ຮ່ວມກັນພັດທະນາ ລະບົບກວດກາມາດຕະຖານສານເຄມີ ທີ່ເຈືອປົນໃນຜະລິດຕະພັນອາຫານ

179 20 ສ.ຫ. 2018 ຂ່າວໜ້າ​ໜຶ່ງ
ຮ່ວມກັນພັດທະນາ ລະບົບກວດກາມາດຕະຖານສານເຄມີ ທີ່ເຈືອປົນໃນຜະລິດຕະພັນອາຫານ

    ພິ­ທີ​ລົງ​ນາມ​ບົດ​ບັນ­ທຶກ​ຄວາມ​ເຂົ້າ­ໃຈ ການ​ຮ່ວມ​ມື​ພັດ­ທະ­ນາ​ລະ­ບົບ​ການ​ກວດ­ກາ​ມາດ­ຕະ­ຖານ​ສານ​ເຄ​ມີ ທີ່​ເຈື່ອ​ປົນ​ໃນ​ຜະ­ລິດ​ຕະ​ພັນ​ອາ­ຫານ ຢູ່ ສປປ ລາວ ຈັດ​ຂຶ້ນ​ວັນ​ທີ 16 ສິງ­ຫາ 2018 ຢູ່​ໂຮງ­ແຮມ​ດອນ​ຈັນ​ພາ​ເລດ ລະ­ຫວ່າງ​ທ່ານ ວຽງ​ທອງ ວົງ​ທະ­ວິ​ໄລ ຫົວ­ໜ້າ​ກົມ​ມາດ­ຕະ­ຖານ ແລະ ວັດ­ແທກ ທ່ານ ບຸນ​ໂຮມ ພາ­ນຸ​ວົງ ຫົວ­ໜ້າ​ສູນ​ຢັ້ງ­ຢືນ​ມາດ­ຕະ­ຖານ ແລະ ກວດ­ກາ​ຄຸ­ນະ­ພາບ​ແຫ່ງ​ຊາດ ແລະ ທ່ານ ຍານ ເຄີ ໂບ ຜູ້­ອຳ­ນວຍ­ການ​ບໍ­ລິ­ສັດ​ລາວ​ເວ ນຳ​ເຂົ້າ-ສົ່ງ​ອອກ​ຈຳ­ກັດ​ຜູ້​ດຽວ ໂດຍ​ມີ​ທ່ານ ບໍ່​ວຽງ​ຄຳ ວົງ​ດາ­ລາ ລັດ­ຖະ­ມົນ­ຕີ​ກະ­ຊວງ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ການ​ລົງ​ນາມ​ບົດ​ບັນ­ທຶກ​ຄວາມ​ເຂົ້າ­ໃຈ​ຄັ້ງ​ນີ້ ເພື່ອ​ສຶກ​ສາ-ຄົ້ນ­ຄວ້າ​ໃນ​ການ​ສະ­ໜອງ​ຄວາມ​ຕ້ອງ­ການ​ຂອງ​ສັງ­ຄົມ ເພື່ອ​ແກ້​ໄຂ​ປາ­ກົດ­ການ​ຫຍໍ້­ທໍ້ ແລະ ປົກ​ປ້ອງ​ຜູ້​ບໍ­ລິ­ໂພກ ຢູ່ ສປປ ລາວ ໃຫ້​ໄດ້​ຮັບ​ຄຸ­ນະ­ພາບ ແລະ ຖືກ­ຕ້ອງ​ຕາມ​ມາດ­ຕະ­ຖານ​ແຫ່ງ​ຊາດ ແລະ ມາດ­ຕະ­ຖານ​ສາ­ກົນ ທັງ​ປະ­ກອບ­ສ່ວນ​ຜັນ​ຂະ­ຫຍາຍ​ມະ­ຕິ​ກອງ​ປະ­ຊຸມ​ໃຫຍ່ ຄັ້ງ​ທີ X ຂອງ​ພັກ ແລະ ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ 5 ປີ ຄັ້ງ​ທີ VIII (2016-2020) ໃຫ້​ປາ­ກົດ​ຜົນ​ເປັນ​ຈິງ.

