ຂ່າວຫຼ້າສຸດ

ສະພາບຝົນຕົກ ຍັງເປັນອຸປະສັກໃນການຊ່ວຍເຫຼືອ ຜູ້ປະສົບໄພ ແລະ ຄົ້ນຫາຜູ້ສູນຫາຍ

199 20 ສ.ຫ. 2018 ຂ່າວໜ້າ​ໜຶ່ງ

    ເນື່ອງ​ຈາກ​ມີ​ຝົນ­ຕົກ​ໜັກ ໃນ​ໄລ­ຍະ​ຜ່ານ​ມາ ເຮັດ​ໃຫ້​ເສັ້ນ­ທາງ​ຫຼາຍ​ຈຸດ ຖືກ​ນ້ຳ​ຖ້ວມ ແລະ ຖືກ​ຕັດ­ຂາດ ມາ​ຮອດ​ປັດ­ຈຸ­ບັນ ເຖິງ​ວ່າ​ນ້ຳ​ຈະ​ບົກ​ແຫ້ງ​ລົງ​ແດ່​ແລ້ວ​ກໍ​ຕາມ ແຕ່​ລົດ​ທຸກ​ປະ­ເພດ​ຍັງ​ບໍ່​ສາ­ມາດທຽວ​ໄປ​ມາ​ໄດ້ ໂດຍ​ສະ­ເພາະ ແຕ່​ເທດ­ສະ­ບານ​ແຂວງ​ອັດ​ຕະ​ປື ຫາເມືອງ​ສະ­ໜາມ​ໄຊ ແລະ ຈາກ​ສະ­ໜາມ​ໄຊ ສູ່​ຈຸດ​ຕ່າງໆ ໃນ​ເຂດ​ໄພ­ພິ­ບັດ​ແມ່ນ​ຍັງ​ພົບ​ຄວາມ​ຫຍຸ້ງ­ຍາກ​ຫຼາຍ ຖ້າ​ຫາກ​ຝົນ​ສືບ­ຕໍ່​ຕົກ​ອີກ ໃນ​ສອງ​ສາມ​ວັນ​ຂ້າງ​ໜ້າ ກໍ​ຍິ່ງ​ຈະ​ເພີ່ມ​ຄວາມ​ລຳ­ບາກ ໃນ​ການ​ຂົນ­ສົ່ງ​ດ້ານ​ສະ­ບຽງ​ອາ­ຫານ ໄປ​ຊ່ວຍ­ເຫຼືອ​ຜູ້​ປະ­ສົບ​ໄພ ແລະ ການ​ຊອກ​ຄົ້ນ​ຫາ​ຜູ້​ສູນ­ຫາຍຈາກ​ໄພ​ນ້ຳ​ຖ້ວມ.

    ທ່ານ ນາງ ມະ­ນີ​ລາ ໄຊ​ສົມ­ບູນ ຮອງ​ເຈົ້າ­ເມືອງ​ສະ­ໜາມ​ໄຊ ຖະ­ແຫຼງ​ຂ່າວ​ປະ­ຈຳ​ວັນ​ທີ 17 ສິງ­ຫາ 2018 ນີ້​ວ່າ: ປັດ­ຈຸ­ບັນ​ທາງ​ການ​ໄດ້​ເລັ່ງ​ໃສ່ ການ​ກໍ່­ສ້າງ​ເຮືອນ​ພັກ­ຊົ່ວ­ຄາວ ແລະ ຖາ­ວອນ ເພື່ອ​ຮອງ​ຮັບ​ປະ​ຊົນ​ທີ່​ຜູ້​ປະ­ສົບ​ໄພ ໃຫ້​ໄດ້​ເຄື່ອນ​ຍ້າຍ​ອອກ​ຈາກ​ສະ­ຖານ­ທີ່​ຕ່າໆ ໃນ​ເທດ­ສະ­ບານ​ເມືອງ​ສະ­ໜາມ​ໄຊ ເປັນ­ຕົ້ນແມ່ນ​ໂຮງ­ຮຽນ ຫົນ­ທາງ ແລະ ຈຸດ​ສາ­ທາ­ລະ­ນະ​ອື່ນໆ. 

