ຍາມຝົນ ທາງເປື້ອນ

639 22 ສ.ຫ. 2018 ນານາສາລະ

    ຄວາມ​ຈິງ​ລະ­ດູ­ຝົນ​ກໍ່​ຖື​ວ່າ​ເປັນ​ເລື່ອງ​ປົກ­ກະ­ຕິ ທີ່ຖະ­ໜົນ​ຫົນ­ທາງ​ຈະ​ເປື້ອນ​ເປິ​ະ​ກວ່າ​ລະ­ດູ­ແລ້ງ ແຕ່ຜູ້​ຂຽນ​ຢາກ​ນຳ​ມາ​ສະ­ເໜີ​ແລກ­ປ່ຽນ​ຕື່ມ ກໍ່​ຄື ເລື່ອງການ​ຄຸ້ມ​ຄອງ​ຂັ້ນ​ບ້ານ ໃນ​ການ​ເກືອດ​ຫ້າມ​ລົດ 6 ລໍ້ ຫຼື 10 ລໍ້ ແກ່​ດິນ​ໄປ​ຖົມ​ເຂດ​ທີ່​ມີ​ການ​ປຸກ​ສ້າງ ຍົກ​ຕົວ­ຢ່າງ ໃນ​ຂັ້ນ​ບ້ານ​ທີ່​ທາງ​ຮ່ອມ​ເຂົ້າ​ໄປ​ໃນເຂດ​ບ້ານ​ ທີ່​ບໍ່​ສາ­ມາດ​ຮັບ​ນ້ຳ­ໜັກ​ລົດ​ແກ່​ດິນ​ຂະໜາດ​ໃຫຍ່ 10 ລໍ້ ເຖິງ​ແມ່ນ​ວ່າ​ທາງ​ດີ​ກໍ່​ຈະ​ເຮັດ​ໃຫ້ທາງ​ເພ ຫຼື ຫຼຸບ​ເປັນ​ຂຸມ​ແຕກ ພໍ​ເຖິງ​ລະ­ດູ­ຝົນ​ນ້ຳ​ມາ ກໍ່​ຈະ​ເຮັດ​ໃຫ້​ທາງ​ເຂົ້າ​ບ້ານ​ຕາມ​ບັນ­ດາ​ຮ່ອມ​ຕ່າງໆ ​ເກີດ​ຄວາມ​ຍາກ​ລຳ­ບາກ​ໃນ​ການ​ສັນ­ຈອນ​ໄປມາ.

    ບັນ­ຫາ​ຂອງ​ລົດ​ແກ່​ດິນ​ໄປ​ຖົມ​ຢຽບ​ທາງ​ຮ່ອມ​ໃນບ້ານ​ຈົນ​ເພ­ພັງ ເປັນ​ບວກ ເປັນ​ຂຸມ​ນີ້ ຜູ້​ທີ່​ໄດ້​ຮັບ​ຜົນກະ­ທົບ​ກໍ່​ແມ່ນ​ປະ­ຊາ­ຊົນ ເພາະ​ຖ້າ­ວ່າ​ອະ­ນຸ­ຍາດ​ໃຫ້ລົດ​ນ້ອຍ​ກໍ່​ໄຄ​ແນ່ ສ່ວນ­ວ່າ​ການ­ຈັດ­ຕັ້ງ​ທ້ອງ­ຖິ່ນ​ໄດ້ເກັບ​ຄ່າ​ທາງ (ຄ່າ​ແກ່​ດິນ​ເຂົ້າ​ທາງ​ຮ່ອມ​ໃນ​ບ້ານ) ດ້ວຍ​ເຫດ­ຜົນ​ວ່າ​ຈະ​ນຳ​ເງິນ​ເຫຼົ່າ­ນັ້ນ​ມາ​ປົວ­ແປງ  ສ່ວນ​ໃຫຍ່​ທີ່​ສັງ­ເກດ​ເຫັນ​ຂ້ອນ​ຂ້າງ​ມິດ​ຈ້ອຍ ເພາະອາດ​ເກີດ​ມາ​ຈາກ​ການ​ຂາດ​ການ​ກວດ­ກາ​ຢ່າງເຂັ້ມ​ງວດ ຈາກ​ການ­ຈັດ­ຕັ້ງ​ກ່ຽວ­ຂ້ອງ ແລ້ວ​ປະ­ຊາຊົນ​ຈຶ່ງ​ມີ​ຄຳ​ຖາມ​ວ່າ ເງິນ​ທີ່​ເກັບ​ນຳ​ລົດ​ຖົມ​ດິນ​ມາປົວ­ແປງ​ທາງ​ຮ່ອມ​ມັນ​ໄປ​ເຂົ້າ­ຖົງ​ໃຜ ? ຜູ້​ຂຽນ​ເຂົ້າໃຈ​ວ່າ ໃນ​ນະ­ຄອນ­ຫຼວງ​ວຽງ​ຈັນ ອາດ​ມີ​ຫຼາຍ​ບ້ານທີ່​ຕົກ​ໃນ​ກໍ­ລະ­ນີ​ທີ່​ເວົ້າ​ມາ​ຂ້າງ​ເທິງ.

    ພວກ​ເຮົາ​ບໍ່​ຄວນ​ລືມ​ວ່າ ຍທຂ ນະ­ຄອນ­ຫຼວງ ໄດ້ອອກ​ແຈ້ງ​ການ​ເລກ​ທີ 2954 ຕັ້ງ­ແຕ່​ວັນ​ທີ 8/6/2018 ໃຫ້​ຢຸດ​ເຊົາ​ຊົ່ວ­ຄາວ​ການ​ຖົມ​ດິນຂຸດ​ດິນ... ແຈ້ງ​ການ​ດັ່ງ­ກ່າວ ​ກຳ­ນົດ​ໄລ­ຍະ​ເວ­ລາ​ແຕ່​ວັນ​ທີ 15 ມິ­ຖຸ­ນາ ຫາ​ວັນ​ທີ 15 ຕຸ­ລາ 2018 ຫ້າມ​ເດັດ­ຂາດ ການ​ຂຸດ​ຖົມ​ດິນ ແກ່​ດິນ​ຂົນ­ສົ່ງ​ໃນ​ຂອບ​ເຂດ​ທົ່ວ​ນະຄອນ​ຫຼວງ ເຊິ່ງ​ແຈ້ງ​ການ​ດັ່ງ­ກ່າວ​ແມ່ນ ຍທຂ ນະຄອນ​ຫຼວງ​ ຈະ​ໄດ້​ສົມ­ທົບ​ເຮັດ​ວຽກ​ຮ່ວມ​ມື​ກັບ​ເມືອງ ແລະ ບ້ານ ພວກ​ເຮົາ​ປະ­ຊາ­ຊົນ​ກໍ່​ສຸດ​ຍິນ​ດີ ຂໍ​ໃຫ້ຂັ້ນ​ເທິງ​ເພິ່ນ​ປະ­ຕິ­ບັດ ເພື່ອ​ແກ້​ໄຂ​ການ​ສັນ­ຈອນ​ໄປມາ​ພາຍ​ໃນ​ບ້ານ​ອອກ​ສູ່​ທາງ​ໃຫຍ່​ໃຫ້​ສະ­ດວກ ເພາະ​ຜ່ານ​ມາ ແລະ ປັດ­ຈຸ­ບັນ ເຫັນ​ວ່າ​ບາງ​ເຂດບ້ານ​ຍັງ​ລຳ­ບາກ ຍ້ອນ​ທາງ​ເພ​ຈາກ​ລົດ​ຂົນ​ດິນ.

    ຫວັງ​ວ່າ­ການ​ເຮັດ​ວຽກ​ປະ­ສານ​ສົມ­ທົບ​ຕາມແຈ້ງ​ການ​ດັ່ງ­ກ່າວ ຈະ​ລົງ​ປະ­ຕິ­ບັດ​ກວດ­ກາ​ໃຫ້​ທົ່ວເຖິງ​ໃນ​ແຕ່​ລະ​ບ້ານ ແລະ ຢ່າ​ລືມ​ໃຫ້​ຄວາມ​ສຳ­ຄັນແກ່​ຫາງ​ສຽງ​ຂອງ​ປະ­ຊາ­ຊົນ.

    ຂໍ​ສະ­ເໜີ​ເປັນ​ການ​ແລກ­ປ່ຽນ.

ຂ່າວທີ່ກ່ຽວຂ້ອງ