ຂ່າວຫຼ້າສຸດ

ສານ​ສູງ​ສຸດ​ຂອງ​ອີ​ຣັກ ໃຫ້​ສັດຕະຍາບັນ​ຜົນ​ການ​ເລືອກ​ຕັ້ງ​ສະພາ​ແຫ່ງ​ຊາດ

161 21 ສ.ຫ. 2018 ຂ່າວຕ່າງປະເທດ
ສານ​ສູງ​ສຸດ​ຂອງ​ອີ​ຣັກ ໃຫ້​ສັດຕະຍາບັນ​ຜົນ​ການ​ເລືອກ​ຕັ້ງ​ສະພາ​ແຫ່ງ​ຊາດ

    ວັນ​ທີ 19 ສິງຫາ​ນີ້ ສານ​ສູງ​ສຸດ​ໃນ​ອີ​ຣັກ ໄດ້​ໃຫ້​ສັດຕະຍາບັນ​ຜົນ​ການ​ເລືອກ​ຕັ້ງ​ສະພາ​ແຫ່ງ​ຊາດ ຊຶ່ງ​ຈັດ​ຂຶ້ນ​ເມື່ອ​ເດືອນ​ພຶດສະພາ​ທີ່​ຜ່ານ​ມາ ເປັນ​ການ​ເປີດ​ໄລຍະ​ການ​ທາບ​ທາມ​ເປັນ​ເວລາ 90 ວັນ ເພື່ອ​ໃຫ້​ບັນດາ​ພັກ​ການເມືອງ​ທີ່​ຊະນະ​ການ​ເລືອກ​ຕັ້ງ ສ້າງຕັ້ງ​ລັດຖະບານ.

    ໂຄສົກ​ຂອງ​ສານ​ສູງ​ສຸດ ຢັ້ງຢືນ​ຢູ່​ໃນ​ແຈ້ງ​ການ​ສະບັບ​ໜຶ່ງ ທີ່​ມີ​ອອກ​ມາ​ເມື່ອ​ວັນ​ທີ 19 ສິງຫາ ວ່າ​ສານ​ສູງ​ສຸດ​ຂອງ​ອີ​ຣັກ ໄດ້​ປະກາດ​ໃຊ້​ຂໍ້​ຕົກລົງ ວ່າ​ດ້ວຍ​ການ​ໃຫ້​ສັດຕະຍາບັນ​ຜົນ​ຂອງ​ການ​ເລືອກ​ຕັ້ງ​ສະພາ​ແຫ່ງ​ຊາດ​ດັ່ງກ່າວ.

    ຈາກ​ການ​ຕົກລົງ​ໃຫ້​ສັດຕະຍາບັນ​ດັ່ງກ່າວ ກໍ​ເປັນ​ອັນວ່າ​ຜົນ​ສຸດ​ທ້າຍ​ຂອງ​ການ​ເລືອກ​ຕັ້ງ​ນັ້ນ ໄດ້​ຮັບ​ການ​ຮັບ​ຮູ້​ຢ່າງ​ເປັນ​ທາງ​ການ. ບັນດາ​ສະມາຊິກ​ສະພາ​ແຫ່ງ​ຊາດ ຈະ​ໄດ້​ປະຊຸມ​ເພື່ອ​ເລືອກ​ຕັ້ງ​ປະທານ​ສະພາ​ແຫ່ງ​ຊາດ ປະທານາທິບໍດີ ແລະ ​ບັນດາ​ສະມາຊິກ​ໃນ​ຄະນະ​ລັດຖະບານ ໃນ​ຮອບ​ເວລາ 90 ວັນ.

    ກ່ອນ​ໜ້າ​ນັ້ນ ເມື່ອ​ວັນ​ທີ 9 ສິງຫາ​ທີ່​ຜ່ານ​ມາ ຄະນະ​ກຳມະການ​ການ​ເລືອກ​ຕັ້ງ​ຂອງ​ອີ​ຣັກ ໄດ້​ປະກາດ​ຜົນ​ການ​ເລືອກ​ຕັ້ງ​ສຸດ​ທ້າຍ ຂອງ​ການ​ເລືອກ​ຕັ້ງ​ສະພາ​ແຫ່ງ​ຊາດ ຊຶ່ງ​ຈັດ​ຂຶ້ນ​ເມື່ອ​ເດືອນ​ພຶດສະພາ​ທີ່​ຜ່ານ​ມາ ຫຼັງ​ຈາກ​ທີ່​ໄດ້​ນັບ​ບັດ​ຄະແນນ​ສຽງ​ຄືນໃໝ່​ດ້ວຍ​ມື ສຳລັບ​ບັນດາ​ສະຖານທີ່​ປ່ອນ​ບັດ​ທີ່​ຖືກ​ກ່າວ​ຫາ​ວ່າ​ມີ​ການ​ສໍ້​ໂກງ. ຜົນ​ຂອງ​ການ​ນັບ​ບັດ​ຄະແນນ​ສຽງ​ຄືນໃໝ່​ນີ້ ມີ​ຄວາມ​ປ່ຽນແປງ​ໜ້ອຍ​ເມື່ອ​ທຽບໃສ່​ຜົນ​ທີ່​ໄດ້​ນຳ​ອອກ​ມາ​ປະກາດ​ກ່ອນ​ໜ້າ​ນັ້ນ.

 

ຂ່າວທີ່ກ່ຽວຂ້ອງ