ຂ່າວຫຼ້າສຸດ

ອະດີດ​ປະທານ​ພັກ CNRP ຖືກ​ກັກ​ຂັງ​ຊົ່ວຄາວ​ຕື່ມ​ອີກ 6 ເດືອນ

257 24 ສ.ຫ. 2018 ຂ່າວຕ່າງປະເທດ
ອະດີດ​ປະທານ​ພັກ CNRP ຖືກ​ກັກ​ຂັງ​ຊົ່ວຄາວ​ຕື່ມ​ອີກ 6 ເດືອນ

    ສານ​ສູງ​ສຸດ​ຂອງ​ກຳປູເຈຍ ມີ​ຄຳ​ຕັດສິນ​ອອກ​ມາ​ເມື່ອ​ວັນ​ທີ 22 ສິງຫາ​ນີ້ ໂດຍ​ໄດ້​ປະຕິເສດ ຕໍ່​ການ​ສູ້​ຄະດີ​ຂອງ​ທະນາຍຄວາມ ທີ່​ແກ້ຄວາມ​ໃຫ້​ແກ່​ທ່ານ ເຂມ ໂສ​ຄາ ອະດີດ​ປະທານ​ພັກ​ກູ້​ຊາດ ກຳປູເຈຍ (CNRP) ຊຶ່ງ​ເປັນ​ພັກ​ຝ່າຍ​ຄ້ານ ທີ່​ຖືກ​ຍຸບ​ຕົວ​ໄປ​ແລ້ວ ເມື່ອ​ເດືອນ​ພະຈິກ ປີ 2017.

    ຕາມ​ການ​ຕັດສິນ​ຂອງ​ສານ​ແລ້ວ ທ່ານ ເຂມ ໂສ​ຄາ  ຍັງ​ຄົງ​ຖືກ​ກັກ​ຂັງ​ຊົ່ວຄາວ​ໄປ​ຕື່ມ​ອີກ 6 ເດືອນ ເພື່ອ​ຮັບ​ໃຊ້​ໃຫ້​ແກ່​ການ​ສືບສວນ​ສອບ​ສວນ ດຳເນີນ​ການ​ພິຈາລະນາ​ຄະດີ ຕາມ​ການ​ຕັດສິນ ຂອງ​ບັນດາ​ສານ​ຂັ້ນ​ລຸ່ມ.

   ເຫດຜົນ​ທີ່​ສານ​ສູງ​ສຸດ​ກຳປູເຈຍ ນຳ​ອອກ​ມາ​ກໍ​ແມ່ນ​ກໍລະນີ​ຂອງ​ທ່ານ ເຂມ ໂສ​ຄາ ໄດ້​ຕ້ອງ​ໂທດ​ສົມຮູ້​ຮ່ວມ​ຄິດ​ຢ່າງ​ປິດ​ລັບ​ກັບ​ຕ່າງປະເທດ​ເປັນ​ເວລາ​ຍາວ​ນານ ແຕ່​ປີ 1993-2017 ເປັນ​ການ​ລະເມີດ​ມາດຕາ 443 ຂອງ​ກົດໝາຍ​ອາຍາ​ກຳປູເຈຍ. ດັ່ງນັ້ນ ທ່ານ ເຂມ ໂສ​ຄາ ຈຶ່ງ​ຕ້ອງ​ຖືກ​ກັກ​ຂັງ​ເປັນ​ການ​ຊົ່ວຄາວ ເພື່ອ​ຮັບ​ໃຊ້​ໃຫ້​ແກ່​ວຽກ​ງານ​ສືບ​ສວຍ​ສອບ​ສວນ ຢ່າງ​ລະມັດລະວັງ ແລະ​ຖືກຕ້ອງ.

    ກ່ອນ​ໜ້າ​ນັ້ນ ເມື່ອ​ວັນ​ທີ 7 ພຶດສະພາ​ທີ່​ຜ່ານ​ມາ ສານ​ກໍ​ໄດ້​ປະຕິເສດ​ຕໍ່​ຄຳ​ຮ້ອງ​ຂໍ ອອກ​ໄປ​ຢູ່​ຕ່າງປະເທດ​ຂອງ​ທ່ານ ເຂມ ໂສ​ຄາ. ທ່ານ ເຂມ ໂສ​ຄາ ອາຍຸ 64 ປີ ຖືກ​ຈັບ​ຕົວ​ເມື່ອ​ວັນ​ທີ 3 ກັນຍາ ປີ 2017 ແລະ​ຖືກ​ກັກ​ຂັງ​ເປັນ​ການ​ຊົ່ວຄາວ ນັບ​ແຕ່​ວັນ​ທີ 6 ກັນຍາ ປີ 2017 ຈົນ​ຮອດ ປັດຈຸບັນ. ຈາກ​ການ​ກະທຳ​ຕ້ອງ​ໂທດ​ທີ່​ຖືກ​ກ່າວ​ຫາ​ນັ້ນ ເຂົາ​ອາດ​ຈະ​ຕ້ອງ​ປະ​ເຊີນ​ກັບ​ການ​ຖືກ​ຈຳ​ຄຸກ ເປັນ​ເວລາ​ແຕ່  15-30 ປີ.

 

ຂ່າວທີ່ກ່ຽວຂ້ອງ