ຍັງຈົດຈໍາວັນຢຶດອໍານາດ 23 ສິງຫາ

207 22 ສ.ຫ. 2018 ຫົວຂໍ້ຂ່າວອື່ນໆ

    ບັນ­ຍາ­ກາດ​ແຫ່ງ​ກະ­ແສ​ຟອງ​ປະ­ຕິ­ວັດ​ທີ່​ຟົດ​ເດືອດ ການ​ລຸກ​ຮື​ຂຶ້ນ​ຂອງ​ມວນ​ຊົນ​ຊາວ​ນະ­ຄອນ­ຫຼວງ​ວຽງ​ຈັນ ໃນ​ມື້​ວັນ​ທີ 23 ສິງ­ຫາ ປີ 1975 ເພື່ອ​ໂຄ່ນ​ລົ້ມ​ອຳ­ນາດ​ການ​ປົກ­ຄອງ​ເກົ່າ​ທີ່​ເໜົ່າ​ເໝັນ​ແລ້ວ ສ້າງ­ຕັ້ງ​ອຳ­ນາດ​ການ​ປົກ­ຄອງ​ປະ­ຕິ­ວັດ​ຂຶ້ນ​ນັ້ນ ຍັງ​ຝັງ​ແໜ້ນ​ຢູ່​ໃນ​ຄວາມ​ຊົງ​ຈຳ​ຂອງ​ຊາວ​ນະ­ຄອນ­ຫຼວງ​ວຽງ​ຈັນ ຢ່າງ​ບໍ່​ມີ​ວັນ​ຈະ​ຫຼົງ​ລືມ​ໄດ້.

    ວັນ​ທີ 23 ສິງ­ຫາ​ປີ 1975 ຕັ້ງ­ແຕ່​ເວ­ລາ 3 ໂມງ​ເຊົ້າ ມວນ​ຊົນ​ຊາວ​ນະ­ຄອນ­ຫຼວງ​ວຽງ​ຈັນ​ນັບ​ເປັນ​ໝື່ນໆ​ຄົນ ໄດ້​ພ້ອມ​ກັນ​ອອກ​ຈາກ​ບ້ານ​ເຮືອນ​ຂອງ​ຕົນ​ມຸ່ງ​ໜ້າ​ໄປ​ສູ່​ສະ­ໜາມ​ຫຼວງ (ເດີ່ນ​ພະ​ທາດ­ຫຼວງ) ໂດຍ​ສະ­ເພາະ ມວນ​ຊົນ​ທີ່​ມີ​ບ້ານ​ຊ່ອງ​ຢູ່​ທາງ​ທິດ­ຕາ­ເວັນ­ຕົກ​ຂອງ​ນະ­ຄອນ­ຫຼວງ​ວຽງ​ຈັນ ແມ່ນ​ໄດ້​ກຳ­ນົດ​ເອົາ​ປະ­ຕູ​ໄຊ​ເປັນ​ຈຸດ​ນັດ​ພົບ ຫຼື ເປັນ​ສູນ​ລວມ​ແລ້ວ ເຄື່ອນ​ເຂົ້າ​ສູ່​ສະ­ໜາມ​ຫຼວງ ດ້ວຍ​ການ​ຮ້ອງ​ຄຳ​ຂວັນ​ຢ່າງ​ຟົດ​ສະ­ໜັ່ນ​ຫວັນ​ໄຫວ: ເດັດ­ດ່ຽວ​ໂຄ່ນ​ລົ້ມ​ລະ­ບອບ​ເກົ່າ​ອັນ​ເນົ່າ​ເໝັນ ທີ່​ເປັນ​ເຄື່ອງ­ມື​ຮັບ​ໃຊ້​ໃຫ້​ແກ່​ພວກ​ຈັກ­ກະ­ພັດ​ຜູ້​ຮຸກ​ຮານ ແລະ ຮຽກ­ຮ້ອງ​ໃຫ້​ສ້າງ­ຕັ້ງ​ອຳ­ນາດ​ການ​ປົກ­ຄອງ​ປະ­ຕິ­ວັດ ທີ່​ເປັນ​ຕົວ​ແທນ​ຂອງ​ປະ­ຊາ­ຊົນ​ລາວ​ບັນ­ດາ­ເຜົ່າ​ທີ່­ແທ້​ຈິງ​ຂຶ້ນ.

