ຂ່າວຫຼ້າສຸດ

ສຶກສາຄວາມເປັນໄປໄດ້ ໃນການພັດທະນາແຫຼ່ງທ່ອງທ່ຽວ ຢູ່ເມືອງວັງວຽງ

410 23 ສ.ຫ. 2018 ຂ່າວໜ້າ​ໜຶ່ງ
ສຶກສາຄວາມເປັນໄປໄດ້ ໃນການພັດທະນາແຫຼ່ງທ່ອງທ່ຽວ ຢູ່ເມືອງວັງວຽງ

    ພິ­ທີ​ລົງ​ນາມ​ບົດ​ບັນ­ທຶກ​ຄວາມ​ເຂົ້າ­ໃຈ (MOU) ໂຄງ­ການ​ພັດ­ທະ­ນາ​ແຫຼ່ງ​ທ່ອງ​ທ່ຽວ​ແບບ​ທຳ​ມະ​ຊາດ ແລະ ບໍ­ລິ­ການ​ກະ­ຕ່າ​ໄຟ­ຟ້າ​ຢູ່​ເຂດ​ເມືອງ​ວັງ​ວຽງ ແຂວງ​ວຽງ​ຈັນ ລະ­ຫວ່າງ​ລັດ­ຖະ­ບານ​ລາວ ກັບ ບໍ­ລິ­ສັດ ເຄ​ເອັນ​ຟາມ ຈຳ­ກັດ​ຜູ້​ດຽວ ຈັດ​ຂຶ້ນ​ວັນ​ທີ 21 ສິງຫາ 2018 ທີ່​ກະ­ຊວງ​ແຜນ­ການ ແລະ ການ​ລົງ­ທຶນ ໂດຍ​ຕາງ­ໜ້າ​ລົງ​ນາມ​ຂອງ​ທ່ານ ສຸ­ພັນ ແກ້ວ​ມີ​ໄຊ ລັດ­ຖະ­ມົນ­ຕີ​ກະ­ຊວງ​ແຜນ­ການ ແລະ ການ​ລົງ­ທຶນ ແລະ ທ່ານ ຄຳ​ເມັ່ງ ພິມ​ມະ​ແສງ ປະ­ທານ​ບໍ­ລິ­ສັດ ເຄ​ເອັນ​ຟາມ ຈຳ­ກັດ​ຜູ້​ດຽວ ມີ​ບັນ­ດາ​ຮອງ​ລັດ­ຖະ­ມົນ­ຕີ​ກະ­ຊວງ​ກ່ຽວ­ຂ້ອງ ອຳ­ນາດ​ການ​ປົກ­ຄອງ​ແຂວງ​ວຽງ​ຈັນ ນັກ­ທຸ­ລະ­ກິດ​ຈີນ ແລະ ພະ­ນັກ­ງານ​ທີ່​ກ່ຽວ­ຂ້ອງ​ສອງ​ຝ່າຍ​ເຂົ້າ​ຮ່ວມ.

