ທົ່ວປະເທດ ມີຕາໜ່າງເສັ້ນທາງຍາວເກືອບ 60 ພັນກິໂລແມັດ

208 23 ສ.ຫ. 2018 ຂ່າວໜ້າ​ໜຶ່ງ

    ໃນ 6 ເດືອນ​ຕົ້ນ​ປີ 2018 ຜ່ານ​ມາ ຄະ­ນະ​ພັກ​ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ ໄດ້​ເອົາ­ໃຈ­ໃສ່​ນຳ­ພາ​ກໍ່­ສ້າງ ແລະ ປັບ­ປຸງ​ບັນ­ດາ​ເສັ້ນ­ທາງ​ອາ​ຊຽນ ເສັ້ນ­ທາງ​ຫຼວງ​ແຫ່ງ​ຊາດ ເສັ້ນ­ທາງ​ຍຸດ​ທະ​ສາດ​ເຊື່ອມ​ຕໍ່​ພາຍ​ໃນ ເສັ້ນ­ທາງ​ຮັບ​ໃຊ້​ການ​ຜະ­ລິດ ເສັ້ນ­ທາງ​ຮັບ​ໃຊ້​ວຽກ​ງານ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ­ຫງົບ ເສັ້ນ­ທາງ​ຮັບ​ໃຊ້​ວັດ­ທະ­ນະ­ທຳ-ສັງ­ຄົມ ເສັ້ນ­ທາງ​ເຂົ້າ​ຫາ​ຈຸດ​ສຸມ​ພັດ­ທະ­ນາ​ຂອງ​ລັດ­ຖະ­ບານ ສາ­ມາດ​ຍາດ​ໄດ້​ຜົນ­ສຳ­ເລັດ​ຢ່າງ​ກ້າວ​ກະ­ໂດດ.

    ທ່ານ ລັດ­ຕະ­ນະ­ມະ­ນີ ຄູນ​ນີ​ວົງ ຮອງ​ລັດ­ຖະ­ມົນ­ຕີ​ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ ໄດ້​ລາຍ​ງານ​ຕີ​ລາ­ຄາ​ການ­ເຄື່ອນ­ໄຫວ​ນຳ­ພາ​ຂອງ​ຄະ­ນະ​ພັກ​ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ 6 ເດືອນ​ຕົ້ນ​ປີ ແລະ ແຜນ­ການ 6 ເດືອນ​ທ້າຍ​ປີ 2018 ໃນ​ກອງ​ປະ­ຊຸມ​ສາ­ມັນ​ຄົບ​ຄະ­ນະ​ພັກ​ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ ຄັ້ງ​ທີ 12 ສະ­ໄໝ​ທີ IV ຜ່ານ​ມາ​ວ່າ: ໃນ​ໄລ­ຍະ​ຜ່ານ​ມາ­ຄະ​ນະ​ພັກ​ກະ­ຊວງ​ໄດ້​ຕັ້ງ­ໜ້າ​ຊີ້​ນຳ​ວຽກ​ງານ​ຂົວ​ທາງ ສາ­ມາດ​ຍາດ​ໄດ້​ຜົນ­ສຳ­ເລັດ​ພົ້ນ​ເດັ່ນ ສຳ­ເລັດ​ໂຄງ­ການ​ກໍ່­ສ້າງ​ຂົວ​ຂ້າມ​ນ້ຳ​ເຊ​ກອງ ແລະ ກຳ­ລັງ​ດຳ­ເນີນ​ໂຄງ­ການ​ກໍ່­ສ້າງ​ເສັ້ນ­ທາງ 3 ເສັ້ນ ແຕ່​ເມືອງ​ອາ​ນຸ​ວົງ-ເມືອງ​ທ່າ​ໂທມ ປະ­ຕິ­ບັດ​ໄດ້ 76% ແຕ່​ພູ​ຫົວ​ຊ້າງ-ອ່າວ​ໃຕ້ ເມືອງ​ອະ­ນຸ­ວົງ​ປະ­ຕິ­ບັດ​ໄດ້ 93% ແຕ່​ຂົວ​ນ້ຳ​ຍອນ-ບ້ານ​ລ່ອງ​ແຈ້ງ​ປະ­ຕິ­ບັດ​ໄດ້ 72% ໂຄງ­ການ​ກໍ່­ສ້າງ​ເສັ້ນ­ທາງ​ບ້ານ​ນາ​ນົກ​ຂຸ້ມ ເມືອງ​ທຸ­ລະ­ຄົມ-ບ້ານ​ນາ​ໄຊ ເມືອງ​ປາກ​ງື່ມ ປະ­ຕິ­ບັດ​ໄດ້ 84% ໂຄງ­ການ​ກໍ່­ສ້າງ​ທາງ​ເລກ 16A ປາກ​ຊ່ອງ-ຫຼັກ 52 ແຂວງ​ອັດ​ຕະ​ປື ປະ­ຕິ­ບັດ​ໄດ້ 94% ໂຄງ­ການ​ຟື້ນ​ຟູ​ທາງ​ເລກ 9 ສັນ­ຍາ 1 ປະ­ຕິ­ບັດ​ໄດ້ 68% ສັນ­ຍາ 2 ປະ­ຕິ­ບັດ​ໄດ້ 99% ໂຄງ­ການ​ກໍ່­ສ້າງ​ທາງ​ຫົງ​ສາ-ຊຽງ​ແມນ ໄລ­ຍະ 1 ແລະ ໄລ­ຍະ 2 ປະ­ຕິ­ບັດ​ໄດ້ 69% ໂຄງ­ການ​ກໍ່­ສ້າງ​ທາງ 6A ຫາງ​ລ້ອງ-ສົບ​ເບົາ ປະ­ຕິ­ບັດ​ໄດ້ 84% ໂຄງ­ການ​ກໍ່­ສ້າງ​ທາງ​ຊຳ​ໃຕ້-ທ່າ​ເຫຼົ້າ ປະ­ຕິ­ບັດ​ໄດ້ 92% ໂຄງ­ການ​ກໍ່­ສ້າງ​ທາງ​ແຕ່​ສາມ​ແຍກ​ນາ​ຊາງ-ທົ່ງ​ທູ້ ປະ­ຕິ­ບັດ​ໄດ້ 91% ແລະ ຍັງ​ມີ​ໂຄງ­ການ​ອື່ນໆ​ທີ່​ສືບ­ຕໍ່​ປະ­ຕິ­ບັດ​ຢ່າງ​ຕັ້ງ­ໜ້າ ຄຽງ​ຄູ່​ກັນ​ນັ້ນ ກໍ່​ໄດ້​ຖື​ສຳ­ຄັນ​ການ​ບູ­ລະ­ນະ​ສ້ອມ­ແປງ​ຕາ​ໜ່າງ​ເສັ້ນ­ທາງ ໂດຍ​ສຸມ​ໃສ່​ຈັດ​ຕັ້ງ​ປະ­ຕິ­ບັດ​ວຽກ​ສ້ອມ­ແປງ​ທາງ​ຫຼວງ​ປີ 2018 ຈຳ­ນວນ 119 ສັນ­ຍາ ປະ­ຕິ­ບັດ​ໄດ້ 69% ສັງ​ລວມ​ແລ້ວ ທົ່ວ​ປະ­ເທດ​ມີ​ຕາ​ໜ່າງ​ເສັ້ນ­ທາງ​ຍາວ​ທັງ​ໝົດ 59.967 ກິ­ໂລ­ແມັດ (ສະ­ຖິ­ຕິ​ປີ 2017)