    ໃນ​ງານ​ໂຮມ​ຊຸມ­ນຸມ​ອັນ​ເຄັ່ງ­ຂຶມ ທີ່​ຈັດ​ຂຶ້ນ​ໃນ​ຕອນ​ເຊົ້າ​ຂອງ​ມື້​ນັ້ນ ຢູ່​ທີ່​ສະ­ໜາມ​ຫຼວງ​ທີ່​ຄັບ­ຄາ​ໜາ​ແໜ້ນ​ໄປ​ດ້ວຍ​ມວນ​ຊົນ​ຊັ້ນ​ຄົນ​ຕ່າງໆ ທີ່​ມາ​ຈາກ​ທົ່ວ​ສາ­ລະ​ທິດ ໄດ້​ປະ­ກາດ​ລົບ​ລ້າງ​ອຳ­ນາດ​ການ​ປົກ­ຄອງ​ເກົ່າ​ທີ່​ເນົ່າ​ເໝັນ ເຜົາ​ຫຸ່ນ​ຈຳ­ລອງ​ຂອງ​ອຳ­ນາດ​ການ​ປົກ­ຄອງ​ຝ່າຍ​ວຽງ​ຈັນ ທີ່​ເປັນ​ໄມ້​ມື​ຂອງ​ພວກ​ຈັກ­ກະ­ພັດ​ຜູ້​ຮຸກ​ຮານ ແລະ ປະ­ກາດ​ສ້າງ­ຕັ້ງ​ອຳ­ນາດ​ການ​ປົກ­ຄອງ​ປະ­ຕິ­ວັດ​ຂັ້ນ​ກຳ­ແພງ​ນະ­ຄອນ​ຂຶ້ນ ໂດຍ​ແມ່ນ​ທ່ານ ເພົ້າ ພິມ​ພະ­ຈັນ ເປັນ​ປະ­ທານ ເຊິ່ງ​ມັນ​ໄດ້​ບົ່ງ​ບອກ​ເຖິງ​ວິ­ນາ­ທີ​ສຸດ​ທ້າຍ​ແຫ່ງ​ການ​ຄົງ​ຕົວ​ຂອງ​ອຳ­ນາດ​ການ​ປົກ­ຄອງ​ເກົ່າ​ທີ່​ເນົ່າ​ເໝັນ ມັນ​ເປັນ​ຂີດ​ໝາຍ​ປະ­ຫວັດ­ສາດ​ຂອງ​ຊາວ​ນະ­ຄອນ­ຫຼວງ​ວຽງ​ຈັນ ທີ່​ສາ­ມາດ​ລົບ​ລ້າງ​ອຳ­ນາດ​ການ​ປົກ­ຄອງ​ເກົ່າ​ໂດຍ​ບໍ່​ໄດ້​ແຕກ​ສຽງ​ປືນ ແລະ ເສຍ­ສະ­ຫຼະ​ເລືອດ​ເນື້ອ​ແຕ່​ຢ່າງ­ໃດ​ເລີຍ ເຊິ່ງ​ເຫດ­ການ​ນີ້ ໄດ້​ສ້າງ​ຄວາມ​ງຶດ­ງໍ້​ອັດ­ສະ­ຈັນ​ໃຫ້​ແກ່​ຊາວ​ໂລກ​ບໍ່​ແມ່ນ​ໜ້ອຍ.

