ເບິ່ງບ້ານເຂົາເອົາບົດຮຽນ 21/08/2018

111 21 ສ.ຫ. 2018 ຫົວຂໍ້ຂ່າວອື່ນໆ

    ມື້ນີ້ມີ​ເລື່ອງ​ການ​ແກ້​ໄຂ​ບັນຫາ​ຢາເສບ​ຕິດ ດ້ວຍ​ນະໂຍບາຍ​ເຝິກ​ວິຊາ​ຊີບ​ຢູ່ ປາ​ນາ​ມາ ມາດຕະການ​ເພີ່ມ​ຈຳນວນ​ພົນ​ລະເມືອງ​ຢູ່ ຣັດ​ເຊຍ ແລະ ເລື່ອງ​ແມ່​ໃຈ​ໂຫດ​ຂາຍ​ລູກ​ສາວເພື່ອ​ແລກ​ເງິນ​ຢູ່ ມາ​ເລ​ເຊຍ.

    ທີ່ ປາ​ນາ​ມາ: ນັບ​ແຕ່​ກາງເດືອນ​ມັງກອນ ປີ 2015 ເປັນຕົ້ນມາ ລັດຖະບານ ປາ​ນາ​ມາ ໄດ້​ເປີດ​ໂຄງການ​ນິລະໂທດ​ກຳ ສຳລັບ​ກຸ່ມ​ຄ້າ​ຢາ​ເສບ​ຕິດ ແລະ ກຸ່ມອາ​ຊະ​ຍາ​ກອນ​ໃນ​ປະເທດ ​ເພື່ອໃຫ້​ໂອກາດ​ພວກ​ເຂົາເຈົ້າ​ໄດ້​ກັບຄືນ​ສູ່​ຊີວິດ​ປົກກະຕິໃນ​ສັງຄົມ ປາ​ນາ​ມາ ເປັນ​ໜຶ່ງ​ໃນ​ບັນດາປະເທດ​ທີ່​ມີ​ອາ​ຊະ​ຍາ​ກອນ​ຫຼາຍທີ່​ສຸດ​ໃນ​ໂລກ ໂດຍ​ສະເພາະແມ່ນ​ພວກ​ທີ່​ພົວພັນ​ກັບ​ການ​ຄ້າຢາ​ເສບ​ຕິດ ພ້ອມໆ​ກັບ​ນະ​ໂຍບາຍ​ນິລະໂທດ​ກຳ ທາງ​ການ ປາ​ນາ​ມາ ກໍ່​ໄດ້​ເປີດ​ໂຄງການເຝິກ​ວິຊາ​ຊີບໃນ​ຂະແໜງການຕ່າງໆ ສະມາຊິກ​ກຸ່ມ​ຄ້າ​ຢາ​ເສບຕິດ ແລະ ອາ​ຊະ​ຍາ​ກອນ ທີ່​ຕ້ອງການ​ເຂົ້າ​ຮ່ວມ​ໂຄງການ​ເຝິກ​ອົບຮົມ​ວິຊາ​ຊີບ ກ່ອນ​ອື່ນ​ຕ້ອງ​ຍອມປົດ ແລະ ມອບ​ອາວຸດ​ໃຫ້​ທາງການ​ ໃນ​ເບື້ອງ​ຕົ້ນ​ທາງ​ການ​ຕັ້ງເປົ້າ​ໝາຍ​ເວລາ​ໄວ້ພຽງ 1 ເດືອນ ເພື່ອ​ຮັບ​ສະໝັກ ແຕ່​ໃນ​ທີ່​ສຸດ​ກໍ່ຕ້ອງ​ໄດ້​ຕໍ່​ເວລາ​ອອກ​ຕື່ມ​ອີກ​ຫຼາຍວັນ ເນື່ອງ​ຈາ​ກວ່າມີ​ຜູ້​ສະໝັກເປັນ​ຈຳນວນ​ຫຼວງຫຼາຍ​ໃນ​ຊຸດເຝິກອົບຮົມ​ຄັ້ງ​ທຳ​ອິດ​ນັ້ນ ມີ​ຜູ້​ເຂົ້າຮ່ວມ​ເຖິງ 2.500 ຄົນ ແລະ ເພີ່ມ​ຂຶ້ນ​ຫຼາຍ​ກວ່າ 5.000 ຄົນ ພາຍ​ໃນ​ທ້າຍ​ປີ​ນັ້ນ​ເອງ.

