ຂ່າວຫຼ້າສຸດ

ປະທານາທິບໍດີ ປູ​ຕິນ ອອກ​ຄຳ​ສັ່ງ​ກວດກາ​ຄວາມ​ພ້ອມ​ໃນ​ການ​ສູ້​ຮົບ

158 22 ສ.ຫ. 2018 ຂ່າວຕ່າງປະເທດ
ປະທານາທິບໍດີ ປູ​ຕິນ ອອກ​ຄຳ​ສັ່ງ​ກວດກາ​ຄວາມ​ພ້ອມ​ໃນ​ການ​ສູ້​ຮົບ

     ທ່ານ ວາ​ລາ​ດີ​ເມຍ ປູ​ຕິນ ປະທານາທິບໍດີ ທັງ​ເປັນ​ຜູ້​ບັນຊາ​ການ​ສູງ​ສຸດ ຂອງ​ບັນດາ ກອງ​ກຳລັງ​ປະກອບ​ອາວຸດ​ຣັດ​ເຊຍ ໄດ້​ອອກ​ຄຳ​ສັ່ງ​ຢ່າງ​ບໍ່​ຄາດ​ຝັນ ເມື່ອ​ວັນ​ທີ 20 ສິງຫາ​ນີ້ ໃຫ້​ມີ​ການ​ກວດກາ​ທັງ​ໝົດ ຕໍ່​ກຳລັງ​ຄວາມ​ສາມາດ​ໃນ​ການ​ສູ້​ຮົບ ຂອງ​ກອງທັບ​ຣັດ​ເຊຍ ໂດຍ​ເລີ່ມ​ຈາກ ທະຫານ​ເຂດ​ພາກ​ຕາເວັນ​ອອກ ແລະ​ເຂດ​ໃຈກາງ.

    ຖະແຫຼງການ​ຂອງ​ທ່ານ ແຊກ​ເກ ຊອຍ​ກູ ລັດຖະມົນຕີ​ປ້ອງ​ກັນ​ປະເທດ​ຣັດ​ເຊຍ ໃຫ້​ຮູ້​ວ່າ ການ ກວດກາ​ດັ່ງກ່າວ ຖືກ​ປະຕິບັດ​ຢູ່​ທັງ​ກອງ​ກຳລັງ​ທະຫານ​ອາກາດ​ຂະໜາດ​ໄກ ຂົນສົ່ງ​ທາງ​ທະຫານ ແລະ​ບັນດາ​ກົມ​ກອງ​ຍົກ​ພົນ​ຂຶ້ນ​ບົກ ອັນ​ປະກອບ​ມີ​ການ​ຊ້ອມ​ຮົບ​ພິເສດ 16 ລາຍການ ໂດຍ​ເລີ່ມ​ຂຶ້ນ ແຕ່​ວັນ​ທີ 20 ຮອດ 25 ສິງຫາ​ນີ້ ຊຶ່ງ​ມີ​ຂຶ້ນ​ກ່ອນ​ການ​ຊ້ອມ​ຮົບ ທິດຕາເວັນອອກ - 2018. ຈຸດ​ໃຈ​ກາງຂອງ​ການ​ກວດກາ​ນີ້ ກໍ​ແມ່ນ​ການຈັດຕັ້ງ ແລະ ການ​ຮັກສາ​ການ​ບັນຊາ​ການ​ຢ່າງ​ຕໍ່​ເນື່ອງ ແລະ​ຍືນ​ຍົງ ສຳລັບ​ທຸກໆ​ກົມ​ກອງ ແລະ ກອງ​ກຳລັງ. ທ່ານ ແຊກ​ເກ ຊອຍ​ກູ ເວົ້າ​ວ່າ ການ​ຊ້ອມ​ຮົບ ທິດຕາເວັນອອກ - 2018 ຈະ​ມີ​ຂອບ​ຂະໜາດ​ໃຫຍ່​ທີ່​ສຸດ​ນັບ​ແຕ່ໃດໆ​ມາ ໂດຍ​ຈະ​ມີ່​ພົນທະຫານ ຈາກ​ຈີນ ແລະ​ມົງ​ໂກນ ເຂົ້າ​ຮ່ວມ​ນຳ.

    ໃນ​ຂ່າວ​ອີກ​ດ້ານ​ໜຶ່ງ ເຈົ້າ​ໜ້າທີ່​ໃນ​ທ້ອງຖິ່ນ ແຈ້ງ​ໃຫ້​ຮູ້​ວ່າ ພວກ​ມື​ປືນ​ທີ່​ບໍ່​ຮູ້​ວ່າ​ເປັນ​ຝ່າຍ​ໃດ ໄດ້​ດຳເນີນ​ການ​ໂຈມ​ຕີ​ຫຼາຍ​ລາຍ ໃນ​ວັນ​ທີ 20 ສິງຫາ​ນີ້ ໂດຍ​ມຸ່ງ​ເປົ້າ​ໃສ່​ເຈົ້າ​ໜ້າທີ່​ຕຳຫຼວດ ຢູ່​ໃນ​ສາທາລະນະ​ລັດ ເຊ​​ສ​ເນຍ (Chechnya) ທີ່​ຂຶ້ນ​ກັບ​ຣັດ​ເຊຍ ເປັນ​ເຫດ​ໃຫ້​ມີ​ຜູ້​ໄດ້​ຮັບ​ບາດເຈັບ ຫຼາຍ​ຄົນ.

 

ຂ່າວທີ່ກ່ຽວຂ້ອງ