ນັກກີລາເຕະບານຍິງ ຢູ-16 ກຽມໄປເກັບຕົວເຝິກຊ້ອມຢູ່ປະເທດຍີ່ປຸ່ນ

128 20 ສ.ຫ. 2018 ວົງຈອນກີລາ
ນັກກີລາເຕະບານຍິງ ຢູ-16 ກຽມໄປເກັບຕົວເຝິກຊ້ອມຢູ່ປະເທດຍີ່ປຸ່ນ

    ທ່ານ​ນາງ ພອນ​ທິບ ແສງ​ມະ­ນີ ຫົວ­ໜ້າ​ຄູ​ເຝິກ​ທັບ​ນັກ­ກີ­ລາ​ບານ­ເຕະ​ຍິງ ທີມ​ຊາດ​ລາວ ຮຸ່ນ​ອາ­ຍຸ​ບໍ່​ເກີນ 16 ປີ ເພື່ອ​ກຽມ​ເຂົ້າ​ຮ່ວມ​ແຂ່ງ­ຂັນ​ບານ­ເຕະ​ຍິງ ຊີງ​ແຊັມ​ອາ­ຊີ ຮອບ​ຄັດ​ເລືອກ ຢູ່​ປະ ເທດ​ມົງ​ໂກ​ລີ ໃຫ້​ສຳ­ພາດ​ວັນ​ທີ 15 ສິງ­ຫາ 2018 ວ່າ: ພາຍ­ຫຼັງ​ທີ່​ໄດ້​ຖືກ​ສະ­ຫະ­ພັນ​ບານ­ເຕະ​ແຫ່ງ ຊາດ​ລາວ ແຕ່ງ­ຕັ້ງ​ເປັນ​ຫົວ­ໜ້າ​ຄູ​ເຝິກ​ທີມ​ຊາດ​ຊຸດ​ນີ້ ກໍ່​ໄດ້​ນຳ­ພາ​ຄະ­ນະ​ຄູ​ເຝິກ​ຄັດ​ເລືອກ ແລະ ເຝິກ­ຊ້ອມ​ນັກ­ກີ­ລາ ແຕ່​ວັນ​ທີ 17 ມິ­ຖຸ­ນາ 2018 ເປັນ­ຕົ້ນ​ມາ ໂດຍ​ມີ​ນັກ­ກີ­ລາ​ເຂົ້າ​ຮ່ວມ​ຄັດ​ເລືອກ 40 ກວ່າ​ຄົນ ສ່ວນ​ໃຫຍ່​ແມ່ນ​ຄັດ​ເລືອກ​ຈາກ​ຊຸດ​ເກົ່າ​ທີ່​ເຂົ້າ​ຮ່ວມ​ການ​ແຂ່ງ­ຂັນ​ບານ­ເຕະ​ຊີງ​ແຊັມ​ອາ​ຊຽນ ຮຸ່ນ​ອາ­ຍຸ​ບໍ່​ເກີນ 16 ປີ ຢູ່​ປະ­ເທດ​ອິນ​ໂດ​ເນ​ເຊຍ ປະ­ສົມ​ປະ­ສານ​ກັບ​ນັກ​ເຕະ​ໃໝ່​ຈາກ​ແຂວງ​ສະ­ຫວັນ​ນະ​ເຂດ ສາ­ລະ​ວັນ ຈຳ­ປາ​ສັກ ຫົວ­ພັນ ແລະ ຊຽງ​ຂວາງ ເຂົ້າ​ນອນ​ສູນ​ເກັບ​ຕົວ​ເຝິກ­ຊ້ອມ.

    ປັດ­ຈຸ­ບັນ​ສາ­ມາດ​ຄັດ​ເລືອກ​ນັກ­ກີ­ລາ​ໄດ້ 27 ຄົນ ໂດຍ​ຈະ​ຕັດ​ໃຫ້​ເຫຼືອ 22 ຄົນ ກ່ອນ​ອອກ​ເດີນ­ທາງ​ເຂົ້າ​ຮ່ວມ​ເກັບ​ຕົວ​ເຝິກ ຊ້ອມ ພ້ອມ​ນີ້​ກໍ່​ຈະ​ໄດ້​ມີ​ການ​ອຸ່ນ​ເຄື່ອງ 2 ນັດ ທີ່​ເມືອງ​ໂອ­ຊາ​ກາ ປະ­ເທດ​ຍີ່­ປຸ່ນ ວັນ​ທີ 22-30 ສິງ ຫາ 2018 ກ່ອນ​ຈະ​ເຂົ້າ​ຮ່ວມ​ການ​ແຂ່ງ­ຂັນ​ບານ­ເຕະ​ຍິງ ຊີງ​ແຊັມ​ອາ­ຊີ ຮຸ່ນ​ອາ­ຍຸ​ບໍ່​ເກີນ 16 ປີ ຮອບ​ຄັດ​ເລືອກ 2019 AFC ຢູ່​ປະ­ເທດ​ມົງ​ໂກ​ລີ ວັນ​ທີ 15-23 ກັນ­ຍາ 2018 ເຊິ່ງ​ການ​ແຂ່ງ­ຂັນ​ດັ່ງ­ກ່າວ ທີມ​ຊາດ​ລາວ​ຖືກ​ຈັດ​ຢູ່​ກຸ່ມ B ປະ­ກອບ​ມີ​ອິນ​ເດຍ ຮົງ​ກົງ ປາ​ກິ​ສ​ຖານ ແລະ ມົງ​ໂກ​ລີ ໃນ​ນີ້​ວັນ​ທີ 17 ກັນ­ຍາ 2018 ທີມ​ຊາດ​ລາວ ຈະ​ພົບ​ກັບ​ປາ​ກິ​ສ​ຖານ ວັນ​ທີ 19 ກັນ­ຍາ 2018 ພົບ​ກັບ​ມົງ​ໂກ​ລີ ວັນ​ທີ 21 ກັນ­ຍາ 2018 ພົບ​ກັບ​ຮົງ​ກົງ ແລະ ວັນ​ທີ 23 ກັນ­ຍາ 2018 ພົບ​ກັບ​ອິນ​ເດຍ.

ຂ່າວທີ່ກ່ຽວຂ້ອງ