ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 22/08/2018

163 22 ສ.ຫ. 2018 ຫົວຂໍ້ຂ່າວອື່ນໆ

    ຄໍ​ລຳ​ປະຈຳ​ວັນ​ນີ້ ໄດ້​ສັງ​ລວມເອົາ​ບົດຮຽນ​ກ່ຽວ​ກັບ​ການ​ເບິ່ງແຍງ​ຜູ້​ເຖົ້າຢູ່ ​ສປ ຈີນ ເລື່ອງສິງກະໂປ ຢຸດ​ອະນຸຍາດ​ໃຫ້​ບຸກຄົນ​ມີ​ລົດ​ໃຫຍ່​ໄວ້​ໃຊ້​ສ່ວນ​ຕົວ ເພາະ​ບໍ່​ມີ​ເສັ້ນທາງ​ໃຫ້​ແລ່ນ​ລົດ ແລະ ເລື່ອງ​ສະພາ​ຫວຽດນາມ ຕ້ອງການ​ໃຫ້​ຕິດຕາມ​ກວດກາເລື່ອງ​ການ​ແຈ້ງ​ຊັບ​ສິນ​ຂອງ​ພະນັກງານ​ລັດ.

    ທີ່ ​ສປ ຈີນ:  ໃນ​ເດືອນ​ຕຸລາ ປີ 2017 ລັດຖະບານ​ຈີນ ​ໄດ້​ເປີດເຜີຍ​ກ່ຽວ​ກັບ​ຮ່າງ​ກົດ​ລະບຽບ​ ວ່າດ້ວຍ​ອົງ​ການຈັດຕັ້ງ​ທີ່​ຮັບ​ຜິດຊອບ​ເບິ່ງແຍງ​ຜູ້​ອາຍຸ​ສູງ​ ແນໃສ່ເຮັດ​ໃຫ້ການ​ເບິ່ງແຍງ ແລະ ການ​ບໍລິການ​ອື່ນໆໄດ້​ມາດ​ຕະຖານ ກົດ​ລະບຽບ​ດັ່ງກ່າວ ​ໄດ້​ຮັບການ​ເຜີຍແຜ່​ຜ່ານ​ສື່​ສັງຄົມ​ອອນລາຍ ເພື່ອ​ທາບ​ທາມ​ຄວາມ​ຄິດຄວາມ​ເຫັນ​ຈາກ​ທົ່ວ​ສັງຄົມ ​ຮ່າງກົດ​ລະບຽບ ໄດ້​ກຳນົດ​ໃຫ້​ສະຖານ​ທີ່​ເບິ່ງແຍງ​ຜູ້​ເຖົ້າ​ສະໜອງ ການ​ບໍລິການ​ດ້ານ​ເຄືອ​ຄ່າຍ​ສື່ສານ ບໍ່​ສະເພາະ​ແຕ່​ເລື່່ອງ​ໂທລະ​ສັບ ແລະ ອິນ​ເຕີ​ເນັດ​ເທົ່ານັ້ນ ໃນ​ກໍລະນີ​ຜູ້​ອາຍຸ​ສູງ​ມີ​ບັນຫາ​ດ້ານ​ການ​ສື່ສານ ສະຖານທີ່ເບິ່ງແຍງ​ມີໜ້າ​ທີ່​ຈັດ​ພະນັກງານ​ວິຊາ​ການ​ເຂົ້າ​ຊ່ວຍ​ທັນທີ ພະນັກງານ​ຄວນ​ປະພຶດແບບ​ສຸພາບ ແລະ ມີ​ຄວາມ​ອົດທົນ​ເອົາໃຈ​ໃສ່​ຮັກສາ​ຂໍ້​ມູນ​ທີ່​ເປັນຄວາມລັບ​ສ່ວນ​ຕົວ​ຂອງ​ຜູ້​ອາຍຸ​ສູງ ແລະ ຂອງ​ຜູ້​ເຂົ້າ​ມາ​ຢ້ຽມຢາມສະຖານທີ່​ບັນຍາກາດ ​ສິ່ງ​ແວດລ້ອມ ແລະ ສະຖານທີ່​ເບິ່ງແຍງຜູ້​ເຖົ້າ​ຕ້ອງ​ຮັບປະກັນ​ຄວາມ​ປອດໄພ ແລະ ຄວາມ​ເປັນ​ສ່ວນ​ຕົວ​ໃນ ທ້າຍ​ປີ 2016 ພົນລະເມືອງ​ຈີນທີ່​ມີ​ອາຍຸ 60 ປີ ຫຼື ສູງ​ກວ່າ​ນັ້ນ ມີ​ຈຳນວນ 230,8 ລ້ານ​ຄົນ ເທົ່າກັບ 16,7% ຂອງ​ຈຳນວນ​ພົນ​ລະເມືອງ​ທັງ​ໝົດ​ຂອງ​ປະເທດ​ຕາມ​ມາດຕະຖານ​ສາກົນ​ປະເທດ​ໃດ ຫຼື ພາກ​ພື້ນ​ໃດ​ທີ່​ມີ​ພົນລະເມືອງອາຍຸ 60 ຫຼື ກາຍ 60 ປີ ຈຳນວນ 10% ຂອງ​ພົນລະເມືອງ​ທັງ​ໝົດຂອງ​ປະເທດ ກໍ່​ຈະ​ຖືກ​ເປັນ​ສັງຄົມຜູ້​ອາຍຸ​ສູງ.

