ຂ່າວຫຼ້າສຸດ

ຂ່າວ​ສັ້ນ

116 23 ສ.ຫ. 2018 ຂ່າວຕ່າງປະເທດ
ຂ່າວ​ສັ້ນ

    ເວ​ເນ​ຊູ​ເອ​ລາ: ວັນ​ທີ 21 ສິງຫາ​ນີ້ ທະນາຄານ​ກາງ​ເວ​ເນ​ຊູ​ເອ​ລາ (BCV) ໄດ້​ປະກາດ​ອັດຕາ​ແລກປ່ຽນ​ເງິນຕາ​ຢ່າງ​ເປັນ​ທາງ​ການ ລະຫວ່າງ​ເງິນ​ໂບ​ລີ​ວາ (bolivar) ອະທິປະ​ໄຕ ກັບ​ເງິນ​ໂດ​ລາ​ສະຫະລັດ ແລະ​ເງິນ​ເອີ​ໂຣ. ຕາມ​ນັ້ນແລ້ວ ອັດຕາ​ແລກປ່ຽນ​ເງິນ​ໂດ​ລາ​ສະຫະລັດ ຢູ່​ໃນ​ລະບົບ​ແລກປ່ຽນ​ເງິນຕາ​ຕ່າງປະເທດ (Dicom) ຈະ​ຢູ່​ທີ່ 60 ໂບ​ລີ​ວາ ອະທິປະ​ໄຕ/1 ໂດ​ລາ​ສະຫະລັດ ແລະ 68,65 ໂບ​ລີ​ວາ/1 ເອີ​ໂຣ.

    ຊູ​ແອດ: ເຮືອບິນ​ສູ້​ຮົບ​ຂອງ​ຊູ​ແອດ​ລຳ​ໜຶ່ງ ໄດ້​ປະສົບ​ເຫດ​ຕົກ ຫຼັງ​ຈາກ​ທີ່​ບິນ​ໄປ​ຕຳ​ເອົາ​ນົກ ແຕ່​ໂຊກ​ດີ​ທີ່​ນັກ​ບິນ ໄດ້​ໂດດ​ຈ້ອງ​ດີດ​ຕົວ​ອອກ​ຈາກ​ເຮືອບິນ​ໄດ້​ທັນ ໂຄສົກ​ຂອງ​ກອງທັບ​ຊູ​ແອດ ໃຫ້​ຮູ້​ວ່າ​ເຮືອບິນ Jas Gripen ຊຶ່ງ​ຜະລິດ​ໂດຍ​ບໍລິສັດ​ການບິນ​ອາ​ວະ​ກາດ Saab ຂອງ​ຊູ​ແອດ ໄດ້​ປະສົບ​ເຫດ​ດັ່ງກ່າວ ໃນ​ຂະນະ​ທີ່​ປະຕິບັດ​ໜ້າທີ່​ຝຶກ​ຊ້ອມ ຢູ່​ທາງ​ເຂດ​ພາກ​ໃຕ້​ຊູ​ແອດ ຕົວ​ເລກ​ສະຖິຕິ​ໃຫ້​ຮູ້​ວ່າ ໃນ​ແຕ່​ລະ​ປີ ເກີດ​ອຸບັດເຫດ​ທີ່​ຄ້າຍຄື​ກັນ​ນີ້ ປະມານ 400 ລາຍ ຢູ່​ໃນ​ຊູ​ແອດ.

    ສ ເກົາຫຼີ: ມີ​ຜູ້​ເສຍ​ຊີວິດ​ຢ່າງ​ໜ້ອຍ 9 ຄົນ ຈາກ​ເຫດການ​ໄຟ​ໄໝ້​ໂຮງງານ​ແຫ່ງ​ໜຶ່ງ ຢູ່​ໃນ​ນະຄອນ ອິນ​ເຈິນ ຂອງ ສ ເກົາຫຼີ ຊຶ່ງ​ເກີດ​ຂຶ້ນ​ເມື່ອ​ວັນ​ທີ 21 ສິງຫາ​ນີ້ ເຈົ້າ​ໜ້າທີ່​ຂອງ ສ ເກົາຫຼີ ເວົ້າ​ວ່າ ອັກຄີ​ໄພ​ດັ່ງກ່າວ​ເກີດ​ຂຶ້ນ​ຢູ່​ໃນ​ໂຮງງານ​ຜະລິດ​ເຄື່ອງໃຊ້​ໄຟຟ້າ​ແຫ່ງ​ໜຶ່ງ ຢູ່​ດ້ານ​ໃນ​ເຂດ​ອຸດສາຫະກຳ ນາມ​ດົງ.

