ຂ່າວຫຼ້າສຸດ

ເວ​ເນ​ຊູ​ເອ​ລາ ຈະ​ຂຶ້ນ​ເງິນເດືອນ​ຂັ້ນ​ຕ່ຳ​ຂອງ​ຜູ້​ອອກແຮງ​ງານ

178 21 ສ.ຫ. 2018 ຂ່າວຕ່າງປະເທດ
ເວ​ເນ​ຊູ​ເອ​ລາ ຈະ​ຂຶ້ນ​ເງິນເດືອນ​ຂັ້ນ​ຕ່ຳ​ຂອງ​ຜູ້​ອອກແຮງ​ງານ

      ປະທານາທິບໍດີ ເວ​ເນ​ຊູ​ເອ​ລາ ນີ​ໂກ​ລາ​​ສ ມາ​ດູ​ໂຣ ແຈ້ງ​ໃຫ້​ຮູ້ເມື່ອ​ວັນ​ທີ 18 ສິງຫາ​ນີ້​ວ່າ ຈະ​ດັດແກ້​ລະດັບ​ເງິນເດືອນ​ຂັ້ນ​ຕ່ຳ​ຂອງ​ຜູ້​ອອກແຮງ​ງານ​ຂຶ້ນ 34 ເທົ່າ ທຽບໃສ່​ໃນ​ປັດຈຸບັນ ຊຶ່ງ​ນອນ​ຢູ່​ໃນ​ຂອບ​ຂອງ​ໂຄງການ​ຟື້ນ​ຟູ​ພື້ນຖານ​ເສດຖະກິດ​ເວ​ເນ​ຊູ​ເອ​ລາ ທີ່​ພວມ​ຈົມ​ເລິກ​ຢູ່​ໃນ​ວິ​ກິດ​ການ​ນັ້ນ.

    ຂ່າວ​ແຈ້ງວ່າ ບົນ​ພື້ນຖານ​ຂອງ​ເງິນ​ໂບ​ລີ​ວາ (bolivar - ສະກຸນ​ເງິນ​ພາຍ​ໃນ​ຂອງ​ເວ​ເນ​ຊູ​ເອ​ລາ) ໃນ​ເວລາ​ນີ້​ນັ້ນ ລະດັບ​ເງິນເດືອນ​ຂັ້ນ​ຕ່ຳ​ຂອງ​ຜູ້​ອອກແຮງ​ງານ ຈະ​ເພີ່ມ​ຂຶ້ນ​ຈາກ 5,2 ລ້ານ ໂບ​ລີ​ວາ ເປັນ 180 ລ້ານ ໂບ​ລີ​ວາ. ເຖິງ​ຢ່າງໃດ​ກໍ​ຕາມ ຫຼັງ​ຈາກ​ທີ່​ລັດຖະບານ​ເວ​ເນ​ຊູ​ເອ​ລາ ປະຕິບັດ​ການ​ປ່ຽນ​ເງິນ ນັບ​ແຕ່​ວັນ​ທີ 20 ສິງຫາ​ນີ້​ເປັນຕົ້ນ​ໄປ ຄ່າ​ຂອງ​ເງິນ​ໂບ​ລີ​ວາ​ໃໝ່ ຈະ​ໄດ້​ປັບ​ຫຼຸດ​ຫ້າ​ເລກ 0 ແລະ​ເມື່ອ​ຮອດ​ເວລາ​ນັ້ນ ລະດັບ​ເງິນເດືອນ​ຂັ້ນ​ຕ່ຳ​ໃໝ່ ຈະ​ເທົ່າ​ກັບ 1.800 ໂບ​ລີ​ວາ.

    ປະທານາທິບໍດີ ມາ​ດູ​ໂຣ ໃຫ້​ຮູ້​ວ່າ ລະດັບ​ເງິນເດືອນ​ຂັ້ນ​ຕ່ຳ​ດັ່ງກ່າວ ອີງໃສ່​ພື້ນຖານ​ຂອງ​ຄ່າ​ເງິນ​ເປ​ໂຕຣ (petro) ຊຶ່ງ​ເປັນ​ເງິນ​ເອ​ເລັກ​ໂຕຣ​ນິກ​ຂອງ​ເວ​ເນ​ຊູ​ເອ​ລາ ທີ່​ໄດ້​ກຳນົດ​ຄ່າ​ຕາມ​ລາຄາ​ນ້ຳມັນ ດ້ວຍ​ລະດັບ 1 ເປ​ໂຕຣ ເທົ່່າ​ກັບ 60 ໂດ​ລາ​ສະຫະລັດ. ນີ້​ເປັນ​ການ​ດັດແກ້​ເງິນເດືອນ​ເທື່ອ​ທີ 5 ຂອງ​ເວ​ເນ​ຊູ​ເອ​ລາ ພາຍ​ໃນ​ປີ​ນີ້ ທ່າມກາງ​ທີ່​ເງິນ​ໂບ​ລີ​ວາ ຕົກ​ຄ່າ​ຢ່າງ​ຕໍ່​ເນື່ອງ ແລະ​ ອົງການ​ກອງ​ທຶນ​ເງິນຕາ​ສາກົນ (IMF) ກໍ​ໃຫ້ການ​ຄາດ​ຄະເນ​ວ່າ ເງິນ​ເຟີ້​ຂອງ​ເວ​ເນ​ຊູ​ເອ​ລາ ຈະ​ຂຶ້ນ​ສູ່ 1 ລ້ານ​ສ່ວນ​ຮ້ອຍ ພາຍ​ໃນ​ປີ 2018.

    ນອກຈາກ​ນັ້ນແລ້ວ ປະທານາທິບໍດີ ມາ​ດູ​ໂຣ ກໍ​ໃຫ້​ຮູ້​ວ່າ ຈະ​ຂຶ້ນ​ພາສີ​ມູນ​ຄ່າ​ເພີ່ມ (VAT) ຂອງ​ບັນດາ​ສິນຄ້າ​ລະດັບ​ສູງ ຈາກ​ລະດັບ 12% ຂຶ້ນ​ເປັນ 16%. ພ້ອມ​ກັນ​ນັ້ນ ລັດຖະບານ​ເວ​ເນ​ຊູ​ເອ​ລາ ກໍ​ຈະ​ນຳ​ໃຊ້​ອັດຕາ​ແລກປ່ຽນ​ເງິນຕາ​ຢ່າງ​ເປັນ​ທາງ​ການ​ໃຫ້​ເໜັງ​ຕີງ​ຢູ່​ພຽງ​ລາຍການ​ດຽວ ຢູ່​ໃນ​ການ​ຄວບ​ຄຸມ​ຢ່າງ​ເຂັ້ມ​ງວດ​ຂອງ​ອົງການ​ທີ່​ກ່ຽວຂ້ອງ.

 

ຂ່າວທີ່ກ່ຽວຂ້ອງ