ຂ່າວຫຼ້າສຸດ

ລາວ-ມຽນມາ ຮັບຮອງເອົາແຜນທີ່ເສັ້ນຊາຍແດນໝາຍເລກ 12

218 20 ສ.ຫ. 2018 ຂ່າວໜ້າ​ໜຶ່ງ

    ກອງ​ປະ­ຊຸມ ຄັ້ງ​ທີ XIII ຄະ­ນະ​ກຳ­ມະ­ການ​ຊາຍ​ແດນ​ລາວ-ມຽນ​ມາ ຂັ້ນ​ສູນ​ກາງ ໄດ້​ຈັດ​ຂຶ້ນ​ໃນ​ລະ­ຫວ່າງ​ວັນ​ທີ 15-16 ສິງ­ຫາ 2108 ທີ່ ແຂວງ​ຫຼວງ​ພະ​ບາງ ຄະ­ນະ​ຜູ້​ແທນ​ຝ່າຍ​ລາວ ນຳ​ໂດຍ​ທ່ານ ແສງ​ເພັດ ຮຸ່ງ​ບຸນ​ຍວງ ຮອງ​ລັດ­ຖະ­ມົນ­ຕີ ກະ­ຊວງ​ການ​ຕ່າງ­ປະ­ເທດ ແຫ່ງ ສປປ ລາວ ແລະ ຄະ­ນະ​ຜູ້​ແທນ​ຝ່າຍ​ມຽນ​ມາ ນຳ​ໂດຍ​ທ່ານ ອູ ມິນ ຕໍ ເລ­ຂາ­ທິ­ການ​ກະ­ຊວງ​ການ​ຕ່າງ­ປະ­ເທດ ແຫ່ງ ສສ ມຽນ​ມາ ພ້ອມ​ດ້ວຍ​ຕົວ​ແທນ​ຈາກ​ຂະ­ແໜງ­ການ ແລະ ແຂວງ​ທີ່​ກ່ຽວ­ຂ້ອງ​ເຂົ້າ​ຮ່ວມ.

    ໃນ​ໂອ­ກາດ​ກ່າວ​ເປີດ​ກອງ​ປະ­ຊຸມ ຫົວ­ໜ້າ​ຄະ­ນະ​ທັງ​ສອງ​ຝ່າຍ​ໄດ້​ຕີ​ລາ­ຄາ​ສູງ ຕໍ່​ການ​ພົວ­ພັນ​ຮ່ວມ​ມື ລະ­ຫວ່າງ​ສອງ ປະ­ເທດ​ລາວ-ມຽນ​ມາ ທີ່​ໄດ້​ມີ​ການ​ຂະ­ຫຍາຍ­ຕົວ​ຂຶ້ນ​ສູ່​ລະ­ດັບ​ສູງ ເຊິ່ງ​ສະ­ແດງ​ອອກ​ໃນ​ການ​ຢ້ຽມ­ຢາມ​ຂອງ​ການ​ນຳ​ຂັ້ນ​ສູງ​ຂອງ​ສອງ​ປະ­ເທດ​ໃນ​ໄລ­ຍະ​ຜ່ານ​ມາ ລວມ​ທັງ​ການ​ຮ່ວມ​ມື​ອັນ​ດີ​ໃນ​ຂົງ­ເຂດ​ວຽກ​ງານ​ຊາຍ​ແດນ ການ​ຂະ­ຫຍາຍ­ຕົວ​ຂອງ​ການ​ພົວ­ພັນ​ຮ່ວມ​ມື​ດັ່ງ­ກ່າວ ບໍ່​ພຽງ​ແຕ່​ຈະ​ສ້າງ​ຜົນ​ປະ­ໂຫຍດ​ທາງ​ດ້ານ​ເສດ­ຖະ­ກິດ​ໃຫ້​ແກ່​ປະ­ຊາ­ຊົນ​ຕາມ​ຊາຍ​ແດນ​ເທົ່າ​ນັ້ນ ແຕ່​ຍັງ​ເປັນ​ການ​ສົ່ງ­ເສີມ​ສັນ­ຕິ­ພາບ ແລະ ຄວາມ​ກ້າວ­ໜ້າ​ຂອງ​ສອງ​ປະ­ເທດ ກໍ່​ຄື ພາກ​ພື້ນ.

    ກອງ​ປະ­ຊຸມ ໄດ້​ຕີ​ລາ­ຄາ​ສູງ​ຕໍ່​ຜົນ­ສຳ­ເລັດ​ໃນ​ການ­ຈັດ­ຕັ້ງ​ປະ­ຕິ­ບັດ​ບົດ​ບັນ­ທຶກ​ກອງ​ປະ­ຊຸມ​ຄັ້ງ​ທີ XII ຂອງ​ຄະ­ນະ​ກຳ­ມະ­ການ​ຊາຍ​ແດນ ລາວ-ມຽນ​ມາ ຂັ້ນ​ສູນ​ກາງ ໃນ​ໜຶ່ງ​ປີ­ຜ່ານ­ມາ ນອກ­ຈາກ​ນີ້ ຍັງ​ໄດ້​ປຶກ­ສາ​ຫາ­ລື​ບັນ­ຫາ​ທີ່​ພົວ­ພັນ​ເຖິງ​ການ​ຮ່ວມ​ມື ລະ­ຫວ່າງ ເຈົ້າ​ໜ້າ­ທີ່​ຊາຍ​ແດນ​ຂອງ​ທັງ​ສອງ​ປະ­ເທດ ເປັນ­ຕົ້ນ ແມ່ນ​ການ​ນຳ​ໃຊ້​ບັດ​ຜ່ານ​ແດນ ດ່ານ​ຊາຍ​ແດນ ການ​ຄ້າ​ຊາຍ​ແດນ ການ​ຄຸ້ມ​ຄອງ ແລະ ກວດ­ກາ​ຫຼັກ​ໝາຍ​ຊາຍ​ແດນ ການ​ສະ­ກັດ​ກັ້ນ​ການ​ຄ້າ­ຂາຍ​ຢາ​ເສບ​ຕິດ ການ​ເດີນ​ເຮືອ ຕາມ​ລຳ​ແມ່­ນ້ຳ​ຂອງ ແລະ ບັນ­ຫາ​ອື່ນໆ.

