ຣັດ​ເຊຍ ເຫັນ​ດີ​ຂາຍ​ລະບົບ​ລູກ​ສອນ​ໄຟ S-400 ໃຫ້​ແກ່​ອິນ​ເດຍ

161 22 ສ.ຫ. 2018 ຂ່າວຕ່າງປະເທດ
ຣັດ​ເຊຍ ເຫັນ​ດີ​ຂາຍ​ລະບົບ​ລູກ​ສອນ​ໄຟ S-400 ໃຫ້​ແກ່​ອິນ​ເດຍ

      ເວບ​ໄຊ Indian Defence News ອ້າງ​ຕາມ​ຄຳ​ເວົ້າ​ຂອງ​ທ່ານ ດີ​ມີ​ຕຣີ ຊູ​ກາ​ແອບ ເຈົ້າ​ໜ້າທີ່​ຕິດຕາມ​ການ​ສົ່ງ​ອອກ​ອາວຸດ​ຂອງ​ຣັດ​ເຊຍ ໃຫ້​ຮູ້​ວ່າ ຣັດ​ເຊຍ​ເຫັນ​ດີ​ຂາຍ​ລະບົບ​ລູກ​ສອນ​ໄຟ S-400 ຍິງ​ຈາກ​ໜ້າດິນ​ສູ່​ອາກາດ​ທີ່​ກ້າວໜ້າ ຈຳນວນ 5 ຊຸດ​ໃຫ້​ແກ່​ອິນ​ເດຍ ດ້ວຍ​ສັນຍາ ໃນ​ລາຄາ​ປະມານ 6,5 ຕື້​ໂດ​ລາ​ສະຫະລັດ.

    ທ່ານ ດີ​ມີ​ຕຣີ ຊູ​ກາ​ແອບ ເວົ້າ​ວ່າ​ຣັດ​ເຊຍ​ໄດ້​ກະກຽມ​ທຸກ​ຢ່າງ​ແລ້ວ ເພື່ອ​ລົງ​ນາມ​ໃນ​ສັນຍາ ດັ່ງກ່າວ. ທຸກ​ແງ່​ມູມ​ທາງ​ດ້ານ​ເຕັກນິກ ແລະ​ການ​ຄ້າ​ທີ່​ສຳຄັນ ໄດ້​ຮັບ​ການ​ຕົກລົງ​ແລ້ວ ໂດຍ​ຣັດ​ເຊຍ ຫວັງ​ວ່າ ສັນຍາ​ນັ້ນ​ຈະ​ໄດ້​ຮັບ​ການ​ລົງ​ນາມ ໃນ​ເດືອນ​ຕຸລາ​ໜ້າ​ນີ້ ໃນ​ລະຫວ່າງ​ທີ່​ມີ​ການ​ປະຊຸມ​ສຸດ​ຍອດ ລະຫວ່າງ​ຜູ້ນຳ​ຂອງ​ສອງ​ປະເທດ.  

    ການ​ຕົກລົງ​ຊື້​ຂາຍ​ລະບົບ​ລູກ​ສອນ​ໄຟ S-400 ດັ່ງກ່າວ ຖືກ​ນຳ​ສະເໜີ​ອອກ​ມາ​ເປັນ​ເທື່ອ​ທຳ​ອິດ ຢູ່​ໃນ​ການ​ພົບ​ປະ​ລະຫວ່າງ​ປະທານາທິບໍດີ​ຣັດ​ເຊຍ ວາ​ລາ​ດີ​ເມຍ ປູ​ຕິນ ກັບ​ນາຍົກລັດຖະມົນຕີ​ອິນ​ເດຍ ນາ​ເຣນ​ດຣາ ໂມ​ດີ ເມື່ອ​ປີ 2016. ຄາດ​ວ່າ​ບັນດາ​ລະບົບ​ລູກ​ສອນ​ໄຟ S-400 ຈະ​ຖືກ​ສົ່ງ​ມອບ​ໃຫ້​ແກ່ ອິນ​ເດຍ ພາຍ​ໃນ​ປີ 2020.

 

ຂ່າວທີ່ກ່ຽວຂ້ອງ