ຂ່າວຫຼ້າສຸດ

ທ່ຽວປ່າສະຫງວນນ້ຳກ່ານ ສຳຜັດທຳມະຊາດທີ່ໜ້າປະທັບໃຈ

295 23 ສ.ຫ. 2018 ຫົວຂໍ້ຂ່າວອື່ນໆ
ທ່ຽວປ່າສະຫງວນນ້ຳກ່ານ ສຳຜັດທຳມະຊາດທີ່ໜ້າປະທັບໃຈ

   ຖ້າ​ເວົ້າ​ເຖິງ​ການ­ທ່ອງ­ທ່ຽວ​ໃນ​ຮູບ​ແບບ​ອະ­ນຸ​ຮັກ ຫຼາຍ​ຄົນ​ກໍ່​ຄົງ​ຄິດ​ເຫັນ​ສະ­ຖານ­ທີ່​ທ່ອງ​ທ່ຽວ​ປາ​ສະຫງວນ​ນ້ຳ​ກ່ານ ແຂວງ​ບໍ່​ແກ້ວ ເປັນ​ສະ­ຖານ­ທີ່​ທ່ອງ​ທ່ຽວ​ທີ່​ສ້າງ​ຄວາມ​ປະ​ທັບ​ໃຈ​ໃຫ້​ກັບ​ນັກ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງ­ປະ­ເທດ ໂດຍ​ສະ­ເພາະ​ການ​ຈັດ​ວາງ​ທີ່​ພັກ​ໃຫ້​ເບິ່ງ​ເປັນ​ທຳ​ມະ​ຊາດ ກໍ່​ຄື ຫ້ອງ​ພັກ​ເທິງ​ຕົ້ນ­ໄມ້ ເຮັດ​ໃຫ້​ນັກ​ທ່ອງ​ທ່ຽວ​ທີ່​ໄດ້​ໄປ​ພັກ​ເຊົາ ຈະ​ມີ​ປະ­ສົບ​ການ​ທີ່​ທ້າ​ທາຍ ແລະ ສຳ­ຜັດ​ໄດ້​ກັບ​ກິ່ນ​ອາຍ​ທຳ​ມະ​ຊາດ​ຢ່າງ​ແທ້​ຈິງ.

   ປ່າ​ສະ­ຫງວນ​ນ້ຳ​ກ່ານ ໄດ້​ຮັບ​ອະ­ນຸ­ຍາດ​ສ້າງ­ຕັ້ງ​ຂຶ້ນ ໃນ​ສົກ​ປີ 2003-2004 ເຊິ່ງ​ຕັ້ງ​ຢູ່​ທາງ​ທິດເໜືອ​ຂອງ​ແຂວງ ຕິດ​ກັບ​ເມືອງ​ລອງ ແຂວງ​ຫຼວງ​ນ້ຳ​ທາ ແລະ ກວມ​ເອົາ​ສາມ​ຕົວ​ເມືອງ​ຂອງ ແຂວງ​ບໍ່​ແກ້ວ ຄື: ເມືອງ​ຫ້ວຍ​ຊາຍ ເມືອງ​ເມິງ ແລະ ເມືອງ​ຜາ​ອຸ­ດົມ ມີ​ເນື້ອ­ທີ່​ທັງ​ໝົດ 67.000 ເຮັກ­ຕາ ຫ່າງ​ຈາກ​ຕົວ​ເມືອງ​ຫ້ວຍ​ຊາຍ​ໄປ​ທາງ​ທິດ­ເໜືອ ປະ­ມານ 70 ກິ­ໂລ­ແມັດ ໃນ​ນັ້ນ 16.800 ເຮັກ­ຕາ ແມ່ນ​ຖືກ​ສຳ​ປະ­ທານ​ພັດ­ທະ­ນາ​ເປັນ​ແຫຼ່ງ​ທ່ອງ​ທ່ຽວ​ທຳ​ມະ​ຊາດ​ໂດຍ ບໍ­ລິ­ສັດ ແອນ​ນີ​ໂມ (ອາ​ນຸ​ຮັກ​ຊີ­ວະ​ນາໆພັນ) ເຊິ່ງ​ເປັນ​ຂອງ​ຄົນ​ຕ່າງ​ຊາດ (ຄົນ​ຝຣັ່ງ) ໂດຍ​ແບ່ງ​ເປັນ 4 ເຂດ ແລະ ນຳ​ໃຊ້​ໃນ​ການ­ທ່ອງ­ທ່ຽວ​ໄປ​ແລ້ວ 1 ເຂດ ສ່ວນ​ອີກ​ສາມ​ເຂດ​ກຳ­ລັງ​ສຳ​ຫຼວດ ແລະ ພວມ​ສ້າງ​ປ້າຍ​ໂຄ­ສະ­ນາ ປ້າຍ​ບອກ​ເຂດ ຫຼັກ​ໝາຍ​ເຂດ ກຳ­ນົດ​ຈຸດ​ຫ້າມ​ເຂົ້າ ແລະ ຈຸດ​ທ່ອງ​ທ່ຽວ​ໄປ​ຕາມ​ລະ­ບຽບ​ການ​ຂອງ​ລັດ­ຖະ­ບານ​ລາວ​ວາງ​ອອກ.