    ສຳ­ລັບ​ທິດ​ທາງ​ແຜນ­ການ​ຕໍ່­ໜ້າ​ສືບ­ຕໍ່​ກໍ່­ສ້າງ ແລະ ປັບ­ປຸງ​ເສັ້ນ­ທາງ​ອາ​ຊຽນ ເສັ້ນ­ທາງ​ຫຼວງ​ແຫ່ງ​ຊາດ ເສັ້ນ­ທາງ​ຍຸດ​ທະ​ສາດ​ເຊື່ອມ​ຕໍ່​ພາຍ​ໃນ ເສັ້ນ­ທາງ​ຮັບ​ໃຊ້​ການ​ຜະ­ລິດ ເສັ້ນ­ທາງ​ຮັບ​ໃຊ້​ວຽກ​ງານ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ­ຫງົບ ແລະ ເສັ້ນ­ທາງ​ເຂົ້າ​ຫາ​ເຂດ​ຈຸດ​ສຸມ​ພັດ­ທະ­ນາ ສືບ­ຕໍ່​ນຳ­ພາ​ຊຸກ­ຍູ້​ບັນ­ດາ​ໂຄງ­ການ​ກໍ່­ສ້າງ​ຂົວ-ທາງ ໃຫ້​ສຳ­ເລັດ​ຕາມ​ແຜນ­ການ ເອົາ­ໃຈ­ໃສ່​ຊີ້​ນຳ​ບັນ­ດາ​ໂຄງ­ການ​ບູ­ລະ­ນະ​ຮັກ­ສາ​ເສັ້ນ­ທາງ​ຫຼວງ​ແຫ່ງ​ຊາດ ແລະ ທາງ​ຫຼວງ​ທ້ອງ­ຖິ່ນ​ໃຫ້​ສຳ­ເລັດ​ຕາມ​ແຜນ­ການ​ທີ່​ວາງ​ໄວ້ ພ້ອມ​ກັນ​ນັ້ນ ກໍ່​ເປັນ​ເຈົ້າ​ການ​ສົມ­ທົບ​ກັບ​ພາກ­ສ່ວນ​ກ່ຽວ­ຂ້ອງ​ເອົາ­ໃຈ­ໃສ່​ການ​ສ້າງ​ແຫຼ່ງ​ລາຍ​ຮັບ​ເພີ່ມ​ໃຫ້​ແກ່​ກອງ​ທຶນ​ບູ­ລະ­ນະ​ຮັກ­ສາ​ທາງ​ຫຼວງ.

ຂ່າວທີ່ກ່ຽວຂ້ອງ