ຂ່າວຫຼ້າສຸດ

ຮອງນາຍົກ ລົງຕິດຕາມສະພາບນໍ້າຂອງເຂົ້າຖ້ວມຢູ່ 2 ເມືອງ

338 22 ສ.ຫ. 2018 ຂ່າວໜ້າ​ໜຶ່ງ

    ວັນ​ທີ 21 ສິງ­ຫາ 2018 ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ພ້ອມ​ດ້ວຍ​ຄະ­ນະ​ລົງ​ຕິດ­ຕາມ​ສະ­ພາບ​ນ້ຳ­ຂອງ​ຍື່ງ​ໄຫຼ​ເຂົ້າ​ຖ້ວມ​ຈຸດ​ຫຼໍ່​ແຫຼມ​ເຂດ​ເມືອງ​ສີ​ສັດ­ຕະ​ນາກ ແລະ ເມືອງ​ຫາດ​ຊາຍ​ຟອງ ຖືກ​ຕ້ອນ­ຮັບ​ໂດຍ​ທ່ານ ແກ່ນ ວໍ­ລະ​ສານ ເຈົ້າ­ເມືອງ​ຫາດ​ຊາຍ​ຟອງ ທ່ານ​ຮອງ​ເຈົ້າ­ເມືອງ​ສີ​ສັດ­ຕະ​ນາກ ອຳ­ນາດ​ການ​ປົກ­ຄອງ​ບ້ານ ແລະ ພະ­ແນກ­ການ​ກ່ຽວ­ຂ້ອງ.

    ການ​ລົງ​ຕິດ­ຕາມ​ສະ­ພາບ​ນ້ຳ​ຍື່ງ​ຖ້ວມ​ຄັ້ງ​ນີ້ ທ່ານ​ຮອງ​ນາ­ຍົກ​ພ້ອມ​ຄະ­ນະ​ໄດ້​ລົງ​ເບິ່ງ​ຈຸດ​ເຂດ​ປະ­ຕູ​ນ້ຳ​ບ້ານ​ໂພນ​ສະ­ຫວ່າງ ເມືອງ​ສີ​ສັດ­ຕະ​ນາກ ເຊິ່ງ​ເຂດ​ດັ່ງ­ກ່າວ​ນ້ຳ­ຂອງ​ໄດ້​ຍື່ງ​ໄຫຼ​ເຂົ້າ​ຈຸດ​ທີ່​ຕ່ຳ​ໃນ​ວັນ​ທີ 20 ສິງ­ຫາ 2018 ແຕ່​ມາ​ຮອດ​ວັນ​ທີ 21 ສິງ­ຫາ 2018 ລະ­ດັບ​ນ້ຳ​ໄດ້​ຫຼຸດ​ລົງ ຍັງ​ເຫຼືອ 11,26 ແມັດ ລະ­ດັບ​ເຕືອນ​ໄພ 12,5 ແມັດ ລະ­ດັບ​ອັນ­ຕະ­ລາຍ 13,5 ແມັດ ສັງ​ລວມ​ແລ້ວ​ເມືອງ​ສີ​ສັດ­ຕະ​ນາກ​ບໍ່​ມີ​ປະ­ຊາ­ຊົນ​ໄດ້​ຮັບ​ຜົນ​ກະ­ທົບ​ຈາກ​ນ້ຳ​ຖ້ວມ​ຄັ້ງ​ນີ້ ຈາກ​ນັ້ນ ຄະ­ນະ​ໄດ້​ສືບ­ຕໍ່​ລົງ​ເບິ່ງ​ຈຸດ​ຫຼໍ່​ແຫຼມ​ເມືອງ​ຫາດ​ຊາຍ​ຟອງ ຄື: ບ້ານ​ນາ­ທາມ ດອນ​ເກີດ ໂຄກ​ຊາຍ ແລະ ເຂດ​ປະ­ຕູ​ນ້ຳ​ຫ້ວຍ​ເດື່ອ ຜ່ານ​ການ​ຕິດ­ຕາມ ແລະ ໄດ້​ຮັບ​ການ​ລາຍ​ງານ​ຈາກ​ພາກ­ສ່ວນ​ກ່ຽວ­ຂ້ອງ​ໃນ​ແຕ່​ລະ​ຈຸດ ລະ­ດັບ​ນ້ຳ­ຂອງ​ໄດ້​ຫຼຸດ​ລົງ​ຢ່າງ​ຕໍ່​ເນື່ອງ ແຕ່​ຍັງ​ມີ​ຫຼາຍ​ເຂດ​ມີ​ນ້ຳ​ຍື່ງ​ໄຫຼ​ເຂົ້າ​ຖ້ວມ​ເນື້ອ­ທີ່​ທຳ​ການ​ຜະ­ລິດ​ຂອງ​ປະ­ຊາ­ຊົນ ໂດຍ​ສະ­ເພາະ ເນື້ອ­ທີ່​ສວນ​ປູກ​ພືດ​ຜັກ ສວນ​ໄມ້​ໃຫ້​ໝາກ ແລະ ໜອງ​ປາ ໄດ້​ຮັບ​ຄວາມ​ເສຍ​ຫາຍ.

    ທ່ານ ແກ່ນ ວໍ­ລະ​ສານ ໄດ້​ກ່າວ​ວ່າ: ເນື່ອງ​ຈາກ​ຝົນ­ຕົກ​ຕິດ­ຕໍ່​ກັນ​ຫຼາຍ​ວັນ ເຮັດ​ໃຫ້​ນ້ຳ­ຂອງ​ໄຫຼ​ຍື່ງ​ເຂົ້າ​ຖ້ວມ​ເຂດ​ຕ່ຳ​ເມືອງ​ຫາດ​ຊາຍ​ຟອງ ແຕ່​ວັນ​ທີ 19 ສິງ­ຫາ 2018 ເປັນ­ຕົ້ນ​ມາ ໃນ​ນີ້ ມີ 7 ເຂດ 20 ບ້ານ​ໄດ້​ຮັບ​ຜົນ​ກະ­ທົບ ເນື້ອ­ທີ່​ທຳ​ການ​ຜະ­ລິດ ໂດຍ​ສະ­ເພາະ ພືດ​ຜັກ ສວນ​ໄມ້​ໃຫ້​ໝາກ ແລະ ໜອງ​ປາ​ໄດ້​ຮັບ​ຄວາມ​ເສຍ​ຫາຍ​ປະ­ມານ 500 ເຮັກ­ຕາ ພາຍ­ຫຼັງ​ນ້ຳ​ຫຼຸດ​ລົງ​ຈະ​ໄດ້​ມີ​ການ​ປະ​ເມີນ​ຢ່າງ​ລະ­ອຽດ ແລ້ວ​ລາຍ​ງານ​ຕໍ່​ຂັ້ນ​ເທິງ​ຮັບ​ຊາບ ພ້ອມ​ທັງ​ສົມ­ທົບ​ກັບ​ພາກ­ສ່ວນ​ກ່ຽວ­ຂ້ອງ​ປຸກ­ລະ­ດົມ ຊຸກ­ຍູ້​ປະ­ຊາ­ຊົນ​ປູກ​ພືດ​ຜັກ​ທົດ​ແທນ​ເນື້ອ­ທີ່​ເສຍ​ຫາຍ.

ຂ່າວທີ່ກ່ຽວຂ້ອງ