ຂ່າວຫຼ້າສຸດ

ຊ່ຽວຊານຕ່າງປະເທດ ມາເກັບຂໍ້ມູນເພື່ອໄປວິໄຈຫາສາເຫດ ຄູກັ້ນນ້ຳເຂື່ອນໄຟຟ້າ ເຊປຽນ-ເຊນ້ຳນ້ອຍແຕກ

451 23 ສ.ຫ. 2018 ຂ່າວໜ້າ​ໜຶ່ງ
ຊ່ຽວຊານຕ່າງປະເທດ ມາເກັບຂໍ້ມູນເພື່ອໄປວິໄຈຫາສາເຫດ ຄູກັ້ນນ້ຳເຂື່ອນໄຟຟ້າ ເຊປຽນ-ເຊນ້ຳນ້ອຍແຕກ

    ວັນ​ທີ 21 ສິງ­ຫາ 2018 ທີ່​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ໄດ້​ໃຫ້​ກຽດ​ຕ້ອນ­ຮັບ​ການ​ເຂົ້າ​ຢ້ຽມ​ຄຳ­ນັບ​ຂອງ​ທ່ານ Prof. Dr. Schliess Anton J ຜູ້​ຊ່ຽວ­ຊານ​ອາ­ວຸ­ໂສ ທັງ​ເປັນ​ປະ­ທານ​ກິດ​ຕິ​ມະ​ສັກ​ອົງ­ການ​ເຂື່ອນ​ໃຫຍ່​ສາ­ກົນ ICOLD ພ້ອມ​ດ້ວຍ​ຄະ­ນະ​ວິ­ສະ­ວະ­ກອນ​ຈາກ​ບໍ­ລິ­ສັດ TEPCO ເຊິ່ງ​ເປັນ​ຊ່ຽວ­ຊານ​ຕ່າງປະ­ເທດ ໃນ​ໂອ­ກາດ​ເດີນ­ທາງ​ມາ​ຮ່ວມ​ເຮັດ​ວຽກ​ກັບ​ຄະ­ນະ​ສືບ­ສວນ-ສອບ​ສວນ​ຫາ​ສາ­ເຫດ​ຄູ​ກັ້ນ​ນ້ຳ​ເຂື່ອນ​ໄຟ­ຟ້າ​ເຊ​ປຽນ-ເຊ​ນ້ຳ​ນ້ອຍ​ແຕກ ຕາມ​ຂໍ້​ຕົກ­ລົງ​ເລກ​ທີ 54/ນຍ.

    ກ່ອນ​ອື່ນ​ທ່ານ​ນາ­ຍົກ­ລັດ­ຖະ­ມົນ­ຕີ ໄດ້​ສະ­ແດງ​ຄວາມ​ຍິນ​ດີ​ຕ້ອນ­ຮັບ ແລະ ຕີ​ລາ­ຄາ​ສູງ​ຕໍ່​ການ​ເຂົ້າ​ຮ່ວມ​ເປັນ​ຄະ­ນະ​ສືບ­ສວນ​ຕ່າງ­ປະ­ເທດ ​ໃນ​ເຫດ­ການ​ຄູ​ກັ້ນ​ນ້ຳ​ເຂື່ອນ​ແຕກ​ຄັ້ງ​ນີ້ ຄະ­ນະ​ດັ່ງ­ກ່າວ​ ໄດ້​ລົງ​ໄປ​ສຳ​ຫຼວດ​ເບິ່ງ​ສະ­ຖານ­ທີ່​ເກີດ​ເຫດ​ໃນ​ວັນ​ທີ 19-20 ສິງ­ຫາ 2018 ພ້ອມ​ທັງ​ເກັບ​ກຳ​ຂໍ້​ມູນ​ຈຳ­ນວນ​ໜຶ່ງ​ ເພື່ອ​ເປັນ​ພື້ນ­ຖານ​ໃຫ້​ແກ່​ການ​ວິ­ເຄາະ​ວິ­ໄຈ ເພື່ອ​ຊອກ​ຫາ​ສາ​ເຫດ­ການ​ແຕກ​ຂອງ​ຄູ​ກັ້ນ​ນ້ຳ​ເຂື່ອນ​ດັ່ງ­ກ່າວ.

