ເສີມຂະຫຍາຍມູນເຊື້ອ 23 ສິງຫາ ເຂົ້າໃນການສ້າງນະຄອນຫຼວງວຽງຈັນ ເພື່ອກ້າວຂຶ້ນສູ່ຄວາມສີວິໄລທີ່ຍືນຍົງ

452 23 ສ.ຫ. 2018 ຂ່າວໜ້າ​ໜຶ່ງ
ເສີມຂະຫຍາຍມູນເຊື້ອ 23 ສິງຫາ ເຂົ້າໃນການສ້າງນະຄອນຫຼວງວຽງຈັນ ເພື່ອກ້າວຂຶ້ນສູ່ຄວາມສີວິໄລທີ່ຍືນຍົງ

    ມື້­ນີ້ ຊາວ​ນະ­ຄອນ­ຫຼວງ​ວຽງ​ຈັນ ກໍ່​ຄື ພີ່­ນ້ອງ​ຮ່ວມ​ຊາດ​ໃນ​ທົ່ວ​ປະ­ເທດ ມີ​ຄວາມ​ເອກ­ອ້າງ​ທະ​ນົງ​ໃຈ ແລະ ເບີກບານ​ມ່ວນ­ຊື່ນ​ເປັນ​ຢ່າງ​ຍິ່ງ​ ທີ່​ໄດ້​ພ້ອມ​ກັນ​ສະ­ເຫຼີມ­ສະ­ຫຼອງ​ເພື່ອ​ລະ­ນຶກ​ເຖິງ​ມູນ­ເຊື້ອ​ຂອງ​ວັນ​ຢຶດ​ອຳ­ນາດ ວັນ​ທີ 23 ສິງ­ຫາ ທີ່​ໄດ້​ວຽນ­ມາ​ຄົບ­ຮອບ 43 ປີ (23/8/1975-23/8/2018).

    ໄຊ­ຊະ­ນະ​ຂອງ​ວັນ​ທີ 23 ສິງ­ຫາ 1975 ແມ່ນ​ໄຊ­ຊະ­ນະ​ອັນ​ຍິ່ງ​ໃຫຍ່ທີ່​ບໍ່​ເຄີຍ​ມີ​ມາ​ຈັກ​ເທື່ອ ເຊິ່ງ​ບໍ່​ພຽງ​ແຕ່​ແມ່ນ​ບາດ​ລ້ຽວ​ແຫ່ງ​ການ​ຜັນ​ແປ ແລະ ການ​ຂຽນ​ໜ້າ​ປະ­ຫວັດ­ສາດ​ຍຸກ​ໃໝ່​ຂອງ​ຊາວ​ນະ­ຄອນ­ຫຼວງ​ວຽງ​ຈັນ​ເທົ່າ​ນັ້ນ ແຕ່​ຫາກ​ຍັງ​ແມ່ນ​ໄຊ­ຊະ­ນະ​ລວມ​ຂອງ​ປະ­ຊາ­ຊົນ​ລາວ​ທັງ​ຊາດ ຍ້ອນ​ວ່າ​ໄຊ­ຊະ­ນະ​ດັ່ງ­ກ່າວ ​ໄດ້​ກາຍ​ຂີດ​ໝາຍ​ແຫ່ງ​ການ​ສະ­ຫຼຸບ​ມ້ວນ­ທ້າຍ​ຂອງ​ການ​ຢຶດ​ອຳ­ນາດ​ການ​ປົກ­ຄອງ​ເກົ່າ ​ທີ່​ຄອບ​ງຳ​ມາ​ເປັນ​ເວ­ລາ​ຍາວ​ນານ ແລະ ສ້າງ­ຕັ້ງ​ອຳ­ນາດ​ການ​ປົກ­ຄອງ​ປະ­ຕິ­ວັດ​ຂຶ້ນ​ມາ​ແທນ​ ຢູ່​ໃນ​ຂອບ​ເຂດ​ທົ່ວ​ປະ­ເທດ​ອີກ​ດ້ວຍ.

