ຂ່າວຫຼ້າສຸດ

ເຢຍ​ລະ​ມັນ​ຊ່ວຍເຫຼືອ​ກະສິກອນ​ທີ່​ໄດ້​ຮັບ​ຜົນ​ກະທົບ​ຈາກ​ໄພ​ແຫ້ງແລ້ງ

100 24 ສ.ຫ. 2018 ຂ່າວຕ່າງປະເທດ
ເຢຍ​ລະ​ມັນ​ຊ່ວຍເຫຼືອ​ກະສິກອນ​ທີ່​ໄດ້​ຮັບ​ຜົນ​ກະທົບ​ຈາກ​ໄພ​ແຫ້ງແລ້ງ

    ທ່ານ​ນາງ ຈູ​ເລຍ ໂກຼ​ເອັກ​ເນີ ລັດຖະມົນຕີ​ກະສິກຳ​ຂອງ​ເຢຍ​ລະ​ມັນ ແຈ້ງ​ໃຫ້​ຮູ້ເມື່ອ​ວັນ​ທີ 22 ສິງຫາ​ນີ້​ວ່າ ລັດຖະບານ​ເຢຍ​ລະ​ມັນ ຈະ​ເລີ່ມ​ໂຄງການ​ຊ່ວຍເຫຼືອ​ພິເສດ ເປັນ​ມູນ​ຄ່າ 340 ລ້ານ​ເອີ​ໂຣ ເພື່ອ​ຊ່ວຍເຫຼືອ​ກະສິກອນ ຫຼັງ​ຈາກ​ເກີດ​ໄພ​ແຫ້ງແລ້ງ​ໃນ​ລະດູແລ້ງ​ທີ່​ຜ່ານ​ມາ ເຮັດ​ໃຫ້​ເກີດ ຜົນ​ກະທົບ​ຢ່າງ​ໃຫຍ່​ຫຼວງ ໃຫ້​ແກ່​ລະດູ​ການ​ຜະລິດ.

    ກ່ອນ​ໜ້າ​ນັ້ນ ທ່ານ​ນາງ ຈູ​ເລຍ ໂກຼ​ເອັກ​ເນີ ກໍ​ໄດ້​ເຫັນ​ພ້ອມ​ກັບ​ການ​ສະເໜີ​ຂອງ​ລັດຖະມົນຕີ ການ​ເງິນ​ເຢຍ​ລະ​ມັນ ກ່ຽວ​ກັບ​ກັບ​ແຜນການ​ຊ່ວຍເຫຼືອ​ພິເສດ​ຂອງ​ລັດຖະບານ​ກາງ ໃນ​ມູນ​ຄ່າ 150-170 ລ້ານ​ເອີ​ໂຣ. ເມື່ອ​ບວກ​ກັບ​ບ້ວງ​ເງິນ​ຊ່ວຍເຫຼືອ​ອື່ນໆ​ອີກ ຈາກ​ອຳນາດ​ການ​ປົກຄອງ​ຂອງ​ລັດ​ຕ່າງໆ ແລ້ວ ກະສິກອນ​ກໍ​ຈະ​ໄດ້​ຮັບ​ເງິນ​ຊ່ວຍເຫຼືອ​ໃນ​ຍອດ​ມູນ​ຄ່າ 340 ລ້ານ​ເອີ​ໂຣ.

    ທ່ານ​ນາງ ຈູ​ເລຍ ໂກຼ​ເອັກ​ເນີ ໃຫ້​ຮູ້​ວ່າ ຟາມ​ປະມານ 10.000 ແຫ່ງ ຫຼື​ເທົ່າ​ກັບ 1/25 ຂອງ​ຈຳນວນ​ຟາມ​ຢູ່​ໃນ​ເຢຍ​ລະ​ມັນ ໄດ້​ຮັບ​ຜົນ​ກະທົບ​ຈາກ​ສະພາບ​ແຫ້ງແລ້ງ​ດັ່ງກ່າວ.

     ເຖິງ​ຢ່າງໃດ​ກໍ​ຕາມ  ເງິນ​ຊ່ວຍເຫຼືອ​ດັ່ງກ່າວ ຍັງ​ຕ່ຳ​ເກີນ​ໄປ​ເມື່ອ​ທຽບໃສ່​ການ​ສະເໜີ ທີ່​ລະດັບ 1 ຕື້ ເອີ​ໂຣ ຊຶ່ງ​ສະມາຄົມ​ກະສິກອນ​ເຢຍ​ລະ​ມັນ (DBV) ຮຽກຮ້ອງ​ຄວາມ​ຊ່ວຍເຫຼືອ​ຈາກ​ລັດ ເພື່ອ​ຊ່ວຍເຫຼືອ​ກະສິກອນ ທີ່​ປະ​ເຊີນ​ກັບ​ຄວາມ​ເສຍ​ຫາຍ​ໃນ​ລະດູແລ້ງ​ທີ່​ຜ່ານ​ມາ ເມື່ອ​ສະພາບ​ແຫ້ງແລ້ງ ແກ່ຍາວ ແລະ​ອຸ່ນ​ຫະ​ພູມ​ໃນ​ລະດູແລ້ງ ຢູ່​ໃນ​ລະດັບ​ສູງ​ເປັນ​ປະຫວັດ​ການ ນັບ​ແຕ່​ປີ 1881 ເປັນຕົ້ນ ມາ.

 

ຂ່າວທີ່ກ່ຽວຂ້ອງ