ຂ່າວຫຼ້າສຸດ

ອາ​ຟະ​ກາ​ນິດ​ສະຖານ ປະກາດ​ຢຸດ​ຍິງ​ກັບ​ຕາ​ລີ​ບັນ​ໃນ​ໂອກາດ​ເທດສະການ ອິດ ອາ​​ລ-ອັດ​ຮາ

128 21 ສ.ຫ. 2018 ຂ່າວຕ່າງປະເທດ
ອາ​ຟະ​ກາ​ນິດ​ສະຖານ ປະກາດ​ຢຸດ​ຍິງ​ກັບ​ຕາ​ລີ​ບັນ​ໃນ​ໂອກາດ​ເທດສະການ ອິດ ອາ​​ລ-ອັດ​ຮາ

    ທ່ານ ອາ​ສຣາ​​ຟ ກາ​ນີ ປະທານາທິບໍດີ​ຂອງ​ອາ​ຟະ​ກາ​ນິດ​ສະຖານ ກ່າວ​ຢູ່​ໃນ​ພິທີ​ສະເຫຼີມ ສະຫຼອງ​ວັນຊາດ​ອາ​ຟະ​ກາ​ນິດ​ສະຖານ ເມື່ອ​ວັນ​ທີ 19 ສິງຫາ​ນີ້ ໂດຍ​ທ່ານ​ໄດ້​ປະກາດ​ໃຊ້​ຄຳ​ສັ່ງ​ຢຸດ​ຍິງ​ກັບ​ກຸ່ມ​ມື​ປືນ​ຕາ​ລີ​ບັນ ໃນ​ໂອກາດ​ເທດສະການ ອິດ ອາ​​ລ-ອັດ​ຮາ (Eid al-Adha) ຂອງ​ຊາວ​ມຸ​ສລິມ ທ່າມ​​​ກາງ​ທີ່​ສະພາບ​ການ​ການ​ຍິງ​ຕໍ່ສູ້ ມີ​ຄວາມ​ເຄັ່ງ​ຕຶງ​ໃນ​ຫຼາຍ​ມື້​ທີ່​ຜ່ານ​ມາ ຢູ່​ໃນ​ນະຄອນ ກາ​​ສ​ນີ (ພາກ​ກາງ​ອາ​ຟະ​ກາ​ນິດ​ສະຖານ).

    ປະທານາທິບໍດີ ກາ​ນີ ຢັ້ງຢືນ​ວ່າ ຄຳ​ສັ່ງ​ຢຸດ​ຍິງ​ຢ່າງ​ມີ​ເງື່ອນໄຂ ຈະ​ມີ​ຜົນ​ບັງຄັບ​ໃຊ້ ນັບ​ແຕ່​ວັນ​ທີ 20 ສິງຫາ​ນີ້​ເປັນຕົ້ນ​ໄປ ແລະ ແກ່ຍາວ​ໄປ “ຕາບໃດ​ທີ່ ຕາ​ລີ​ບັນ ຍັງ​ເຄົາລົບ​ຕໍ່​ຄຳ​ສັ່ງ​ຢຸດ​ຍິງ​ນີ້.”

    ຍັງ​ບໍ່​ເປັນ​ທີ່​ຈະ​ແຈ້ງວ່າ ຕາ​ລີ​ບັນ​ຈະ​ຍອມຮັບ​ຄຳ​ສັ່ງ​ຢຸດ​ຍິງ​ຂອງ​ປະທານາທິບໍດີ ກາ​ນີ ເນື່ອງ​ໃນ​ໂອກາດ​ເທດສະການ ອິດ ອາ​​ລ-ອັດ​ຮາ ນັ້ນ​ຫຼື​ບໍ່. ອິດ ອາ​​ລ-ອັດ​ຮາ ເປັນ​ວັນ​ບຸນ​ຂອງ​ຊາ​ວວ​ມຸ​ສລິມ ຊຶ່ງ​ຈັດ​ຂຶ້ນ​ໃນ​ແຕ່​ລະ​ປີ ແລະ​ແກ່ຍາວ​ເປັນ​ເວລາ 3 ວັນ. ວັນ​ບຸນ​ດັ່ງກ່າວ​ໃນ​ປີ​ນີ້ ເລີ່ມ​ຂຶ້ນ​ຢ່າງ​ເປັນ​ທາງ​ການ ນັບ​ແຕ່​ວັນ​ທີ 21 ສິງຫາ​ນີ້​ເປັນຕົ້ນ​ໄປ.

    ອາ​ຟະ​ກາ​ນິດ​ສະຖານ ໄດ້​ຕົກ​ຢູ່​ໃນ​ສະພາບ​ຄວາມ​ບໍ່​ສະຫງົບ​ມາ​ດົນ​ແລ້ວ ຍ້ອນ​ເກີດ​ການ​ຕໍ່ສູ້​ລະຫວ່າງ​ກອງ​ກຳລັງ​ຂອງ​ຝ່າຍ​ລັດຖະບານ ກັບ​ກຸ່ມ​ມື​ປືນ​ຕາ​ລີ​ບັນ. ສະຖິຕິ​ຂອງ​ສະຫະ​ປະຊາ​ຊາດ ໃຫ້​ຮູ້​ວ່າ ນັບ​ແຕ່​ຕົ້ນ​ປີ 2009 ມາ​ຮອດ​ເວລາ​ນີ້ ມີ​ສາມັນ​ຊົນ​ອາ​ຟະ​ກາ​ນິດ​ສະຖານ ເສຍ​ຊີວິດ​ແລ້ວ  26.000 ກວ່າ​ຄົນ ແລະ​ບາດເຈັບ​ເກືອບ 49.000 ຄົນ ຈາກ​ການ​ພິພາດ​ດ້ວຍ​ອາວຸດ.

 

ຂ່າວທີ່ກ່ຽວຂ້ອງ