ຂ່າວຫຼ້າສຸດ

ກຸ່ມກະສິກຳອິນຊີ ບ້ານທ່າຊ້າງ ສະໜອງຜັກ ໝາກໄມ້ ປ້ອນຕະຫຼາດ 5-6 ໂຕນຕໍ່ອາທິດ

160 24 ສ.ຫ. 2018 ຂ່າວໜ້າ​ໜຶ່ງ
ກຸ່ມກະສິກຳອິນຊີ ບ້ານທ່າຊ້າງ ສະໜອງຜັກ ໝາກໄມ້ ປ້ອນຕະຫຼາດ 5-6 ໂຕນຕໍ່ອາທິດ

    ກຸ່ມ​ກະ­ສິ­ກຳ​ອິນ​ຊີ ບ້ານ​ທ່າຊ້າງ ເມືອງ​ປາກ​ງື່ມ ນະ­ຄອນ­ຫຼວງ​ວຽງ​ຈັນ ເປັນ​ກຸ່ມ​ໜຶ່ງ​ທີ່​ໄດ້​ທຳ​ການ​ຜະ­ລິດ​ກະ­ສິ­ກຳ​ອິນ​ຊີ ສະ­ໜອງ​ຜົນ​ຜະ­ລິດ​ພືດ​ຜັກ ແລະ ໝາກ​ໄມ້ ປ້ອນ​ຕະ­ຫຼາດ​ໄດ້​ເຖິງ 6 ໂຕນ​ຕໍ່​ອາ­ທິດ ນອກ­ຈາກ​ນີ້ ຍັງ​ມີ​ແຜນ​ຂະ­ຫຍາຍ​ສະ­ມາ­ຊິກ ແລະ ເນື້ອ­ທີ່​ການ​ຜະ­ລິດ ເພື່ອ​ແນ­ໃສ່​ເພີ່ມ​ຈຳ­ນວນ​ຜົນ​ຜະ­ລິດ​ສະ­ໜອງ​ຕໍ່​ຜູ້​ບໍ­ລິ­ໂພກ​ໃຫ້​ຫຼາຍ​ຂຶ້ນ.

    ທ່ານ ທັດ­ສະ­ນີ ພິ­ລາ​ວົງ ຄະ­ນະ​ກຸ່ມ​ກະ­ສິ­ກຳ​ອິນ​ຊີ ບ້ານ​ທ່າ​ຊ້າງ ໄດ້​ໃຫ້​ຮູ້­ເມື່ອ​ບໍ່​ດົນ​ຜ່ານ​ມາ​ວ່າ: ກຸ່ມ​ກະ­ສິ­ກຳ​ອິນ​ຊີ ບ້ານ​ທ່າ​ຊ້າງ ສ້າງ­ຕັ້ງ​ຂຶ້ນ​ປີ 2010 ປັດ­ຈຸ­ບັນ​ສາ­ມາດ​ຂະ­ຫຍາຍ​ສະ­ມາ­ຊິກ​ໄດ້ 98 ຄອບ­ຄົວ ເນື້ອ­ທີ່​ທຳ​ການ​ຜະ­ລິດ 102 ເຮັກ­ຕາ ແລະ ຂະ­ຫຍາຍ​ເຮືອນ​ຮົ່ມ​ໄດ້ 300 ກວ່າ​ຫຼັງ ໃນ​ນີ້ ໄດ້​ປູກ​ພືດ​ຜັກ ແລະ ໝາກ​ໄມ້​ພື້ນ​ບ້ານ​ຂອງ​ລາວ​ກວມ 70% ສ່ວນ​ທີ່​ເຫຼືອ​ແມ່ນ​ປູກ​ພືດ​ແນວ​ພັນ​ນຳ​ເຂົ້າ​ຈາກ​ຕ່າງ­ປະ­ເທດ ສະ­ເລ່ຍ​ຜົນ​ຜະ­ລິດ​ໃນ​ລະ­ດູ­ຝົນ​ສາ­ມາດ​ສະ­ໜອງ​ຕະ­ຫຼາດ​ໄດ້ 3-4 ໂຕນ​ຕໍ່​ອາ­ທິດ ສ່ວນ​ລະ­ດູ­ແລ້ງ​ສະ­ໜອງ​ໄດ້ 5-6 ໂຕນ​ຕໍ່​ອາ­ທິດ.

