ເຈົ້າພາບ ສົ່ງຄົບ 28 ປະເພດກີລາ ພ້ອມຕັ້ງເປົ້າຕິດ 1 ໃນ 5 ກີລາແຫ່ງຊາດ

161 22 ສ.ຫ. 2018 ວົງຈອນກີລາ
ເຈົ້າພາບ ສົ່ງຄົບ 28 ປະເພດກີລາ ພ້ອມຕັ້ງເປົ້າຕິດ 1 ໃນ 5 ກີລາແຫ່ງຊາດ

    ທ່ານ ບຸນ​ຕົ້ນ ຈັນ­ທະ​ພອນ ເຈົ້າ­ແຂວງ​ຊຽງ​ຂວາງ ໃຫ້​ສຳພາດ​ຕໍ່​ສື່​ມວນ​ຊົນ​ກ່ຽວ​ກັບ​ຄວາມພ້ອມ​ຂອງ​ກີ­ລາ ​ທີ່​ຈະ​ເຂົ້າ​ຮ່ວມ​ແຂ່ງ­ຂັນ​ກີ­ລາ​ແຫ່ງ​ຊາດ ຄັ້ງ​ທີ 11 ຫຼື ຊຽງ​ຂວາງ​ເກມ ວ່າ: ກ່ອນ​ໜ້າ​ນີ້ ແຂວງ​ຊຽງ​ຂວາງ ​ແມ່ນ​ບໍ່​ມີ​ນັກ­ກີ­ລາ​ຄົບ​ຖ້ວນ​ໃນ​ຈຳ­ນວນ 28 ປະ­ເພດ​ກີ­ລາ ເພາະ​ພວກ​ເຮົາເຄີຍ​ສົ່ງ​ເຂົ້າ​ຮ່ວມ​ພຽງ​ແຕ່ 14-15 ປະ­ເພດ ຈາກ​ທັງ​ໝົດ 10 ຄັ້ງ​ທີ່​ຜ່ານ​ມາ ແລະ ເຄີຍ​ຍາດ​ໄດ້​ຫຼຽນ​ໃນ​ລະ­ດັບ​ກາງໆ ດັ່ງ­ນັ້ນ ທາງ​ແຂວງ​ໄດ້​ວາງ 3 ຍຸດ​ທະ​ສາດ ປະ­ກອບ​ມີ: ໄດ້​ເອົາ​ສິ່ງ​ທີ່​ມີ​ແລ້ວ​ຄື​ຂໍ​ຄູ​ເຝິກ ແລະ ນັກ­ກີ­ລາ​ກັບ​ແຂວງ​ທີ່​ແຮກ­ສ່ຽວ​ມາ​ເພີ່ມ​ເລື່ອງ​ເຕັກ­ນິກ ຊອກ​ຫາ​ນຳ​ກະຊວງ ສະ​ຖາ​ບັນ​ການ​ສຶກ​ສາ ແລະ ສຳ­ນັກ­ງານ​ຕ່າງໆ ທີ່​ເປັນ​ລູກ​ຫຼານ​ຂອງ​ຊາວ​ຊຽງ​ຂວາງ ທີ່​ສະ­ໝັກ​ໃຈ​ມາ​ຮັບ​ໃຊ້​ບ້ານ​ເກີດ​ເມືອງ​ນອນ ແລະ ຮຽກ­ຮ້ອງ​ໃນ​ວົງ​ກວ້າງ ຄື: ທຸກ​ຄົນ​ທີ່​ສະ­ໝັກ​ໃຈ​ມາ​ຊ່ວຍ​ແຂວງ​ຊຽງ​ຂວາງ ແລະ ມາ​ເຖິງ​ປັນ​ຈຸ​ບັນ​ນີ້ ປາ­ກົດ​ວ່າ ນັກ­ກີ­ລາ​ຄົບ​ທັງ 28 ປະ­ເພດ ແລະ ໄດ້​ເຂົ້າ​ສູນ​ເຝິກ­ຊ້ອມ​ໄດ້​ເຖິງ 7 ຮ້ອຍ​ກວ່າ​ຄົນ​ລວມ​ທັງ ຄະ­ນະ​ນຳ ຄູ​ເຝິກ ແລະ ນັກ­ກີ­ລາ ສ່ວນ​ເປົ້າ​ໝາຍ​ແມ່ນ​ອີງ­ໃສ່​ຄວາມ​ສາ­ມາດ ແລະ ຄວາມ​ກະ​ຕື້​ລື​ລົ້ນ​ຂອງ​ນັກ­ກີ­ລາ​ແຂວງ ຈະ​ບໍ່​ໃຫ້​ຫຼຸດ 1 ໃນ 5 ອັນ​ດັບ​ທຳ​ອິດ.