    ກ່ອນ​ໜ້າ​ນີ້ 43 ປີ ບົນ​ພື້ນ ຖານ​ແຫ່ງ​ໄຊ­ຊະ­ນະ​ອັນ​ເປັນ​ປະຫວັດ​ສາດ ແລະ ຕໍ່​ເນື່ອງຂອງ​ກອງ­ທັບ ແລະ ປະ­ຊາ­ຊົນ​ຫວຽດນາມ ແລະ ກຳ­ປູ­ເຈຍ​ອ້າຍ​ນ້ອງ ໃນ​ລະ­ດູ­ບານ­ໃໝ່ ປີ 1975 ອັນ​ໄດ້​ເປັນ​ການ​ສ້າງ​ເງື່ອນ­ໄຂ ເອື້ອ​ອຳ­ນວຍ​ໃຫ້​ແກ່​ພາ­ລະ­ກິດ​ຕໍ່­ສູ້​ປົດ​ປ່ອຍ​ຊາດ​ຂອງ​ປະ­ຊາ­ຊົນ​ເຮົາ ພາຍ​ໃຕ້​ການ​ນຳ­ພາ​ຂອງ​ພັກ​ປະຊາ​ຊົນ​ປະ­ຕິ­ວັດ​ລາວ ​ກ້າວ​ເຂົ້າ​ສູ່​ບາດ­ກ້າວ​ໃໝ່.

    ພາຍ​ໃຕ້​ຂະ​ບວນ​ການ​ລຸກ​ຮື້​ຂຶ້ນຂອງ​ນັກ­ຮຽນ​ນັກ​ສຶກ​ສາ ກຳ​ມະກອນ ແລະ ປະ­ຊາ­ຊົນບັນ­ດາ​ຊັ້ນ​ຄົນ ແລະ ເຜົ່າ​ຕ່າງໆ ໃນ​ຂອບ​ເຂດ​ທົ່ວ​ປະ­ເທດ ທີ່​ພວມ​ຂະ­ຫຍາຍ­ຕົວ​ຢ່າງ​ແຂງ­ແຮງ ກວ້າງ­ຂວາງ ຕໍ່​ເນື່ອງ ແລະ ຟັ່ນ​ເຟືອນ​ປານ​ພາຍຸ​ລົມ­ແດງ​ນັ້ນ ມາ​ຮອດ​ວັນ​ທີ 23 ສິງ­ຫາ 1975 ປະ­ຊາ­ຊົນ​ທຸກ​ຊັ້ນຄົນ​ໃນ​ທົ່ວ​ນະ­ຄອນ­ຫຼວງ​ວຽງ​ຈັນ ແລະ ແຂວງ​ວຽງ​ຈັນ ເປັນ​ຈຳ­ນວນ​ນັບ​ແສນ​ຄົນ ​ໄດ້​ຈັດຕັ້ງ​ການ​ໂຮມ​ຊຸມ­ນຸມ​ມິດ​ຕິງ​ຂຶ້ນ​ຢູ່​ເດິ່ນ​ພະ​ທາດ­ຫຼວງ ເພື່ອ​ປະ­ກາດ​ລົບ​ລ້າງ​ອຳ­ນາດ​ການ​ປົກ­ຄອງເກົ່າ ສ້າງ­ຕັ້ງ​ອຳ­ນາດ​ການ​ປົກຄອງ​ປະ­ຕິ­ວັດ​ປະ­ຊາ­ຊົນ​ຂຶ້ນ​ແທນ ຊຶ່ງ​ການ​ຢືດ​ອຳ­ນາດ​ໃນ​ມື້​ດັ່ງ­ກ່າວ ຖື​ເປັນ​ໄຊ­ຊະ­ນະ​ທີ່​ມີ​ລັກ­ສະ­ນະປະ­ຫວັດ­ສາດ​ຂອງ​ຊາວ​ນະ­ຄອນຫຼວງ​ວຽງ​ຈັນ ທີ່​ໄດ້​ຫຼຸດ​ພົ້ນ​ອອກ​ຈາກ​ຄວາມ­ທຸກ​ຍາກ​ຈາກ​ແອກ​ປົກ­ຄອງ​ເກົ່າ ຊຶ່ງ​ຄອບ​ງຳ​ມາ​ເປັນ​ເວ­ລາ​ຍາວ​ນານ​ຫຼາຍ​ຮ້ອຍ​ປີ.