    ຂ່າວ​ບອກ​ວ່າ: ນະໂຍບາຍນິລະໂທດ​ກຳ ແລະ ໂຄງການ​ເຝິກອົບຮົມ​ວິຊາ​ຊີບ​ໃຫ້​ເຫຼົ່າ​ອາ​ຊະ​ຍາ​ກອນ​ຄ້າ​ຢາ​ເສບ​ຕິດ​ນີ້ ມີເປົ້າ​ໝາຍ​ຫຼຸດຜ່ອນ​ອາ​ຊະ​ຍາ​ກຳ ແລະ ສ້າງ​ຄວາມສຸກ​ໃນ​ສັງຄົມ ລິ​ເລີ່ມ​ໂດຍທ່ານ ຮວນ ກາກ​ລົດ ບາ​ເຣ​ຣາ ໂຣ​ດຼິ​ເກ ພາຍຫຼັງ​ທ່ານ​ໄດ້​ຮັບ​ໄຊຊະນະ​ໃນ​ການ​ເລືອກ​ຕັ້ງ​ປະທານາທິບໍດີ ປາ​ນາ​ມາ.

    ທີ່ ຣັດ​ເຊຍ: ໃນ​ໄລຍະ​ຫຼັງໆມາ​ນີ້ ສະຫະພັນ​ຣັດ​ເຊຍ ໄດ້​ປະເຊີນ​ກັບ​ທ່າ​ອ່ຽງ​ຈຳນວນ​ພົນ​ລະເມືອງ​ຫຼຸດ​ລົງ ເພື່ອ​ແກ້​ໄຂ​ບັນ​​ຫາ​ດັ່ງກ່າວ​ ທ່ານ​ປະທານາທິບໍດີ ປູ​ຕິນ ໄດ້​ປະກາດ​ຢ່າງ​ເປັນ​ທາງ​ການ​ໃນທ້າຍ​ເດືອນ​ພະຈິກ ປີ 2017 ກ່ຽວ​ກັບ​ແຜນ​ປະຕິ​ຮູບ​ປະຊາກອນ ໂດຍ​ເລັ່ງ​ເປົ້າ​ໝາຍ​ກະ​ຕຸ້ນ​ການເກີດ ພາຍ​ໃຕ້​ແຜນ​ປະຕິ​ຮູບ​ດັ່ງກ່າວ ລັດຖະບານ ຣັດ​ເຊຍ ຈະໃຫ້​ຄວາມສຳຄັນ​ເປັນ​ພິເສດ ຕໍ່ຄອບຄົວ​ທີ່​ມີ​ລາຍ​ໄດ້​ຕ່ຳ ໂດຍ​ຈະແຈກ​ຢາຍ​ເງິນ​ໃຫ້​ແກ່​ຄອບຄົວ​ທີ່​ເກີດ​ລູກ​ຄົນ​ທຳ​ອິດ ທາງ​ການ ຣັດ​ເຊຍ ໄດ້​ຈັດ​ສັນ​ງົບປະມານ ຈຳນວນ 2,4 ຕື້​ໂດ​ລາ​ສະຫະລັດ ແລະ ໄດ້​ເລີ່ມ​ແຈກ​ຢາຍ​ໃຫ້​ຄອບຄົວ​ເປົ້າ​ໝາຍ ນັບ​ແຕ່​ປີ 2018 ນີ້ ເປັນຕົ້ນ​ມາ ແມ່ຍິງ​ຣັດ​ເຊຍທີ່​ເກີດ​ລູກ​ຜູ້​ທຳ​ອິດ ​ຈະ​ໄດ້​ຮັບ​ເງິນ​ສະໜັບສະໜູນ​ການ​ເກີດ ຜູ້​ລະ 180 ໂດ​ລາ​ສະຫະລັດ​ຕໍ່​ເດືອນ ຕິດຕໍ່​ກັນ​ເປັນ​ເວລາ 18 ເດືອນ ທ່າ​ອ່ຽງ​ຈຳນວນ​ປະຊາກອນ​ຫຼຸດ​ລົງ​ໃນ​ໄລຍະ​ຍາວ​ຢູ່​ຣັດ​ເຊຍນັ້ນ ມີ​ສາເຫດ​ມາ​ຈາກ​ບັນຫາ​ເສດຖະກິດ ແລະ ສັງຄົມ (ແຫຼ່ງ​ຂ່າວ ​ຂປລ 30/11/2017).

