ຂ່າວຫຼ້າສຸດ

ອີ​ຣານ ກັບ​ຄືນ​ສູ່​ສົ່ງ​ອອກໄຟ​ຟ້າ​ໃຫ້​ແກ່​ບັນດາ​ປະເທດ​ໃກ້​ຄຽງ

222 23 ສ.ຫ. 2018 ຂ່າວຕ່າງປະເທດ
ອີ​ຣານ ກັບ​ຄືນ​ສູ່​ສົ່ງ​ອອກໄຟ​ຟ້າ​ໃຫ້​ແກ່​ບັນດາ​ປະເທດ​ໃກ້​ຄຽງ

     ສຳນັກ​ຂ່າວສານ Tasnim ລາຍ​ງານ​ອ້າງ​ຕາມ​ຄຳ​ເວົ້າ​ຂອງ​ທ່ານ ມາ​ມູ​ເດຣ​ຊາ ຮາ​ກີ​ຟາມ ຮອງ​ລັດຖະມົນຕີ​ກະຊວງ​ພະລັງງານ​ຂອງ​ອີ​ຣານ ໃຫ້​ຮູ້ເມື່ອ​ວັນ​ທີ 21 ສິງຫາ​ນີ້​ວ່າ ອີ​ຣານ​ໄດ້​ກັບ​ຄືນ​ສູ່​ການ​ສະໜອງ​ໄຟຟ້າ ໃຫ້​ແກ່​ອີ​ຣັກ ອາ​ຟະ​ກາ​ນິດ​ສະຖານ ແລະ ປາ​ກິດ​ສະຖານ ມາ​ຕັ້ງແຕ່ 10 ວັນ​ທີ່​ຜ່ານ​ມາ.

    ອີ​ຣານ ໄດ້​ງົດ​ການ​ສະໜອງ​ໄຟຟ້າ​ໃຫ້​ແກ່​ອີ​ຣັກ ເມື່ອ​ເດືອນ​ມິຖຸນາ​ທີ່​ຜ່ານ​ມາ ເນື່ອງ​ຈາ​ກວ່າ​ອີ​ຣັກ​ບໍ່​ຊຳລະ​ຄ່າ​ໄຟ​ຟ້າ​​ຢ່າງ​ຄົບ​ຖ້ວນ ແລະ​ ຍ້ອນ​ວ່າ​ອີ​ຣານ​ເພີ່ມ​ການ​ໃຊ້​ໄຟຟ້າ​ໃນ​ລະດູແລ້ງ. ສະພາບ​ຂາດແຄນ​ໄຟຟ້າ​ຢູ່​ໃນ​ອີ​ຣັກ ໄດ້​ກໍ່ໃຫ້ເກີດ​ສຽງ​ຄັດຄ້ານ​ຢູ່​ໃນ​ນະຄອນ ບາ​ສຣາ ແລະ ນະຄອນ​ອື່ນໆ ເມື່ອ​ປະຊາຊົນ​ຖິ້ມ​ໂທດ​ໃສ່​ລັດຖະບານ​ອີ​ຣັກ.

    ໃນ​ຂະນະ​ດຽວ​ກັນ ການເຄື່ອນໄຫວ​ຄັດຄ້ານ ກໍ​ເກີດ​ຂຶ້ນ​ຢູ່​ໃນ​ອີ​ຣານ ໃນ​ຫຼາຍ​ເດືອນ​ມໍ່ໆມານີ້ ຊຶ່ງ​ພົວພັນ​ເຖິງ​ການ​ຕັດ​ໄຟຟ້າ​ຢູ່​ເລື້ອຍໆ ລວມ​ເຖິງ​ການ​ຂາດແຄນ​ນ້ຳ​ບໍລິໂພກ​ນຳ​ອີກ ລັດຖະບານ​ອີ​ຣານ​ໃຫ້​ຮູ້​ວ່າ ສະພາບ​ແຫ້ງແລ້ງ​ຕາມ​ລະດູ​ການ ໄດ້​ເຮັດ​ໃຫ້​ນ້ຳ​ໃນ​ແມ່ນ້ຳ​ຕ່າງໆ​ບົກ​ແຫ້ງ ນຳໄປ​ສູ່​ການ​ຫຼຸດ​ປະລິມານ​ການ​ຜະລິດ​ໄຟຟ້າ​ແຮງ​ນ້ຳ​ຢູ່​ໃນ​ເຂື່ອນ​ຕ່າງໆ.

 

ຂ່າວທີ່ກ່ຽວຂ້ອງ