​ລຸ້ນ​ເຍົາ­ວະ​ຊົນ​ເທົ່າ​ນັ້ນ​ທີ່​ຕິດ ແຕ່​ຜູ້​ໃຫຍ່​ອາ­ຍຸ​ສີ່​ຫ້າ​ສິບ​ຮອດ​ເຈັດ​ສິບ​ກໍ່​ຕິດ​ຢາ​ບ້າ​ຄື​ກັນ.

    ພວກ​ຂີ້­ລັກ-ຕິດ​ຢາ​ບ້າ ຈະ​ມີ​ພຶດ­ຕິ​ກຳ​ລະ​ແວງ​ສົງ­ໄສ ເວ­ລາ​ຈັບ​ກຸ່ມ​ກັນ​ໂອ້​ລົມ​ສາຍ­ຕາ​ວອກ​ແວກ ທັງໆ​ທີ່​ພໍ່​ແມ່​ຜູ້​ປົກ­ຄອງ​ກໍ່​ຮູ້​ພຶດ­ຕິ​ກຳ​ແບບ​ນີ້​ຢູ່​ເຕັມ​ເອິກ ແຕ່​ບໍ່​ສົນ­ໃຈ ເຊິ່ງ​ເຈົ້າ​ໜ້າ­ທີ່​ຄວນ​ກ່າວ​ເຕືອນ-ສຶກ​ສາ​ອົບ­ຮົມ​ເຂົາ­ເຈົ້າ ພ້ອມ​ກັນ​ລົງ​ກວດ­ກາ​ຢ່າງ​ຈິງ​ຈັງ ແຕ່​ລະ​ຫຼັງ­ຄາ​ເຮືອນ ຫຼີກ­ເວັ້ນ​ເຮັດ​ແບບ​ມ້າມ​ແປະ​ພຸງ ພວກ​ໄວ​ລຸ້ນ​ທີ່​ຕິດ​ຢາ​ບ້າ ແລະ ຂີ້­ລັກ ຈະ​ມີ​ການ​ວາງ​ແຜນ​ຮ່ວມ​ຫົວ​ກັນ ຍົກ​ຕົວ­ຢ່າງ ຄຸ້ມ​ໜຶ່ງ​ຈະ​ບໍ່​ລົງ­ມື​ລັກ​ໃນ​ເຂດ​ຄຸ້ມ​ຕົນ​ເອງ ເພາະ​ມີ​ຄົນ​ຈື່​ໜ້າ ຈຶ່ງ​ໄປ​ຊອກ​ລົງ­ມື​ລັກ​ເຂດ​ຄຸ້ມ​ອື່ນ ເຂົ້າ​ໃນ​ລັກ­ສະ­ນະ​ຜີ​ບ້ານ​ພ້ອມ​ຜີ​ປ່າ ພວກ​ບໍ່​ລົງ­ມື​ລັກ ແຕ່​ວາງ​ແຜນ​ເອົາ​ຂໍ້​ມູນ​ຊີ້​ທາງ​ໃຫ້​ໝູ່​ຢູ່​ບ້ານ​ອື່ນ​ມາ​ລັກ ພຶດ­ຕິ​ກຳ​ດັ່ງ­ກ່າວ ເຊິ່ງ​ພໍ່​ແມ່​ກໍ່​ບໍ່​ສົນ­ໃຈ​ນຳ ເບິ່ງ​ຄື​ວ່າ​ເປັນ​ການ​ໃຫ້​ທ້າຍ​ກັນ ຈຶ່ງ​ຝາກ​ເຖິງ​ເຈົ້າ​ໜ້າ­ທີ່​ກ່ຽວ­ຂ້ອງ​ລອງ​ລົງ​ກວດ­ກາ​ລະ­ອຽດ​ຖີ່​ຖ້ວນ ເພື່ອ​ຄ້ຳ­ປະ­ກັນ​ຄວາມ​ສະ­ຫງົບ​ປອດ​ໄພ​ຂອງ​ປະ­ຊາ­ຊົນ​ພາຍ​ໃນ​ບ້ານ​ເມືອງ!.

ຂ່າວທີ່ກ່ຽວຂ້ອງ