   ພ້ອມ​ນັ້ນ​ ກໍ່​ຍັງ​ປັບ­ປຸງ​ລະ­ບົບ​ການ​ບໍ​ລິການ​ນຳ​ທ່ຽວ​ໃນ​ຂົງ­ເຂດ​ດັ່ງ­ກ່າວ​ເຊັ່ນ: ການ​ຂີ່​ມ້າ ຂີ່​ຊ້າງ ທ່ຽວ​ຊົມ​ທິວ​ທັດ​ທຳ​ມະ​ຊາດ ການ​ອະ­ນຸ​ຮັກ​ປ່າ­ໄມ້​ແບບ​ທຳ​ມະ​ຊາດ ການ​ສ້າງ​ເຮືອນ​ພັກ​ນັກ​ທ່ອງ​ທ່ຽວ​ເທິງ​ຕົ້ນ­ໄມ້ ຂີ່​ສາຍ​ກາບ (ສະ​ລິງ) ທາງ​ອາ­ກາດ​ຈາກ​ຕົ້ນ­ໄມ້​ນີ້​ຫາ​ຕົ້ນໄມ້​ນັ້ນ ເບິ່ງ​ສັດ​ນາໆ​ຊະ­ນິດ ຍ່າງ​ທ່ຽວ​ເລາະ​ສາຍ​ນ້ຳ​ກ່ານ ນ້ຳ​ງ່າ ແລະ ນ້ຳ​ງາວ.

   ນອກ​ນີ້​ ທາງ​ບໍ­ລິ­ສັດ​ຍັງ​ໄດ້​ຊ່ວຍ­ເຫຼືອ​ປະ­ຊາ­ຊົນ​ໃນ​ເຂດ​ດັ່ງ­ກ່າວ ໃນ​ການ​ເຮັດ​ກິດ­ຈະ­ກຳ​ຕ່າງໆ ແລະ ຊ່ວຍ­ເຫຼືອ​ສັດ­ປ່າ​ທີ່​ປະ­ຊາຊົນ​ຈັບ​ໄດ້ ​ເພື່ອ​ປ່ອຍ​ຄືນ​ສູ່​ປ່າ ນັກ​ທ່ອງ​ທ່ຽວ​ສ່ວນ​ຫຼາຍ​ແມ່ນ​ນັກ​ທ່ອງ​ທ່ຽວ​ຕ່າງ​ປະເທດ ແລະ ຄົນ​ລາວ​ກໍ່​ມີ​ຈຳ­ນວນ​ໜຶ່ງ ປັດ­ຈຸ­ບັນ​ນີ້​ແມ່ນ​ມີ​ນັກ​ທ່ອງ​ທ່ຽວ​ເຂົ້າ​ທ່ຽວ​ຊົມ​ເປັນ​ຈຳ­ນວນ​ຫຼວງ­ຫຼາຍ ແລະ ເປັນ​ທີ່​ຮັບ​ຮູ້​ກັນ​ຢ່າງ​ກວ້າງ­ຂວາງ ບັນ­ດາ​ກິດ­ຈະ­ກຳ​ເຫຼົ່າ​ນີ້ ປະ­ຊາ­ຊົນ​ບັນ­ດາ­ເຜົ່າ​ໃນ​ຂົງ­ເຂດ​ນີ້​ແມ່ນ​ໄດ້​ມີ​ສ່ວນ​ຮ່ວມ.