    ການ​ລົງ​ນາມ​ສອງ​ຝ່າຍ​ຄັ້ງ​ນີ້ ລັດ­ຖະ­ບານ​ໄດ້​ອະ­ນຸ­ຍາດ​ໃຫ້​ບໍ­ລິ­ສັດ​ເປັນ​ຜູ້​ສຶກ​ສາ​ຄວາມ​ເປັນ​ໄປ​ໄດ້​ໂຄງ­ການ​ສຳ​ຫຼວດ​ທີ່​ດິນ ແລະ ກະ­ກຽມ​ແຜນ­ທີ່​ດິນ ເພື່ອ​ພັດ­ທະ­ນາ​ແຫຼ່ງ​ທ່ອງ​ທ່ຽວ​ທຳ​ມະ​ຊາດ ປະ­ກອບ​ມີ​ກິດ­ຈະ­ກຳ​ກະ­ຕ່າ​ໄຟ­ຟ້າ ສະ­ຖານ­ທີ່​ຈອດ​ລົດ ອາ­ຄານ​ນັກ​ທ່ອງ​ທ່ຽວ​ເພື່ອ​ໄປ​ຂຶ້ນ​ກະ­ຕ່າ​ໄຟ­ຟ້າ ສວນ​ດອກ​ໄມ້​ສຳ­ລັບ​ທ່ຽວ​ຊົມ ແລະ ຖ່າຍ­ຮູບສະ­ຖານ­ທີ່​ສຳ­ລັບ​ສ້າງ​ພະ​ໃຫຍ່​ຢູ່​ເທິງ​ຈອມ​ພູ ສະ­ຖານ­ທີ່​ສ້າງ​ເມືອງ​ຈຳ­ລອງ​ໃນ​ແບບ​ຂອງ​ຢູ​ໂຣບ ໂຮງ­ແຮມ​ລະ­ດັບ​ສາມ​ດາວ ຮ້ານ​ອາ­ຫານ ສວນ​ຫຼິ້ນ​ຂະ­ໜາດ​ນ້ອຍ ແລະ ສວນ​ດອກ​ໄມ້​ຕາມ​ລະ­ດູ​ການ​ຂອງ​ທ້ອງ­ຖິ່ນ ເຊິ່ງ​ການ​ສຶກ​ສາ​ຄວາມ​ເປັນ​ໄປ​ໄດ້​ຂອງ​ໂຄງ­ການ​ ໃນ​ແຕ່​ລະ​ກິດ­ຈະ­ກຳ​ຕ້ອງ​ໃຫ້​ສອດ­ຄ່ອງ​ກັບ​ແຜນ​ແມ່​ບົດ​ຄຸ້ມ​ຄອງ​ຕົວ​ເມືອງ​ທ່ອງ​ທ່ຽວ​ເມືອງ​ວັງ​ວຽງ ແຕ່​ປີ 2010-2020 ເພື່ອ​ດຶງ​ດູດ ແລະ ຕອບ​ສະ­ໜອງ​ຄວາມ​ຕ້ອງ­ການ​ຂອງ​ນັກ​ທ່ອງ​ທ່ຽວ ແລະ ຄົນ​ທ້ອງ­ຖິ່ນ ສຶກ​ສາ​ບົດ​ວິ­ພາກ​ເສດ­ຖະ­ກິດ-ເຕັກ­ນິກ ສຶກ​ສາ​ບົດ​ປະ​ເມີນ​ຜົນ​ກະ­ທົບ​ທາງ​ດ້ານ​ສິ່ງ­ແວ­ດລ້ອມ​ສັງ­ຄົມ ແລະ ທຳ​ມະ​ຊາດ ເພື່ອ​ໃຫ້​ຂະ­ແໜງ­ການ​ກ່ຽວ­ຂ້ອງ​ຮັບ­ຮອງ​ຕາມ​ລະ­ບຽບ​ການ ແລະ ສຶກ​ສາ​ການ​ມີ​ສ່ວນ​ຮ່ວມ​ຂອງ​ປະ­ຊາ­ຊົນ​ເຂົ້າ​ຮ່ວມ​ກິດ­ຈະ­ກຳ​ຂອງ​ໂຄງ­ການ ສ່ວນ​ເນື້ອ­ທີ່​ສຳ​ຫຼວດ​ແມ່ນ​ຢູ່​ເຂດ​ພູ​ອານ​ມ້າ ແລະ ພູ​ຄັນ­ຮົ່ມ ບ້ານ​ນາ​ດ້ວງ ເມືອງ​ວັງ​ວຽງ ໃນ​ເນື້ອ­ທີ່ 250 ເຮັກ­ຕາ ເຊິ່ງ​ກຳ­ນົດ​ເວ­ລາ​ສຳ​ຫຼວດ 18 ເດືອນ ເລີ່ມ​ແຕ່​ມື້​ລົງ​ນາມ​ເປັນ­ຕົ້ນ​ໄປ ແຕ່​ບໍ­ລິ­ສັດ​ຈະ​ໃຊ້​ເວ­ລາ​ສຳ​ຫຼວດ​ໃຫ້​ສຳ­ເລັດ​ພາຍ​ໃນ 5-6 ເດືອນ ເພື່ອ​ໃຫ້​ທັນ​ລົງ­ມື​ກໍ່­ສ້າງ​ປີ 2019 ແລະ ຈະ​ໃຊ້​ເວ­ລາ​ພັດ­ທະ­ນາ​ພາຍ​ໃນ 3 ປີ​ໃຫ້​ສຳ­ເລັດ.

    ໃນ​ໂອ­ກາດ​ລົງ​ນາມ​ບົດ​ບັນ­ທຶກ​ຄວາມ​ເຂົ້າ­ໃຈ​ກັບ​ລັດ­ຖະ­ບານ​ຄັ້ງ​ນີ້ ບໍ­ລິ­ສັດ ເຄ​ເອັນ​ຟາມ ຈຳ­ກັດ​ຜູ້​ດຽວ ຍັງ​ໄດ້​ລົງ​ນາມ​ບົດ​ບັນ­ທຶກ​ຄວາມ​ເຂົ້າ­ໃຈ​ກັບ​ບໍ­ລິ­ສັດ ສາຍ​ສະ​ລິງ Northbartholet ຫຸ້ນ​ສ່ວນ ຈຳ­ກັດ ປັກ​ກິ່ງ ສປ ຈີນ ເພື່ອ​ສຳ​ຫຼວດ​ອອກ​ແບບ​ການ​ກໍ່­ສ້າງ​ກະ­ຕ່າ​ໄຟ­ຟ້າ ແລະ ພາຍ­ຫຼັງ​ທີ່​ໂຄງ­ການ​ກໍ່­ສ້າງ​ດັ່ງ­ກ່າວ​ສຳ­ເລັດ ບໍ­ລິ­ສັດ ສາຍ​ສະ​ລິງ Northbartholet ຫຸ້ນ​ສ່ວນ​ຈຳ­ກັດ ປັກ​ກິ່ງ ສປ ຈີນ ຈະ​ນຳ​ນັກ​ທ່ອງ​ທ່ຽວ​ຂອງ​ຈີນ​ເຂົ້າ​ມາ​ທ່ຽວ​ຊົມ​ເປັນ​ຈຳ­ນວນ​ຫຼາຍ ຮ່ວມ​ລົງ​ນາມ​ລະ­ຫວ່າງ​ທ່ານ​ປະ­ທານ​ບໍ­ລິ­ສັດ ເຄ​ເອັນ​ຟາມ ຈຳ­ກັດ​ຜູ້​ດຽວ ແລະ ທ່ານ ຊູ​ຊາງ​ຊິງ ປະ­ທານ​ບໍ­ລິ­ສັດ ສາຍ​ສະ​ລິງ Northbartholet ຫຸ້ນ​ສ່ວນ​ຈຳ­ກັດ ປັກ​ກິ່ງ ສປ ຈີນ.

ຂ່າວທີ່ກ່ຽວຂ້ອງ