ຂ່າວຫຼ້າສຸດ

ນາຍົກລັດຖະມົນຕີ​ຈີນ-ມາ​ເລ​ເຊຍ ພົບ​ປະ​ເຈລະຈາ​ກັນ

266 23 ສ.ຫ. 2018 ຂ່າວຕ່າງປະເທດ
ນາຍົກລັດຖະມົນຕີ​ຈີນ-ມາ​ເລ​ເຊຍ ພົບ​ປະ​ເຈລະຈາ​ກັນ

    ວັນ​ທີ 20 ສິງຫາ​ນີ້ ທ່ານ​ຫຼີ​ເຄິ້​ສຽງ ນາຍົກລັດຖະມົນຕີ​ຈີນ ໄດ້​ພົບ​ປະ​ເຈລະຈາ​ກັບ​ທ່ານ​ມາ​ຮາ​ເທຍ ໂມ​ຮາມ​ມັດ ນາຍົກລັດຖະມົນຕີ​ມາ​ເລ​ເຊຍ ຢູ່​ທີ່​ນະຄອນຫຼວງ​ປັກ​ກິ່ງ ແລະ ຫຼັງ​ຈາກ​ນັ້ນ ຜູ້​ທັງ​ສອງ​ກໍ​ໄດ້​ເຂົ້າ​ຮ່ວມ​ກອງ​ປະຊຸມ​ຖະແຫຼງ​ຂ່າວ​ຮ່ວມ​ກັນ.

    ທ່ານ​ຫຼີ​ເຄິ້​ສຽງ ຊີ້​ໃຫ້​ເຫັນ​ວ່າ ຄວາມ​ສຳຄັນ​ຂອງ​ສາຍ​ພົວພັນ​ຈີນ-ມາ​ເລ​ເຊຍ ໄດ້​ລື່ນ​ກາຍ​ຂອບ​ສອງ​ຝ່າຍ. ຕໍ່ໜ້າ​ສະຖານະ​ການ​ສາກົນ​ໃນ​ປັດຈຸບັນ​ນີ້ ສອງ​ຝ່າຍ​ເຫັນ​ດີ​ເປັນ​ເອກະ​ພາບ​ກັນ​ຮັກສາ​ການ​ຄ້າ​ເສລີ​ຮ່ວມ​ກັນ ຄັດຄ້ານ​ລັດທິ​ປົກ​ປ້ອງ​ການ​ຄ້າ ແລະ​ຊຸກຍູ້​ຂະ​ບວນ​ການ​ໂລກາ​ພິ​ວັດ​ດ້ານ​ເສດຖະກິດ​ໃຫ້​ພັດທະນາ​ຢ່າງ​ບໍ່​ຢຸດ​ຢັ້ງ ແລະ​ໂປ່ງ​ໃສ. ສອງ​ຝ່າຍ​ສຸມ​ໃສ່​ຊຸກຍູ້​ການ​ສ້າງ​ປະຊາ​ຄົມ​ອາຊີ​ຕາເວັນ​ອອກ ສະໜັບສະໜູນ​ຖານະ​ການ​ເປັນໃຈ​ກາງຂອງ​ອາ​ຊຽນ ໃນ​ການ​ຮ່ວມ​ມື​ພາກ​ພື້ນ ຮ່ວມ​ກັນ​ສົ່ງ​ສັນຍານ​ດ້ານ​ບວກ​ໃຫ້​ພາກ​ພື້ນ ແລະ​ໂລກ​ເຫັນ​ວ່າ ຈີນ ແລະ ມາ​ເລ​ເຊຍ​ສືບຕໍ່​ຮັກສາ​ຈິດໃຈ​ມິດຕະພາບ​ຢ່າງ​ຍາວ​ນານ ປົກ​ປັກ​ຮັກສາ​ສັນຕິພາບ ສະຖຽນ​ລະ​ພາບ ແລະ ການ​ພັດທະນາ​ຂອງ​ພາກ​ພື້ນ.

    ທ່ານ ມາ​ຮາ​ເທຍ ໂມ​ຮາມ​ມັດ ກ່າວ​ວ່າ ຈີນ​ເປັນ​ຄູ່​ຮ່ວມ​ສຳຄັນ​ຂອງ​ມາ​ເລ​ເຊຍ ສາຍ​ພົວພັນ​ມາ​ເລ​ເຊຍ-ຈີນ ແລະ​ການ​ຮ່ວມ​ມື​ລະຫວ່າງ​ສອງ​ປະເທດ ເຮັດ​ໃຫ້​ທັງ​ສອງ​ຝ່າຍ​ໄດ້​ຮັບ​ຜົນ​ປະໂຫຍດ​ນຳ​ກັນ. ຈີນ​ພັດທະນາ​ຢ່າງ​ວ່ອງໄວ​ໃນ​ດ້ານ​ການ​ປະດິດ​ສ້າງ ແລະ ມາ​ເລ​ເຊຍ​ຫວັງ​ວ່າ​ຈະ​ສາມາດ​ຖອດ​ຖອນ​ບົດຮຽນ​ນຳ​ຈີນ ຍົກ​ສູງ​ລະດັບ​ການ​ຮ່ວມ​ມື​ດ້ານ​ການ​ຄ້າ​ເອ​ເລັກ​ໂຕຣ​ນິກ ແລະ ການ​ປະດິດ​ສ້າງ​ໃໝ່​ລະຫວ່າງ​ສອງ​ປະເທດ.

 

ຂ່າວທີ່ກ່ຽວຂ້ອງ