ຂ່າວຫຼ້າສຸດ

ນະຄອນຫຼວງວຽງຈັນ ສະເຫຼີມສະຫຼອງວັນຢຶດອຳນາດ ຄົບຮອບ 43 ປີ

883 24 ສ.ຫ. 2018 ຂ່າວໜ້າ​ໜຶ່ງ
ນະຄອນຫຼວງວຽງຈັນ ສະເຫຼີມສະຫຼອງວັນຢຶດອຳນາດ ຄົບຮອບ 43 ປີ

    ນະ­ຄອນ­ຫຼວງ​ວຽງ​ຈັນ (ນວ) ຈັດ​ພິ­ທີ​ສະ­ເຫຼີມ­ສະ­ຫຼອງ​ວັນ​ຢຶດ​ອຳ­ນາດ ຄົບ­ຮອບ 43 ປີ (23 ສິງ­ຫາ 1975-23 ສິງ­ຫາ 2018) ຂຶ້ນ​ໃນ​ວັນ​ທີ 23 ສິງ­ຫາ 2018 ໂດຍ​ພິ­ທີ​ໄດ້​ເລີ່ມ​ຈາກ​ການ​ຍ່າງ​ມິ​ນິ​ມາ​ຣາ​ທອນ ຈາກ​ສວນ​ປະ­ຕູ​ໄຊ ໄປ​ຕາມ​ຖະ­ໜົນ 23 ສິງ­ຫາ-ສະ­ໜາມ​ຫຼວງ ໄລ­ຍະ​ທາງ 3 ກິ­ໂລ­ແມັດ ມີ​ຜູ້​ເຂົ້າ​ຮ່ວມ 1.000 ກວ່າ​ຄົນ ຈາກ​ນັ້ນ ຄະ­ນະ​ພັກ ສະ­ພາ​ປະ­ຊາ­ຊົນ ແລະ ອົງ­ການ​ປົກ­ຄອງ ນວ ນຳ​ໂດຍ​ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ກໍ່​ໄດ້​ເຂົ້າ​ວາງ​ພວງ­ມາ­ລາ​ຢູ່​ອະ­ນຸ­ສາ­ວະ­ລີ​ນັກ­ຮົບ​ນິ­ລະ­ນາມ (ດາວ​ແດງ) ແລະ ກະ­ຕ່າ​ດອກ​ໄມ້​ຢູ່​ອະ­ນຸ­ສອນ​ສະ­ຖານ​ປະ­ທານ ໄກ­ສອນ ພົມ­ວິ­ຫານ ເພື່ອ​ລະ­ນຶກ​ເຖິງ​ຄຸນ­ງາມ­ຄວາມ­ດີ​ຂອງ​ນັກ­ຮົບ​ປະ­ຕິ­ວັດ ແລະ ຜູ້​ເສຍ­ສະ­ຫຼະ​ຊີ­ວິດ​ເພື່ອ​ປະ­ເທດ​ຊາດ.