    ເມື່ອ​ພວກ​ເຮົາ​ຫວນ​ຄືນ​ເບິ່ງ​ໃນ​ຕະ­ຫລອດ 43 ປີທີ່​ຜ່ານ​ມາ ພາ­ລະ­ກິດ​ປົກ​ປັກ​ຮັກ­ສາ ແລະ ພັດ­ທະ­ນານະ­ຄອນ­ຫຼວງ​ວຽງ​ຈັນ ໄດ້​ຜ່ານ​ຜ່າ​ບັນ­ດາ​ອຸ­ປະ­ສັກ ແລະ ຄວາມ​ຫຍຸ້ງ­ຍາກ​ນາໆ​ປະ­ການ ອັນ​ເນື່ອງ​ມາ​ຈາກ​ໃນ​ບາດ­ກ້າວ​ເບື້ອງ​ຕົ້ນ ຊຶ່ງ​ພື້ນ­ຖານ​ໃນ​ທຸກ​ດ້ານ ແລະ ຜົນ​ສະ­ທ້ອນ​ຂອງ​ລະ­ບອບ​ເກົ່າ ໄດ້​ສ້າງ​ໃຫ້​ນະ­ຄອນ­ຫຼວງ​ວຽງ​ຈັນ ກາຍ­ເປັນ​ຕົວ​ເມືອງ​ນຳ​ເຂົ້າ​ເກືອບ​ທຸກ​ດ້ານ ແລະ ເປັນ​ຕົວ​ເມືອງ​ຫຼິ້ນ​ກິນ​ຟູມ​ເຟືອຍ​ຕາມ​ໂຄງ​ສ້າງ ແລະ ຮູບ​ຖານ​ການປົກ­ຄອງ​ແບບ​ເມືອງ​ຂຶ້ນ ໂດຍ​ບໍ່​ມີພື້ນ­ຖານ​ອັນ​ໃດ​ໝັ້ນ​ທ່ຽງ ໜັກ​ແໜ້ນ​ ຊາວ​ນະ­ຄອນ­ຫຼວງ​ວຽງ​ຈັນ ບັນ­ດາ​ຊັ້ນ​ຄົນ ແລະ ຊັ້ນ​ຄົນ​ຕ່າງໆ ລ້ວນ​ແຕ່​ດຳ­ລົງ​ຊີວິດ​ຢູ່​ພາຍ​ໃຕ້​ສະ­ພາບ​ວະ​ຂອງ​ຄວາມ­ທຸກ​ຍາກ ຖືກ​ກົດ​ຂີ່ ໜີບ​ເຕັງ ແລະ ບໍ່​ມີ​ພື້ນ­ຖານ​ອັນ​ໃດ​ເພື່ອ​ຮັບ­ປະ­ກັນ​ຊີ­ວິດ ແລະ ສິດ​ເສລີ​ພາບ ດ້ານ​ໜຶ່ງ ​ສັດ­ຕູ ແລະ ອິດ​ທິ​ກຳ­ລັງ​ທີ່​ເປັນ​ປໍ​ລະ​ປັກ​ຍັງ​ຄົງ​ສືບຕໍ່​ປະ­ຕິ­ບັດ​ກົນ­ອຸ­ບາຍ ດຳ­ເນີນ​ການ­ເຄື່ອນ­ໄຫວ​ໜີບ​ຮັດ ປິດ​ລ້ອມ ເກາະ​ຜິດ ແລະ ມ້າງ­ເພ​ທຳ­ລາຍ​ຄວາມ​ສະ­ຫງົບ​ຢູ່​ພາຍ​ໃນ​ຕະ­ຫຼອດ​ມາ.