    ໃນ​ຄວາມ​ເປັນ​ຈິງ​ແລ້ວ ໄຊ­ຊະ­ນະ​ທີ່​ພວກ​ເຮົາ​ຢຶດ​ອຳ­ນາດ 23 ສິງ­ຫາ ໃນ​ປີ 1975 ມັນ​ແມ່ນ​ຜົນ­ສຳ­ເລັດ​ໃນ​ເບື້ອງ​ຕົ້ນ​ຂອງ​ປະ­ຊາ­ຊົນ​ບັນ­ດາ­ເຜົ່າ ໃນ​ການ​ດຳ­ເນີນ​ການ​ຕໍ່­ສູ້​ທາງ​ການ­ເມືອງ​ໃນ​ໄລ­ຍະ​ພຽງ 2 ປີ​ກວ່າ ນັບ​ແຕ່​ມື້​ເຊັນ​ສັນ­ຍາ​ຟື້ນ​ຟູ​ສັນ­ຕິ­ພາບ ແລະ ຄວາມ​ຖືກ­ຕ້ອງ​ປອງ​ດອງ​ຊາດ​ທີ່​ວຽງ​ຈັນ ເມື່ອ​ວັນ​ທີ 21 ກຸມ­ພາ 1973 ແຕ່​ທັງ​ນັ້ນ ກໍ່​ຍ້ອນ​ມີ​ພັກ​ປະ­ຊາ­ຊົນ​ປະ­ຕິ­ວັດ​ລາວ ເປັນ​ຜູ້​ສະ­ຫຼາດ​ສ່ອງ​ໃສ​ຮູ້​ກຳ​ເອົາ​ກາ­ລະ​ໂອ­ກາດ​ນຳ­ພາ​ປະ­ຊາ­ຊົນ​ລາວ​ບັນ­ດາ­ເຜົ່າ ເພື່ອ​ທຳ​ການ​ຕໍ່­ສູ້​ດ້ວຍ​ຫຼາຍ​ຮູບ​ຫຼາຍ​ວິ­ທີ​ລະ​ອິດ​ລະ​ອ້ຽວ​ຫຍຸ້ງ­ຍາກ​ສັບ­ສົນ​ຈົນ​ບໍ່​ສາ­ມາດ​ຈະ​ພັນ​ລະ​ນາ​ໄດ້ ແຕ່​ອີກ​ດ້ານ​ໜຶ່ງ​ໄຊ­ຊະ­ນະ ແລະ ຜົນ­ສຳ­ເລັດ​ດັ່ງ­ກ່າວ ພວກ​ເຮົາ​ກໍ່​ບໍ່​ສາ­ມາດ​ຈະ​ຕັດ​ແຍກ​ອອກ​ຈາກ​ຜົນ­ງານ​ແຫ່ງ​ການ​ເຂົ້າ​ຮ່ວມ​ຢ່າງ​ຕັ້ງ­ໜ້າ​ຂອງ​ກຳ­ລັງ​ປະ­ກອບ​ອາ­ວຸດ ປ້ອງ​ກັນ​ຊາດ-ປ້ອງ​ກັນ​ຄວາມ​ສະ­ຫງົບ​ຂອງ​ພວກ​ເຮົາ​ໄດ້ ເພາະ­ວ່າ​ກ່ອນ​ຈະ​ເຖິງ​ວັນ​ທີ 23 ສິງ­ຫາ​ປີ 1975 ນັ້ນ ໂດຍ​ພາຍ​ໃຕ້​ການ​ນຳ­ພາ​ຂອງ​ພັກ ແລະ ການ​ຊີ້​ນຳ​ຈາກ​ກອງ​ບັນ­ຊາ​ການ​ສູງ​ສຸດ ກອງ­ທັບ​ປົດ​ປ່ອຍ​ປະ­ຊາ­ຊົນ​ລາວ ບັນ­ດາ​ພະ­ນັກ­ງານ-ນັກ­ຮົບ​ເຫຼົ່າ​ຮົບ​ຕ່າງໆ ລ້ວນ​ແຕ່​ສຸມ​ໃສ່​ການ​ປະ­ຕິ­ບັດ​ທິດ​ນຳ​ຂອງ​ພັກ ເພີ່ມ​ທະ­ວີ​ການ​ຕໍ່­ສູ້​ທາງ​ການ­ເມືອງ​ປະ­ຕິ­ບັດ​ສັນ­ຍາ​ວຽງ​ຈັນ ສົມ­ທົບ​ໜູນ​ໜີບ​ດ້ວຍ​ກຳ­ລັງ​ປະ­ກອບ​ອາ­ວຸດ​ທີ່​ເຫັນ​ວ່າ​ມີ​ເງື່ອນ­ໄຂ​ເຮັດ​ໄດ້ ເພື່ອ​ເປີດ​ກວ້າງ​ເຂດ​ປົດ​ປ່ອຍ​ອອກ​ເທື່ອ​ລະ​ກ້າວ.

