ລາວ-ຮົງກາຣີ ຊຸກຍູ້ສົ່ງເສີມການພັດທະນາວຽກງານກະສິກໍາ

183 24 ສ.ຫ. 2018 ຂ່າວໜ້າ​ໜຶ່ງ
ລາວ-ຮົງກາຣີ ຊຸກຍູ້ສົ່ງເສີມການພັດທະນາວຽກງານກະສິກໍາ

    ເພື່ອ​ເປັນ​ການ​ຮ່ວມ​ມື ລະ­ຫວ່າງ ລາວ ແລະ ຮົງ​ກາ​ຣີ ໃນ​ການ​ພັດ­ທະ­ນາ​ຂົງ­ເຂດ​ວຽກ​ງານ​ກະ­ສິ­ກຳ ແລະ ການ​ລ້ຽງ­ສັດ​ນ້ຳ ໄດ້​ມີ​ມາ​ແຕ່​ປີ 2008 ເປັນ­ຕົ້ນ​ມາ ເຊິ່ງ​ການ​ຮ່ວມ​ມື​ສອງ​ຝ່າຍ​ໄດ້​ກ້າວ​ເຂົ້າ​ສູ່​ລວງ​ເລິກ ແລະ ເປັນ​ຮູບ​ປະ​ທຳ​ຫຼາຍ​ຂຶ້ນ ວັນ​ທີ 21 ສິງ­ຫາ 2018 ທ່ານ  ພວງ​ປາ​ຣິ​ສັກ ປຣະ​ວົງ​ວຽງ​ຄຳ ຮອງ​ລັດ­ຖະ­ມົນ­ຕີ ກະ­ຊວງ​ກະ­ສິ­ກຳ ແລະ ປ່າ­ໄມ້ ແລະ ທ່ານ ວຽງ​ທະ­ວີ​ສອນ ເທບ​ພະ­ຈັນ ຮອງ​ປະ­ທານ​ກຳ­ມາ​ທິ​ການ​ການ​ຕ່າງ­ປະ­ເທດ ສະ­ພາ​ແຫ່ງ​ຊາດ ພ້ອມ​ດ້ວຍ​ຄະ­ນະ ຈາກ​ກົມ​ກ່ຽວ­ຂ້ອງ​ໄດ້​ເດີນ­ທາງ​ໄປ​ຢ້ຽມ­ຢາມ​ບັນ­ດາ​ໂຄງ­ການ​ຮ່ວມ​ມື​ລາວ-ຮົງ​ກາ​ຣີ​ທີ່​ເມືອງ​ນາ​ຊາຍ​ທອງ ນະ­ຄອນ­ຫຼວງ​ວຽງ​ຈັນ.