    ສ່ວນ​ອີກ​ຄວາມ​ພ້ອມ​ດ້ານ​ໜຶ່ງ ​ກໍ່​ຄື ສະ­ຖານ­ທີ່​ຮອງ​ຮັບ​ນັກ­ກີ­ລາທີ່​ຈະ​ເຂົ້າ​ມາ​ຮ່ວມ​ງານ​ ແມ່ນ​ອີງໃສ່​ໂຮງ­ຮຽນ​ເປັນ​ຈຸດ​ໜັກ ເປັນຕົ້ນ​ແມ່ນ​ໂຮງ­ຮຽນ​ວິ­ຊາ​ຊີບ ສະ​ຖາ​ບັນ​ສ້າງ​ຄູ ແລະ ໂຮງ­ຮຽນ​ມັດ­ທະ­ຍົມ​ຕົ້ນ​ປາຍ ລວມ​ທັງໝົດ​ມີ 38 ແຫ່ງ ແລະ ສະ­ຖານ­ທີ່​ຮັບ­ແຂກ​ທີ່​ເຂົ້າ​ມາ​ຮ່ວມ​ງານ​ດັ່ງ­ກ່າວ ພວກ​ເຮົາ​ສາ­ມາດ​ຮອງ​ຮັບ​ໄດ້ 6 ພັນ​ຄົນ ໂດຍ​ມີ​ເຮືອນ​ພັກ ແລະ ໂຮງ­ແຮມ ພາຍ​ໃນຕົວ​ເມືອງ​ໂພນ​ສະ­ຫວັນ ແລະ ເມື່ອ​ທີ່​ໃກ້​ຄຽງ ເປັນ­ຕົ້ນ​ແມ່ນເມືອງ​ຄູນ ແລະ ເມືອງ​ຄຳ.

    ສຳ­ລັບ​ແຂວງ​ຊຽງ​ຂວາງ ໃນ​ງານ​ກີ­ລາ​ແຫ່ງ​ຊາດ​ທີ່​ຜ່ານ​ມາ ບໍ່​ເຄີຍ​ສົ່ງ​ຮ່ວມ​ເຖິງ 20 ປະ­ເພດ​ກີ­ລາ ແລະ ຄັ້ງ​ທີ 10 ເມື່ອ​ປີ 2014 ທີ່​ແຂວງ​ອຸ­ດົມ​ໄຊ ເປັນ​ເຈົ້າ­ພາບ ມີ 25 ປະ­ເພດ​ກີ­ລາ ປາ­ກົດ​ວ່າ: ແຂວງ​ຊຽງ​ຂວາງ ຍາດ​ໄດ້ 9 ຫຼຽນ​ຄຳ 17 ຫຼຽນ​ເງິນ ແລະ 48 ຫຼຽນ​ທອງ ຈັດ​ຢູ່​ອັນ​ດັບ​ທີ 10 ຂອງ​ຕາ­ຕະ­ລາງ​ຄະ­ແນນ​ສະ­ຫຼຸບ​ຫຼຽນ ສ່ວນ​ເຈົ້າ​ຄອງ​ຫຼຽນ​ຄຳ​ເປັນ​ຂອງກະ­ຊວງ​ປ້ອງ​ກັນ​ປະ­ເທດ ຍາດ​ໄດ້ 61 ຫຼຽນ​ຄຳ 29 ຫຼຽນ​ເງິນ ແລະ 37 ຫຼຽນ​ທອງ.

ຂ່າວທີ່ກ່ຽວຂ້ອງ