ຂ່າວຫຼ້າສຸດ

ກຸ່ມ​ມື​ປືນ ຕາ​ລີ​ບັນ ປະຕິເສດ​ຂໍ້​ສະເໜີ​ຢຸດ​ຍິງ​ຂອງ​ລັດຖະບານ​ອາ​ຟະ​ກາ​ນິດ​ສະຖານ

249 22 ສ.ຫ. 2018 ຂ່າວຕ່າງປະເທດ
ກຸ່ມ​ມື​ປືນ ຕາ​ລີ​ບັນ ປະຕິເສດ​ຂໍ້​ສະເໜີ​ຢຸດ​ຍິງ​ຂອງ​ລັດຖະບານ​ອາ​ຟະ​ກາ​ນິດ​ສະຖານ

    ຂ່າວສານ ຣອຍ​ເຕີ ລາຍ​ງານ​ວ່າ ວັນ​ທີ 20 ສິງຫາ​ນີ້ ກຸ່ມ​ມື​ປືນ​ຕາ​ລີ​ບັນ ໄດ້​ຖະແຫຼງ​ເຖິງ ການ​ປະຕິເສດ​ຕໍ່​ຂໍ້​ສ​​ະ​ເໜີ​ຢຸດ​ຍິງ​ຂອງ​ຝ່າຍ​ລັດຖະບານ​ອາ​ຟະ​ກາ​ນິດ​ສະຖານ ພ້ອມ​ກັນ​ນັ້ນ​ກໍ​ຢືນຢັນ​ວ່າ ຈະ​ສືບຕໍ່​ດຳເນີນ​ການ​ໂຈມ​ຕີ.

    ຜູ້​ບັນຊາ​ການ ຂອງ​ກຸ່ມ​ຕາ​ລີ​ບັນ 2 ຄົນ ຊຶ່ງ​ບໍ່​ປະສົງ​ອອກ​ນາມ ໃຫ້​ຮູ້​ວ່າ ຜູ້ນຳ​ສູງ​ສຸດ​ຂອງ​ກຸ່ມ ດັ່ງກ່າວ ໄດ້​ປະຕິເສດ​ຕໍ່​ຂໍ້​ສະເໜີ​ຂອງ​ປະທານາທິບໍດີ​ອາ​ຟະ​ກາ​ນິດ​ສະຖານ ອາ​ສຣາ​​ຟ ກາ​ນີ ກ່ຽວ​ກັບ​ຄຳ​ສັ່ງ​ຢຸດ​ຍິງ​ແກ່ຍາວ 3 ເດືອນ ເລີ່ມ​ແຕ່​ຕົ້ນ​ເທດສະການ ອິດ ອາ​​ລ-ອັດ​ຮາ (Eid al-Adha) ຂອງ​ຊາວ​ມຸ​ສລິມ ເປັນຕົ້ນ​ໄປ.

   ເມື່ອ​ເດືອນ​ມິຖຸນາ​ທີ່​ຜ່ານ​ມາ ສອງ​ຝ່າຍ​ໄດ້​ປະຕິບັດ​ຄຳ​ສັ່ງ​ຢຸດ​ຍິງ​ແກ່ຍາວ​ເປັນ​ເວລາ 3 ວັນ ເນື່ອງ​ໃນ​ໂອກາດ​ເທດສະການ ອິດ ອາ​​ລ-ເຟີດ (Eid al-Fitr).

    ໃນ​ຂ່າວ​ອີກ​ດ້ານ​ໜຶ່ງ ເຈົ້າ​ໜ້າທີ່ ອາ​ຟະ​ກາ​ນິດ​ສະຖານ  ແຈ້ງ​ໃຫ້​ຮູ້ເມື່ອ​ວັນ​ທີ 20 ສິງຫາ​ນີ້​ວ່າ ກອງ​ກຳລັງ​ຮັກສາ​ຄວາມ​ສະຫງົບ​ຂອງ​ລັດຖະບານ​ປະເທດ​ນີ້ ໄດ້​ຊ່ວຍເຫຼືອ​ນຳ​ເອົາ​ຕົວ​ປະກັນ 149 ຄົນ (ໃນ​ນັ້ນ​ມີ​ແມ່ຍິງ ແລະ​ເດັກນ້ອຍ ລວມ​ຢູ່​ນຳ​ຫຼາຍ​ຄົນ) ອອກ​ມາ​ໄດ້ ຊຶ່ງ​ກຸ່ມ​ມື​ປືນ​​ຕາ​ລີ​ບັນ ລັກ​ພາ​ຕົວ​ພວກ​ເຂົາ​ໄປ ຢູ່​ໃນ​ພື້ນ​ທີ່​ແຂວງ ກຸນ​ດຸ​​ສ (ພາກ​ເໜືອ​ອາ​ຟະ​ກາ​ນິດ​ສະຖານ) ເມື່ອ​ວັນ​ທີ 19 ສິງຫາ. ໃນ​ຂະນະ​ດຽວ​ກັນ ກຸ່ມ​ມື​ປືນ​ຕາ​ລີ​ບັນ ຍັງ​ກັກ​ຕົວ​ຕົວ​ປະກັນ​ໄວ້​ອີກ 21 ຄົນ.

 

ຂ່າວທີ່ກ່ຽວຂ້ອງ