ຂ່າວຫຼ້າສຸດ

ອິດ​ສະ​ຣາ​ແອນ ຮັບຮອງ​ແຜນການ​ກໍ່ສ້າງ​ເຮືອນ 1.000 ກວ່າ​ຫຼັງ​ຢູ່​ໃນ​ເຂດ​ຝັ່ງ​ຕາເວັນຕົກ

213 24 ສ.ຫ. 2018 ຂ່າວຕ່າງປະເທດ
ອິດ​ສະ​ຣາ​ແອນ ຮັບຮອງ​ແຜນການ​ກໍ່ສ້າງ​ເຮືອນ 1.000 ກວ່າ​ຫຼັງ​ຢູ່​ໃນ​ເຂດ​ຝັ່ງ​ຕາເວັນຕົກ

    Peace Now ທີ່​ເປັນ​ອົງການ​ບໍ່​ຂຶ້ນ​ກັບ​ລັດຖະບານ ແຈ້ງ​ໃຫ້​ຮູ້​ວ່າ ເມື່ອ​ວັນ​ທີ 22 ສິງຫາ​ນີ້ ເຈົ້າ​ໜ້າທີ່​ອິດ​ສະ​ຣາ​ແອນ ໄດ້​ຮັບຮອງ​ແຜນການ​ກໍ່ສ້າງ​ເຮືອນ​ຢູ່​ຈຳນວນ 1.000 ກວ່າ​ຫຼັງ ຢູ່​ໃນ​ເຂດ ຢຶດ​ຄອງ​ໃນ​ບໍລິເວນ​ຝັ່ງ​ຕາເວັນຕົກ​ແມ່ນ້ຳ​ຈໍ​ແດນ.

    ແຜນການ​ດັ່ງກ່າວ​ໄດ້​ຮັບ​ການ​ຮັບຮອງ​ໂດຍ ຄະນະ​ກຳ​ມະ​ຫານ​ໜຶ່ງ​ໃນ​ກະຊວງ​ປ້ອງ​ກັນ ປະເທດ ອິດ​ສະ​ຣາ​ແອນ. ແຜນການ​ນີ້​ປະກອບ​ມີ​ເຮືອນ​ໃໝ່ 370 ຫຼັງ ຢູ່​ໃນ​ເຂດ​ຕັ້ງ​ຖິ່ນ​ຖານ ອາ​ດາມ ໃນ​ເຂດ​ຝັ່ງ​ຕາເວັນ​ຕົກ​​ມ່​ນ້ຳ​ຈໍ​ແດນ ບ່ອນ​ຊຶ່ງ​ຊາວ​ອິດ​ສະ​ຣາ​ແອນ 3 ຄົນ ຖືກ​ຊາວ ປາ​ແລັດ​ສະ​ຕິນ​ຜູ້​ໜຶ່ງ​ໂຈມ​ຕີ​ດ້ວຍ​ມີດ ເມື່ອ​ເດືອນ​ກໍລະກົດ​ທີ່​ຜ່ານ​ມາ ໃນ​ນັ້ນ​ມີ​ຜູ້​ເສຍ​ຊີວິດ 1 ຄົນ.

    ການ​ກໍ່ສ້າງ​ເຂດ​ຕັ້ງ​ຖິ່ນ​ຖານ ນັບ​ວ່າ​ເປັນ​ໜຶ່ງ​ໃນ​ບັນດາ​ບັນຫາ “ຮ້ອນຮົນ” ທີ່​ສຸດ ເປັນ​ການ ກີດຂວາງ​ຕໍ່​ການ​ກັບ​ມາ​ເຄື່ອນ​ໄຫວ​ການ​ເຈລະຈາ​ສັນຕິພາບ ລະຫວ່າງ​ອິດ​ສະ​ຣາ​ແອນ ກັບ ປາ​ແລັດ​ສະ​ຕິນ ຊຶ່ງ​ໄດ້​ຢຸດ​ມາ​ຕັ້ງແຕ່​ປີ 2014. ຝ່າຍ​ປາ​ແລັດ​ສະ​ຕິນ​ຢາກ​ໃຫ້​ຝັ່ງ​ຕາເວັນຕົກ​ແມ່ນ້ຳ ຈໍ​ແດນ ພ້ອມ​ກັບ ເຈ​ຣູ​ຊາ​ແລມ​ຕາເວັນ​ອອກ ແລະ ​ແຫຼມ​ກາ​ຊາ ຂຶ້ນ​ກັບ​ລັດ​ປາ​ແລັດ​ສະ​ຕິນ ໃນ​ອະນາຄົດ.

    ສ່ວນ​ໃຫຍ່​ຂອງ​ບັນດາ​ປະເທດ​ໃນ​ໂລກ ຖື​ວ່າ​ບັນດາ​ເຂດ​ຕັ້ງ​ຖິ່ນ​ຖານ ຊຶ່ງ​ອິດ​ສະ​ຣາ​ແອນ ກໍ່ສ້າງ​ຢູ່​ໃນ​ເຂດ​ດິນແດນ​ຢຶດ​ຄອງ​ລະຫວ່າງ​ສົງຄາມ​ຕາເວັນ​ອອກ​ກາງ ເມື່ອ​ປີ 1967 ນັ້ນ​ເປັນ​ເລື່ອງ​ທີ່ ຜິດ​ກົດໝາຍ. ໃນ​ຂະນະ​ດຽວ​ກັນ ອິດ​ສະ​ຣາ​ແອນ​ຖືວ​​່າ​ທົ່ວ​ທັງ​ນະຄອນ ເຈ​ຣູ​ຊາ​ແລມ ເປັນ​ນະ​ຄອນ​​ຫຼວງ “ຕະຫຼອດ​ການ ແລະ​ ບໍ່​ສາມາດ​ຕັດ​ແບ່ງ​ໄດ້” ຂອງ​ຕົນ ພ້ອມ​ທັງ​ໃຫ້​ທັດສະນະ​ວ່າ ອະນາຄົດ​ຂອງ​ບັນດາ​ເຂດ​ຕັ້ງ​ຖິ່ນ​ຖານ ຕ້ອງ​ໄດ້​ຮັບ​ການ​ຕົກລົງ​ຢູ່​ໃນ​ການ​ເຈລະຈາ​ກັບ​ປາ​ແລັດ​ສະ​ຕິນ.

    ປັດຈຸບັນ​ນີ້ ມີ​ຊາວ​ອິດ​ສະ​ຣາ​ແອນ ປະມານ 500.000 ຄົນ ດຳລົງ​ຊີວິດ ຢູ່​ໃນ​ເຂດ​ຝັ່ງ​ຕາເວັນຕົກ​ແມ່ນ້ຳ​ຈໍ​ແດນ ແລະ ​ເຈ​ຣູ​ຊາ​ແລມ​ຕາເວັນ​ອອກ. ໃນ​ຂະນະ​ດຽວ​ກັນ ຢູ່​ໃນ​ບັນດາ​ເຂດ​ດັ່ງກ່າວ ມີ​ຊາວ​ປາ​ແລັດ​ສະ​ຕິນ ດຳລົງ​ຊີວິດ​ຢູ່​ປະມານ 2,6 ລ້ານ​ຄົນ.

ຂ່າວທີ່ກ່ຽວຂ້ອງ