 ການ​ໄປ​ຢ້ຽມ­ຢາມ​ຄັ້ງ​ນີ້​ເພື່ອ​ປະ­ຕິ­ບັດ​ຕາມ​ແນວ­ທາງ​ຂອງ​ລັດ­ຖະ­ບານ​ກ່ຽວ​ກັບ​ການ​ສົ່ງ­ເສີມ​ເຮັດ​ທຸ­ລະ​ກິດ​ລະ­ຫວ່າງ ລັດ ແລະ ເອ­ກະ​ຊົນ​ໃຫ້​ປາ­ກົດ​ຜົນ​ເປັນ​ຈິງ ບໍ­ລິ­ສັດ​ເອ­ກະ​ຊົນ​ລາວ ແລະ ຮົງ​ກາ​ຣີ ຈຶ່ງ​ໄດ້​ຮ່ວມ​ທຶນ​ເພື່ອ​ດຳ­ເນີນ​ງານ​ການ​ຜະ­ລິດ ໂດຍ​ໃຊ້​ໂຮງ­ງານ​ຂອງ​ລັດ ນັບ​ແຕ່​ປີ 2013 ເປັນ­ຕົ້ນ​ມາ ໃນ​ປີ 2016 ລັດ­ຖະ­ບານ​ໄດ້​ຮັບ​ເງິນ​ກູ້​ຄັ້ງ​ທີ 2 ຈາກ​ປະ­ເທດ​ຮົງ​ກາ​ຣີ 30 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 240 ຕື້​ກີບ ເພື່ອ​ພັດ­ທະ­ນາ​ລະ­ບົບ​ຄວາມ​ປອດ​ໄພ​ໃນ​ຕ່ອງ​ໂສ້​ການ​ຜະ­ລິດ ເຊິ່ງ​ໃນ​ແຜນ​ງານ​ນີ້​ປະ­ກອບ​ດ້ວຍ 3 ເສົາ​ຫຼັກ​ໃຫຍ່ ຄື: ການ​ປັບ­ປຸງ​ກົດ​ລະ­ບຽບ​ຕ່າງໆ​ໃຫ້​ສອດ­ຄ່ອງ​ກັບ​ລະ­ບົບ​ສາ­ກົນ ພ້ອມ​ການ​ປັບ­ປຸງ​ສະ​ຖາ​ບັນ​ຕ່າງໆ​ທີ່​ກ່ຽວ­ຂ້ອງ ການ​ບູ­ລະ­ນະ ແລະ ປັບ­ປຸງ​ຫ້ອງ​ວິ­ໄຈ​ທີ່​ໄດ້​ມາດ­ຕະ­ຖານ​ສາ­ກົນ ຈຸດ​ກວດ­ກາ​ຕ່າງໆ​ຕາມ​ດ່ານ​ຊາຍ​ແດນ ການ​ສ້າງ​ພື້ນ­ຖານ​ໂຄງ​ລ່າງ​ທີ່​ກ່ຽວ­ຂ້ອງ  ການ​ພັດ­ທະ­ນາ​ລະ­ບົບ​ເຮັດ​ຟາມ​ແບບ​ບູ​ລະ​ນາ​ການ​ເພື່ອ​ທົດ​ລອງ ແລະ ສາ­ທິດ​ການ​ນຳ​ໃຊ້​ລະ­ບົບ​ຄວາມ​ປອດ​ໄພ​ໃນ​ຕ່ອງ​ໂສ້​ຜະ­ລິດ​ອາ­ຫານ ໝາຍ​ເຖິງ​ນັບ​ແຕ່​ຂັ້ນ​ຕອນ​ການ​ຜະ­ລິດ​ຕ່າງໆ​ຈົນ​ເຖິງ​ການ­ຈຳ­ໜ່າຍ​ເຂົ້າ​ສູ່​ຕະ­ຫຼາດ ໂດຍ​ສະ­ເພາະ ແມ່ນ​ຜະ­ລິດ​ຕະ​ພັນ​ຊີ້ນ ແລະ ປາ ເຊິ່ງ​ຕິດ​ພັນ​ໂດຍ​ກົງ​ກັບ​ເສົາ​ຫຼັກ​ທີ 3 ຈະ​ເປັນ​ຕົວ​ແບບ​ໃນ​ການ​ຜະ­ລິດ​ຕົວ​ຈິງ ທັງ​ພາຍ​ໃນ​ຟາມ​ຂອງ​ບໍ­ລິ­ສັດ ກໍ່​ຄື ການ​ສົ່ງ­ເສີມ​ປະ­ຊາ­ຊົນ​ທຳ​ການ​ຜະ­ລິດ.

    ຫຼັງ​ຈາກ​ນັ້ນ ຄະ­ນະ​ໄດ້​ເດີນ­ທາງ​ໄປ​ຢ້ຽມ­ຢາມ​ສູນ​ຂະ­ຫຍາຍ​ພັນ​ປາ​ນ້ຳ​ຫຸມ ສູນ​ດັ່ງ­ກ່າວ​ເປັນ​ບ່ອນ​ຜະ­ລິດ​ລູກ​ປາ​ທີ່​ມີ​ຄຸ­ນະ­ພາບ ມີ​ລະ­ບົບ​ການ​ຈັດ­ການ​ນ້ຳ ຄັດ​ເລືອກ​ພໍ່​ແມ່​ແນວ​ພັນ​ປາ​ທີ່​ມີ​ຄຸ­ນະ­ພາບ​ສູງ ລວມ​ທັງ​ມີ​ອ່າງ​ອະ­ນຸ­ບານ ຫ້ອງ​ວິ­ໄຈ​ທີ່​ຄົບ​ວົງ​ຈອນ ເຊິ່ງ​ສາ­ມາດ​ຜະ­ລິດ​ລູກ​ປາ​ອອກ​ສູ່​ຕະ­ຫຼາດ ປະ­ມານ 5 ແສນ ຫາ 1 ລ້ານ​ໂຕ​ຕໍ່​ເດືອນ ແລະ ເດີນ­ທາງ​ໄປ​ຢ້ຽມ­ຢາມ​ໂຮງ­ງານ​ອາ­ຫານ​ສັດ​ທີ່​ບ້ານ​ໜອງ​ແຕ່ງ ເປັນ​ໂຮງ­ງານ​ທັນ​ສະ­ໄໝ​ແຫ່ງ​ໜຶ່ງ​ທີ່​ມີ​ການ​ກວດ​ສອບ ຄັດ​ແຍກ ຈັດ​ເກັບ ແລະ ບັນ­ຈຸ​ຄົບ​ວົງ​ຈອນ ມີ​ກຳ­ລັງ​ການ​ຜະ­ລິດ​ອາ­ຫານ​ສັດ​ສູງ​ສຸດ​ປະ­ມານ 18.000 ໂຕນ​ຕໍ່​ປີ.

ຂ່າວທີ່ກ່ຽວຂ້ອງ