    ແນວ­ໃດ​ກໍ​ຕາມ ການ​ເປີດ​ສົກ­ຮຽນ​ໃໝ່ 2018-2019 ໃກ້​ຈະ​ມາ​ເຖິງ​ແລ້ວ ທາງ​ເມືອງຍັງ​ມີ​ຄວາມ​ຕ້ອງ­ການ​ຄວາມ​ຊ່ວຍ­ເຫຼືອບັນ­ເທົາ​ທຸກຈາກ​ສັງ­ຄົມ ທັງ​ພາຍ ແລະ ຕ່າງ­ປະ­ເທດ ຕື່ມ​ອີກ​ຈຳ­ນວນ​ຫຼາຍ ນອກ­ຈາກ​ເຄື່ອງ​ອຸ­ປະ­ໂພກ-ບໍ­ລິ­ໂພກ​ແລ້ວ ຍັງ​ຕ້ອງ­ການ​ເຄື່ອງ­ນຸ່ງ​ຫົ່ມ ນັກ­ຮຽນ ແລະ ອຸ­ປະ­ກອນ​ການ​ຮຽນ-ການ​ສອນທີ່​ຈຳ­ເປັນ.

    ທ່ານ ພັທ ແສງ​ສຸ​ລີ ເມກ​ເມືອງ​ໄຊ ຮອງ​ເສ­ນາ​ທິ​ການ​ທະ­ຫານ ແຂວງ​ອັດ​ຕະ​ປື ຫົວ­ໜ້າ​ທີມ​ງານ​ຊອກ​ຄົ້ນ​ຜູ້​ສູນ­ຫາຍ ເປີດ­ເຜີຍ​ວ່າ: ສຳ­ລັບ​ການ​ຊອກ​ຄົ້ນ​ຜູ້​ສູນ­ຫາຍ ແມ່ນ​ໄດ້​ຢຸດ­ຕິ​ຊົ່ວ­ຄາວ ເນື່ອງ​ຈາກ​ຍັງ​ມີ​ສະ­ພາບ​ນ້ຳ​ຖ້ວມ​ສູງ ຢູ່​ເຂດ​ໄພ­ພິ­ບັດ ເຊິ່ງ​ທາງ​ກຳ­ລັງ​ພົນ ໄດ້​ດຳ­ເນີນ​ການ​ຂົນ​ຍ້າຍ​ອຸ­ປະ­ກອນ​ທັງ​ໝົດ ເຂົ້າ​ມາ​ທີ່​ຕັ້ງ​ເມືອງ​ສະ­ໜາມ​ໄຊ ເພື່ອ​ລໍ­ຖ້າ​ນ້ຳ​ບົກ​ແຫ້ງ ແລະ ກະ­ກຽມ​ວາງ​ແຜນ​ລົງ­ມື ໃນ​ຮອບ​ໃໝ່.

    ສະ­ນັ້ນ ຈຶ່ງ​ຮຽກ­ຮ້ອງ​ມາ​ຍັງນັກ​ຂ່າວ ທັງ​ພາຍ​ໃນ ແລະ ຕ່າງ­ປະ­ເທດ ລວມ​ທັງ​ພາກ­ສ່ວນ​ຕ່າງໆ ຖ້າ​ບໍ່​ມີ​ພາ­ລະ­ກິດ​ທີ່​ຈຳ­ເປັນ ບໍ່​ຄວນ​ເຂົ້າ​ໄປ​ເຄື່ອນ​ໄຫວ​ວຽກ​ງານ ໃນ​ເຂດ​ດັ່ງ­ກ່າວ ເພາະ​ຢ້ານ​ຈະ​ບໍ່​ມີ​ຄວາມ​ປອດ​ໄພ.

ຂ່າວທີ່ກ່ຽວຂ້ອງ