    ທີ່ ສິງກະໂປ: ໃນ​ປັດຈຸບັນ ການ​ທີ່​ຈະ​ມີ​ລົດ​ໃຫຍ່​ສ່ວນ​ຕົວ​ຂັບຢູ່ສິງກະໂປ​ນັ້ນ ຍາກ​ແສນ​ເຂັນ ເພາະ​ທາງ​ການ​ໄດ້​ປະກາດ​ຢ່າງເປັນ​ທາງ​ການ​ແລ້ວ ​ວ່າຈະ​ບໍ່​ອະນຸ​ຍາດ​ໃຫ້​ມີ​ການ​ເພີ່ມ​ຈຳນວນລົດສູ່​ຖະໜົນ​ຕື່ມ​ອີກ ​ຍ້ອນ​ບັນຫາການ​ຈາລະ​ຈອນ​ຕິດ​ຂັດ​ໃນ​ໄລຍະກ່ອນ ມີ​ການ​ປະກາດ​ເລື່ອງ​ນີ້ ຊາວສິງກະໂປ ກໍ່​ພົບ​ບັນຫາ​ຫຍຸ້ງຍາກ ກ່ອນ​ຈະ​ໄດ້​ເປັນ​ເຈົ້າ​ຂອງ​ລົດ​ໃຫຍ່ຄື ກ່ອນ​ອື່ນ​ຕ້ອງ​ໄດ້​ຊື້​ໃບ​ອະນຸຍາດພິເສດ​ຈາກ​ລັດຖະບານ ໃນ​ມູນ​ຄ່າ 50.000 ໂດ​ລາ​ສິງກະໂປ (ປະມານ 300 ກວ່າ​ລ້ານ​ກີບ) ໃບອະນຸຍາດ​ດັ່ງກ່າວ ມີ​ອາຍຸ 10 ປີ ນອກຈາກ​ນັ້ນ ຜູ້​ຈະ​ເປັນເຈົ້າ​ຂອງລົດ​ຍັງ​ຕ້ອງ​ໄດ້​ເສຍ​ພາສີຫຼາຍ​ປະເພດ ເຊິ່ງ​ເມື່ອ​ບວກ​ກັບພາສີ​ນຳເຂົ້າ​ແລ້ວ ລົດ​ຄັນ​ນ້ອຍໆຕ໋ອກປ໋ອກ ກໍ່​ຈະ​ມີ​ລາຄາ​ສູງ​ປະມານ 600 ລ້ານ​ກີບ (1 ແສນ​ໂດ​ລາ​ສິງກະ​ໂປ) ໃນ​ແຕ່​ລະ​ປີ​ລັດຖະບານສິງກະໂປ ອະນຸຍາດ​ໃຫ້​ເພີ່ມ​ຈຳນວນ​ລົດ​ຕາມ​ຖະໜົນ​ໄດ້​ພຽງ 0,25% ນັ້ນ​ເປັນ​ເລື່ອງ​ຜ່ານ​ມາ ສ່ວນ​ໃນ​ປັດຈຸບັນ (ນັບ​ແຕ່​ເດືອນກຸມພາ​ປີ​ນີ້​ເປັນຕົ້ນ​ມາ ລັດ​ຖະບານ​ສິງກະໂປ​ ໄດ້​ຢຸດຕິ​ກາ​ອອກໃບ​ອະນຸຍາດ​ເພີ່ມ​ຕື່ມ ​ສຳລັບການ​ເປັນ​ເຈົ້າ​ຂອງ​ລົດ​ໃຫຍ່ ສ່ວນ​ບຸກຄົນ ຖ້າ​ຜູ້​ໃດ​ຕ້ອງການໃບ​ອະນຸຍາດ ກໍ່​ຕ້ອງ​ໄດ້​ລໍຖ້າເຈົ້າ​ຂອງ​ໃບ​ອະນຸຍາດ​ເກົ່າ​ຍົກເລີກ​ເສຍ​ກ່ອນ.

