ຂ່າວຫຼ້າສຸດ

U-12 ລາວ ຄອງຂັນຊະນະເລີດ ຊຸຊິງລິງ ຄັບ 2018

242 20 ສ.ຫ. 2018 ວົງຈອນກີລາ
U-12 ລາວ ຄອງຂັນຊະນະເລີດ ຊຸຊິງລິງ ຄັບ 2018

    ນັກ­ກີ­ລາ​ເຕະ­ບານ U-12 ຈາກ​ສະ­ໂມ­ສອນ Lob Stadium ເປັນ​ຕົວ​ແທນ​ທີມ​ລາວ ໄດ້​ເຂົ້າ​ຮ່ວມ​ການ​ແຂ່ງ­ຂັນ​ບານ­ເຕະ ຊຸ​ຊິງ ລິງ ຄັບ (Soong Ching Ling Cup 2018) ໃນ​ລະ­ຫວ່າງ​ວັນ​ທີ 11-16 ສິງ­ຫາ 2018 ທີ່​ນະ­ຄອນ­ຫຼວງ​ປັກ​ກິ່ງ ສປ ຈີນ ທີມ​ທີ່​ເຂົ້າ​ຮ່ວມ​ການ​ແຂ່ງ­ຂັນ​ມີ ສປ ຈີນ ໄທ ກຳ­ປູ­ເຈຍ ຟີ​ລິບ​ປິນ ອິນ​ໂດ​ເນ​ເຊຍ ມຽນ​ມາ ຫວຽດ­ນາມ ແລະ ສປປ ລາວ.

    ການ​ແຂ່ງ­ຂັນ​ໄດ້​ຖືກ​ແບ່ງ​ອອກ​ເປັນ 3 ຮອບ ຮອບ​ທີ 1 ຈະ​ເປັນ​ການ​ເຕະ​ແບ່ງ​ກຸ່ມ ເຊິ່ງ​ລາວ​ໄດ້​ຢູ່​ໃນ​ກຸ່ມ A ເຊິ່ງ​ປະ­ກອບ​ມີ: ໄທ ມຽນ​ມາ ຫວຽດ­ນາມ ແລະ ລາວ ຜົນ​ການ​ແຂ່ງ­ຂັນ​ຄື ນັດ​ທຳ​ອິດ U-12 ລາວ ເອົາ​ຊະ­ນະ U-12 ໄທ 1-0 ນັດ​ທີ​ສອງ ເອົາ​ຊະ­ນະ U-12 ຫວຽດ­ນາມ 20-0 ແລະ ນັດ​ທີ​ສາມ ສະ­ເໝີ U-12 ມຽນ​ມາ 1-1 ຈົບ​ຮອບ​ທຳ​ອິດ U-12 ລາວ ເຂົ້າ​ຮອບ​ເປັນ​ທີ 1 ຂອງ​ກຸ່ມ ໂດຍ​ມີ 7 ຄະ­ແນນ ແລະ U-12 ໄທ ເປັນ​ທີ 2 ໂດຍ​ມີ 6 ຄະ­ແນນ ຮອບ 2 ເປັນ​ການ​ເອົາ​ທີ 1 ແລະ 2 ຂອງ​ກຸ່ມ A ແລະ B ມາ​ພົບ​ກັນ​ໂດຍ​ເຕະ 2 ນັດ ແລ້ວ​ເອົາ​ທີມ​ທີ່​ມີ​ຄະ­ແນນ​ຫຼາຍ​ອັນ​ດັບ 1 ແລະ 2 ເຂົ້າ​ມາ​ຊີງ​ຊະ­ນະ​ເລີດ.

    ຜົນ​ການ​ແຂ່ງ­ຂັນ U-12 ລາວ ເອົາ​ຊະ­ນະ U-12 ສປ ຈີນ 3-1 ແລະ U-12 ລາວ ເສຍ​ໃຫ້ U-12 ຟິ​ລິບ​ປິນ 1-2 ສົ່ງ​ຜົນ​ໃຫ້ U-12 ລາວ ຜ່ານ​ເຂົ້າ​ຮອບ​ຊີງ​ຊະ­ນະ​ເລີດ ໂດຍ​ໂຄ­ຈອນ​ມາ​ພົບ U-12 ໄທ ອີກ​ຄັ້ງ ແລະ ເປັນ U-12 ລາວ ສາ­ມາດ​ເກັບ​ເອົາ​ໄຊ­ຊະ­ນະ​ເໜືອ U-12 ໄທ ໄປ​ໄດ້​ອີກ​ຄັ້ງ 2-1 ປະ­ຕູ ພ້ອມ​ທັງ​ໄດ້​ຄອງ​ຂັນ​ຊະ­ນະ​ເລີດ Soong Ching Ling Cup 2018.

ຂ່າວທີ່ກ່ຽວຂ້ອງ