ຂ່າວຫຼ້າສຸດ

ໄພ​ທຳ​ມະ​ຊາດ ຢູ່​ໃນ​ປະເທດ​ຕ່າງໆ

145 21 ສ.ຫ. 2018 ຂ່າວຕ່າງປະເທດ
ໄພ​ທຳ​ມະ​ຊາດ ຢູ່​ໃນ​ປະເທດ​ຕ່າງໆ

   ຂ່າວສານ​ຫວຽດນາມ ລາຍ​ງານ​ອ້າງ​ຕາມ​ຂໍ້​ມູນ​ຈາກ​ຫ້ອງການ​ຊີ້​ນຳ​ການ​ປ້ອງ​ກັນ ແລະ​ ຮັບ​ມື​ກັບ​ໄພ​ທຳ​ມະ​ຊາດ​ຂັ້ນ​ສູນ​ກາງຂອງ​ຫວຽດນາມ ໃຫ້​ຮູ້ເມື່ອ​ວັນ​ທີ 19 ສິງຫາ​ນີ້​ວ່າ ໄລ່​ຮອດ​ວັນ​ທີ 18 ສິງຫາ ພາຍຸ ເບ​ບິນ​ກາ (Bebinca) ທີ່​ພັດ​ຂຶ້ນ​ຝັ່ງ​ໃນ​ບັນດາ​ແຂວງ​ພາກ​ເໜືອ​ຫວຽດນາມ ເຮັດ​ໃຫ້​ເກີດ​ຝົນຕົກ​ໜັກ ແລະ​ນ້ຳນອງ  ເປັນ​ເຫດ​ໃຫ້​ມີ​ຜູ້​ເສຍ​ຊີວິດ 10 ຄົນ ແລະ ​ມີ​ຜູ້​ຫາຍ​ສາບ​ສູນ​ອີກ 2 ຄົນ ຍ້ອນ​ຖືກ​ກະແສນ້ຳ​ພັດ​ໄຫຼ​ໄປ.

    ທີ່​ປະ​ເດ​ອິນ​ເດຍ ອຳນາດ​ການ​ປົກຄອງ​ລັດ ເກ​ຣາ​ລາ (ພາກ​ໃຕ້​ອິນ​ເດຍ) ແຈ້ງ​ໃຫ້​ຮູ້ເມື່ອ​ວັນ​ທີ 17 ສິງຫາ​ທີ່​ຜ່ານ​ມາ​ວ່າ ຈຳນວນ​ຜູ້​ເສຍ​ຊີວິດ​ຍ້ອນ​ຝົນຕົກ​ໜັກ ແລະ ນ້ຳນອງ​ແກ່ຍາວ​ເປັນ​ເວລາ 10 ວັນ​ທີ່​ຜ່ານ​ມາ ຢູ່​ໃນ​ລັດ​ດັ່ງກ່າວ ໄດ້​ເພີ່ມ​ຂຶ້ນ​ເປັນ 324 ຄົນ.

    ໃນ​ຂະນະ​ດຽວ​ກັນ ອົງການ​ສຳ​ຫຼວດ​ທໍລະນີ​ສາດ ຂອງ ສ ອາ​ເມ​ຣິ​ກາ (USGS) ແຈ້ງ​ໃຫ້​ຮູ້​ວ່າ ໄດ້​ເກີດ​ເຫດການ​ແຜ່ນດິນ​ໄຫວ ແທກ​ຄວາມ​ແຮງ​ສັ່ນ​ສະເທືອນ​ໄດ້ 7,2 ອົງສາ​ຣິກ​ເຕີ ຢູ່​ໃນ​ບໍລິເວນ​ຫ່າງ​ຈາກ​ເກາະ ລອມ​ບອກ ຂອງ​ອິນ​ໂດ​ເນ​ເຊຍ 124​ ກມ ໄປ​ທາງ​ທິດເໜືອ-ຕາເວັນ​ອອກ​ສ່ຽງ​ເໜືອ. ຈຸດ​ສູນ​ກາງຂອງ​ແຜ່ນດິນ​ໄຫວ​ໃນ​ເທື່ອ​ນີ້ ຢູ່​ເລິກ​ລົງ​ໄປ​ໃຕ້​ດິນ 20​ ກມ.

    ກ່ອນ​ໜ້າ​ນັ້ນ ໃນ​ວັນ​ດຽວ​ກັນ ໄດ້​ເກີດ​ເຫດການ​ແຜ່ນດິນ​ໄຫວ ແທກ​ຄວາມ​ແຮງ​ສັ່ນ​ສະເທືອນ​ໄດ້ 6,3 ອົງສາ​ຣິກ​ເຕີ ເຮັດ​ໃຫ້​ເກີດ​ສັ່ນ​ສະເທືອນ​ໃນ​ເກາະ​ລອມ​ບອກ. ເມື່ອ​ຕົ້ນ​ເດືອນ​ສິງຫາ​ນີ້ ກໍ​ເກີດ​ເຫດການ​ແຜ່ນດິນ​ໄຫວ​ຢູ່​ໃນ​ເກາະ​ລອມ​ບອກ ເປັນ​ເຫດ​ໃຫ້​ມີ​ຜູ້​ເສຍ​ຊີວິດ​ກວ່າ 430 ຄົນ.

    USGS ກໍ​ໃຫ້​ຮູ້​ວ່າ ວັນ​ທີ 19 ສິງຫາ​ນີ້ ໄດ້​ເກີດ​ເຫດການ​ແຜ່ນດິນ​ໄຫວ ແທກ​ຄວາມ​ແຮງ​ສັ່ນ​ສະເທືອນ​ໄດ້  8,2 ອົງສາ​ຣິກ​ເຕີ ຢູ່​ໃນ​ມະຫາ​ສະໝຸດ​ປາ​ຊີ​ຟິກ ໃນ​ບໍລິເວນ​ໃກ້​ກັບ ຟີ​ຈິ ແລະ ຕົງ​ກາ.

ຂ່າວທີ່ກ່ຽວຂ້ອງ