     ທ່ານ Prof. Dr. Schliess Anton J ໄດ້​ສະ­ແດງ​ຄວາມ​ຂອບ­ໃຈ​ຕໍ່​ທ່ານ​ນາ­ຍົກ­ລັດ­ຖະ­ມົນ­ຕີ​ທີ່​ໄດ້​ຕ້ອນ­ຮັບ​ຢ່າງ​ອົບ​ອຸ່ນ ພ້ອມ​ທັງ​ສະ­ແດງ​ຄວາມ​ເສຍ​ໃຈ​ຕໍ່​ຜົນ​ເສຍ​ຫາຍ​ທາງ​ດ້ານ​ຊີ­ວິດ ແລະ ຊັບ​ສິນ​ທີ່​ເກີດ​ຂຶ້ນ​ຕໍ່​ປະ­ຊາ­ຊົນ​ເມືອງ​ສະ­ໜາມ​ໄຊ ແຂວງ​ອັດ​ຕະ​ປື ທ່ານ Prof. Dr. Schliess Anton J ໄດ້​ກ່າວ​ວ່າ ອຸ­ບັດ​ຕິ​ເຫດ​ແມ່ນ​ສາ­ມາດ​ເກີດ​ໄດ້​ກັບ​ທຸກ​ປະ­ເທດ ບໍ່​ວ່າ​ຈະ​ເປັນ​ປະ­ເທດ​ທີ່​ຈະ­ເລີນ ແລະ ມີ​ເຕັກ­ນິກ​ວິ­ຊາ​ການ​ສູງ​ແລ້ວ​ກໍ່​ຕາມ ແຕ່​ເມື່ອ​ເກີດ​ແລ້ວ​ກໍ່​ຕ້ອງ​ໄດ້​ຊອກ​ຫາ​ສາ­ເຫດ ແລະ ຖື​ເປັນ​ບົດ­ຮຽນ ພ້ອມ​ທັງ​ນຳ​ໃຊ້​ບົດ­ຮຽນ​ດັ່ງ­ກ່າວ ​ເພື່ອ​ສະ­ກັດ​ກັ້ນ​ບໍ່​ໃຫ້​ເຫດ­ການ​ລັກ­ສະ­ນະ​ນີ້​ເກີດ​ຂຶ້ນ​ອີກ ແລະ ຖື​ເອົາ​ໂອ­ກາດ​ນີ້​ກວດ­ກາ​ຄືນ ແລະ ປັບ­ປຸງ​ມາດ­ຕະ­ຖານ ແລະ ຄຸ­ນະ­ພາບ​ຂອງ​ເຂື່ອນ​ໃນ​ຂອບ​ເຂດ​ທົ່ວ​ປະ­ເທດ​ໃຫ້​ດີ​ຂຶ້ນ​ກວ່າ​ເກົ່າ.

    ຕອນ​ທ້າຍ ທ່ານ​ນາ­ຍົກ­ລັດ­ຖະ­ມົນ­ຕີ ໄດ້​ສະ­ແດງ​ຄວາມ​ຂອບ­ໃຈ​ຕໍ່​ທ່ານ Prof. Dr. Schliess Anton J ທີ່​ໄດ້​ລາຍ​ງານ​ກ່ຽວ​ກັບ​ສະ­ພາບ​ການ​ລົງ​ໄປ​ເບິ່ງ​ສະ­ຖານ­ທີ່​ເກີດ​ເຫດ ເກັບ​ກຳ​ຂໍ້​ມູນ ແລະ ແຜນ​ສືບ­ສວນ-ສອບ​ສວນ​ເບື້ອງ​ຕົ້ນ ພ້ອມ​ທັງ​ຊຸກ­ຍູ້​ໃຫ້​ຄະ­ນະ​ຊ່ຽວ­ຊານ​ປະ­ສານ​ສົມ­ທົບ​ກັບ​ຄະ­ນະ​ສືບ­ສວນ-ສອບ​ສວນ​ພາຍ​ໃນ ​ເພື່ອ​ເລັ່ງ​ສືບ­ສວນ-ສອບ​ສວນ​ໃຫ້​ຮູ້​ຜົນ​ໄວ ມີ​ຄວາມ​ໂປ່ງ​ໃສ ແລະ ເປັນ​ທີ່​ຍອມ­ຮັບ​ຂອງ​ທຸກ​ຝ່າຍ ນອກ​ນີ້ ທ່ານ​ນາ­ຍົກ​ຍັງ​ໄດ້​ແລກ­ປ່ຽນ​ກັບ​ຄະ­ນະ​ຊ່ຽວ­ຊານ​ຕ່າງ­ປະ­ເທດ​ດັ່ງ­ກ່າວ ​ກ່ຽວ​ກັບ​ການ​ກວດ­ກາ​ມາດ­ຕະ­ຖານ ແລະ ຄຸ້ມ​ຄອງ​ຄຸ­ນະ­ພາບ​ທາງ​ດ້ານ​ເຕັກ­ນິກ ແລະ ຄວາມ​ປອດ​ໄພ​ຂອງ​ເຂື່ອນ ແນ­ໃສ່​ຍົກ​ມາດ­ຕະ­ຖານ ແລະ ຄຸ­ນະ­ພາບ​ຂອງ​ເຂື່ອນ​ຢູ່​ໃນ​ປະ­ເທດ​ໃຫ້​ສູງ​ຂຶ້ນ​ເລື້ອຍໆ.

ຂ່າວທີ່ກ່ຽວຂ້ອງ