    ແຕ່​ພາຍ​ໃຕ້​ການ​ນຳ­ພາ​ຂອງ​ພັກ ການ​ນຳ­ພາ​ໂດຍ​ກົງ​ຮອບດ້ານຂອງ​ອົງ­ຄະ​ນະ​ພັກ​ນະ­ຄອນຄອນ​ຫຼວງ ຊາວ​ນະ­ຄອນ­ຫຼວງວຽງ​ຈັນ ບັນ­ດາ​ຊັ້ນ​ຄົນ ແລະ ເຜົ່າ​ຕ່າງໆ ກໍ່​ໄດ້​ເສີມ​ຂະ­ຫຍາຍ​ມູນ­ເຊື້ອ​ຮັກ​ຊາດ ຍົກ​ສູງ​ນ້ຳ­ໃຈ​ອົດທົນ​ຜ່ານ​ຜ່າ​ຄວາມ​ຫຍຸ້ງ­ຍາກ ສິ່ງ​ທົດ​ສອບ​ທ້າ​ທາຍ​ນາໆ​ປະ­ການ ດ້ວຍ​ການ​ເຊີດ​ຊູ​ນ້ຳ­ໃຈຮັກ​ຊາດ ເຊື່ອ​ໝັ້ນ​ຕໍ່​ການ​ນຳ­ພາ​ຂອງ​ພັກ ສາ­ມັກ­ຄີ​ເປັນ​ປຶກ​ແຜ່ນ​ຢູ່​ອ້ອມ​ຂ້າງ​ພັກ ອ້ອມ​ຂ້າງ​ອົງ­ຄະ​ນະ​ພັກ ແລະ ອົງ­ການ​ປົກ­ຄອງນະ­ຄອນ­ຫຼວງ​ວຽງ​ຈັນ ແຕ່​ລະ​ຂັ້ນ​ພ້ອມ​ກັນ​ເຊີດຊູ​ຄວາມ​ຫ້າວ­ຫັນ ຄວາມ​ດຸ­ໝັ່ນ ແລະ ຫົວ­ຄິດ​ປະ­ດິດ​ສ້າງ​ເຂົ້າ​ໃນ​ທຸກ​ສະ­ໜາມ­ຮົບ​ແຫ່ງ​ພາ­ລະ­ກິດ​ປົກ​ປັກ​ຮັກ­ສາ ແລະ ພັດ­ທະ­ນາ ນະ­ຄອນ­ຫຼວງ​ວຽງ​ຈັນ ໃຫ້​ກາຍເປັນ­ໃຈ​ກາງ ແລະ ໝາກ​ຫົວ­ໃຈ​ຂອງ​ປະ­ເທດ​ຊາດ ຊຶ່ງ​ກໍ່​ສາ­ມາດ​ຍາດ​ໄດ້​ໝາກ­ຜົນ​ທີ່​ເປັນ​ພື້ນ­ຖານ ແລະ ໜັກ​ແໜ້ນ​ໃນ​ທຸກ​ດ້ານເປັນກ້າວໆ​ມາ ໂດຍ​ສະ­ເພາະ ອັນ​ທີ່​ພົ້ນ​ເດັ່ນ​ກວ່າ​ໝູ່ແມ່ນ ​ໃນ​ຊຸມ​ປີ​ນັບ​ແຕ່​ພັກ​ເຮົາ​ໄດ້​ນຳ​ພາ­ລະ­ກິດ​ປ່ຽນ­ແປງ​ໃໝ່​ມາ​ເຖິງ​ປັດ­ຈຸ­ບັນ ລະ­ດັບ​ການ​ຂະ­ຫຍາຍ­ຕົວ​ຢ່າງ​ໜັກ​ແໜ້ນ​ຕໍ່​ເນື່ອງ ຍອດ​ຜະລິດ​ຕະ​ພັນ​ລວມ​ພາຍ​ໃນ (GDP) ບັນ­ລຸ​ໄດ້ 124.900 ກວ່າ​ຕື້​ກີບ ດ້ວຍ​ອັດ­ຕາ​ການ​ເຕີບ​ໂຕ ປະ­ມານ​ແຕ່ 12% ຕໍ່​ປີ ລາຍ​ໄດ້​ສະ­ເລ່ຍ​ຕໍ່​ຄົນ​ປະ­ມານ​ເກືອບ 4.390 ໂດ​ລາ​ສະ­ຫະ­ລັດ/ຕໍ່​ປີ ໂຄງ​ປະ­ກອບເສດ­ຖະ­ກິດ​ໄດ້​ຮັບ​ການ​ພັດ­ທະ­ນາຢ່າງ​ຕັ້ງ­ໜ້າ​ ຕາມ​ກົນ​ໄກ​ເສດ­ຖະ­ກິດ​ຕະ­ຫຼາດ ໃນ​ນີ້ ຂະ­ແໜງ​ກະ­ສິ­ກຳ-ປ່າ­ໄມ້ ເພີ້ມ​ຂຶ້ນ 8% ກວມ 17% ຂະ­ແໜງ​ອຸດ­ສາ­ຫະ­ກຳ ເພີ້ມ​ຂຶ້ນ 18% ກວມ 47% ແລະ ຂະ­ແໜງ​ບໍ­ລິ­ການ​ເພີ້ມ​ຂຶ້ນ 12% ກວມ 36% ການ​ລະ­ດົມ​ການ​ລົງ­ທຶນ ມີ​ມູນ​ຄ່າ​ສູງ​ເຖິງ 84.200 ກວ່າ​ຕື້​ກີບ.