    ທີ່ ມາ​ເລ​ເຊຍ: ນີ້​ເປັນ​ຂ່າວເສົ້າ​ ເລື່ອງ​ຜູ້​ເປັນ​ແມ່​ບັງຄັບ​ໃຫ້ລູກ​ສາວ​ໄວ​ເດັກ​ສອງ​ຄົນ​ຂາຍຕົວ​ແລກ​ເງິນ ແລະ ກໍ່​ເລີຍ​ຖືກສານ​ຕັດສິນ ຈຳ​ຄຸກ 150 ປີ ຂ່າວ​ກ່ຽວ​ກັບ​ຄະດີ​ນີ້ ເກີດ​ຂຶ້ນໃນ​ຕົ້ນ​ເດືອນ​ພະຈິກ​ປີຜ່ານມາ ເລື່ອງ​ມີ​ຢູ່​ວ່າ ຍິງ​ຄົນ​ໜຶ່ງ​ອາຍຸ 39 ປີ ອາໄສ​ຢູ່​ເມືອງ ໂຈ​ຮໍ ບາ​ຣູ ໄດ້​ບັງຄັບ​ລູກ​ສາວ​ຂອງ​ຕົນ​ສອງຄົນ ອາຍຸ 10 ແລະ 13 ປີ ມີເພດ​ສຳພັນ​ກັບ​ຊາຍ​ຈາກ​ປະເທດ ບັງ​ກະລາ​ເທດ ສອງ​ຄົນ ຢູ່​ໂຮງແຮມລາຄາປະຢັດ ຊື່ ລາ​ກິນ ເປກ​ດາ​ນຳ (Larkin Perdana) ເປັນ​ຈຳນວນ 5 ຄັ້ງ ໃນ​ເວລາ​ທີ່​ແຕກ​ຕ່າງ​ກັນ ຄື​ແຕ່​ວັນ​ທີ 1-7 ເດືອນ​ຕຸລາ ປີ 2017 ລູກ​ສາວ​ໄດ້​ຮັບ​ເງິນ​ຄ່າ​ຕົວ ຄັ້ງ​ລະ 50 ຣິງ​ກິດ ໃນ​ສານ​ແມ່ຜີ​ຍັກ (ຕາມ​ຊື່​ທີ່​ສື່​ມາ​ເລ​ເຊຍເອີ້ນ) ຄົນ​ນີ້​ໄດ້​ຮັບສາລະພາບຜິດ​ໃນ 10 ກໍລະນີ ແລະ ຖືກ​ຕັດສິນ​ໃຫ້​ຕິດ​ຄຸກ​ເປັນ​ເວລາ 150 ປີ ເປັນ​ອັນວ່າ ເກີດ​ອີກ​ສອງ​ຊາດ​ແມ່​ຜີ​ຍັກ​ຄົນ​ນີ້ ​ກໍ່​ຍັງ​ຈະ​ໃຊ້​ໂທດ​ຕິດ​ຄຸກ​ບໍ່​ໝົດ.

ຂ່າວທີ່ກ່ຽວຂ້ອງ