    ໃນ​ໄລ­ຍະ​ເວ­ລາ​ດັ່ງ­ກ່າວ ບັນ­ດາ​ກຳ­ລັງ​ປະ­ກອບ​ອາ­ວຸດ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ­ຫງົບ​ຢູ່​ທຸກ​ເຂດ​ແຂວງ​ທ້ອງ­ຖິ່ນ ລ້ວນ​ແຕ່​ເປັນ​ເອ­ກະ​ພາບ​ເດັດ­ດ່ຽວ ໜີບ​ຮັດ​ສັດ­ຕູ​ດ້ວຍ​ກຳ­ລັງ​ປະ­ກອບ​ອາ­ວຸດ ສາ­ມາດ​ເປີດ​ເສັ້ນ­ທາງ​ໃຫ້​ແຕ່​ລະ​ກົມ​ກອງ​ເຂົ້າ​ໄປ​ເຖິງ​ຈຸດ​ທີ່​ໝາຍ ເຊັ່ນ: ຢູ່​ນະ­ຄອນ­ຫຼວງ​ວຽງ​ຈັນ ຫຼວງ​ພະ​ບາງ ສະ­ຫວັນ​ນະ​ເຂດ ປາກ​ເຊ ທ່າ​ແຂກ ແລະ ຕົວ​ເມືອງ​ອື່ນໆ ສະ­ເພາະ​ມື້​ວັນ​ທີ 23 ສິງ­ຫາ 1975 ນອກ­ຈາກ​ມວນ​ຊົນ​ຊັ້ນ​ຄົນ​ຕ່າງໆ ເຂົ້າ​ຮ່ວມ​ໃນ​ງານ​ບຸນ​ໃຫຍ່​ດັ່ງ­ກ່າວ​ແລ້ວ ບັນ­ດາ​ກົມ​ກອງ​ທະ­ຫານ​ເຫຼົ່າ​ຮົບ​ຕ່າງໆ ເຊັ່ນ: ກອງ­ຮ້ອຍ 161 ລົດ​ຕັງ ກອງ­ພັນ 705 ກອງ­ພັນ 605 ກອງ­ຮ້ອຍ​ກຳ­ລັງ​ໄຟ​ເພດ​ຍິງ ແລະ ກອງ​ອື່ນໆ ກໍ່​ລ້ວນ​ແຕ່​ໄດ້​ເຂົ້າ​ຮ່ວມ​ເຄື່ອນ​ໄຫວ​ຮັກ­ສາ​ຄວາມ​ປອດ​ໄພ ໃນ​ຂອບ​ເຂດ​ສະ­ໜາມ​ຫຼວງ​ໃນ​ມື້​ນັ້ນ ຈາກ​ເຫດ­ການ​ປະ­ຫວັດ­ສາດ 23 ສິງ­ຫາ 1975 ມັນ​ໄດ້​ເປັນ​ຂີດ​ໝາຍ​ທີ່​ປະ­ຊາ­ຊົນ​ບັນ­ດາ­ເຜົ່າ ຂຸດ​ຮາກ​ຖອນ​ໂຄນ​ແຫ່ງ​ພະ­ລັງ​ອຳ­ນາດ​ອາ­ຍາ​ສິດ​ຂຸນ​ເສິກ​ຂອງ​ລະ­ບອບ​ເກົ່າ ແລ້ວ​ກ້າວ​ສູ່​ການ​ສະ­ຖາ­ປະ­ນາ ສາ­ທາ­ລະ­ນະ​ລັດ ປະ­ຊາ­ທິ­ປະ­ໄຕ ປະ­ຊາ­ຊົນ​ລາວ ໃນ​ວັນ​ທີ 2 ທັນ­ວາ 1975 ຢ່າງ​ສະ­ຫງ່າ​ຜ່າ­ເຜີຍ.

ຂ່າວທີ່ກ່ຽວຂ້ອງ