    ໃນ​ໂອ­ກາດ​ນີ້ ປະ­ທານ​ຄະ­ນະ​ກຳ­ມະ­ການ​ຊາຍ​ແດນ ລາວ-ມຽນ​ມາ ຂັ້ນ​ສູນ​ກາງ ໄດ້​ຕາງ­ໜ້າ​ລັດ­ຖະ­ບານ​ຂອງ​ຕົນ ລົງ​ນາມ​ຮັບ­ຮອງ​ເອົາ​ແຜນ­ທີ່​ເສັ້ນ​ຊາຍ​ແດນ ລາວ-ມຽນ​ມາ ໝາຍ​ເລກ 12 ສະ­ບັບ​ປັບ­ປຸງ​ໃໝ່ ເຊິ່ງ​ແຜນ­ທີ່​ສະ­ບັບ​ດັ່ງ­ກ່າວ ແມ່ນ​ໄດ້​ນຳ​ໃຊ້​ເຕັກ­ນິກ​ທັນ​ສະ­ໄໝ​ທີ່​ມີ​ຄວາມ​ຊັດ​ເຈນ​ສູງ ເພື່ອ​ເປັນ​ເອ­ກະ­ສານ​ຊ້ອນ​ທ້າຍ​ສັນ­ຍາ​ວ່າ​ດ້ວຍ​ເສັ້ນ​ຊາຍ​ແດນ​ຖາ­ວອນ ລະ­ຫວ່າງ​ສອງ​ປະ­ເທດ ສະ­ບັບ​ລົງ​ວັນ​ທີ 11 ມິ­ຖຸ­ນາ 1994.

    ສອງ​ຝ່າຍ​ເຫັນ​ດີ​ເປັນ​ເອ­ກະ​ພາບ​ກັນ​ໃນ​ການ​ຊຸກ­ຍູ້​ໃຫ້​ເຈົ້າ​ໜ້າ­ທີ່​ຊາຍ​ແດນ​ທ້ອງ­ຖິ່ນ​ຂອງ​ຕົນ ເອົາ­ໃຈ­ໃສ່​ເພີ່ມ​ທະ­ວີ​ການ​ຮ່ວມ​ມື ການ​ແລກ­ປ່ຽນ​ຂໍ້​ມູນ​ຂ່າວ­ສານ ໃນ​ການ​ປ້ອງ​ກັນ​ການ​ກໍ່​ອາ​ຊະ​ຍາ​ກຳ​ຂ້າມ​ແດນ ການ​ຄ້າ­ຂາຍ​ຢາ​ເສບ​ຕິດ ແລະ ສິ່ງ​ຜິດ​ກົດ­ໝາຍ​ອື່ນໆ ເພື່ອ​ແນ­ໃສ່​ຮັບ­ປະ­ກັນ​ຄວາມ​ເປັນ​ລະ­ບຽບ​ຮຽບ​ຮ້ອຍ​ຕາມ​ບໍ­ລິ­ເວນ​ຊາຍ​ແດນ ພ້ອມ​ນັ້ນ ກໍ່​ເຫັນ​ດີ​ໃຫ້​ເຈົ້າ​ໜ້າ­ທີ່​ທ້ອງ­ຖິ່ນ ສຶກ​ສາ​ອົບ­ຮົມ​ປະ­ຊາ­ຊົນ​ທີ່​ອາ­ໄສ​ຢູ່​ບໍ­ລິ­ເວນ​ຊາຍ​ແດນ​ຂອງ​ສອງ​ປະ­ເທດ ປະ­ຕິ­ບັດ​ການ​ເຂົ້າ-ອອກ​ເມືອງ ໃຫ້​ຖືກ­ຕ້ອງ​ຕາມ​ລະ­ບຽບ​ກົດ­ໝາຍ​ຂອງ​ສອງ​ປະ­ເທດ.

    ກອງ​ປະ­ຊຸມ​ຄັ້ງ​ນີ້ ໄດ້​ປະ­ກອບ­ສ່ວນ​ອັນ​ສຳ­ຄັນ​ເຂົ້າ​ໃນ​ການ​ເພີ່ມ​ທະ­ວີ​ສາຍ​ພົວ­ພັນ​ມິດ­ຕະ­ພາບ ແລະ ການ​ຮ່ວມ​ມື​ທີ່​ມີ​ມູນ­ເຊື້ອ​ອັນ​ດີ­ງາມ ທັງ​ເປັນ​ການ​ປົກ​ປັກ​ຮັກ­ສາ​ເສັ້ນ​ຊາຍ​ແດນ ຂອງ​ທັງ​ສອງ​ປະ­ເທດ​ໃຫ້​ກາຍ­ເປັນ​ເສັ້ນ​ຊາຍ​ແດນ​ແຫ່ງ​ສັນ­ຕິ­ພາບ ມິດ­ຕະ­ພາບ ແລະ ການ​ຮ່ວມ​ມື​ຍາວ​ນານ.

ຂ່າວທີ່ກ່ຽວຂ້ອງ