   ໃນ​ເຂດ​ປ່າ​ສະ­ຫງວນ​ນ້ຳ​ກ່ານ ເປັນ​ແຫຼ່ງ​ທ່ອງ​ທ່ຽວ​ທຳ​ມະ​ຊາດ ເປັນ​ພື້ນ​ທີ່​ປ່າ​ສະ­ຫງວນ​ທີ່​ມີ​ນັກ​ທ່ອງ​ທ່ຽວ​ພາຍ​ໃນ ແລະ ຕ່າງ­ປະ­ເທດ​ມີ​ຄວາມ​ສົນ­ໃຈ​ເຂົ້າ​ມາ​ໃຊ້​ບໍ­ລິ­ການທ່ຽວ​ຊົມ​ທຳ​ມະ​ຊາດ​ເຊັ່ນ: ປ່າ­ໄມ້ ສັດ​ນາໆ​ຊະ­ນິດ ສະ­ເລ່ຍ​ແລ້ວ 10 ຄົນ/ວັນ ສຳ­ລັບ​ຄ່າ​ບໍ­ລິ­ການ​ນຳ​ທ່ຽວ 1.060.000 ກີບ/ຄົນ/3 ວັນ ໃນ​ນັ້ນ ລວມ​ທັງ​ຄ່າ​ທຳ­ນຽມ​ຂອງ​ພາກ​ລັດ 18.000 ກີບ/ຄົນ ສະ­ພາບ​ພື້ນ​ທີ່​ດັ່ງ­ກ່າວ ໄດ້​ຮັບ​ການ​ປົກ​ປັກ​ຮັກ­ສາ​ໄວ້​ເຮັດ​ໃຫ້​ປ່າ­ໄມ້​ພືດ​ພັນ​ຂຽວ​ສົດ​ງົດ​ງາມ​ຕາມ​ທຳ​ມະ​ຊາດ ມີ​ທັງ​ສັດ­ປ່າ​ນາໆພັນ​ທີ່​ຫຼາກ​ຫຼາຍ ອັນ​ໄດ້​ເຮັດ​ໃຫ້​ປະ­ຊາ­ຊົນ​ບັນ­ດາ­ເຜົ່າ​ໃນ​ເຂດ​ນີ້​ມີ​ລາຍ​ຮັບ​ຈາກ​ການ​ຂາຍ​ພືດ​ຜັກ ຊີ້ນ​ປາ​ອາ­ຫານ ແລະ ເຄື່ອງ​ຫັດ­ຖະ­ກຳ​ພື້ນ​ບ້ານ​ທີ່​ເປັນ​ເອ­ກະ­ລັກ​ຂອງ​ຊົນ­ເຜົ່າ​ຕ່າງໆ ​ໄປ​ເປັນ​ຂອງ​ທີ່​ລະ­ນຶກ​ໃຫ້​ແກ່​ນັກ​ທ່ອງ​ທ່ຽວ ທີ່​ເຂົ້າ​ມາ​ຊົມ​ແຫຼ່ງ​ທ່ອງ​ທ່ຽວ​ແຫ່ງ​ນີ້.

   ສ່ວນ​ຈຸດ​ເດັ່ນ​ຂອງ​ແຫຼ່ງ​ທ່ອງ​ທ່ຽວ​ປ່າ​ສະ­ຫງວນ​ນ້ຳ​ກ່ານ​ນີ້ ແມ່ນ​ສາ­ມາດ​ດຶງ​ດູດ​ນັກ​ທ່ອງ​ທ່ຽວ​ທີ່​ມັກ​ຄວາມ​ທ້າ​ທາຍ​ແບບ​ປະ­ຈົນ​ໄພ ​ມັກ​ໃນ​ປ່າ­ໄມ້​ທຳ​ມະ​ຊາດ ນັກ​ທ່ອງ​ທ່ຽວ​ທີ່​ເຂົ້າ​ມາ​ຫຼາຍ​ແມ່ນ​ນັກ​ທ່ອງ​ທ່ຽວ​ແບບ Backpacker ແລະ ກິດ­ຈະ­ກຳ​ຫຼັກ​ທີ່​ເປັນ​ທີ່​ຮູ້­ຈັກ​ກັນ​ຫຼາຍ​ໃນ​ຮູບ​ແບບ​ນັກ​ທ່ອງ​ທ່ຽວ​ກຸ່ມ​ນີ້​ແມ່ນການ​ຂີ່​ສາຍ​ກາບ ແລະ ເຮືອນ​ທີ່­ຢູ່​ເທິງ​ຕົ້ນ­ໄມ້ ເຊິ່ງ​ຈະ​ມີ​ຄວາມ​ແຕກ​ຕ່າງ​ຈາກ​ແຫຼ່ງ​ທ່ອງ​ທ່ຽວ​ໃນ​ແຂວງ​ອື່ນໆ.

ຂ່າວທີ່ກ່ຽວຂ້ອງ