ເວ​ເນ​ຊູ​ເອ​ລາ ນຳ​ເອົາ​ເງິນ​ໂບ​ລີ​ວາ​ໃໝ່ ເຂົ້າ​ສູ່​ການ​ນຳ​ໃຊ້​ຢ່າງ​ເປັນ​ທາງ​ການ

139 22 ສ.ຫ. 2018 ຂ່າວຕ່າງປະເທດ
ເວ​ເນ​ຊູ​ເອ​ລາ ນຳ​ເອົາ​ເງິນ​ໂບ​ລີ​ວາ​ໃໝ່ ເຂົ້າ​ສູ່​ການ​ນຳ​ໃຊ້​ຢ່າງ​ເປັນ​ທາງ​ການ

   ແຜນການ​ປ່ຽນ​ເງິນ ຊຶ່ງ​ປະທານາທິບໍດີ​ເວ​ເນ​ຊູ​ເອ​ລາ ນີ​ໂກ​ລາ​​ສ ມາ​ດູ​ໂຣ ປະກາດ​ໄປ ກ່ອນ​ໜ້າ​ນີ້​ຫຼາຍ​ເດືອນ ໄດ້​ເລີ່ມ​ມີ​ຜົນ​ບັງຄັບ​ໃຊ້​ຢ່າງ​ເປັນ​ທາງ​ການ​ແລ້ວ ໃນ​ວັນ​ທີ 20 ສິງຫາ​ນີ້ ຊຶ່ງ​ຕາມ​ນັ້ນແລ້ວ ສະກຸນ​ເງິນ​ພາຍ​ໃນ​ປະເທດ​ຂອງ​ເວ​ເນ​ຊູ​ເອ​ລາ ໄດ້​ຮັບ​ການ​ປັບ​ຫຼຸດ​ລົງ​ຫ້າ​ເລກ 0 ແລະ​ມີ​ຊື່​ໃໝ່​ວ່າ​ເງິນ “ໂບ​ລີ​ວາ ອະທິປະ​ໄຕ.”

    ເງິນ “ໂບ​ລີ​ວາ ອະທິປະ​ໄຕ” ໃໝ່ ຖືກ​ນຳ​ເຂົ້າ​ສູ່​ການ​ນຳ​ໃຊ້ ຈະ​ປະກອບ​ມີ​ເງິນ​ທີ່​ເປັນ​ໂລຫະ 2 ປະເພດ ຊຶ່ງ​ມີຄ່າ 0,5 ແລະ 1 ໂບ​ລີ​ວາ (bolivar)  ໃນ​ຂະນະ​ທີ່​ປະເພດ​ເງິນ​ເຈ້ຍ​ຈະ​ມີຄ່າ 2 5 10 20 50 100 200 ແລະ 500 ໂບ​ລີ​ວາ. ນອກຈາກ​ນັ້ນແລ້ວ ປະເພດ​ເງິນ​ຕ່າງໆ​ທີ່​ມີ​ຢູ່​ໃນ​ປັດຈຸບັນ ຊຶ່ງ​ເປັນ​ປະເພດ​ທີ່​ມີຄ່າ​ແຕ່ 1.000 ຫາ 100.000 ໂບ​ລີ​ວາ ກໍ​ຍັງ​ຄົງ​ໃຊ້​ໄດ້​ຢູ່​ຕໍ່​ໄປ.

    ນີ້​ເປັນ​ເທື່ອ​ທີ​ສອງ ທີ່​ລັດຖະບານ​ເວ​ເນ​ຊູ​ເອ​ລາ ປະຕິບັດ​ການ​ປ່ຽນ​ເງິນ ພາຍ​ໃນ 10 ປີ​ທີ່​ຜ່ານ ມາ. ເມື່ອ​ປີ 2008 ປະທານາທິບໍດີ ຮຸຍ​ໂກ ຊາ​ເວ​​ສ ຜູ້​ທີ່​ໄດ້​ລ່ວງ​ລັບ​ໄປ​ແລ້ວ​ນັ້ນ ກໍ​ໄດ້​ນຳ​ເອົາ​ເງິນ “ໂບ​ລີ​ວາ ແຂງແຮງ” ເຂົ້າ​ສູ່​ການ​ນຳ​ໃຊ້ ດ້ວຍ​ການ​ຫຼຸດ​ລົງ​ສາມ​ເລກ 0 ເມື່ອ​ທຽບໃສ່​ສະກຸນ​ເງິນ​ພາຍ​ໃນ ປະເທດ ທີ່​ໃຊ້​ກ່ອນ​ໜ້າ​ນັ້ນ.

 

ຂ່າວທີ່ກ່ຽວຂ້ອງ