    ວຽກ​ງານ​ດັ່ງ­ກ່າວ ຈະ​ໄດ້​ຮ່ວມ​ກັນ​ສຶກ​ສາ-ຄົ້ນ­ຄວ້າ ປະ­ສານ​ສົມ­ທົບ​ກັບ​ບັນ­ດາ​ພາກ­ສ່ວນ​ກ່ຽວ­ຂ້ອງ ແລະ ກະ­ກຽມ​ເງື່ອນ­ໄຂ​ຄື: ສ້າງ​ບັນ­ດາ​ນິ­ຕິ​ກຳ ແລະ ລະ­ບຽບ​ການ ມາດ­ຕະ­ຖານ​ແຫ່ງ​ຊາດ ໂດຍ​ອີງ­ໃສ່​ມາດ­ຕະ­ຖານ​ສາ­ກົນ ໃນ​ການ​ກຳ­ນົດ​ສານ​ເຄ​ມີ ທີ່​ເຈື່ອ​ປົນ​ໃນ​ອາ­ຫານ ໂດຍ​ອີງ​ຕາມ​ຂໍ້​ກຳ­ນົດ​ຂອງ EU ສະ­ບັບ​ເລກ​ທີ 1881/2006 ລົງ​ວັນ​ທີ 19 ພະ­ຈິກ 2006 ແລະ ຂໍ້​ກຳ­ນົດ​ສະ­ບັບ​ເລກ​ທີ 1258/2011 ລົງ​ວັນ​ທີ 2 ພະ­ຈິກ 2011 ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ ແລະ ສ້າງ​ວິ­ຊາ​ການ ໄດ້​ມີ​ການ​ຈັດ​ເຝິກ­ອົບ­ຮົມ​ກ່ຽວ​ກັບ​ວຽກ​ງານ​ດັ່ງ­ກ່າວ ແລະ ເຜີຍ­ແຜ່​ໃຫ້​ຜູ້​ບໍ­ລິ­ໂພກ​ຮັບ​ຊາບ ມີ​ການ​ຈັດ​ຫາ​ອຸ­ປະ­ກອນ ແລະ ຄູ່​ມື​ການ​ກວດ​ສອບ​ເພື່ອ​ຮອງ​ຮັບ​ວຽກ​ງານ​ການ​ກວດ­ກາ ການ​ກວດ­ກາ​ຄຸ­ນະ­ພາບ​ຜະ­ລິດ​ຕະ​ພັນ​ອາ­ຫານ​ທີ່​ຜະ­ລິດ ແລະ ການ​ນຳ​ເຂົ້າ​ຈຳ­ໜ່າຍ​ຢູ່​ຕາມ​ຫ້າງ​ຮ້ານ ນອກ​ນີ້ ຍັງ​ຈະ​ໄດ້​ກວດ​ສອບ​ເຄື່ອນ​ທີ່ ແລະ ມີ​ສາຍ​ດ່ວນ​ເພື່ອ​ຮັບ​ການ​ແຈ້ງ​ຂໍ້​ມູນ​ຈາກ​ປະ­ຊາ­ຊົນ ຜູ້​ຊົມ­ໃຊ້ ຫຼື ຜູ້​ປະ­ກອບ​ການ​ທີ່​ແຈ້ງ​ຂ່າວ​ກ່ຽວ​ກັບ​ຜະ­ລິດ​ຕະ​ພັນ​ອາ­ຫານ​ທີ່​ມີ​ສານ​ທີ່​ເປັນ​ອັນ­ຕະ­ລາຍ​ຕໍ່​ຜູ້​ບໍ­ລິ­ໂພກ ແລະ ບໍ່​ໄດ້​ມາດ­ຕະ­ຖານ​ອີກ​ດ້ວຍ.

ຂ່າວທີ່ກ່ຽວຂ້ອງ