ຂ່າວຫຼ້າສຸດ

ອະດີດ​ເລຂາທິການ​ໃຫຍ່​ອົງການ ​ສປຊ ເຖິງ​ແກ່​ມໍລະນະ​ກຳ

112 21 ສ.ຫ. 2018 ຂ່າວຕ່າງປະເທດ
ອະດີດ​ເລຂາທິການ​ໃຫຍ່​ອົງການ ​ສປຊ ເຖິງ​ແກ່​ມໍລະນະ​ກຳ

     ກອງ​ທຶນ​ໂກ​ຟິ ອານ​ນັນ ທີ່​ຕັ້ງ​ຢູ່​ໃນ​ນະຄອນ​ເຊີ​ແນວ (ປະເທດ​ສະ​ວິດ) ປະກາດ​ເມື່ອ​ວັນ​ທີ 18 ສິງຫາ​ນີ້​ວ່າ ທ່ານ​ໂກ​ຟີ ອານ​ນັນ ອະດີດ​ເລຂາທິການ​ໃຫຍ່​ອົງການ​ສະ​ປະຊາ​ຊາດ ຜູ້​ກໍ່​ຕັ້ງ​ກອງ​ທຶນ​ດັ່ງກ່າວ ໄດ້​ເຖິງ​ແກ່​ມໍລະນະ​ກຳ​ຢູ່​ທີ່​ປະເທດ​ສະ​ວິ​​ສ ໃນ​ມື້​ດຽວ​ກັນ ລວມ​ອາຍຸ​ໄດ້ 80 ປີ.

    ທ່ານ​ອານ​ນັນ ເກີດ​ຢູ່​ປະເທດ​ກາ​ນາ ເມື່ອ​ປີ 1938 ເຄີຍ​ຮຽນ​ຢູ່​ໂຮງຮຽນ​ຊັ້ນ​ສູງ​ທີ່​ກາ​ນາ ແລະ ສ ອາ​ເມ​ຣິ​ກາ ໄດ້​ຮັບ​ປະ​ຣິນ​ຍາ​ຕີ​ດ້ານ​ເສດຖະສາດ ແລະ​ປະ​ຣິນ​ຍາ​ໂທ​ວິຊາ​ບໍລິຫານ. ທ່ານ​ອານ​ນັນ ໄດ້​ເຮັດ​ວຽກ​ຢູ່​ອົງການ​ສະຫະ​ປະຊາ​ຊາດ ແຕ່​ປີ 1962 ເປັນຕົ້ນ​ມາ ແລະ​ຮັບ​ຕຳແໜ່ງ​ເປັນ​ເລຂາທິການ​ໃຫຍ່​ອົງການ​ສະຫະ​ປະຊາ​ຊາດ​ສອງ​ສະໄໝ​ຕິດຕໍ່​ກັນ ແຕ່​ເດືອນ​ມັງກອນ ປີ 1997 ຮອດ​ເດືອນ​ທັນວາ ປີ 2006.

    ໃນ​ໄລຍະ​ດຳລົງ​ຕຳແໜ່ງ​ເລຂາທິການ​ໃຫຍ່​ອົງການ​ສະຫະ​ປະຊາ​ຊາດ​ນັ້ນ ທ່ານ​ອານ​ນັນ​ໄດ້​ມີ​ຄຳ​ເຫັນ ແລະ​ສະເໜີ​ແຜນການ​ປະຕິ​ຮູບ​ກ່ຽວ​ກັບ​ຫຼາຍ​ດ້ານ​ເຊັ່ນ ການ​ບໍລິຫານ​ຕໍ່​ສຳນັກ​ເລຂາທິການ ການ​ປະກອບ​ເປັນ​ສະພາ​ມົນຕີ ການ​ປົກ​ປ້ອງ​ສິດທິ​ມະນຸດ ແລະ ​ເພີ່ມ​ທະວີ​ການເຄື່ອນໄຫວ​ຮັກສາ​ສັນຕິພາບ ແລະ​ອື່ນໆ ພ້ອມ​ທັງ​ໄດ້​ມີ​ການ​ຮຽກຮ້ອງ ແລະ​ທຳ​ຄວາມ​ພະຍາຍາມ​ເພື່ອ​ຊຸກຍູ້​ສັນຕິພາບ ແລະ​ການ​ພັດທະນາ​ຂອງ​ພາກ​ພື້ນ​ອາ​ຟະ​ຣິກ​ກາ ຍົກ​ສູງ​ຖານະ​ຂອງ​ແມ່ຍິງ ຫຼຸດຜ່ອນ​ຄວາມທຸກ​ຍາກ ແລະ​ຄວາມ​ບໍ່​ຍຸດຕິ​ທຳ ປັບປຸງ​ການ​ສຶກ​ສາ ຫຼຸດຜ່ອນ​ການ​ເປັນ​ພະຍາດ​ເອດ​​ສ ແລະ​ ອະນຸລັກ​ສິ່ງແວດລ້ອມ ທັງ​ໄດ້​ຊຸກຍູ້​ໃຫ້​ບັນດາ​ປະເທດ​ສະມາຊິກ ເພີ່ມ​ທະວີ​ການ​ຮ່ວມ​ມື​ກັນ​ແກ້​ໄຂ​ບັນຫາ​ຫຍຸ້ງຍາກ​ຂອງ​ປະຊາ​ຄົມ​ໂລກ ໂດຍ​ຜ່ານ​ອົງການ​ສະຫະ​ປະຊາ​ຊາດ.

    ຫາງ​ສຽງ​ສາກົນ​ເຄີຍ​ຕີ​ລາຄາ​ວ່າ ໃນ​ໄລຍະ​ທ່ານ​ໂກ​ຟີ ອານ​ນັນ ດຳລົງ​ຕຳແໜ່ງ​ເປັນ​ເລຂາທິການ​ໃຫຍ່​ອົງການ​ສະຫະ​ປະຊາ​ຊາດ​ນັ້ນ ອົງການ​ນີ້​ມີ​ຊື່​ສຽງ​ສູງ​ຫຼາຍ​ທີ່​ບໍ່​ເຄີຍ​ມີ​ມາ​ກ່ອນ. ໃນ​ໄລຍະ​ທ່ານ​ສິ້ນ​ສຸດ​ການ​ດຳລົງ​ຕຳແໜ່ງ​ເລຂາທິການ​ໃຫຍ່​ອົງການ​ສະຫະ​ປະຊາ​ຊາດ​ຊຸດ​ທຳ​ອິດ ທ່ານ​ພ້ອມ​ດ້ວຍ​ອົງການ​ສະຫະ​ປະຊາ​ຊາດ ໄດ້​ຮັບ​ລາງວັນ​ໂນ​ແບນ ສາຂາ​ສັນຕິພາບ ປີ 2001 ຮ່ວມ​ກັນ.

 

ຂ່າວທີ່ກ່ຽວຂ້ອງ