ໂຄງການກໍ່ສ້າງທາງລົດໄຟ ລາວ-ຈີນ ຄືບໜ້າຫຼາຍກວ່າ 36%

431 20 ສ.ຫ. 2018 ຂ່າວໜ້າ​ໜຶ່ງ

    ໂຄງ­ການ​ກໍ່­ສ້າງ​ທາງ​ລົດ­ໄຟ ລາວ-ຈີນ ແມ່ນ​ໂຄງ­ການ​ຮ່ວມ​ມື​ລະ­ຫວ່າງ​ລັດ­ຖະ­ບານ ສປປ ລາວ ແລະ ລັດ­ຖະ­ບານ ສປ ຈີນ ເປັນ​ໂຄງ­ການ​ທີ່​ມີ​ຄວາມ​ສຳ­ຄັນ​ດ້ານ​ປະ­ຫວັດ­ສາດ ແລະ ຍຸດ​ທະ​ສາດ​ຂອງ​ລາວ ເຊິ່ງ​ຈະ​ເປັນ​ພື້ນ­ຖານ​ໂຄງ​ລ່າງ​ທາງ​ເສດ­ຖະ­ກິດ​ທີ່​ໜັກ​ແໜ້ນ ແລະ ຍືນ​ຍົງ​ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ຊາດ ກໍ່​ຄື ການ​ປະ­ຕິ­ບັດ​ນະ­ໂຍ­ບາຍ​ຫັນ​ປະ­ເທດ​ຈາກ​ສະ­ຖາ­ນະ​ພາບ​ທີ່​ບໍ່​ມີ​ຊາຍ​ແດນ​ຕິດ​ກັບ​ທະ­ເລ ໃຫ້​ເປັນ​ປະ­ເທດ​ເຊື່ອມ​ຈອດ​ກັບ​ພາກ​ພື້ນ ແລະ ສາ­ກົນ ປັດ­ຈຸ­ບັນ​ໂຄງ­ການ​ດັ່ງ­ກ່າວ​ມີ​ຄວາມ​ຄືບ​ໜ້າ​ຫຼາຍ​ກວ່າ 30%.

    ທ່ານ ລັດ­ຕະ­ນະ­ມະ­ນີ ຄູນ​ນີ​ວົງ ຮອງ​ລັດ­ຖະ­ມົນ­ຕີ​ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ ໄດ້​ລາຍ​ງານ​ຕໍ່​ກອງ​ປະ­ຊຸມ​ສາ­ມັນ​ຄົບ​ຄະ­ນະ​ພັກ​ກະ­ຊວງ ຄັ້ງ​ທີ 12 ສະ­ໄໝ IV (ເປີດ​ກວ້າງ) ຕິດ​ພັນ​ກັບ​ການ​ສະ­ຫຼຸບ​ຕີ​ລາ­ຄາ​ຜັນ​ຂະ­ຫຍາຍ​ບັ້ນ​ດຳ­ເນີນ​ຊີ­ວິດ​ການ­ເມືອງ​ປັບ­ປຸງ​ປົວ­ແປງ​ພັກ ປະ­ຈຳ​ປີ 2017 ໃນ​ວັນ​ທີ 15 ສິງ­ຫາ 2018 ວ່າ: ປັດ­ຈຸ­ບັນ​ໂຄງ­ການ​ກໍ່­ສ້າງ​ທາງ​ລົດ­ໄຟ ລາວ-ຈີນ ແຕ່​ບໍ່​ເຕັນ-ນະ­ຄອນ­ຫຼວງ​ວຽງ​ຈັນ ປະ­ຕິ­ບັດ​ໄດ້ 36,5% ໃນ​ນີ້ ໄດ້​ສຳ­ເລັດ​ການ​ເຈາະ​ອຸ​ໂມງ 62 ອຸ​ໂມງ ສາ­ມາດ​ຊີ​ເຈາະ​ໄດ້ 76.893 ແມັດ ກໍ່­ສ້າງ​ຂົວ 108 ແຫ່ງ ຊີ​ເຈາະ​ເສົາ​ຂົວ​ໄດ້ 180.707 ແມັດ ສະ­ເພາະ​ການ​ຊົດ​ເຊີຍ​ສິ່ງ​ກີດ­ຂວາງ ແມ່ນ​ບັນ­ດາ​ແຂວງ​ໄດ້​ຄົ້ນ­ຄວ້າ​ລາ­ຄາ​ຊົດ​ເຊີຍ​ສິ່ງ​ກີດ­ຂວາງ​ຕາມ 8 ຂັ້ນ​ຕອນ ແລະ ໄດ້​ຖືກ​ຮັບ­ຮອງ​ຈາກ​ສະ­ພາ​ແຂວງ ນະ­ຄອນ­ຫຼວງ ປັດ­ຈຸ­ບັນ​ຢູ່​ໃນ​ຂັ້ນ​ຕອນ​ບໍ­ລິ­ສັດ​ທາງ​ລົດ­ໄຟ ລາວ-ຈີນ ປະ­ກອບ​ເອ­ກະ­ສານ​ໂອນ​ຄ່າ​ຊົດ​ເຊີຍ ງວດ​ທີ 1 ໃຫ້​ແຂວງ ເພື່ອ​ຊຳ­ລະ​ໃຫ້​ຜູ້​ຖືກ​ຜົນ​ກະ­ທົບ.

    ສຳ­ລັບ​ທິດ​ທາງ​ແຜນ­ການ​ໃນ­ຕໍ່­ໜ້າ ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ ຈະ​ສືບ­ຕໍ່​ເອົາ­ໃຈ­ໃສ່​ຕິດ­ຕາມ​ຊຸກ­ຍູ້​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ​ກໍ່­ສ້າງ​ທາງ​ລົດ­ໄຟ​ລາວ-ຈີນ​ໃຫ້​ສຳ­ເລັດ​ຕາມ​ແຜນ­ການ ແລະ ຮັບ­ປະ­ກັນ​ດ້ານ​ຄຸ­ນະ­ພາບ.

ຂ່າວທີ່ກ່ຽວຂ້ອງ