ຂ່າວຫຼ້າສຸດ

ປະທານປະເທດ ເນັ້ນຮີບຮ້ອນແກ້ໄຂບັນຫາໄພນໍ້າຖ້ວມໃຫ້ສຳເລັດໂດຍໄວ

283 20 ສ.ຫ. 2018 ຂ່າວໜ້າ​ໜຶ່ງ
ປະທານປະເທດ ເນັ້ນຮີບຮ້ອນແກ້ໄຂບັນຫາໄພນໍ້າຖ້ວມໃຫ້ສຳເລັດໂດຍໄວ

   ວັນ​ທີ 18 ສິງ­ຫາ 2018 ທ່ານ ບຸນ​ຍັງ ວໍ­ລະ​ຈິດ ເລ­ຂາ­ທິ­ການ​ໃຫຍ່​ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ ປະ­ທານ​ປະ­ເທດ ພ້ອມ​ດ້ວຍ​ຄະ­ນະ​ໄດ້​ເດີນ­ທາງ​ໄປ​ເຄື່ອນ​ໄຫວ​ຢ້ຽມ­ຢາມ ແລະ ເຮັດ​ວຽກ​ທີ່​ແຂວງ​ອັດ​ຕະ​ປື ໃຫ້​ກຽດ​ຕ້ອນ­ຮັບ​ຂອງ ທ່ານ ເລັດ ໄຊ​ຍະ​ພອນ ເຈົ້າ­ແຂວງ​ອັດ​ຕະ​ປື ມີ​ອຳ­ນາດ​ການ​ປົກ­ຄອງ​ແຂວງ ເມືອງ ແລະ ປະ­ຊາ­ຊົນ​ໃຫ້­ການ​ຕ້ອນ­ຮັບ​ຢ່າງ​ອົບ​ອຸ່ນ.

   ທ່ານ ອຸ່ນ​ຫຼ້າ ໄຊ​ຍະ​ສິດ ຮອງ​ເຈົ້າ­ແຂວງ​ອັດ​ຕະ​ປື ໄດ້​ລາຍ​ງານ​ໃຫ້​ຊາບ​ກ່ຽວ​ກັບ​ສະ­ພາບ​ການ​ແກ້​ໄຂ ແລະ ຊ່ວຍ­ເຫຼືອ​ປະ​ຊະ​ຊາ​ຊົນ​ທີ່​ຖືກ​ຜົນ​ກະ­ທົບ​ຈາກ​ໄພ​ນ້ຳ​ຖ້ວມ ຢູ່​ທີ່​ເມືອງ​ສະ­ໜາມ​ໄຊ​ວ່າ: ເມືອງ​ສະ­ໜາມ​ໄຊ ເປັນ​ເມືອງ​ໜຶ່ງ​ທີ່​ທຸກ​ຍາກ​ຫ່າງ​ຈາກ​ເທດ­ສະ­ບານ​ແຂວງ 35 ກິ­ໂລ­ແມັດ ມີ 40 ບ້ານ 6.771 ຄອບ­ຄົວ​ມີ​ພົນ­ລະ­ເມືອງ 36 ພັນ​ກວ່າ​ຄົນ ໃນ​ນີ້​ມີ​ບ້ານ​ທີ່​ໄດ້​ຮັບ​ຜົນ​ກະ­ທົບ​ຈາກ​ໄພ​ນ້ຳ​ຖ້ວມ 13 ບ້ານ ມີ 2.717 ຄອບ­ຄົວ ມີ​ພົນ­ລະ­ເມືອງ 13.067 ຄົນ ໃນ​ນັ້ນ​ໄດ້​ຮັບ​ຜົນ​ກະ­ທົບ 100% ມີ 6 ບ້ານ ຄື: ບ້ານ​ຫີນ​ລາດ ບ້ານ​ສະ­ໝອງ​ໃຕ້ ບ້ານ​ທ່າ​ຫີນ ບ້ານ​ໃໝ່ ບ້ານ​ທ່າ​ແສງ​ຈັນ ແລະ ບ້ານ​ໃຫຍ່​ແທ ໃນ 6 ບ້ານ​ດັ່ງ­ກ່າວ ມີ​ຈຳ­ນວນ 1.611 ຄອບ­ຄົວ ມີ 7.095 ຄົນ ແລະ ໄດ້​ຍົກ­ຍ້າຍ​ມາ​ຢູ່​ເຂດ​ທີ່​ປອດ​ໄພ​ຢູ່ 6 ຈຸດ ຄື: ຈຸດ​ເທດ­ສະ­ບານ​ເມືອງ​ສະ­ໜາມ​ໄຊ ຈຸດ​ບ້ານ​ຕະ​ມໍ​ຢອດ ຈຸດ​ບ້ານ​ດອນ​ບົກ ຈຸດ​ບ້ານ​ປິນ​ດົງ ຈຸດ​ພັກ ໂຮງ ຮຽນ ມສ ຈັນ­ທາ ແລະ ບ້ານ​ຄອນ​ທູດ ສຳ­ລັບ​ຈຳ­ນວນ​ຜູ້​ສູນ­ຫາຍ​ມີ​ທັງ​ໝົດ 131 ຄົນ ມາ​ຮອດ​ປັດ­ຈຸ­ບັນ​ສາ­ມາດ​ເກັບ​ກູ້​ຊາກ​ສົບ​ໄດ້​ໃນ​ສະ­ໜາມ​ຈຳ­ນວນ 34 ສົບ ຍິງ 18 ສົບ ໃນ​ນີ້​ມີ​ເດັກ​ອາ­ຍຸ 10 ປີ​ລົງ​ມາ ຈຳ­ນວນ 13 ສົບ ຍິງ 6 ສົບ ແລະ ເສຍ​ຊີ­ວິດ​ຕື່ມ​ອີກ 5 ສົບ​ຢູ່​ທີ່​ໂຮງ­ໝໍ ເຊິ່ງ​ລວມ​ຜູ້​ເສຍ​ຊີ­ວິດ​ທັງ​ໝົດ​ຈຳ­ນວນ 39 ຄົນ ຍິງ 18 ຄົນ ແລະ ຜູ້​ທີ່​ຍັງ​ສູນ­ຫາຍ​ມີ  97 ຄົນ.

   ຕໍ່​ເຫດ­ການ​ທີ່​ເກີດ​ຂຶ້ນ​ດັ່ງ­ກ່າວ ທາງ​ອຳ­ນາດ​ການ​ປົກ­ຄອງ​ແຂວງ​ອັດ​ຕະ​ປື​ໄດ້​ສຸມ​ທຸກ​ກຳ­ລັງ​ຈາກ​ພາກ­ສ່ວນ​ໄປ​ຊ່ວຍ­ເຫຼືອ​ປະ­ຊາ­ຊົນ​ທີ່​ຖືກ​ຜົນ​ກະ­ທົບ​ຢ່າງ​ຮີບ​ດ່ວນ ໂດຍ​ສົມ­ທົບ​ກັບ​ກຳ­ລັງ​ປ້ອງ​ກັນ​ຊາດ ປ້ອງ​ກັນ​ຊາດ​ຄວາມ​ສະ­ຫງົບ ແພດ​ໝໍ ສື່​ມວນ​ຊົນ ອາ­ສາ​ສະ­ໝັກ​ຈາກ​ພາຍ​ໃນ ແລະ ຕ່າງ­ປະ­ເທດ ເພື່ອ​ຊ່ວຍ­ເຫຼືອ​ຈົນ​ສຸດ​ຄວາມ​ສາ­ມາດ​ໃນ​ການ​ຊ່ວຍ ເຫຼືອ​ບັນ​ເທົ່າ​ທຸກ ແລະ ຊອກ​ຄົ້ນ​ຫາ​ຜູ້​ປະ­ສົບ​ໄພ​ທີ່​ສູນ­ຫາຍ​ຈາກ​ໄພ­ພິ­ບັດ​ດັ່ງ­ກ່າວ ພ້ອມ​ນັ້ນ​ໄດ້​ມີ​ການ​ລະ­ດົມ​ທຶນ­ຮອນ ວັດ­ຖຸ​ອຸ­ປະ­ກອນ ເຄື່ອງ​ອຸ​ໂພກ​ບໍ­ລິ­ໂພກ​ຈາກ​ພາກ­ສ່ວນ​ຕ່າງໆ​ໃນ​ຂອບ​ເຂດ​ທົ່ວ​ປະ­ເທດ ແລະ ການ​ຊ່ວຍ­ເຫຼືອ​ໃນ​ດ້ານ​ຕ່າງ​ຈາກ​ຕ່າງ­ປະ­ເທດ ມາ​ຮອດ​ປັດ­ຈຸ­ບັນ​ໄດ້​ຮັບ​ເງິນ​ຈາກ​ການ​ບໍ­ລິ­ຈາກ​ທັງ​ໝົດ 19 ຕື້​ກວ່າ​ກີບ ນອກ​ນີ້ ຍັງ​ໄດ້​ຮັບ​ເງິນ​ຈາກ​ບໍ­ລິ­ສັດ​ທີ່​ເປັນ​ຂາ​ຫຸ້ນ​ໂຄງ­ການ​ເຂື່ອນ​ເຊ​ປຽນ-ເຊ​ນ້ຳ​ນ້ອຍ ຈຳ­ນວນ 18 ຕື້​ກວ່າ​ກີບ ແລະ 1 ລ້ານ​ໂດ​ລາ​ສະ­ຫະ­ລັດ ສຳ­ລັບ​ເຄື່ອງ​ອຸ­ປະ­ໂພກ-ບໍ­ລິ­ໂພກ​ລວມ​ເປັນ​ມູນ​ຄ່າ​ທັງ​ໝົດ 63 ຕື້​ກວ່າ​ກີບ.

ໂອ­ກາດ​ນີ້​ທ່ານ ບຸນ​ຍັງ ວໍ­ລະ​ຈິດ ໄດ້​ໃຫ້​ກຽດ​ໂອ້​ລົມ ແລະ ເນັ້ນ​ໜັກ​ໃຫ້​ອຳ­ນາດ​ການ​ປົກ­ຄອງ​ແຂວງ​ອັດ​ຕະ​ປື ເອົາ ໃຈ​ໃສ່​ໃຫ້​ຮີບ​ຮ້ອນ​ແຈກ​ຢາຍ​ເງິນ​ໃຫ້​ແຕ່​ລະ​ຄອບ­ຄົວ​ທີ່​ຮັບ​ຜົນ​ກະ­ທົບ​ຈາກ​ໄພ­ພິ­ບັດ​ໂດຍ​ໄວ ພ້ອມ​ນີ້​ກໍ່​ຕ້ອງ​ຮັບ­ປະ­ກັນ​ຄວາມ​ປອດ​ໃສ​ທີ​ສຸດ ພະ­ຍາ­ຍາມ​ບໍ່​ໃຫ້​ມີ​ການ​ຕົກ​ລົ່ນ​ເສຍ​ຫາຍ ຮັບ­ປະ­ກັນ​ຖືກ­ຕ້ອງ​ຕາມ​ລະ­ບຽບ ແລະ ວ່ອງ­ໄວ​ກວ່າ​ເກົ່າ ໃຫ້​ນຳ​ໃຊ້​ເຄື່ອງ​ຂອງ​ອຸ­ປະ­ກອນ​ຕ່າງໆ​ທີ່​ແຕ່​ລະ​ພາກ­ສ່ວນ​ທັງ​ພາຍ​ໃນ ແລະ ຕ່າງ­ປະ­ເທດ​ໃຫ້​ແຈກ​ຢາຍ​ແກ່​ປະ​ຊົນ​ໂດຍ​ໄວ ໂດຍ​ສະ­ເພາະ​ແມ່ນ​ເຄື່ອງ​ຂອງ​ຮັບ​ໃຊ້​ໃນ​ຊີ­ວິດ​ປະ­ຈຳ​ວັນ ແລະ ຈຳ­ເປັນ​ທີ​ສຸດ ສຳ­ລັບ​ການ​ປຸກ​ສ້າງ​ເຮືອນ​ພັກ​ເຊົາ​ຊົ່ວ­ຄາວ​ແມ່ນ​ໃຫ້​ລະ­ດົມ​ກຳ­ລັງ​ມະ­ຫາ­ຊົນ ກອງ​ກຳ­ລັງ ແລະ ສະ­ມາ­ຊິກ​ຂອງ​ອົງ​ການ­ຈັດ­ຕັ້ງ​ມະ­ຫາ­ຊົນ​ທົ່ວ​ປະ­ເທດ​ໃຫ້​ເຂົ້າ​ມາ​ຊ່ວຍ​ເປັນ​ກຳ­ລັງ​ໃນ​ການ​ກໍ່­ສ້າງ​ແຕ່​ຕ້ອງ​ມາ​ດ້ວຍ​ຄວາມ​ສະ­ໝັກ​ໃຈ ແລະ ໃຫ້​ເຂົາ­ເຈົ້າ​ຊ່ວຍ​ກຸ້ມ​ຕົນ​ເອງ​ໃນ​ການ​ດຳ­ລົງ​ຊີ­ວິດ​ໃນ​ໄລ­ຍະ​ຢູ່​ເຂດ​ປະ­ສົບ​ໄພ ພະ­ຍາ­ຍາມ​ບໍ່​ໃຫ້​ສິ່ນ​ເປືອງ​ງົບ­ປະ­ມານ​ທີ່​ມາ​ຊ່ວຍ­ເຫຼືອ​ປະ­ຊາ­ຊົນ ເອົາ­ໃຈ ໃສ່​ບັນ­ຫາ​ສຸກ­ຂະ­ພາບ​ຂອງ​ປະ­ຊາ­ຊົນ​ໂດຍ​ລວມ ບໍ່​ສະ­ເພາະ​ແຕ່​ຢູ່​ເມືອງ​ສະ­ໜາມ​ໄຊ ລວມ​ທັງ​ເມືອງ​ອື່ນໆ​ທີ່​ໄດ້​ຮັບ​ຜົນ​ກະ­ທົບ ໂດຍ​ສະ­ເພາະ​ແມ່ນ​ການ​ເກີດ​ພະ­ຍາດ​ຕິດ­ແປດ​ທີ່​ມີ​ຄວາມ​ສ່ຽງ​ໃນ​ການ​ລະ­ບາດ​ໄວ­ວາ ໃຫ້​ລະ­ດົມ​ແພດ​ໝໍ​ພາຍ​ໃນ​ແຂວງ​ກ່ອນ​ຖ້າ​ຍັງ​ບໍ່​ພຽງ­ພໍ​ຈຶ່ງ​ສະ­ເໜີ​ການ​ຊ່ວຍ­ເຫຼືອ​ເພີ່ມ​ເຕີມ​ນຳ​ລັດ­ຖະ­ບານ ແລະ ໃຫ້​ເອົາ­ໃຈ​ໃນ​ກາ​ນາ​ກວດ­ກາ​ຄຸນ​ນະ​ພາບ​ຂອງ​ສະ­ບຽງ​ອາ­ຫານ​ປະ­ເພດ​ຕ່າງໆ​ທີ່​ໄດ້​ຮັບ​ການ​ບໍ­ລິ­ຈາກ​ມາ​ແຕ່​ລະ​ໄລ­ຍະ​ທີ່​ຍັງ​ຄ້າງ​ໄວ້​ໃນ​ສາງ​ຈຳ­ນວນ​ໜຶ່ງ​ເປັນ ຕົ້ນ​ອາ­ຫານ​ແຫ້ງ-ອາ­ຫານ​ສົດ ກ່ອນ​ທີ່​ຈະ​ມີ​ການ­ແຈກ­ຢາຍ ແລະ ປຸງ​ແຕ່ງ​ໃຫ້​ແກ່​ປະ­ຊາ­ຊົນ​ນຳ­ໄປ​ບໍ­ລິ­ໂພກ ໃຫ້​ເອົາ­ໃຈ ໃສ່​ສ້ອມ­ແປງ​ບັນ­ດາ​ຫ້ອງ​ຮຽນ​ທີ່​ໄດ້​ຮັບ​ຄວາມ​ເສຍ​ຫາຍ ແລະ ເປ່​ເພ ໃຫ້​ສຳ­ເລັດ​ໂດຍ​ໄວ ເພື່ອ​ກະ­ກຽມ​ເປີດ​ສົກ­ຮຽນ​ໃໝ່​ໃນ​ຕົ້ນ​ເດືອນ​ກັນ­ຍາ​ທີ່​ຈະ​ມາ​ເຖິງ​ນີ້ ນອກ​ນີ້​ກໍ່​ໃຫ້​ປະ­ກອບ​ອຸ­ປະ­ກອນ​ການ​ຮຽນ​ຄົບ​ຊຸດ​ໃຫ້​ແກ່​ນັກ­ຮຽນ​ທີ່​ມາ​ຈາກ​ເຂດ​ປະ­ສົບ​ໄພ­ພິ­ບັດ​ທີ່​ຍັງ​ຂາດ ເຂີນ​ອຸ­ປະ­ກອນ​ການ​ຮຽນ ລວມ​ທັງ​ຊຸດ​ນັກ­ຮຽນ​ລວມ​ທັງ​ຄູ ອາ­ຈານ​ຜູ້​ທີ່​ໄດ້​ຮັບ​ຜົນ​ກະ­ທົບ​ເຊັ່ນ​ກັນ ເຊິ່ງ​ອຸ­ປະ­ກອນ​ຕ່າງໆ​ເຫຼົ່າ­ນັ້ນ​ຫາກ​ຍັງ​ບໍ່​ໄດ້​ຮັບ​ການ​ຊ່ວຍ­ເຫຼືອ​ຈາກ​ພາກ­ສ່ວນ​ຕ່າງໆ ຫຼື ບໍ່​ພຽງ­ພໍ​ກໍ່​ໃຫ້​ນຳ​ໃຊ້​ງົບ­ປະ­ມານ​ທີ່​ໄດ້​ຮັບ​ຈາກ​ການ​ຊ່ວຍ ເຫຼືອ​ນັ້ນ​ມາ​ຈັດ​ຊຶ້​ໃຫ້​ນັກ­ຮຽນ ແລະ ຄູ​ອາ­ຈານ​ໂດຍ​ໄວ.

   ພ້ອມ​ດຽວ​ກັນ​ນີ້ ທ່ານ ບຸນ​ຍັງ ວໍ­ລະ​ຈິດ ໄດ້​ມອບ​ເງິນ​ຈຳ­ນວນ 1 ຕື້​ກີບ ເພື່ອ​ນຳ­ໄປ​ຊ່ວຍ­ເຫຼືອ​ຜູ້​ທີ່​ປະ­ສົບ​ໄພ​ພິ ບັດ​ທີ່​ເກີດ​ຂຶ້ນ​ຢູ່​ເມືອງ​ສະ­ໜາມ​ໄຊ ແລະ ໄປ​ຢ້ຽມ​ຜູ້​ປະ­ສົບ​ໄພ​ຢູ່​ທີ່​ໂຮງ­ໝໍ​ແຂວງ​ອັດ​ຕະ​ປື ພ້ອມ​ທັງ​ມອບ​ເຄື່ອງ​ຊ່ວຍ­ເຫຼືອ​ໃຫ້​ປະ­ຊາ­ຊົນ​ທີ່​ຖືກ​ຜົນ​ກະ­ທົບ​ທີ່​ຍົກ­ຍ້າຍ​ຈາກ​ປາກ​ຊ່ອງ​ຈຳ­ນວນ 53 ຄອບ­ຄົວ 187 ຄົນ ຢູ່​ທີ່​ໂຮງ­ຮຽນ​ມັດ­ທະ­ຍົມ​ສຶກ​ສາ​ສົມ­ບູນ​ຈັນ­ທາ​ຕື່ມ​ອີກ.

ຂ່າວທີ່ກ່ຽວຂ້ອງ