ຂ່າວຫຼ້າສຸດ

ພະຍາດ​ອະຫິວາ ​ແລະ​ ອີ​ໂບລາ ຜັນ​ແປ​ຢ່າງ​ສັບສົນ​ຢູ່​ໃນ ສປ ກົງ​ໂກ

254 20 ສ.ຫ. 2018 ຂ່າວຕ່າງປະເທດ
ພະຍາດ​ອະຫິວາ ​ແລະ​ ອີ​ໂບລາ ຜັນ​ແປ​ຢ່າງ​ສັບສົນ​ຢູ່​ໃນ ສປ ກົງ​ໂກ

   ເຈົ້າ​ໜ້າ​ທີ່​ສາທາລະນະ​ສຸກ​ຂອງ​ສາທາລະນະ​ລັດ ປະຊາທິປະ​ໄຕ ກົງ​ໂກ (ສປ ກົງ​ໂກ) ​ແຈ້ງ​ໃຫ້​ຮູ້​ເມື່ອ​ວັນ​ທີ 15 ສິງຫາ​ທີ່​ຜ່ານ​ມາ​ວ່າ ປັດຈຸບັນ​ນີ້​ຄົນ​ເຈັບ​ທີ່​ຕິດພະຍາດ​ອະຫິວາ 2.100 ຄົນ ພວມ​ປິ່ນປົວ​ຢູ່​ພາຍ​ໃນ​ປະ​ເທດ​ນີ້.

    ນັບ​ແຕ່​ເດືອນ​ກຸມພາ​ປີ​ນີ້​ເປັນ​ຕົ້ນ​ມາ ພະຍາດ​ອະຫິວາ ​ໄດ້​ເຮັດ​ໃຫ້​ມີ​ຜູ້​ເສຍ​ຊີວິດ​ໄປ​ແລ້ວ 127 ຄົນ ຢູ່​ໃນ ສປ ກົງ​ໂກ. ​ໃນ​ຂະນະ​ດຽວ​ກັນ ສະຫະ​ປະຊາ​ຊາດ ​ໃຫ້​ຮູ້​ວ່າ ມີ 1.351 ຄົນ​ພວມ​ໄດ້​ຮັບ​ການ​ປິ່ນປົວ​ພະຍາດ​ອະຫິວາ ​ແລະ ​ວ່າກ່ອນ​ໜ້າ​ນັ້ນ ​ມີ​ຜູ້​ເສຍ​ຊີວິດ​ດ້ວຍ​ພະຍາດ​ນີ້​ໄປ​ແລ້ວ 22 ຄົນ ຢູ່​ໃນ​ເຂດ ມາຣາດີ ຂອງ​ປະ​ເທດ​ນີ​ເຊ.

    ໄປ​ຄຽງ​ຄູ່​ກັບ​ພະຍາດ​ອະຫິວາ ສປ ກົງ​ໂກ ກໍ​ພວມ​ປະ​ເຊີນ​ກັບ​ພະຍາດ​ອີ​ໂບລາ (Ebola) ​ເປັນ​ເທື່ອ​ທີ 10 (ນັບ​ແຕ່​ປີ 1976 ​ເປັນ​ຕົ້ນ​ມາ) ​ໂດຍ​ໄດ້​ເກີດ​ການລະບາດ ຢູ່​ໃນ​ແຂວງ​ກີ​ວູ​ເໜືອ (ພາກ​ຕາ​ເວັນ​ອອກ​ຂອງ ສປ ກົງ​ໂກ) ຊຶ່ງ​​ເກີດ​ຂຶ້ນ​ພຽງ​ໜຶ່ງ​ອາທິດ​ຫຼັງ​ຈາກ​ທີ່​ໄດ້​ປະກາດ​ຢຸດຕິ​ການລະບາດ​ເທື່ອ​ທີ 9 ທີ່​ໄດ້​ເລີ່​ມ​ເກີດ​ຂຶ້ນ​ມາ​ຕັ້ງ​ແຕ່​ຕົ້ນ​ເດືອນ​ເມສາ​ທີ່​ຜ່ານ​ມາ ຢູ່​ໃນ​ເຂດ​ພາກ​ຕາ​ເວັນ​ອອກ​ສ່ຽງ​ເໜືອ​ຂອງ ສປ ກົງ​ໂກ.

    30 ຄົນ ​ໄດ້​ຮັບ​ການ​ກຳນົດ​ວ່າ​ຕິດ​ໄວຣັສ ອີ​ໂບລາ ​ໃນ​ຂະນະ​ທີ່​ມີ 27 ກໍລະນີ ສົງ​ໃສ​ວ່າ​ຕິດ​ໄວຣັສດັ່ງກ່າວ; ພະນັກງານ​ແພດ 70 ກວ່າ​ຄົນ ຕ້ອງ​ໄດ້​ຖືກ​ກັກ​ບໍລິ​ເວນ​ເພື່ອ​ຕິດຕາມ​ອາການ ຍ້ອນ​ວ່າ​ພວກ​ເຂົາ​ສຳ​ພັດ​ກັບ​ຜູ້​ຕິດພະຍາດ. ມາ​ຮອດ​ເວລາ​ນີ້ ມີ​ຄົນ​ເຈັບ​ທີ່​ຕິດ​ໄວຣັສອີ​ໂບລາ​ເສຍ​ຊີວິດ​ແລ້ວ 41 ຄົນ ​ໃນ​ລະຫວ່າງ​ເກີດ​ການລະບາດ​ເທື່ອ​ທີ 10 ຢູ່​ໃນ ສປ ກົງ​ໂກ.

 

ຂ່າວທີ່ກ່ຽວຂ້ອງ