ພະຍາດ​ແອນ​ແທຣກ ລະບາດ​ຢູ່​ໃນ​ຝຣັ່ງ

188 22 ສ.ຫ. 2018 ຂ່າວຕ່າງປະເທດ
ພະຍາດ​ແອນ​ແທຣກ ລະບາດ​ຢູ່​ໃນ​ຝຣັ່ງ

   ໃນ​ແຈ້ງ​ການ​ທີ່​ມີ​ອອກ​ມາ​ເມື່ອ​ວັນ​ທີ 20 ສິງຫາ​ນັ້ນ ເຈົ້າ​ໜ້າທີ່​ໃນ​ເຂດ​ສາຍພູ ຮາວ-ແອວ  (Hautes-Alpes) ໃນ​ເຂດ​ພາກ​ຕາເວັນ​ອອກ​ສ່ຽງ​ໃຕ້​ຂອງ​ປະເທດ​ຝຣັ່ງ ໃຫ້​ຮູ້​ວ່າ ລາຍ​ງານ​ເທື່ອ​ທຳ​ອິດ ກ່ຽວ​ກັບ​ການ​ລະບາດ​ຂອງ​ພະຍາດ​ແອນ​ແທຣກ (Anthrax) ຢູ່​ໃນ​ບ້ານ ມົນ​ກາ​ດິນ ຊຶ່ງ​ໄດ້​ປະກາດ ອອກ​ໄປ​ເມື່ອ​ວັນ​ທີ 28 ມິຖຸນາ​ທີ່​ຜ່ານ​ມາ ລະບຸ​ວ່າ​ມີ​ງົວ​ຕາຍ​ໄປ 6 ໂຕ.

    ຂ່າວ​ແຈ້ງວ່າ ງົວ ແກະ ແລະ​ ມ້າ ຈຳນວນ 50 ກວ່າ​ໂຕ ໄດ້​ກາຍເປັນ “ຜູ້​ຮັບ​ເຄາະ​ຮ້າຍ” ງວດ​ທຳ​ອິດ​ຂອງ​ການລະບາດພະຍາດ​ແອນ​ແທຣກ ທີ່​ຮ້າຍ​ແຮງ​ທີ່​ສຸດ ໃນ​ຮອບ 2 ທົດ​ສະ​ວັດ​ທີ່​ຜ່ານ​ມາ ຢູ່​ໃນ​ຝຣັ່ງ ຊຶ່ງ​ການ​ລະບາດ​ເກີດ​ຂຶ້ນ​ເມື່ອ​ຂາດແຄນ​ວັກ​ແຊງ​ປ້ອງ​ກັນ​ພະຍາດ. ມາ​ຮອດ​ເວລາ​ນີ້ ພະຍາດ​ແອນ​ແທຣກ ທີ່​ເຮັດ​ໃຫ້​ສັດລ້ຽງ​ຕາຍພາຍ​ໃນ​ເວລາ​ພຽງ 24 ຊົ່ວໂມງ ຫຼັງ​ຈາກ​ທີ່​ຕິດພະຍາດ ດັ່ງກ່າວ​ນັ້ນ ໄດ້​ແພ່​ລາມ​ອອກ​ໄປ​ສູ່​ຟາມ 28 ແຫ່ງ​ຢູ່​ໃນ​ພື້ນ​ທີ່​ດັ່ງກ່າວ.

    ພະຍາດ​ແອນ​ແທຣກ ມັກ​ມີ​ອາການ​ປະກົດ​ອອກ​ຢູ່​ທີ່​ຜີວ​ໜັງ ແລະ​ມາ​ຮອດ​ເວລາ​ນີ້ ຮູບ​ແບບ​ທີ່ ແພ່​ຫຼາຍ​ທີ່​ສຸດ​ຂອງ​ພະຍາດ​ດັ່ງກ່າວ ແມ່ນ​ບໍ່​ຄ່ອຍ​ເຮັດ​ໃຫ້​ເກີດ​ການ​ເສຍ​ຊີວິດ ຖ້າ​ຫາ​ກວ່າ​ໄດ້​ຮັບ​ການ ປິ່ນປົວ​ດ້ວຍ​ຢາ​ຕ້ານ​ເຊື້ອ. ເຖິງ​ຢ່າງໃດ​ກໍ​ຕາມ ແບກ​ເຕີ​ເຣຍ bacillus anthracis ທີ່​ພາໃຫ້​ເກີດ ພະຍາດ​ແອນ​ແທຣກ​ນັ້ນ ພັດ​ກໍ່ໃຫ້ເກີດ​ມີ​ທາດ​ເບື່ອ​ຮ້າຍ​ແຮງ​ຊະນິດ​ໜຶ່ງ ຊຶ່ງ​ສາມາດ​ນຳ​ໃຊ້ ຄື​ກັບ​ວ່າ ເປັນ​ອາວຸດ​ຊີວະ​ພາບ. ເມື່ອ​ປີ 2001 ໄດ້​ເກີດ​ເຫດການ​ໂຈມ​ຕີ​ດ້ວຍ​ແບກ​ເຕີ​ເຣຍ ທີ່​ກໍ່ໃຫ້ເກີດ ພະຍາດ​ແອນ​ແທຣກ ຢູ່​ໃນ ສ ອາ​ເມ​ຣິ​ກາ ໂດຍ​ທີ່​ຜູ້​ກໍ່​ເຫດ​ໄດ້​ເອົາ​ແບກ​ເຕີ​ເຣຍ ເຂົ້າ​ໃສ່​ຊອງ​ຈົດໝາຍ ແລະ ​ສົ່ງ​ຜ່ານ​ລະບົບ​ໄປສະນີ ເປັນ​ເຫດ​ໃຫ້​ມີ​ຜູ້​ເສຍ​ຊີວິດ 5 ຄົນ ແລະ​ຕິດພະຍາດ​ອີກ 17 ຄົນ.

 

ຂ່າວທີ່ກ່ຽວຂ້ອງ