ຂ່າວຫຼ້າສຸດ

ນ້ຳບາກ ກຽມພ້ອມຈັດງານສະຫຼອງປີທ່ອງທ່ຽວລາວ ແລະ ຊ່ວງເຮືອປະຈຳປີ

229 23 ສ.ຫ. 2018 ວົງຈອນກີລາ

   ເພື່ອ​ກຽມ​ຄວາມ​ພ້ອມ​ໃຫ້​ແກ່​ງານ​ສະ­ເຫຼີມ­ສະ­ຫຼອງ​ປີ​ທ່ອງ​ທ່ຽວ​ລາວ ແລະ ງານ​ບຸນ­ຊ່ວງ­ເຮືອ​ປະ­ຈຳ​ປີ 2018 ຂອງ​ເມືອງ​ນ້ຳ​ບາກ ແຂວງ​ຫຼວງ​ພະ​ບາງ ທີ່​ຈະ​ມີ​ຂຶ້ນ​ທ້າຍ​ເດືອນ​ສິງ­ຫາ 2018 ມາ​ຮອດ​ປັດ­ຈຸ­ບັນ ທຸກ​ອາ​ນຸ​ກຳ­ມະ­ການ​ຮັບ­ຜິດ­ຊອບ ໄດ້​ມີ​ການ​ແບ່ງ​ວຽກ​ບັນ­ຈຸ​ບຸ​ຄະ­ລາ​ກອນ​ເຂົ້າ​ໃນ​ທຸກ​ໜ້າ​ວຽກ​ຢ່າງ​ລະ­ອຽດ ຢູ່​ທຸກ​ຫ້ອງ­ການ​ບ້ານ ແລະ ສະ­ຖານ­ທີ່​ຈັດ​ງານ​ໄດ້​ປະ­ດັບ​ປະ­ດາ​ຢ່າງ​ຈົບ­ງາມ ທັງ​ໃນ​ເວ­ລາ​ກາງ­ເວັນ ແລະ ກາງ­ຄືນ.

   ງານ​ສະ­ເຫຼີມ­ສະ­ຫຼອງ​ປີ​ທ່ອງ​ທ່ຽວ​ລາວ 2018 ຂອງ​ເມືອງ​ນ້ຳ​ບາກ ຈະ​ຈັດ​ຂຶ້ນ​ວັນ​ທີ 25 ສິງ­ຫາ 2018 ໂດຍ​ຈະ​ມີ​ຂະ​ບວນ​ກ້ອນ​ກຳ­ລັງ​ຕາງ­ໜ້າ​ປະ­ຊາ­ຊົນ​ບັນ­ດາ­ເຜົ່າ​ພາຍ​ໃນ​ເມືອງ ສະ­ແດງ​ສິ­ລະ​ປະ​ວັນ­ນະ­ຄະ­ດີ​ຂອງ​ບັນ­ດາ­ເຜົ່າ​ຂັບ​ລຳ​ທ້ອງ­ຖິ່ນ ງານ​ຕະ­ຫຼາດ­ນັດ ທ່ຽວ​ຊົມ​ສະ­ຖານ­ທີ່​ທ່ອງ​ທ່ຽວ​ຂອງ​ເມືອງ ສ່ວນ​ວັນ​ທີ 26 ສິງ­ຫາ 2018 ຈະ​ຈັດ​ງານ​ແຂ່ງ­ຂັນ​ຊ່ວງ​ເຮືອ​ປະ­ຈຳ​ປີ ເຊິ່ງ​ປີ​ນີ້​ມີ​ເຮືອ​ເຂົ້າ​ຮ່ວມ 14 ພາກ­ສ່ວນ ແບ່ງ​ເປັນ 2 ປະ­ເພດ ຄື: ປະ­ເພດ​ເຮືອ​ປະ­ເພ­ນີ​ມີ 7 ລຳ ແບ່ງ​ເປັນ 2 ສາຍ ແລະ ປະ­ເພດ​ເຮືອ​ກີ­ລາ (ເຮືອ​ສູດ) ມີ 7 ລຳ ແບ່ງ​ເປັນ 2 ສາຍ.

   ຜ່ານ​ການ​ຈັບ​ສະ­ຫຼາກ​ປະ­ເພດ​ເຮືອ​ປະ­ເພ­ນີ ສາຍ ກ ມີ​ເຮືອ​ບ້ານ​ໂພນ​ໄຊ ເຮືອ​ບ້ານ​ໂຄ້ງ​ເຮືອ​ບ້ານ​ນ້ຳ​ລາ ເຮືອ​ບ້ານ​ໂພນ​ສະ­ອາດ ສາຍ ຂ ມີ​ເຮືອ​ບ້ານ​ຟ້າ ເຮືອ​ບ້ານ​ນະ­ຄອນ ເຮືອ​ບ້ານ​ລີ່ ສຳ­ລັບ​ປະ­ເພດ​ເຮືອ​ກີ­ລາ ສາຍ ກ ມີ​ເຮືອ​ບ້ານ​ໂພນ​ສະ­ອາດ ເຮືອ​ບ້ານ​ທ່າ​ລີ​ໃຕ້ ເຮືອ​ບ້ານ​ລີ່ ເຮືອ​ບ້ານ​ປາກ​ມອງ ສາຍ ຂ ມີ​ເຮືອ​ບໍ­ລິ­ສັດ ສິນ​ໄຊ​ຫຼວງ​ພະ​ບາງ ເຮືອ​ບ້ານ​ບົມ ແລະ ເຮືອ​ບ້ານ​ຊາງ ໂດຍ​ການ​ແຂ່ງ­ຂັນ​ແມ່ນ​ເສຍ 2 ຄັ້ງ​ຕົກ​ຮອບ ໃນ​ນີ້ ຈະ​ແຂ່ງ­ຂັນ​ກັນ​ຕ່ຳ​ສຸດ 26 ລ່ອງ ແລະ ສູງ​ສຸດ 30 ລ່ອງ.

ຂ່າວທີ່ກ່ຽວຂ້ອງ