ຂ່າວຫຼ້າສຸດ

ທ່ານນາຍົກ ຕ້ອນຮັບຄະນະຜູ້ແທນຍີ່ປຸ່ນ

191 21 ສ.ຫ. 2018 ຂ່າວໜ້າ​ໜຶ່ງ
ທ່ານນາຍົກ ຕ້ອນຮັບຄະນະຜູ້ແທນຍີ່ປຸ່ນ

    ວັນ​ທີ 20 ສິງ­ຫາ 2018 ທີ່​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ໄດ້​ໃຫ້​ກຽດ​ຕ້ອນ­ຮັບ​ການ​ເຂົ້າ​ຢ້ຽມ​ຄຳ­ນັບ​ຂອງ​ທ່ານ ຕາ​ເກ​ໂອະ ຄາ​ວາ​ມຸ​ຣະ (Honorable Mr. Takeo KAWAMURA) ປະ­ທານ​ກຳ­ມາ​ທິ​ການ​ງົບ­ປະ­ມານ ສະ­ພາ​ຜູ້​ແທນ​ລາ­ຊະ​ດອນ (ສະ­ພາ​ຕ່ຳ) ຍີ່­ປຸ່ນ ທັງ​ເປັນ​ປະ­ທານ​ສະ­ມາ­ຄົມ​ມິດ­ຕະ­ພາບ ຍີ່­ປຸ່ນ-ລາວ ພ້ອມ​ດ້ວຍ​ຄະ­ນະ ເນື່ອງ​ໃນ​ໂອ­ກາດ​ເດີນ­ທາງ​ມາ​ຢ້ຽມ­ຢາມ ແລະ ເຮັດ​ວຽກ​ຢູ່ ສປປ ລາວ ໃນ​ວັນ​ທີ 19-20 ສິງ­ຫາ 2018.

    ໂອ­ກາດ​ນີ້ ທ່ານ​ນາ­ຍົກ ໄດ້​ສະ­ແດງ​ຄວາມ​ຍ້ອງ­ຍໍ​ຊົມ­ເຊີຍ ຕໍ່​ການ​ເດີນ­ທາງ​ມາ​ຢ້ຽມ­ຢາມ ແລະ ເຮັດ​ວຽກ​ຂອງ​ຄະ­ນະ​ຜູ້​ແທນ​ຍີ່­ປຸ່ນ​ຄັ້ງ​ນີ້ ເຊິ່ງ​ເປັນ​ການ​ສືບ­ຕໍ່​ສົ່ງ­ເສີມ​ສາຍ​ພົວ­ພັນ​ມິດ­ຕະ­ພາບ ແລະ ການ​ຮ່ວມ​ມື​ອັນ​ດີ­ງາມ​ທີ່​ມີ​ມາ​ແຕ່​ດົນ​ນານ​ຂອງ​ສອງ​ປະ­ເທດ ລາວ-ຍີ່­ປຸ່ນ ໂດຍ​ສະ­ເພາະ ການ​ຮ່ວມ​ມື ລະ­ຫວ່າງ​ສະ­ພາ​ແຫ່ງ​ຊາດ​ລາວ ແລະ ສະ­ພາ​ແຫ່ງ​ຊາດ​ຍີ່­ປຸ່ນ ລວມ​ທັງ​ວຽກ​ອື່ນໆ​ຂອງ​ສອງ​ຝ່າຍ ເພື່ອ​ເສີມ​ຂະ­ຫຍາຍ​ສາຍ​ພົວ­ພັນ​ຮ່ວມ​ມື ວຽກ​ງານ​ສະ­ພາ​ແຫ່ງ​ຊາດ​ຂອງ​ສອງ​ປະ­ເທດ​ໃຫ້​ນັບ​ມື້​ແໜ້ນ​ແຟ້ນ​ຍິ່ງໆ​ຂຶ້ນ.

    ພ້ອມ​ນີ້ ທ່ານ​ປະ­ທານ​ກຳ­ມາ​ທິ​ການ​ງົບ­ປະ­ມານ ສະ­ພາ​ຜູ້​ແທນ​ລາ­ຊະ​ດອນ ຍີ່­ປຸ່ນ ໄດ້​ສະ­ແດງ​ຄວາມ​ຂອບ­ໃຈ ຕໍ່​ການ​ຕ້ອນ­ຮັບ​ອັນ​ອົບ​ອຸ່ນ​ຂອງ​ທ່ານ​ນາ­ຍົກ ພ້ອມ​ທັງ​ໄດ້​ລາຍ​ງານ​ຫຍໍ້​ເຖິງ​ຈຸດ­ປະ­ສົງ ແລະ ຜົນ­ສຳ­ເລັດ​ກອງ​ປະ­ຊຸມ​ຕ່າງໆ ໂດຍ​ທັງ​ສອງ​ຝ່າຍ​ຢືນ­ຢັນ​ທີ່​ຈະ​ສືບ­ຕໍ່​ເສີມ​ຂະ­ຫຍາຍ​ສາຍ​ພົວ­ພັນ​ຮ່ວມ​ມື ໃນ​ວຽກ​ງານ​ສະ­ພາ​ແຫ່ງ​ຊາດ ແລະ ແລກ­ປ່ຽນ​ບົດ­ຮຽນ ຕະ­ຫຼອດ​ຮອດ​ການ​ເຂົ້າ​ເຖິງ​ຂໍ້​ມູນ​ຂ່າວ­ສານ ຕາມ​ແນວ­ທາງ​ນະ­ໂຍ­ບາຍ​ຂອງ​ລັດ­ຖະ­ບານ​ສອງ​ປະ­ເທດ​ວາງ​ໄວ້.

    ໃນ​ໂອ­ກາດ​ເຂົ້າ​ຢ້ຽມ​ຄຳ­ນັບ​ຄັ້ງ​ນີ້​ຄະ­ນະ​ຜູ້​ແທນ​ຍີ່­ປຸ່ນ ຍັງ​ໄດ້​ມອບ​ເງິນ​ຊ່ວຍ­ເຫຼືອ​ຜູ້​ປະ­ສົບ​ຜົນ​ກະ­ທົບ​ຈາກ​ອຸ​ທົກ​ກະ​ໄພ​ນ້ຳ​ຖ້ວມ ຢູ່ ສປປ ລາວ ເປັນ​ຈຳ­ນວນ​ເງິນ 2 ແສນ​ເຢັນ ຫຼື ປະ­ມານ 15 ລ້ານ​ກວ່າ​ກີບ ເຊິ່ງ​ເງິນ​ຈຳ­ນວນ​ດັ່ງ­ກ່າວ​ແມ່ນ​ໄດ້​ຈາກ​ການ​ລະ­ດົມ​ຄະ­ນະ​ຜູ້​ແທນ​ທີ່​ມາ​ດ້ວຍ​ກັນ.

ຂ່າວທີ່ກ່ຽວຂ້ອງ