    ວັນ​ທີ 23 ສິງ­ຫາ ເປັນ​ວັນ​ທີ່​ມີ​ຄວາມ​ໝາຍ​ຄວາມ​ສຳ­ຄັນ​ທາງ​ປະ­ຫວັດ­ສາດ​ຂອງ​ປວງ​ຊົນ​ລາວ​ທັງ​ຊາດ ທີ່​ລຸກ​ຮື້​ຂຶ້ນ​ຢຶດ​ເອົາ​ອຳ­ນາດ​ການ​ປົກ­ຄອງ​ໃນ​ຂອບ​ເຂດ​ທົ່ວ​ປະ­ເທດ ແມ່ນ​ວັນ​ທີ່​ຊາວ​ນະ­ຄອນ­ຫຼວງ​ວຽງ​ຈັນ ຈັດ​ງານ​ໂຮມ​ຊຸມ­ນຸມ​ໃຫຍ່​ຢູ່​ສະ­ໜາມ​ຫຼວງ ເພື່ອ​ປະ­ກາດ​ລົບ​ລ້າງ​ລະ­ບອບ​ຣາ​ຊາ​ທິ​ປະ​ໄຕ ແລະ ລະ­ບອບ​ລ່າ​ເມືອງ​ຂຶ້ນ​ຂອງ​ຈັກ­ກະ­ພັດ​ຜູ້​ຮຸກ​ຮານ ສ້າງ­ຕັ້ງ​ອຳ­ນາດ​ການ​ປົກ­ຄອງ​ປະ­ຕິ­ວັດ​ຂຶ້ນ ໄຊ­ຊະ­ນະ​ຂອງ​ວັນ​ທີ 23 ສິງ­ຫາ 1975 ແມ່ນ​ໄຊ­ຊະ­ນະ​ອັນ​ຍິ່ງ​ໃຫຍ່​ທີ່​ບໍ່​ເຄີຍ​ມີ​ມາ​ກ່ອນ ເຊິ່ງ​ບໍ່​ພຽງ​ແຕ່​ເປັນ​ບາດ​ລ້ຽວ​ແຫ່ງ​ການ​ຜັນ​ແປ ແລະ ການ​ຂຽນ​ບັນ­ທຶກ​ໃນ​ໜ້າ​ປະ­ຫວັດ­ສາດ​ຍຸກ​ໃໝ່​ຂອງ​ຊາວ​ນະ­ຄອນ­ຫຼວງ​ວຽງ​ຈັນ ເທົ່າ​ນັ້ນ ແຕ່​ແມ່ນ​ໄຊ­ຊະ­ນະ​ລວມ​ຂອງ​ປະ­ຊາ­ຊົນ​ລາວ​ທັງ​ຊາດ ຍ້ອນ​ວ່າ​ໄຊ­ຊະ­ນະ​ດັ່ງ­ກ່າວ ໄດ້​ກາຍ­ເປັນ​ຂີດ​ໝາຍ​ແຫ່ງ​ການ​ສະ­ຫຼຸບ​ມ້ວນ­ທ້າຍ ຂອງ​ການ​ຢຶດ​ອຳ­ນາດ​ການ​ປົກ­ຄອງ​ເກົ່າ ທີ່​ຄອບ​ງຳ​ມາ​ເປັນ​ເວ­ລາ​ຍາວ​ນານ ແລະ ສ້າງ­ຕັ້ງ​ອຳ­ນາດ​ການ​ປົກ­ຄອງ​ປະ­ຕິ­ວັດ​ຂຶ້ນ​ມາ​ແທນ ຢູ່​ໃນ​ຂອບ​ເຂດ​ທົ່ວ​ປະ­ເທດ.

    ໂອ­ກາດ​ນີ້ ທ່ານ​ເຈົ້າ​ຄອງ ນະ­ຄອນ­ຫຼວງ​ວຽງ​ຈັນ ກໍ່​ໄດ້​ເນັ້ນ​ໃຫ້​ເອົາ­ໃຈ­ໃສ່​ສືບ­ຕໍ່​ຈັດ​ຕັ້ງ​ຜັນ​ຂະ­ຫຍາຍ​ຄຳ​ສອນ​ຂອງ​ຜູ້­ນຳ​ພັກ-ລັດ ຂອງ ນວ ໂດຍ​ສະ­ເພາະ 4 ມູນ­ເຊື້ອ​ໃຫຍ່ ຄື: ມູນ­ເຊື້ອ​ພິ­ລາດ​ອາດ​ຫານ ມູນ­ເຊື້ອ​ແຫ່ງ​ຄວາມ​ສາ­ມັກ­ຄີ​ປອງ​ດອງ ມູນ­ເຊື້ອ​ຄວາມ​ຮັກ​ຊາດ​ຢ່າງ​ດູດ­ດື່ມ ແລະ ມູນ­ເຊື້ອ​ແຫ່ງ​ຄວາມ​ເປັນ​ຕົວ​ແທນ​ຂອງ​ປະ­ຊາ­ຊົນ​ລາວ​ທົ່ວ​ປະ­ເທດ ກໍ່​ຄື ມູນ­ເຊື້ອ​ຂອງ​ຄົນ​ເມືອງ​ຫຼວງ ສະ­ນັ້ນ ໃນ​ຖາ­ນະ​ເປັນ​ຄົນ​ເມືອງ​ຫຼວງ​ຂໍ​ຮຽກ­ຮ້ອງ​ໃຫ້​ບັນ­ດາ​ທ່ານ​ພ້ອມ​ກັນ​ແຂ່ງ­ຂັນ​ຮັກ​ຊາດ ແລະ ພັດ­ທະ­ນາ ຕິດ​ພັນ​ກັບ​ຮັກ​ເມືອງ​ວຽງ​ຈັນ ພ້ອມ​ກັນ​ສ້າງ​ເມືອງ​ວຽງ​ຈັນ​ໃຫ້​ເປັນ​ເມືອງ​ໜ້າ​ຢູ່ ແລະ ຍືນ​ຍົງ​ຕະ­ຫຼອດ​ໄປ.

ຂ່າວທີ່ກ່ຽວຂ້ອງ