   ທີ່ ​ສສ ຫວຽດນາມ: ໃນ​ທ້າຍປີຜ່ານມາ​ມີ​ຂ່າວ​ວ່າ ກຳມາ​ທິການ​ຍຸຕິ​ທຳ​ສະພາ​ແຫ່ງ​ຊາດຫວຽດນາມ ໄດ້​ຊຸກຍູ້​ໃຫ້​ລັດ​ຖະບານ​ມີ​ກົນ​ໄກ ແລະ ກົດ​ລະບຽບ ເພື່ອ​ຕິດຕາມ​ລາຍ​ຮັບ​ຂອງ​ພົນລະ​ເມືອງ ໂດຍ​ສະເພາະແມ່ນພະນັກງານ​ລັດ ແນໃສ່​ຮັບ​ປະກັນ​ຄວາມ​ໂປ່ງ​ໃສ ແລະ ຄວາມສາມາດ​ໃນ​ການ​ກວດ​ສອບ ເຮັດ​ໄດ້​ແນວ​ນີ້ ຈຶ່ງ​ຈະ​ສາມາດ​ຕໍ່ສູ້​ຕ້ານ​ບັນຫາ​ສໍ້​ລາດ​ບັງ​ຫຼວງ​ທີ່ຍັງ​ມີ​ແຜ່​ຫຼາຍ ກຳມາ​ທິ​ການ​ໄດ້ສະເໜີ​ວ່າ ລັດຖະບານ​ຄວນ​ມີມາດ​ຕະການ​ທາງ​ວິໄນ​ສຳລັບພະນັກງານ​ທີ່​ຕົວະ ຫຼື ເຊື່ອງອຳຊັບ​ສິນ​ຂອງ​ຕົນ ທ່ານ​ນາງ ເລ ທິ​ງ່າ ປະທານ​ກຳມາ​ທິ​ການ​ຍຸຕິທຳ ໃຫ້​ຮູ້​ວ່າ: ໃນ​ປີ 2017 ຈຳນວນ​ພະນັກງານ​ທີ່​ແຈ້ງ​ຊັບ​ສິນຂອງ​ຕົນ​ນັ້ນ ມີ​ຈຳນວນ​ຫຼາຍກວ່າ 1,1 ລ້ານ​ລາຍການ ແຕ່ການ​ກວດກາ​ຄືນ​ວ່າການ​ແຈ້ງຖືກຕ້ອງ ຫຼື ບໍ່​ນັ້ນ​ເຮັດ​ໄດ້​ພຽງ 77 ລາຍການ​ເທົ່າ​ນັ້ນ ນີ້​ຄື​ຊ່ອງຫວ່າງ​ທີ່​ເຮັດ​ໃຫ້ການ​ແຈ້ງ​ຊັບສິນ​ສ່ວນ​ໃຫຍ່​ບໍ່​ມີ​ປະສິດທິພາບ ໃນ​ການ​ຕ້ານ​​ບັນ​ຫາ​ສໍ້​ລາດ​ບັງຫຼວງ.

ຂ່າວທີ່ກ່ຽວຂ້ອງ