    ຜ່ານ​ການ​ສ້າງ­ຕັ້ງ​ກຸ່ມ​ມາ​ໄດ້ 8 ປີ ແມ່ນ​ມີ​ຄວາມ​ສະ­ດວກ​ຫຼາຍ​ຢ່າງ ໂດຍ​ສະ­ເພາະ ພາກ­ສ່ວນ​ທີ່​ກ່ຽວ­ຂ້ອງ ເຊັ່ນ: ຂະ­ແໜງ​ປູກ­ຝັງ ແລະ ຫ້ອງ­ການ​ກະ­ສິ­ກຳ ແລະ ປ່າ­ໄມ້​ເມືອງ​ໄດ້​ລົງ​ມາ​ຊຸກ­ຍູ້-ສົ່ງ­ເສີມ ​ຊ່ວຍ­ເຫຼືອ​ທາງ​ດ້ານ​ການ​ເຝິກ­ອົບ­ຮົມ ຖ່າຍ​ທອດ​ເຕັກ­ນິກ​ວິ­ຊາ​ການ ເຮັດ​ໃຫ້­ການ​ຜະ­ລິດ​ຂອງ​ພວກ​ເຮົາ​ນັບ​ມື້​ມີ​ຄຸ­ນະ­ພາບ ຄຽງ​ຄູ່​ກັນ​ນີ້ ຜູ້​ບໍ­ລິ­ໂພກ ກໍ່​ມີ​ຄວາມ​ເຊື່ອ​ໝັ້ນ​ໃນ​ຂອດ​ການ​ຜະ­ລິດ​ຫຼາຍ​ຂຶ້ນ ສະ­ແດງ​ອອກ​ຜົນ​ຜະ­ລິດ​ໄດ້​ຂາຍ​ດີ ສ່ວນ​ຂໍ້​ຫຍຸ້ງ­ຍາກ​ສ່ວນ​ໃຫຍ່​ແມ່ນ​ໃນ​ລະ­ດູ­ຝົນ ເພາະ​ສາ­ມາດ​ປູກ​ພືດ​ໄດ້​ແຕ່​ໃນ​ເຮືອນ​ຮົ່ມ​ເທົ່າ​ນັ້ນ ຈຶ່ງ​ເປັນ​ສາ­ເຫດ​ເຮັດ​ໃຫ້​ຍອດ​ການ​ສະ­ໜອງ​ພືດ​ຜັກ ແລະ ໝາກ​ໄມ້​ຫຼຸດ​ລົງ.

    ສຳ­ລັບ​ແຜນ­ການ​ຕໍ່­ໜ້າ ກຸ່ມ​ກະ­ສິ­ກຳ​ອິນ​ຊີ ບ້ານ​ທ່າ​ຊ້າງ ຈະ​ສືບ­ຕໍ່​ຂະ­ຫຍາຍ​ເຮືອນ​ຮົ່ມ​ໃຫ້​ໄດ້​ເພີ່ມ​ຂຶ້ນ ພ້ອມ​ທັງ​ຈະ​ຂະ­ຫຍາຍ​ສະ­ມາ­ຊິກ​ໃຫ້​ໄດ້ 140 ກວ່າ​ຄອບ­ຄົວ ຫຼື ເທົ່າ​ກັບ 100% ຂອງ​ຈຳ­ນວນ​ຄອບ­ຄົວ​ພາຍ​ໃນ​ບ້ານ ເພື່ອ​ສູ້​ຊົນ​ສ້າງ​ໃຫ້​ບ້ານ​ດັ່ງ­ກ່າວ​ເປັນ​ບ້ານ​ກະ­ສິ­ກຳ​ອິນ​ຊີ​ຢ່າງ​ແທ້​ຈິງ.

ຂ່າວທີ່ກ່ຽວຂ້ອງ