ຂ່າວຫຼ້າສຸດ

ລັດຖະມົນຕີ​ຫຼາຍ​ຄົນ​ໃນ​ລັດຖະບານ​ອົດ​ສະ​ຕຣາ​ລີ ທະຍອຍ​ກັນ​ລາ​ອອກ​ຈາກ​ຕຳແໜ່ງ

237 23 ສ.ຫ. 2018 ຂ່າວຕ່າງປະເທດ
ລັດຖະມົນຕີ​ຫຼາຍ​ຄົນ​ໃນ​ລັດຖະບານ​ອົດ​ສະ​ຕຣາ​ລີ ທະຍອຍ​ກັນ​ລາ​ອອກ​ຈາກ​ຕຳແໜ່ງ

   ກ້າວ​ເຂົ້າ​ສູ່​ການ​ເຮັດ​ວຽກ​ໃນ​ວັນ​ທີ 22 ສິງຫາ​ນີ້ ສະພາບ​ຄວາມ​ສົນລະວົນ​ຢູ່​ໃນ​ລັດຖະບານ​ອົດ​ສະ​ຕຣາ​ລີ ພາຍ​ໃຕ້​ການ​ນຳພາ​ຂອງ​ນາຍົກລັດຖະມົນຕີ ມານ​ຄອມ ເທີນ​ບູນ ກໍ​ຍິ່ງ​ບືນເລິກ​ເຂົ້າ​ໄປ ເມື່ອ​ມີ​ລັດຖະມົນຕີ​ຍື່ນ​ຄຳ​ຮ້ອງ​ຂໍ​ລາ​ອອກ​ຈາກ​ຕຳແໜ່ງ​ຕື່ມ​ອີກ 3 ທ່ານ ເຮັດ​ໃຫ້​ຍອດ​ຈຳນວນ​ເຈົ້າ​ໜ້າທີ່​ຂອງ​ລັດຖະບານ ທີ່​ລາ​ອອກ​ຈາກ​ຕຳແໜ່ງ ຂຶ້ນ​ເປັນ 10 ທ່ານ.

    ບັນດາ​ລັດຖະມົນຕີ ທີ່​ຂໍ​ລາ​ອອກ​ຈາກ​ຕຳແໜ່ງ​ໃໝ່​ຫຼ້າ​ສຸດ​ດັ່ງກ່າວ  ກໍ​ແມ່ນ​ທ່ານ ສະ​ຕີບ ຊີ​ໂອ​ໂບ ລັດຖະມົນຕີ​ການ​ຄ້າ; ທ່ານ ອາລັນ ຕູດ ລັດຖະມົນຕີ​ກ່ຽວ​ກັບ​ພົນລະເມືອງ ແລະ​ທ່ານ ເກັກ ຮັນ ລັດຖະມົນຕີ​ສາທາລະນະ​ສຸກ. ເຖິງ​ຢ່າງໃດ​ກໍ​ຕາມ ການ​ສະເໜີ​ຂໍ​ລາ​ອອກ​ຈາກ​ຕຳແໜ່ງ​ຂອງ​ລັດຖະມົນຕີ​ເຫຼົ່ານັ້ນ ຍັງ​ບໍ່​ທັນ​ໄດ້​ຮັບ​ຄວາມ​ເຫັນ​ດີ​ຈາກ​ນາຍົກລັດຖະມົນຕີ.

    ການ​ທີ່​ບັນດາ​ລັດຖະມົນຕີ ຫຼື​ບັນດາ​ເຈົ້າ​ໜ້າທີ່​ໃນ​ລັດຖະບານ​ອົດ​ສະ​ຕຣາ​ລີ ທະຍອຍ​ກັນ​ລາ​ອອກ​ຈາກ​ຕຳແໜ່ງ ແມ່ນ​ເພື່ອ​ເປັນ​ການ​ຄັດຄ້ານ​ຕໍ່​ນາຍົກລັດຖະມົນຕີ ເທີນ​ບູນ ເຮັດ​ໃຫ້​ເກີດ​ສະພາບ​ຄວາມ​ເຄັ່ງ​ຕຶງ​ຂຶ້ນ​ມາ ເລີ່ມ​ແຕ່​ຫຼັງ​ການ​ລົງ​ຄະແນນ​ສຽງ​ເລືອກ​ຕັ້ງ​ຜູ້ນຳ​ຂອງ​ພັກ ເສລີ ຄືນໃໝ່ ຊຶ່ງ​ທ່ານ ເທີນ​ບູນ ຮຽກຮ້ອງ​ອອກ​ມາ​ຢ່າງ​ບໍ່​ຄາດ​ຝັນ ໃນ​ວັນ​ທີ 21 ສິງຫາ​ນີ້ ຫຼັງ​ຈາກ​ທີ່​ທ່ານ ປີ​ເຕີ ດັດ​ເຕິນ ອະດີດ​ລັດຖະມົນຕີ​ກະຊວງ​ພາຍ​ໃນ ທ້າ​ທາຍ​ຕໍ່​ຕຳແໜ່ງ​ການ​ນຳ​ຂອງ​ເຂົາ. ໃນ​ການ​ລົງ​ຄະແນນ​ສຽງ​ດັ່ງກ່າວ ທ່ານ ເທີນ​ບູນ ໄດ້​ຮັບ​ໄຊຊະນະ​ເໜືອ​ທ່ານ ປີ​ເຕີ ດັດ​ເຕິນ ດ້ວຍ​ຄະແນນ​ສຽງ 48-35. ຫຼັງ​ຈາກ​ການ​ລົງ​ຄະແນນ​ສຽງ​ດັ່ງກ່າວ ທ່ານ ດັດ​ເຕິນ ກໍ​ໄດ້​ປະກາດ​ລາ​ອອກ​ຈາກ​ຕຳແໜ່ງ ເພື່ອ​ກະກຽມ​ໃຫ້​ແກ່​ການ​ກັບ​ໄປ​ສູ່​ການ​ຊີງ​ຕຳແໜ່ງ​ຜູ້ນຳ​ຂອງ​ພັກ​ໃນ​ຄັ້ງ​ຕໍ່​ໄປ.

    ນອກຈາກ​ທ່ານ ດັດ​ເຕິນ ແລ້ວ ຄຳ​ຮ້ອງ​ຂໍ​ລາ​ອອກ​ຈາກ​ຕຳແໜ່ງ​ຂອງ​ຜູ້​ອື່ນໆ​ຢູ່​ໃນ​ຄະນະ​ລັດຖະບານ​ອົດ​ສະ​ຕຣາ​ລີ ແມ່ນ​ຍັງ​ບໍ່​ທັນ​ໄດ້​ຮັບ​ການ​ຮັບຮອງ​ຈາກ​ນາຍົກລັດຖະມົນຕີ ເທີນ​ບູນ.

 

ຂ່າວທີ່ກ່ຽວຂ້ອງ