    ເອ​ກົວ​ດໍ: ຜູ້​ບັນຊາ​ການ​ສູງ​ສຸດ​ຂອງ​ຕຳຫຼວດ​ເອ​ກົວ​ດໍ ແຈ້ງ​ໃຫ້​ຮູ້ເມື່ອ​ວັນ​ທີ 20 ສິງຫາ​ນີ້​ວ່າ ຕຳຫຼວດ​ຢຶດ​ໂຄ​ເຄນ​ໄດ້ 1,1 ໂຕນ ໃນ​ຂະນະ​ທີ່​ພວມ​ຖືກ​ຂົນສົ່ງ​ໄປ​ຍັງ​ແບນ​ຊິກ. ຂ່າວ​ແຈ້ງວ່າ  ກົມ​ຕໍ່ຕ້ານ​ຢາ​ເສບ​ຕິດ​ຂອງ​ເອ​ກົວ​ດໍ ໄດ້​ພົບ​ເຫັນ​ຢາ​ເສບ​ຕິດ​ດັ່ງກ່າວ ຊຶ່ງ​ຫຸ້ມ​ຫໍ່​ເປັນ​ຈຳນວນ 1.094 ຫໍ່ ແລະ​ຖືກ​ຊຸກເຊື່ອງ​ໄວ້​ໃນ​ຖັງ​ໃສ່​ໝາກກ້ວຍ​ເພື່ອ​ສົ່ງ​ອອກ. ນອກຈາກ​ຢຶດ​ໂຄ​ເຄນ​ດັ່ງກ່າວ​ແລ້ວ ເຈົ້າ​ໜ້າທີ່​ກ່ຽວຂ້ອງ ຍັງ​ຈັບ​ຕົວ​ເປົ້າ​ໝາຍ​ທີ່​ກ່ຽວຂ້ອງ​ກັບ​ຢາ​ເສບ​ຕິດ​ດັ່ງກ່າວ​ໄດ້ 1 ຄົນ ຢູ່​ໃນ​ທ່າ​ກຳປັ່ນ​ແຫ່ງ​ໜຶ່ງ ຢູ່​ທາງ​ທິດຕາເວັນຕົກ​ເອ​ກົວ​ດໍ.

    ຫວຽດນາມ: ຂ່າວສານ​ຫວຽດນາມ ອ້າງ​ຕາມ​ຂໍ້​ມູນ​ຈາກ​ສູນ​ແຈ້ງ​ຂ່າວ​ແຜ່ນດິນ​ໄຫວ ແລະ​ແຈ້ງ​ເຕືອນ​ສຶ​ນາ​ມິ ໃຫ້​ຮູ້​ວ່າ ໃນ​ວັນ​ທີ 21 ສິງຫາ​ນີ້ ໄດ້​ເກີດ​ເຫດການ​ແຜ່ນດິນ​ໄຫວ​ສອງ​ລາຍ​ຕິດຕໍ່​ກັນ ໃນ​ລະດັບ​ຄ່ອຍ ຢູ່​ໃນ​ເຂດ​ພູ​ດອຍ ໃນ​ແຂວງ​ກວາງ​ນາມ (ພາກ​ກາງ​ຫວຽດນາມ) ແລະ ​ແຂວງ​ເຊີນ​ລາ (ພາກ​ຕາເວັນຕົກ​ສ່ຽງ​ເໜືອ​ຫວຽດນາມ). ໃນ​ນັ້ນ ເຫດການ​ແຜ່ນດິນ​ໄຫວ​ຢູ່​ໃນ​ແຂວງ​ກວາງ​ນາມ ແທກ​ຄວາມ​ແຮງ​ສັ່ນ​ສະເທືອນ​ໄດ້ 2,6 ອົງສາ​ຣິກ​ເຕີ ໃນ​ຂະນະ​ທີ່​ເຫດການ​ແຜ່ນ​​ດິນ​ໄຫວ​ຢູ່​ໃນ​ແຂວງ​ເຊີນ​ລາ ແທກ​ຄວາມ​ແຮງ​ສັ່ນ​ສະເທືອນ​ໄດ້ 3,9 ອົງສາ​ຣິກ​ເຕີ.

 

ຂ່າວທີ່ກ່ຽວຂ້ອງ