    ສະ­ນັ້ນ ຍິ່ງ​ກວ່າ​ເວ­ລາ​ໃດ ມັນ​ຮຽກ­ຮ້ອງ​ໃຫ້​ຊາວ​ນະ­ຄອນ­ຫຼວງ​ວຽງ​ຈັນ​ທຸກ​ຖ້ວນ​ໜ້າ ຈົ່ງ​ໄດ້​ເສີມ​ຂະ­ຫຍາຍ​ມູນ­ເຊື້ອ​ແຫ່ງ​ວັນ​ທີ 23 ສິງ­ຫາ ​ໃຫ້​ແຂງ­ແຮງ ແລະ ສູງ​ຂຶ້ນ ບົນ​ພື້ນ­ຖານປັບ­ປຸງ ແລະ ເຊີດ​ຊູ​ຄວາມ​ເຊື່ອ​ໝັ້ນ​ຕໍ່​ການ​ນຳ­ພາ​ຂອງ​ພັກ ຂອງ​ອົງ­ຄະ​ນະ​ພັກ​ໃຫ້​ສູງ​ຂຶ້ນ ເພີ່ມ​ທະ­ວີ​ຄວາມ​ສາ­ມັກ­ຄີ ເປັນ​ເອ­ກະ​ພາບ ເຊີດ​ຊູ​ມູນ­ເຊື້ອອັນ​ພິ­ລາດ​ອາດ​ຫານ ເດັດ­ດ່ຽວ​ໜຽວ​ແໜ້ນ ຊຶ່ງ​ແມ່ນ​ມູນ­ເຊື້ອ​ອັນ​ດີ­ງາມ​ທີ່​ພວກ​ເຮົາ​ເຄີຍ​ສືບ​ທອດ​ປະ­ຕິ­ບັດ​ກັນ​ມາ ເພື່ອ​ຜ່ານ​ຜ່າ​ຄວາມ​ຫຍຸ້ງ­ຍາກ ສຸມ​ກຳ­ລັງ​ແຮງໃນ​ທຸກ​ດ້ານ​ ເຂົ້າ​ໃນ​ພາ­ລະ­ກິດ​ປົກ​ປັກ​ຮັກ­ສາ ແລະ ພັດ­ທະ­ນາ​ນະ­ຄອນ­ຫຼວງ​ວຽງ​ຈັນ ໃນ​ທຸກ​ດ້ານ​ໃຫ້​ເຂັ້ມ­ແຂງ ໜັກ​ແໜ້ນ ກ້າວ​ໄປ​ສູ່​ຄວາມ​ສີ­ວິ­ໄລ​ທີ່​ຍືນ​ຍົງ.

ນ້ຳ­ໃຈ ວັນ​ທີ 23 ສິງ­ຫາ ຄົບ­ຮອບ 43 ປີ ໝັ້ນ­ຍືນ !

ຂ່າວທີ່ກ່ຽວຂ້ອງ